Pakikipag-olay sa Sarong Kagharong
Pinapadusahan daw nin Dios an mga Tawo sa Nagkakalayong Impierno?
NAOOGMA an Mga Saksi ni Jehova na ipakipag-olay sa iba an Biblia. Igwa ka daw nin partikular na tema sa Biblia na iniisip-isip mo? May gusto ka daw na maaraman sa arin man na paniniwala o relihiosong aktibidad kan Mga Saksi ni Jehova? Kun igwa, dai mag-alangan na sabihon iyan sa sunod na may makaolay kang Saksi. Maoogma siang ipakipag-olay iyan sa saimo.
Arog kaini an puedeng mangyari sa pakikipag-olay nin saro sa Mga Saksi ni Jehova sa sarong kagharong. Ipamugtak ta baga na nagduman an Saksing si Mauricio sa harong ni Alejandro.
Papadusahan daw nin Dios an Maraot na mga Tawo?
Mauricio: Naoogma akong mahiling ka giraray Alejandro.
Alejandro: Iyo man ako.
Mauricio: Pigpaparaisip-isip ko kaya an sinabi mo kan huring pagdigdi ko.
Alejandro: Arin man?
Mauricio: Sinabi mo na nabigla ka kan maaraman mong an Mga Saksi ni Jehova dai nagtutubod sa nagkakalayong impierno.
Alejandro: Iyo, nabigla talaga ako. An totoo, dai ko maako na dai kamo nagtutubod dian.
Mauricio: Naoogma ako ta sinabi mo iyan sako. Pirme akong interesadong madangog an punto de vista kan iba. Mantang an mga tawo may dakol asin laen-laen na ideya manongod sa nagkakalayong impierno, puede kong maaraman kun ano an paniniwala mo manongod dian?
Alejandro: Bueno, kaidto pa ako nagtutubod na pagnagadan an maraot na mga tawo mapapaduman sinda sa impierno asin papasakitan sinda duman sagkod lamang.
Mauricio: Lakop an paniniwalang iyan. Hapoton taka Alejandro, nagkaigwa ka na daw nin makamomondong eksperyensia sa buhay?
Alejandro: Iyo. Ginadan si Manay limang taon na an nakaagi.
Mauricio: Namomondo akong madangog ‘yan. Seguro pungawon ka na saiya.
Alejandro: Iyo. Aroaldaw ko siang iniisip.
Mauricio: Narisa ko na may mga tawong makusog an paniniwala sa nagkakalayong impierno huling naapektaran sinda kan mga ginibo kan maraot na mga tawo. Kun sa bagay, gustong mahiling kan inosenteng mga biktima na mapadusahan an mga maraot huli sa mga ginibo kaini.
Alejandro: Iyo talaga! Gusto kong mapadusahan an naggadan sa tugang ko. Grabe an ginibo nia sa pamilya mi.
Mauricio: Normal sanang makamate nin arog kaiyan. Itinotokdo kan Biblia na naaanggot man an Dios kun binibiktima an inosenteng mga tawo—asin nangangako sia na papadusahan nia an mga maraot. Hilingon mo an sinasabi digdi sa Isaias 3:11: ‘Herak man kan maraot na tawo! Magigin maraot sa saiya iyan: huli ta babayadan sia nin bagay [na] ginibo nin saiyang mga kamot.’ Kaya makakasarig kita na papadusahan nin Dios an maraot na mga tawo.
Alejandro: Pero paano iyan mangyayari kun mayo man nin nagkakalayong impierno, arog kan sabi mo?
Mauricio: Magayon na hapot iyan. Sa halipot na pagtaram, an simbag iyo na an mga maraot papadusahan nin Dios nin daing sagkod na pagkalaglag. Isip-isipa an sinasabi kan Biblia digdi sa 2 Tesalonica 1:9. Puedeng pakibasa tabi ini?
Alejandro: Sige. Sabi digdi: ‘Na sinda magtitios nin silot, an daing katapusan na pagkatunaw, na iyo an pakabulag sa lalawgon nin Kagurangnan.’
Mauricio: Kaya nahiling mo Alejandro, mayo nang paglaom an maraot na mga tawo huling daing katapusan na kagadanan an padusa sainda nin Dios. Mayo na sindang oportunidad na mabuhay sa puturo.
Alejandro: Nasabotan ko an sinasabi kan bersikulong ini, pero garo bakong makatanosan iyan. An gabos magagadan. Bako daw na dapat mas magabat an padusa kan mga maraot?
Ano an Hinahagad nin Hustisya?
Mauricio: Nahihiling ko na mahalaga saimo an hustisya.
Alejandro: Iyo, iyo nanggad.
Mauricio: Kaomaw-omaw nanggad iyan. An totoo, an mga tawo igwa nin pakamate kun ano an tama asin sala huling linalang kita nin Dios na igwa kaiyan. Mahalagang marhay man sa Dios an hustisya. Pero kun itinotokdo nin mga namomoon sa relihion na pinapadusahan nin Dios an mga tawo sa nagkakalayong impierno, an totoo ilinaladawan ninda an Dios bilang grabe kabakong makatanosan.
Alejandro: Anong boot mong sabihon?
Mauricio: Ipahiling ko saimo an sarong halimbawa. Pamilyar ka sa estorya sa Biblia manongod ki Adan asin Eva?
Alejandro: Iyo. Sinabihan sinda nin Dios na dai pagkakanon an bunga nin sarong partikular na kahoy, pero dai sinda nagsunod.
Mauricio: Tama. Hilingon ta an pagkasaysay sa Biblia. Yaon iyan sa Genesis 2:16, 17. Sabi sa mga bersikulong ini: ‘Pinagbotan ni Jehova Dios an tawo, na sinabihan: Kumakan ka kan arin man na kahoy sa tatamnan; alagad an kahoy nin pakamidbid kan karahayan asin karatan dai ka magkakan; huli ta sa aldaw na kumakan ka kaiyan, magagadan ka.’ Kaya, anong sinabi nin Dios na mangyayari ki Adan kun kakakanon nia an ipinagbabawal na bunga?
Alejandro: An sabi nia magagadan si Adan.
Mauricio: Tama. Isip-isipa: Huli sa pagkakasala ni Adan, an bilog na rasa nin tawo namundag na parakasala.a Alagad, dawa arog kaiyan an nangyari, may sinabi daw an Dios na ano man manongod sa pagpadusa sa nagkakalayong impierno?
Alejandro: Mayo.
Mauricio: Pero kun si Adan asin Eva namemeligrong mapasakitan sagkod lamang, bako daw na pinatanidan kutana sinda nin Dios? Bako daw na iyan an makatanosan asin mamomoton na gibohon?
Alejandro: Iyo man nanggad.
Mauricio: Isip-isipa man kun ano an sinabi nin Dios ki Adan asin Eva pagkatapos nindang magkasala. Puedeng pakibasa mo tabi an Genesis 3:19?
Alejandro: Okey. Sabi digdi: ‘Sa ganot nin saimong lalawgon makakan ka nin tinapay sagkod na bumalik ka sa daga; huli ta dian ka kinua; huli ta ika kabokabo, sa kabokabo ka man mabalik.’
Mauricio: Salamat. Oyon sa sinabi nin Dios, anong mangyayari ki Adan?
Alejandro: An sabi nia mabalik si Adan sa kabokabo kan daga.
Mauricio: Eksakto. Ngonyan, maoyon ka daw na tanganing makabalik an siisay man sa sarong lugar, dapat na dati na siang hale duman?
Alejandro: Siempre.
Mauricio: Kaya haen si Adan bago sia linalang nin Dios?
Alejandro: Dai sia nag-eeksister.
Mauricio: Tama. Asin maririsa mo na mayong nasambitan na nagkakalayong impierno sa paghukom nin Dios. Magigin makatanosan daw kaya an Dios kun sasabihon nia ki Adan na mabalik sia sa daga na pinagkuanan sa saiya tapos sa nagkakalayong impierno palan talaga sia mapapaduman?
Alejandro: Dai, bako iyan makatanosan.
Ginigibo daw kan Diablo an Kabotan nin Dios?
Mauricio: May saro pang bagay na puede tang pag-isipan manongod sa katokdoan na nagkakalayong impierno.
Alejandro: Ano iyan?
Mauricio: Siisay an parateng sinasabi kan mga tawo na “namamahala” sa nagkakalayong impierno? Siisay daa an nagpapadusa sa mga tawong nasa impierno?
Alejandro: An Diablo.
Mauricio: Pero, an Diablo an pinakamaraot na kaiwal nin Dios. Kun ipinapadara nin Dios an tawo sa nagkakalayong impierno tanganing pasakitan kan Diablo, bako daw na ipinaparisa kaiyan na garo igwa nin pagtitinabangan an Dios asin an Diablo?
Alejandro: Hmm. Dai ko lamang naisip iyan kaidto.
Mauricio: Tanganing iilustrar iyan—saro kang ama, bako?
Alejandro: Iyo, igwa akong aking lalaki. Nagkinse anyos pa sana sia.
Mauricio: Halimbawa nagin rebeldeng marhay an aki mo. Kadakol siang ginigibong maraot na bagay na nagpapamondo saimo. Anong gigibohon mo?
Alejandro: Pagmamaigotan ko siang itanos.
Mauricio: Segurado akong paorootro mong poprobaran na tabangan siang makabalik sa tamang dalan.
Alejandro: Iyo talaga.
Mauricio: Sabihon ta baga na sa ibong kan gabos na paghihingoa mo, habo niang dangogon an sinasabi mo saiya. Sa kahurihurihi, tibaad mamatean mo na mayo ka nang ibang magigibo kundi an padusahan sia.
Alejandro: Iyo.
Mauricio: Pero paano kun maaraman mong iniimpluwensiahan an saimong aki nin sarong maraot na tawo, na tinotokdoan siang gibohon an gabos na maraot na bagay na iyan?
Alejandro: Maaanggot ako sa tawong iyan.
Mauricio: Ngonyan, aapresyaron ko an magigin komento mo digdi. Mantang aram mo na sarong maraot asin imoral na tawo an nag-impluwensia sa aki mo tumang sa saimo, madolok ka daw sa tawong iyan asin hahagadon sa saiya na padusahan an aki mo para sa saimo?
Alejandro: Siempre dai. Taano man ta gigibohon ko iyan?
Mauricio: Kun siring, talaga daw na rasonableng isipon na hahagadon nin Dios ki Satanas na Diablo—an mismong nag-iimpluwensia sa maraot na mga tawo—na padusahan an iyo man sanang mga tawong iyan?
Alejandro: Garo bako man nanggad.
Mauricio: An totoo, kun gusto nin Dios na mapadusahan an mga maraot, taano ta susunodon kan Diablo—na pangenot na kaiwal nin Dios—an mga kagustohan nin Dios asin papasakitan an mga maraot?
Alejandro: Dai ko lamang iyan naisip kaidto!
Tataposon ni Jehova an Gabos na Karatan
Mauricio: Pero, makakaseguro ka. Mahiro an Dios tumang sa dai na mababakleng mga maraot. Tibaad puede tang basahon an sarong huring bersikulo na naglilinaw kan puntong ini. Yaon iyan sa Salmo 37:9. Puede tabing pakibasa kan bersikulong ini?
Alejandro: Okey. An sabi digdi: ‘An mga malignos [“maraot,” An Marahay na Bareta Biblia] anan na roronoton, alagad an mga naghahalat ki Jehova, sinda manononod kan daga.’
Mauricio: Salamat. Narisa mo kun ano an gigibohon ni Jehova Dios sa mga maraot?
Alejandro: Sinabi dian na roronoton sinda nin Dios.
Mauricio: Tama. Sa ibang pagtaram, lalaglagon nia sinda nin permanente. Pero an marahay na mga tawo—‘an mga naghahalat ki Jehova’—magkakamit nin buhay digdi sa daga sagkod lamang. Siempre, puede ining magpalataw nin mga hapot sa isip mo. Halimbawa, taano ta dai na sana papondohon nin Dios an mga tawo sa paggibo nin maraot? Asin kun intension nia talagang padusahan an mga maraot, taano ta dai pa nia ginigibo iyan?
Alejandro: Interesanteng mga hapot iyan.
Mauricio: Tibaad puede kong ipahiling saimo an simbag kan Biblia sa sunod tang pag-oolay.b
Alejandro: O sige.
b Para sa dugang pang impormasyon, hilingon an kapitulo 11 kan librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.