An Kaogmahan daw Nakadepende sa Pag-agom?

Itinotokdo daw kan Biblia na kaipuhan na igwa ka nin agom tanganing magin kontento asin maogma? Sa primero, tibaad garo baga sinusuportaran kan Tataramon nin Dios an siring na ideya. Taano man?

Segun sa pagkasaysay sa Genesis, nahiling nin Dios na “bakong marahay” para sa enot na lalaking si Adan na magdanay na solo. Kaya linalang nin Dios si Eva bilang “kakomplemento” ni Adan. (Genesis 2:​18, NW) An terminong “kakomplemento” nangangahulogan na ginigibo kaiyan an sarong bagay na magin kompleto. Sa bersikulong iyan, tibaad isipon niato na dai magigin kompleto an saro kun dai sia maagom. Saro pa, dakol na pagkasaysay sa Biblia an naglaladawan sa pag-agoman bilang gikanan nin mga bendisyon asin kagayagayahan. Sarong halimbawa kaiyan an estorya ni Rut.

Minsan siring, katuyohan daw talaga kan siring na mga pagkasaysay na itokdo sa sato na an mga Kristiano ngonyan dai magigin maogma, kontento, o kompleto kun dai sindang agom asin mga aki? Bako man. Si Jesu-Cristo an pinakakompleto asin pinakakontentong tawo na nabuhay kasuarin man. Pero, nagdanay siang daing agom sagkod na magadan. Si Jesus, na iyo an pinakamadonong na tawo na nabuhay kasuarin man, an perpekto man na ladawan kan “maogmang Dios,” si Jehova. (1 Timoteo 1:​11, NW; Juan 14:9) Ihinayag ni Jesus kun ano an kaipuhan tanganing magin maogma sa kinaban na ini. (Mateo 5:​1-12) Dai nia nasambitan dian an pag-agom.

Kun siring, may pagkakakontrahan daw an Biblia sa temang ini? Dai man. Kaipuhan na mansayon niato an pag-agoman basado sa katuyohan ni Jehova. Mantang an pag-agoman dinisenyo nia na magin gikanan nin kagayagayahan, kadayupotan, asin karangahan, may panahon na nagin mahalagang marhay man an areglong ini tanganing maotob an nagkapirang aspekto kan saiyang kabotan. Halimbawa, an katuyohan nin Dios para ki Adan asin Eva iyo na ‘magbunga asin magdakol sinda asin [panoon nin tawo] an daga.’ (Genesis 1:28) Kun solo sana si Adan o si Eva, dai maootob an katuyohan na iyan nin Dios. Imbes, kinaipuhan ninda an lambang saro, asin sa partikular na paagi nagin kompleto an saro huli sa saro.

Kaagid kaiyan, may koneksion sa pag-agom asin buhay pampamilya, igwa si Jehova nin espesyal na mga katuyohan sa daganon na nasyon nin Israel. Gusto nia ining magin dakulang nasyon tanganing dai ini madaog kan mga kalaban. Katuyohan man nia na maggikan sa tribo nin Juda an Mesiyas, na masalbar sa maimbod na katawohan sa mga epekto nin kasalan asin kagadanan. (Genesis 49:10) Huli kaini, ibinilang kan maimbod na mga babae sa Israel na sarong espesyal na pribilehio an pagkaigwa nin agom asin mga aki. Sa ibong na lado, ibinilang nindang kasusupgan asin kamondoan an pagigin daing agom asin mga aki.

Pero, kumusta man ngonyan? An mga Kristiano daw na nabubuhay ngonyan sa planetang ini na dakolon nang tawo obligadong mag-agom asin magkaaki bilang pagsunod sa pagboot kaidto nin Dios na ‘panoon an daga’? Dai. (Mateo 19:​10-12) Dai na man kaipuhan na protektaran nin Dios an linahe kan Mesiyas o ingatan an nasyon na paggigikanan kan Paraligtas. Kun siring, ano an dapat na magin pagmansay kan mga Kristiano sa pag-agom asin pagigin daing agom?

An totoo, pareho iyan ikakaladawan na balaog o regalo nin Dios. Siring kan aram nindo, an sarong regalo na tamang-tama sa saro tibaad sa iba bako. An pag-agoman sarong sagradong areglo na puedeng paggikanan nin pagkamoot, pag-ibaiba, asin masarig na pundasyon nin pamilya. Pero, sinasabi man kan Biblia na an mga nag-aaragom sa bakong perpektong kinaban na ini mapapaatubang man sa mga problema, o “kahorasaan sa laman.” Kun dapit sa pagigin daing agom, dai iyan minamansay ni Jehova na dahilan nin kasusupgan o nin kamondoan. Imbes, sinasabi sa Biblia na may mga bentaha iyan kun ikokomparar sa pagigin may agom.​—1 Corinto 7:​28, 32-35.

Kaya an Biblia igwa nin timbang na pagmansay sa pagigin may agom asin pagigin daing agom. Bilang Kagtugdas nin pag-agoman asin pamilya, gusto ni Jehova na an gabos niang lingkod magin maogma asin kontento, baga man sinda daing agom o may agom.