1 Imilandu

11 Awe umuya inshiku, abena Israele+ bonse bailelongana kuli Davidi ku Hebrone,+ abati: “Moneni! Ifwe tuli bamunyinenwe.+ 2 Ukufuma fye na kale, ilyo na Shauli ali imfumu, ni mwe mwaletungulula abena Israele mu bulwi;+ kabili Yehova Lesa wenu atile kuli imwe, ‘Ni we ukacema+ abantu bandi abena Israele, kabili ni we ukaba intungulushi+ ya bantu bandi abena Israele.’” 3 E ico abakalamba bonse aba mu Israele baile ku mfumu ku Hebrone na Davidi apangene na bo icipangano mu Hebrone pa ntanshi ya kwa Yehova; e lyo basubile+ Davidi ukuba imfumu ya bena Israele, ukulingana na mashiwi+ Yehova asoseele muli Samwele.+

4 Pa numa Davidi na bena Israele bonse baile ku Yerusalemu,+ e kutila, ku Yebusi,+ ukwaleikala abena Yebusi.+ 5 E lyo abena Yebusi batile kuli Davidi: “Tawaingilemo muno.”+ Na lyo line Davidi apokele Sione,+ umusumba uwacingililwa kwi linga, e kutila, Umusumba wa kwa Davidi.+ 6 E ico Davidi atile: “Onse uukabalilapo ukwipaya+ abena Yebusi e ukaba intungulushi kabili umukalamba wa bashilika.” Kabili Yoabu+ mwana Seruya e wabalilepo ukuya, kabili aishileba intungulushi. 7 Kabili Davidi aikele ku ncende iyayafishe ukufikako.+ E mulandu wine bakwinikile ukuti Umusumba wa kwa Davidi.+ 8 Kabili atampile ukukuula konse konse mu musumba, ukufuma Apalundumana ukufika na ku ncende ishaushingulwike, nomba Yoabu ena awemye+ incende sha musumba ishasheleko. 9 Kabili Davidi aile alekoselako,+ pantu Yehova wa mabumba ali nankwe.+

10 Nomba aba e bakalamba pa baume ba maka+ aba kwa Davidi, abalemwafwa nga nshi mu kuteka kwakwe pamo na bena Israele bonse, ukuti bamucite imfumu ukulingana na mashiwi+ ya kwa Yehova ayo alandile pali Israele. 11 Kabili aba e mpalume sha kwa Davidi: Yashobeamu+ umwana wa mwina Hakmone, umukalamba wa aba batatu. Aimishe ifumo lyakwe no kwipaya abantu imyanda itatu (300) pa muku umo.+ 12 No wakonkapo ni Eleasari+ mwana Dodo umwina Ahohe.+ Na o ali pa mpalume shitatu.+ 13 Uyu e wali na Davidi ku Pas-damimu,+ uko abaPelishiti balongene pamo ku bulwi. Nomba kwali ibala ilyaiswilemo barle, kabili abantu bena balifulumwike ku cinso ca baPelishiti.+ 14 Lelo ena alishangile no kwiminina pa kati ke bala no kulipususha, kabili aipeye abaPelishiti abengi, ica kuti Yehova apuswishe+ nga nshi abantu bakwe.+

15 Kabili abakalamba batatu aba pa bantu amakumi yatatu (30)+ batentemukile ku cilibwe, kuli Davidi ku lucengo lwa Adulamu,+ ilyo abashilika ba baPelishiti bapangile inkambi mu mpanga yabatama iya bena Refa.+ 16 Inshita ilya Davidi ali ku ncende iyayafishe ukufikako;+ kabili inkambi ya bashilika abaPelishiti+ ninshi yali mu Betelehemu. 17 Ilyo papitile inshita Davidi atampile ukufuluka ati: “Iye, nga ninganwako+ amenshi ya mu cishima ca mu Betelehemu,+ icabela ku mpongolo!” 18 Awe balya batatu baileingila ku maka mu nkambi ya baPelishiti no kutapa amenshi mu cishima ca mu Betelehemu icaba pa mpongolo, kabili baliyasendele no kuyatwala kuli Davidi.+ Nomba Davidi alikeene ukunwa, ayetile fye pa nshi kuli Yehova.+ 19 Kabili atile: “Te kuti ncite ici cintu, pantu nalicindika Lesa wandi! Bushe inwe umulopa+ wa aba bantu abaibikile mu kapoosa mweo? Pantu ni pa kuibika mu kapoosa mweo e po bayaletele.” E fyo akeene ukunwa yalya menshi.+ Ifi e fyacitile ishi mpalume shitatu.

20 Abishai+ munyina Yoabu+ e wali umukalamba pali balya batatu; kabili aimishe ifumo lyakwe no kwipaya abantu imyanda itatu (300), kabili na o aishibikwe nga balya batatu. 21 Pali aba batatu e wacindikwe ukucila bambi babili, kabili aishileba umukalamba wabo; lelo taishileba+ pali balya batatu.

22 Benaya+ mwana Yehoyada,+ umwana wa muntu wa maka, uwacitile ifingi mu Kabseele,+ aipeye abana babili aba kwa Ariele uwa ku Moabu; kabili alitentemwike no kuyaipaya inkalamo+ mu cilindi ca menshi pa bushiku kwali imfula ya bungululu bwabuuta. 23 Kabili e waipeye umwina Egupti ipaka, uwalepele imikono isano.+ Kabili mu minwe ya mwina Egupti mwali ifumo+ ilyaba ngo mulando wa bakapikula ba nsalu; lelo aile kuli ena ne nkonto no kusompola ifumo ukufuma mu minwe ya mwina Egupti no kumwipaila kwi fumo lyakwe line.+ 24 Ifi e fyo Benaya mwana Yehoyada acitile, kabili na o ali pali shilya impalume shitatu. 25 Nangu ca kuti ali uwacindikwa sana ukucila balya amakumi yatatu (30), lelo tafikileko kuli balya batatu.+ Lelo Davidi alimusontele ukuba umukalamba wa ba kumulinda.+

26 Nomba pa baume ba maka mu bashilika, pali Asaele+ munyina Yoabu, Elhanani+ mwana Dodo uwa ku Betelehemu, 27 Shamote+ umwina Harore, Helese umwina Pelone,+ 28 Ira+ mwana Ikeshe umwina Tekoa, Abiesere umwina Anatote,+ 29 Sibekai+ umwina Husha, Ilai umwina Ahohe,+ 30 Maharai+ umwina Netofa,+ Helede+ mwana Baana umwina Netofa, 31 Itai mwana Ribai+ umwina Gibea+ uwa mu bana ba kwa Benjamini,+ Benaya umwina Piratone,+ 32 Hurai uwa ku mimana ya Gaashi,+ Abiele umwina Arba, 33 Asmabete umwina Baharumu,+ Eliaba umwina Shaalibimu, 34 abana ba kwa Hashemu umwina Gisone, Yonatani+ mwana Shage umwina Harari, 35 Ahiamu mwana Sakari+ umwina Harari,+ Elifali mwana Uri, 36 Hefere umwina Mekerati, Ahiya umwina Pelone, 37 Hesero umwina Karmele,+ Naarai mwana Esbai, 38 Yoele munyina Natani,+ Mibhari mwana Hagri, 39 Seleke umwina Amone, Naharai umwina Beerote, e walesenda ifyanso fya kwa Yoabu mwana Seruya, 40 Ira umwina Itri, Garebu+ umwina Itri, 41 Uria+ umwina Hiti,+ Sabadi mwana Alai, 42 Adina mwana Shisa umwina Rubene, intungulushi ya bena Rubene, uwakwete abantu amakumi yatatu (30); 43 Hanani mwana Maaka, na Yoshafati umwina Mitni, 44 Usia umwina Ashterate, Shama na Yeiele, abana ba kwa Hotamu umwina Aroere, 45 Yediaele mwana Shimri, na Yoha munyina umwina Tisi, 46 Eliele umwina Mahabi, na Yeribai na Yoshabia abana ba kwa Elnaamu, na Itma umwina Moabu. 47 Eliele na Obedi na Yaasiele umwina Soba.