Taano ta Kahagadan nin Dios na an mga Parasamba Nia Mag-agom Sana nin Kapagtubod?

▪ Kaiba sa Ley nin Dios sa nasyon nin Israel an pagboot na ini dapit sa nakapalibot na mga nasyon: ‘Dai ka makipagbalae sa sainda. Dai mo ipagtao an saimong aking babae sa saindang aking lalaki, dai mo man ipaagom an saindang aking babae sa saindong aking lalaki.’ (Deuteronomio 7:3, 4) Ano an dahelan kan siring na pagbabawal?

An sarong dahelan may koneksion sa banwaan ni Jehova sa kabilogan. Aram ni Jehova na gusto ni Satanas na raoton an banwaan Nia paagi sa pag-impluwensia sa sainda na sumamba sa falsong mga dios. Kaya, nagpatanid an Dios na ‘papasukion kan [mga dai nagtutubod] an saimong aki, asin maglilingkod sinda sa mga putik na dios.’ Bako nanggad marahay an magigin resulta. Kun an nasyon nin Israel masamba sa ibang mga dios, mawawara ninda an pag-oyon asin proteksion nin Dios, na huli kaiyan madali sindang madadaog kan mga kaiwal. Kun siring, paano na maootob an panuga na sa sainda magikan an Mesiyas? Malinaw nanggad, may dahelan si Satanas na akiton an mga Israelita na mag-agom nin dai nagtutubod sa Dios.

An saro pang dahelan may koneksion sa pagmakolog nin Dios sa mga lingkod nia bilang indibiduwal. Aram niang an kaogmahan asin an ikakarahay kan kada saro nakadepende sa pagkaigwa ninda nin haraning relasyon sa saiya bilang saindang Dios. May masarig daw na basehan an patanid ni Jehova manongod sa peligro nin pag-agom nin dai nagtutubod sa saiya? Isip-isipa an halimbawa ni Hadeng Salomon. Aram nia an patanid ni Jehova manongod dian: ‘Papakilingon ninda an saindong puso sa saindang mga dios.’ Huli sa pambihirang kadonongan, tibaad inisip nia na dai na nia kaipuhan an konseho nin Dios o na dai iyan aplikado sa saiya. Binaliwala nia iyan. Ano an resulta? Luway-luway na ‘pinakiling kan saiyang mga agom an saiyang puso sa ibang mga dios.’ Makamomondo nanggad! Nawara mismo ni Salomon an pag-oyon ni Jehova, asin nagkabaranga nanggad an banwaan nia huli sa saiyang pagigin bakong maimbod.—1 Hade 11:2-4, 9-13.

Tibaad mangatanosan an nagkapira na may mga eksepsion. Halimbawa, nagin agom kan Israelitang si Mahalon an Moabitang si Rut, na nagin marahayon na lingkod nin Dios. Pero peligroso an pag-agom nin Moabita. Dai inomaw si Mahalon sa pag-agom nin Moabita; amay siang nagadan, posibleng marhay na bago pa apodon ni Rut si Jehova na saiyang Dios. An tugang ni Mahalon na si Chelion nagin agom an Moabitang si Orpa, na padagos na nagsamba sa ‘saiyang mga dios.’ Sa ibong na lado, nagin agom ni Booz si Rut kan ini lingkod na nin Dios. Sa katunayan, kan huri ibinilang sia kan mga Judio na “perpektong proselito.” Nagin bendisyon ki Rut sagkod Booz an saindang pag-agoman.—Rut 1:4, 5, 15-17; 4:13-17.

Kun siring, madonong daw na ipangatanosan na huli sa halimbawa ni Mahalon asin Rut puede na niatong lapason an konseho ni Jehova na mag-agom sana nin kapagtubod? Kun arog kaiyan an pangangatanosan ta, bako daw na garo man sana sinasabi niato na puede nang gibohon na hanapbuhay an pagsugal huling may parasugal na nanggana nin jackpot?

An Biblia nagsasadol sa mga Kristiano ngonyan na mag-agom sana ‘dian sa Kagurangnan.’ Pinapatanidan kita kaiyan na ‘dai makipagsakal na bakong timbang sa mga dai nagtutubod.’ An konsehong iyan para sa tunay na mga Kristiano na naghahanap nin maaagom. Sa mga may agom na bakong kapagtubod, nagtatao an Biblia nin nakakatabang na konseho kun paano aatubangon sa pinakamarahay na paagi an masakit na situwasyon. (1 Corinto 7:12-16, 39; 2 Corinto 6:14) Ipinapahiling kan gabos na konsehong iyan na gusto nin Dios na Jehova, an Kagtugdas nin pag-agoman, na magin maogma kita bilang mga parasamba nia—may agom man o mayo.