Puon sa bulan na ini, dai na itatampok sa pagtiripon sa tahaw kan semana an tulong sampol na presentasyon. Imbes, an Workbook sa Pagtiripon Mapadapit sa Pamumuhay Asin Ministeryo magkakaigwa nin sampol na pakikipag-ulay na may pambukas na hapot, teksto, asin hapot na pag-uulayan sa masunod para sa pagdalaw liwat. Saro sanang video nin sampol na pakikipag-ulay an ipi-play kada semana. Puwedeng pumili an kada parahayag kun arin na publikasyon sa satong Toolbox sa Pagtutukdo an gagamiton asin kun nuarin iyan iiintrodusir—sa inot na pagdalaw o sa pagdalaw liwat. Itatampok man sa workbook an duwang sampol na pakikipag-ulay para sa mga pagdalaw liwat. Paagi kaini, mas makakapagpokus kita sa satong pasuhan na matukduan “an gabos na igwang pusong nasa tamang kamugtakan para sa buhay na daing katapusan.”—Gi 13:48.
Asignasyon nin mga Estudyante: Apuwera sana kun may ibang instruksiyon, dapat na idemonstrar kan mga estudyante an sampol na pakikipag-ulay.