Hapot Hali sa mga Parabasa

Taano ta nagin isyu para sa mga kalaban ni Jesus an paghugas nin kamot?

Saro sana ini sa dakul na isyung ibinabatikos kan mga kalaban ni Jesus sa saiya asin sa mga disipulo niya tanganing hanapan sinda nin sala. Kaiba sa Katugunan ni Moises an nagkapirang pagbuot sa kalinigan sa seremonyal na paagi kun dapit sa mga bagay na arog kan mga ilinuluwas kan hawak, leproso, asin mga bangkay nin tawo saka hayop. Nagtao man iyan nin mga instruksiyon kun paano mahahali an pagigin maati. Magigibo ini paagi sa pag-atang, paghugas o paglaba, asin pagwirik.—Lev., kap. 11-15; Bil., kap. 19.

Ginibuhan nin sobra kadetalyadong paliwanag kan Judiong mga rabbi an lambang detalye kan mga katugunan na ini. Sarong reperensiya an nagsabi na an kada bagay na nakakapaati maagi “sa pag-usisa kun sa anong mga kamugtakan iyan makukua, kun paano saka sagkod sain iyan makakaulakit sa iba, anong mga kasangkapan o bagay an puwedeng magin maati saka dai magigin maati, asin ultimo, anong mga paagi saka ritwal an kaipuhan para magin malinig.”

Hinapot si Jesus kan saiyang mga kalaban: ‘Tadaw ta dai sinusunod kan mga disipulo mo an mga katukduan na hali pa sa satong mga ginikanan, kundi minakakan sindang maati an mga kamot?’ (Mar. 7:5, BPVa) Dai sinasabi kan mga kalaban ni Jesus na maraot sa salud kan mga disipulo niya an pagkakan na maati an kamot. Kundi, ipinagbubuot sa sainda kan mga rabbi na bubuan nin tubig an saindang kamot bago magkakan bilang sarong ritwal. Sinabi pa kan reperensiya: “Pinagdedebatehan man kun anong lalagan an gagamiton sa pagbubo, anong klaseng tubig an angay na gamiton, siisay an dapat na magbubo, asin kun sagkod sain na parte kan kamot an dapat na mabasa.”

Simple sana an nagin reaksiyon ni Jesus sa gabos na katugunan na ini na gibo nin tawo. Sinabi niya sa Judiong mga lider nin relihiyon kan inot na siglo: ‘Tama nanggad an sinabi ni propeta Isaias dapit sa saindo mga parasagin-sagin kan isinurat niya ini: “Inuumaw ako kan mga tawong ini kan saindang nguso, alagad harayo sako [ki Jehova] an saindang puso. An pagsamba ninda sako mayo nin halaga, huli ta an itinutukdo ninda bilang doktrina, mga pagbuot nin tawo sana!” Nagsabi pa si Jesus, “Isinisikwal nindo an tugon nin Diyos asin kinukuyog an mga katukduan nin mga tawo.”’—Mar. 7:6-8, BPV.