Aram Mo Daw?

Paano nagdanay na kalmadong marhay an disipulong si Esteban mantang pinepersegir?

NASA atubangan si Esteban nin sarong grupo nin anggot na mga lalaki. Bilang miyembro kan pinakahalangkaw na korte sa Israel, an Sanhedrin, an 71 hukom na idto kabilang sa pinakamaimpluwensiyang mga lalaki sa nasyon. Tinipon sinda kan Halangkaw na Saserdoteng si Caifas na iyo an nanginot sa korte kan sentensiyahan si Jesus nin kagadanan mga pirang bulan na an nakaagi. (Mat. 26:57, 59; Gibo 6:8-12) Mantang sunod-sunod sindang nag-aatubang nin mga putikon na testigo, may narisa sindang makangangalas ki Esteban—an lalawgon niya “garo lalawgon nin anghel.”—Gibo 6:13-15.

Paano nagibo ni Esteban na magdanay na kalmado sa siring na nakakatakot na sitwasyon? Bago puwersahan na darahon sa Sanhedrin, sibot-sibot si Esteban sa saiyang ministeryo sa paggiya kan makusog na puwersa kan espiritu nin Diyos. (Gibo 6:3-7) Kan binibista siya, an espiritu man sanang iyan an naghihiro sa saiya bilang pararanga asin parapagirumdom. (Juan 14:16, nota sa ibaba) Mantang si Esteban pusuan na nagdedepensa, na nakarekord sa Gibo kapitulo 7, ipinagirumdom sa saiya kan banal na espiritu an mga 20 o labi pang teksto sa Hebreong Kasuratan. (Juan 14:26) Asin urog pang napakusog an pagtubod ni Esteban kan bisyon na diyan nahiling niya si Jesus na nasa tuo nin Diyos.—Gibo 7:54-56, 59, 60.

Pag-abot nin panahon, tibaad mapaatubang kita sa mga huma asin persekusyon. (Juan 15:20) Paagi sa regular na pagbasa asin paghurop-hurop sa Tataramon nin Diyos asin lubos na pagpartisipar sa ministeryo, tinutugutan niyatong maghiro sa satong buhay an espiritu ni Jehova. Magkakaigwa man kita nin kusog tanganing matagalan an pagkontra mantang pinapagdanay an satong panglaog na katuninungan.—1 Ped. 4:12-14.