Dawa Masusupgon, Nagin Misyonera Ako

Namundag ako kan 1951 sa Vienna, Austria, sa sarong pamilyang Katoliko. Masusupgon ako, pero nagtutubod ako sa Diyos saka parating namimibi. Kan nuwebe anyos ako, nagpuon na makipag-adal si Tatay sa Mga Saksi ni Jehova; dai nahaloy, nakipag-adal na man kaiba niya si Nanay.

Dai nahaloy, nagin parte kami kan Döbling Congregation sa Vienna. Dakul kaming ginigibong magkairibanan bilang pamilya. Binabasa saka pinag-aadalan mi an Bibliya, nag-aatender sa mga pagtiripon kan kongregasyon, asin nagboboluntaryo sa mga asembleya. Puon kan mga panahon na idto, tinabangan ako ni Tatay na magkaigwa nin hararom na pagkamuot ki Jehova. Sa katunayan, ipinapamibi ni Tatay na magin payunir kami kan sakong tugang na babayi. Pero kan panahon na idto bako iyan an gusto kong gibuhon.

NAGPUON NA MAGLINGKOD NIN BILOG NA PANAHON

Nabawtismuhan ako kan 1965 sa edad na 14. Pero nasakitan akong magdulok sa mga dai ko bisto sa ministeryo. Nasakitan man ako ta hababa an paghiling ko sa sadiri ko saka gustong-gusto kong akuon ako kan mga kapwa ko hoben. Kaya dai nahaloy pakapabawtismo ko, nagpuon akong makiiba-iba sa mga bakong lingkod ni Jehova. Dawa ngani gustong-gusto ko sindang kaiba-iba, riniribok man ako kan konsiyensiya ko ta an parati kong mga kaibanan mga bakong Saksi. Pero mayo ako kan kusog para magbago. Ano an nakatabang sako?

Kan mga panahon na iyan, nag-asosyar sa kongregasyon mi an 16 anyos na sister na si Dorothée. Napahanga ako kan kaigutan niya sa pagharong-harong. Medyo mas matua ako saiya nin dikit, pero bako akong gayong aktibo sa ministeryo. Naisip ko: ‘Saksi an mga magurang ko pero si Dorothée bakong Saksi an pamilya. Dawa ngani nakaistar siya kaiba kan saiyang ina na may hilang, pirmi siyang nasa ministeryo!’ Nakadagka sako an halimbawa niya na gumibo nin urog pa para ki Jehova. Dai nahaloy pagkatapos kaiyan, nagin magkapartner kami ni Dorothée sa pagpapayunir. Inot, nag-auxiliary payunir kami, na kaidto an apod vacation pioneer, dangan kan huri, naglingkod kaming magkaibanan bilang mga regular payunir. Nakakaulakit an entusiyasmo ni Dorothée. Tinabangan niya akong makapuon nin inot kong tinutukduan sa Bibliya. Sa paglihis nin panahon, nagin mas madali na sa sakong magdulok sa mga tawo sa saindang harong, sa tinampo, asin sa iba pang mga sitwasyon.

Kan inot na taon ko bilang regular payunir, nag-abot sa kongregasyon mi an brother na si Heinz na taga Austria. Nanudan niya an katotoohan sa Canada kan magbisita siya sa tugang niyang lalaki na sarong Saksi. Iinasignar si Heinz sa kongregasyon mi sa Vienna bilang espesyal payunir. Sa primero pa lang, nagustuhan ko na siya. Pero gusto niyang magin misyonero, kaso mayo iyan sa plano ko. Kaya kan inot, itinago ko an namamatian ko para sa saiya. Pero pag-abot nin panahon, nagpuon kaming mag-date ni Heinz, nagpakasal kami, asin magkaibanan na nagpayunir sa Austria.

AN PASUHAN NA MAGIN MISYONERO

Parating iniistorya sako ni Heinz na mawot niyang magin misyonero. Dawa ngani nungka niya man akong pinirit, hinahapot niya ako nin nakakadagkang mga hapot arog kan, “Tutal mayo man kitang aki, puwede daw kitang gumibo nin urog pa sa paglilingkod ki Jehova?” Dahil masusupgon ako, natatakot akong magin misyonera. Totoo na nagpayunir ako, pero an ideya na magin misyonera garo baga dai ko iyan kaya. Alagad, padagos akong mapasensiyang dinagka ni Heinz na pag-isipan an pasuhan na iyan. Dinagka niya man ako na mas magpokus sa pagtabang sa mga tawo kisa sa pagparaisip manungod sa sadiri ko. Talagang nakatabang sako an sadol niya.

Luway-luway akong nagkaigwa kan pagmawot na maglingkod bilang misyonera, kaya nag-aplay kami sa Gilead School. Pero sinabi kan branch servant na pauswagon ko nguna an kasanayan ko sa Ingles. Pakalihis nin tulong taon na paghihinguwang magibo iyan, nasurpresa kami kan makaresibi kami nin asignasyon na maglingkod sa sarong kongregasyon na Yugoslavian sa Salzburg, Austria. Naglingkod kami sa teritoryong iyan sa suminunod na pitong taon, kaiba na diyan an sarong taon sa pansirkitong gibuhon. Masakit an lengguwaheng Serbo-Croatian, alagad nagkaigwa kami nin dakul na tinutukduan sa Bibliya.

Dangan kan 1979 sinabi samo na “magbakasyon” sa Bulgaria. Ipinagbabawal diyan kaidto an gibuhon na paghuhulit. Kaya dai man talaga kami naghulit sa “bakasyon” na iyan. Pero pasekreto kaming nagdara sa nasyon na iyan nin pinasadit na mga literatura para sa limang sister na nakaistar sa Sofia, an kabiserang siyudad. Takuton ako, pero tinabangan ako ni Jehova sa peligroso pero nakakaugmang asignasyon na iyan. Huli sa nahiling kong kusog nin buot kan mga sister na idto saka sa kaugmahan ninda sa ibong kan peligrong mapreso, nagkaigwa ako nin kumpiyansa na gibuhon an pinakamakakaya ko sa ano man na ipagibo sako kan organisasyon ni Jehova.

Kan panahon man na iyan, nag-aplay giraray kami sa Gilead, asin sa pagkakataon na ini, inako kami. Paghuna mi maklase kami sa lengguwaheng Ingles sa Estados Unidos. Pero kan Nobyembre 1981, nagpuon an Gilead Extension School sa sangang opisina sa Wiesbaden, Germany. Kaya nakapagklase kami sa lengguwaheng German na mas madali sako na masabutan. Sain kami iaasignar?

PAGLILINGKOD SA NASYON NA MAY GIYERA

Iinasignar kami sa Kenya! Pero, hinapot kami kan sangang opisina sa Kenya kun buot ming maglingkod sa kataid na nasyon na Uganda. Labing sampulong taon bago kaiyan, buminagsak an gobyerno nin Uganda huli sa kudeta kan militar sa panginginot ni Heneral Idi Amin. Sa suminurunod na taon, dahil sa saiyang diktador na pamamahala rinibo an nagadan asin nagkawsa nin grabeng kariribukan sa minilyon na tawo. Dangan kan 1979, buminagsak giraray an gobyerno nin Uganda. Siyempre, medyo nagduwa-duwa akong magbalyo sa nasyon na iyan dahil may giyera. Pero inandam kami kan Gilead na magtiwala ki Jehova, kaya inako mi an asignasyon.

Grabe an kariribukan sa Uganda. Arog kaini an pagkaladawan diyan ni Heinz sa 2010 Yearbook: “Dakul na serbisyo, . . . arog kan suplay nin tubig asin komunikasyon, an naapektaran na marhay. . . . Komun an baradilan saka harabunan, lalo na sa banggi. . . . An gabos nasa harong lang, naglalaom—asin sa parati namimibi—na malihis an banggi na dai sinda lalaugon nin siisay man na may maraot na intensiyon.” Sa ibong kan mga kadipisilan na ini, dai nanggad nagluya an espirituwalidad kan mga tugang duman!

Kan 1982, nag-abot kami ni Heinz sa Kampala, an kabisera kan Uganda. Kan inot na limang bulan, nag-istar kami sa harong ni Sam asin Christina Waiswa kaiba an saindang limang aki asin apat na paryente. Sa parati sarong beses lang sa sarong aldaw nagkakakan si Brother asin Sister Waiswa saka an saindang pamilya, kaya talagang kahanga-hanga an pagigin mapagpadagos ninda. Durante kan pag-istar mi sa pamilyang Waiswa, nakanuod kami ni Heinz nin dakul na praktikal na bagay na nakatabang samo sa buhay mi bilang misyonero. Halimbawa, nakanuod kami kun paano makatipid nin tubig paagi sa pagkarigos gamit an pira sanang litro nin tubig asin paggamit kan pinagkarigusan bilang pambubo sa inodoro. Kan 1983, naglipat kami ni Heinz sa sadiri ming harong sa sarong mas ligtas na lugar sa Kampala.

Nagustuhan mi talaga an ministeryo. Nagigirumduman ko na may bulan kaidto na nakapasakamot kami nin labing 4,000 na magasin! Pero an pinakanagustuhan mi talaga iyo an mga tawo. May paggalang sinda sa Diyos saka gusto nindang makipag-ulay manungod sa Bibliya. Sa parati, kada saro samo ni Heinz igwa nin 10 sagkod sa 15 tinutukduan sa Bibliya. Asin dakul kaming nanudan sa mga tinutukduan mi. Halimbawa, naapresyar mi an pagigin positibo ninda mantang naglalakaw sinda pasiring asin hali sa mga pagtiripon kada semana—nungka sindang nagreklamo asin pirming nakangirit.

Kan 1985 asin 1986, nagkaigwa nin duwa pang ralaban an militar sa Uganda. Parati kaming nakakahiling nin mga aking suldados na armado nin mga riple asin nakapuwesto sa mga checkpoint. Kan panahon na iyan, namimibi kami na tawan kami nin kadunungan asin kalmadong puso mantang naghahanap kami nin mga interesado sa ministeryo. Asin sinimbag ni Jehova an samong mga pamibi. Sa parati dai na kami nakakamati nin takot pag nakanumpong na kami nin sarong interesado sa mensahe kan Kahadian.

Gustong-gusto mi man an pagpapatotoo sa mga dayuhan. Halimbawa, nanumpungan asin nagin Bible study mi si Murat asin Dilbar Ibatullin, sarong mag-agom na taga Tatarstan (Central Russia). Si Murat sarong doktor. Nabawtismuhan sinda asin maimbod na naglilingkod ki Jehova sagkod ngunyan. Pag-abot nin panahon, nabisto ko si Tatjana Vileyska, sarong babayi na haling Ukraine na nagpaplano kaidtong maghugot. Kan mabawtismuhan na si Tatjana, nagbalik siya sa Ukraine asin kan huri naglingkod bilang paratradusir kan satong mga publikasyon.a

BAGONG MGA KADIPISILAN

Kan 1991 mantang nagbabakasyon kami ni Heinz sa Austria, kinontak kami kan lokal na sangang opisina asin ipinaaram samo an manungod sa bago ming asignasyon: sa Bulgaria. Pagkatapos na bumagsak an komunismo sa Sirangan na Europa, nagin legal na an gibuhon kan Mga Saksi ni Jehova sa Bulgaria. Arog kan iinistorya ko kasubago, pasekreto kami kaidto ni Heinz na nagdara nin mga literatura sa nasyon na iyan kan ipinagbabawal pa an gibuhon diyan. Pero ngunyan pinapaduman na kami para talagang maghulit.

Sinabi samo na dai magbalik sa Uganda. Kaya dai na kami nakabalik sa samong missionary home para mag-impake saka dai na man kami nakapaaram sa mga amigo mi. Imbes, nagduman kami sa Bethel sa Germany, pinasubli nin awto, asin nagbiyahe pasiring sa Bulgaria. Iinasignar kami sa sarong grupo na igwa nin mga 20 parahayag sa Sofia.

Napaatubang kami sa bagong mga kadipisilan sa Bulgaria. An inot, dai kami tatao kan lengguwahe. Apuwera kaiyan, duwa sanang publikasyon an igwa sa lengguwaheng Bulgarian—an mga librong An Katotoohan na Minagiya Pasiring sa Buhay na Daing Sagkod asin An Sakuyang Libro nin mga Istorya sa Bibliya. Asin masakit makapuon nin mga pag-adal sa Bibliya. Sa ibong kan mga kadipisilan na iyan, nag-uuswag an samong sadit pero maigot na grupo nin mga Saksi. Narisa iyan kan Orthodox Church, asin diyan na talaga nagpuon an mga problema.

Kan 1994, hinalian nin rehistro an Mga Saksi asin ibinilang na garo ipinagbabawal na sekta. Inaresto an nagkapirang tugang. Nagpalakop an media nin marauton na mga kaputikan manungod sa sato, na sinasabing an Mga Saksi ni Jehova daa bako lang mga paragadan nin mga aki kundi kinukumbinsir man an iba pang mga Saksi na maghugot. Dahil kaiyan, nasakitan kami ni Heinz na maghulit. Sa parati nakakanumpong kami nin agresibong mga tawo na kinukurahawan kami, nag-aapod nin pulis, asin pigdadaklag pa ngani kami nin kun anu-ano. Imposibleng mailaog sa nasyon an mga literatura, asin nagin dipisilon man an pag-arkila nin mga edipisyo para sa mga pagtiripon. Pinapundo pa ngani kan mga pulis an saro sa mga kumbensiyon mi. Dai kami sanay ni Heinz sa arog kaiyan na sitwasyon na angguton samo an mga tawo. Ibang-iba nanggad iyan sa kinatudan mi sa Uganda na an mga tawo interesado saka mainamigo! Ano an nakatabang samo na maka-adjust sa pagbabagong iyan?

An pakikiiba-iba sa mga tugang nagtao sa samo nin kaugmahan. Maugma sinda na nanumpungan ninda an katotoohan asin naapresyar ninda an pagtabang mi sa sainda. An gabos ugos sa kada saro saka nagtitinarabangan. Nanudan mi sa mga eksperyensiyang iyan na puwede kaming magin maugma sa ano man na asignasyon kun padagos kaming mapokus sa mga tawo imbes na sa mga kadipisilan.

Pero pag-abot nin panahon, nagrahay an mga kamugtakan. Kan 1998, nairehistro giraray an satong organisasyon, asin dai nahaloy dakul na publikasyon an itrinadusir sa Bulgarian. Dangan kan 2004, pigdedikar an bagong mga pasilidad kan sangang opisina. Sa ngunyan, igwa na nin 57 kongregasyon sa Bulgaria asin 2,953 na parahayag. Kan nakaaging taon nin paglilingkod, 6,475 an nag-atender sa Memoryal. Kun kaidto limang sister sana an parahayag sa Sofia, ngunyan siyam na an kongregasyon! Talagang nahiling ming “an dikit [nagin] sangribo.”—Isa. 60:22.

PAG-ATUBANG SA PERSONAL NA MGA KADIPISILAN

Nagkaigwa ako nin mga hilang. Sa naglihis na mga taon, may mga nagtubong tumor sa hawak ko. An saro kaiyan nasa hutok. Kaya nagpa-radiation therapy ako saka 12 oras na inoperaran sa India tanganing mahali an kadaklan na parte kan tumor. Pagkatapos kan operasyon, nagparahay-rahay ako sa sangang opisina sa India, dangan nagbalik na kami sa asignasyon mi sa Bulgaria.

Nagkaigwa man si Heinz nin sarong bihira asin namamanang hilang na inaapod na Huntington’s disease. Nasakitan siyang maglakaw, magtaram, asin kontrulon an paghiro kan saiyang hawak. Mantang naglalala an hilang niya, nagigin mas lalo man siyang nakadepende sa sako. Kun minsan haros dai ko na kaya saka pigpaparaisip ko kun paano na kami sa masurunod. Alagad, sarong hoben na brother na an pangaran Bobi an parating inaagda si Heinz na magpartner sinda sa ministeryo. Dai ikinakasupog ni Bobi an pagtaram ni Heinz o an daing kontrol na paghiro kan hawak niya. Pirmi kong maaasahan si Bobi sa mga panahon na dai ko maaalalayan si Heinz. Dawa ngani nagdesisyon kami ni Heinz na dai na mag-aki sa sistemang ini, pagmati mi itinao samo ni Jehova si Bobi para magin aki mi!—Mar. 10:29, 30.

Nagkakanser man si Heinz. Nakakamundo, nagadan an namumutan kong agom kan 2015. Nasakitan akong marhay ta si Heinz kaya an pirming nagtatabang sako na dai magparahadit. Dai ako makapaniwala na mayo na siya. Pero sa isip ko, buhay na buhay siya! (Luc. 20:38) Sa kada aldaw, parati kong nagigirumduman an mabuot na mga sinasabi niya saka an marahay na mga sadol niya sako. Nagpapasalamat nanggad ako sa mga taon na magkaibanan kaming maimbod na naglingkod.

NAGPAPASALAMAT SA TABANG NI JEHOVA

Talagang tinabangan ako ni Jehova sa gabos na kadipisilan na inagihan ko. Asin tinabangan niya man ako na mapaglabanan an pagkamasusupgon ko asin magin sarong misyonera na nakapokus sa mga tawo. (2 Tim. 1:7) Salamat ki Jehova dahil sa ngunyan ako saka an nguhod kong tugang na babayi nasa bilog na panahon na paglilingkod. Sa ngunyan, siya saka an agom niya naglilingkod sa sarong sirkito na Serbian an lengguwahe sa Europa. Nasimbag na an mga pamibi ni Tatay kaidto!

Nagtatao sako nin panglaog na katuninungan an personal na pag-adal ko nin Bibliya. Sa masakit na mga panahon, nanudan kong “mas udok” na mamibi, arog kan ginibo ni Jesus. (Luc. 22:44) Saro sa mga simbag sa mga pamibi ko an ipinapahiling na pagkamuot asin kabuutan kan mga amigo ko sa samong kongregasyon sa Nadezhda, Sofia. Inaagda ninda akong makaibanan sinda asin parati nindang ipinapahayag an apresasyon ninda sako, na talagang nakakapaugma sakuya.

Parati kong hinuhurop-hurop an pagkabuhay liwat. Naiimahinar ko si Nanay saka si Tatay na nasa atubangan kan harong mi, hoben na giraray arog kaidto kan kasalon sinda. An tugang ko man nagluluto. Tapos si Heinz nakatindog kataid kan kabayo niya. Pag iniisip-isip ko an mga arog kaiyan, nahahali an negatibo kong mga namamatian saka napapano an sakong puso nin pasasalamat ki Jehova.

Mantang iniisip-isip ko an sakong buhay saka an mga mangyayari sa maabot, bilog na puso akong minauyon sa sinabi ni David na mababasa sa Salmo 27:13, 14: “Hain na daw kuta ako ngunyan kun mayo ako nin pagtubod na mahihiling ko an karahayan ni Jehova sa daga kan mga buhay? Maglaom ka ki Jehova; kusugi an buot mo asin magpakakusog ka. Iyo, maglaom ka ki Jehova.”