1 Imilandu
10 Awe abaPelishiti+ baile ku nkondo ku kulwa na bena Israele; kabili abena Israele bafulumwike abaPelishiti, kabili baile balebepaya mu Lupili lwa Gilboa.+ 2 Kabili abaPelishiti bali mupepi nga nshi kuli Shauli na bana bakwe; kabili abaPelishiti baipeye Yonatani+ na Abinadabu+ na Malkishua,+ abana abaume aba kwa Shauli.+ 3 Awe ubulwi bwakoseele Shauli; kabili abalelasa imifwi basukile bamusanga, kabili abalepoosa imifwi balimucenene.+ 4 E lyo Shauli aebele uwalesenda ifyanso fyakwe+ ati: “Somona ulupanga+ lobe no kundasa, pa kuti aba bantu abashasembululwa+ beisa no kunsaalula.”+ Lelo uwalesenda ifyanso fyakwe alikeene,+ pantu ali no mwenso nga nshi. E ico Shauli abuulile ulupanga no kuwilapo.+ 5 Ilyo uwalesenda ifyanso fyakwe amwene ukuti Shauli afwa, e lyo na o awilile pa lupanga no kufwa afwa.+ 6 E fyo Shauli na bana bakwe abaume batatu bafwile,+ kabili bonse aba mu ng’anda yakwe bafwilile pamo. 7 Ilyo abena Israele bonse abali mu mpanga yabatama bamwene ukuti abashilika bafulumuka no kuti Shauli na bana bakwe abaume nabafwa, e lyo batendeke ukufuma mu misumba yabo no kufulumuka;+ na pa numa abaPelishiti balishile no kutendeka ukwikalamo.
8 Nomba ubushiku bwakonkelepo, ilyo abaPelishiti baishile ku kusenda+ ifya bantu baipeye, basangile Shauli na bana bakwe nabafwa pa Lupili lwa Gilboa.+ 9 Kabili balimufuulile no kumuputula umutwe+ no kusenda ifya kufwala fyakwe ifya bulwi no kufituma mu calo conse ica baPelishiti, pa kuti beshibishe+ utulubi+ twabo na bantu. 10 Awe basukile babika ifya kufwala fyakwe ifya bulwi mu ng’anda ya kwa lesa wabo,+ kabili bapampamine icipanga cakwe ku ng’anda ya kwa Dagone.+
11 Kabili bonse abena Yabeshe+ mu Gileadi balyumfwile fyonse ifyo abaPelishiti bacitile kuli Shauli.+ 12 E ico abaume bonse aba maka baliimine no kuyasenda icitumbi ca kwa Shauli pamo ne fitumbi fya bana bakwe abaume no kufileta ku Yabeshe, e ko bashiikile amafupa yabo mwi samba lya muti uukalamba+ uwa mu Yabeshe;+ kabili balekele ukulya+ pa nshiku cinelubali (7).
13 E fyo Shauli afwile pa mulandu wa kuti tacetekele+ Yehova ukukuma ku mashiwi ya kwa Yehova ayo ashakonkele kabili na pa kwipusha ku wa mipashi.+ 14 Kabili taipwishe Yehova.+ E ico alimwipeye kabili apeele ubufumu kuli Davidi mwana Yese.+