Yeremia

40 Icebo caishile kuli Yeremia ukufuma kuli Yehova pa numa Nebusaradani+ umukalamba wa balinshi amutumine ukufuma ku Rama,+ ilyo amusendele ninshi ali mu minyololo pa kati ka bankole bonse aba mu Yerusalemu na ba kwa Yuda, abaletwalwa muli bunkole ku Babiloni.+ 2 E lyo umukalamba wa balinshi asendele Yeremia no kumweba ati: “Yehova Lesa obe asosele ukuti ubu bucushi bukesa pali cino cifulo,+ 3 kabili Yehova ali no kuleta ubu bucushi no kucita ico asosele, pantu namubembukila Yehova kabili tamumfwilile ishiwi lyakwe. Kabili ici e cimucitikile.+ 4 Nomba, mona! nakukakula buno bushiku ku minyololo iyali ku maboko yobe. Nga cawama mu menso yobe ukunkonka ku Babiloni, natuleya, na ine nkalakusakamana.+ Lelo nga cabipa mu menso yobe ukunkonka ku Babiloni, shala. Mona! Icalo conse cili pa ntanshi yobe. Konse ukwawama kabili uko utemenwe, e ko uye.”+

5 Na o ali talaishiba nga ali no kubwelelamo, ilyo Nebusaradani atile: “Bwelela kuli Gedalia+ mwana Ahikamu+ mwana Shafani,+ uo imfumu ya ku Babiloni isontele ukuteka imisumba ya kwa Yuda, no kwikala nankwe mu kati ka bantu; nangu konse uko watemwa ukuya, e ko uye.”+

E lyo umukalamba wa balinshi amupeele ifya kulya no bupe, no kumuleka aye.+ 6 Na o Yeremia aile kuli Gedalia+ mwana Ahikamu ku Mispa+ no kwikala nankwe mu kati ka bantu abashele mu calo.

7 Nomba abakalamba bonse aba bashilika abali mu mpanga,+ bena na bantu babo, baumfwile ukuti imfumu ya ku Babiloni naisonta Gedalia mwana Ahikamu ukuteka icalo, no kuti naimusonta ukuteka abaume na banakashi na bana banono na bamo abapiina ba mu calo, abashasendelwe muli bunkole ku Babiloni.+ 8 E ico Ishmaele+ mwana Netania e lyo na Yohanani+ na Yonatani, abana ba kwa Karea, na Seraya mwana Tanhumete na bamwana Efai umwina Netofa+ na Yesania+ mwana Maakati,+ baishile kuli Gedalia ku Mispa, pamo na bantu babo.+ 9 Kabili Gedalia+ mwana Ahikamu+ mwana Shafani+ alapile+ kuli bena na ku bantu babo, no kutila: “Mwitiina ukubombela abena Kaldi. Akwikaleni mu calo no kubombela imfumu ya Babiloni, kabili mukekala umutende.+ 10 Kabili, moneni, ine ndeikala mu Mispa,+ pa kuti ndemwimininako ku cinso ca bena Kaldi abaleisa kuli ifwe. Nomba imwe longanikeni imyangashi+ ne fisabo fya mu lusuba na mafuta no kufibika mu fipe fyenu, mwikale na mu misumba yenu iyo mupokele.”

11 Na baYuda bonse abali ku Moabu na bali mu bana ba kwa Amone na bali mu Edomu na bali mu fyalo fyonse fimbi,+ baumfwile ukuti imfumu ya ku Babiloni naipeela kuli Yuda abashelepo kabili naisonta Gedalia+ mwana Ahikamu mwana Shafani uwa kubateka. 12 Na baYuda bonse batendeke ukubwela ukufuma konse uko basalanganine, kabili baleisa ku calo ca kwa Yuda kuli Gedalia ku Mispa.+ Balonganike ne myangashi ne fisabo fya mu lusuba ifingi nga nshi.

13 Kabili Yohanani+ mwana Karea+ na bakalamba bonse aba bashilika abali mu mpanga,+ baile kuli Gedalia ku Mispa. 14 E lyo bamwebele ati: “Bushe tawishibe ukuti Baalisi, imfumu ya bana ba kwa Amone,+ naituma Ishmaele+ mwana Netania+ ku kukwipaya?” Lelo Gedalia mwana Ahikamu tasumine ifyo basosele.+

15 E lyo Yohanani+ mwana Karea aebele Gedalia ku Mispa, umwafisama, ati: “Ndefwaya ukuya nomba line ku kwipaya Ishmaele mwana Netania, pantu tapali umuntu uuleishiba.+ Nga cinshi alekwipaila, kabili cinshi ico bonse abaYuda abalelongana kuli iwe balasalanganina na bashalapo ba kwa Yuda balalobela?”+ 16 Lelo Gedalia+ mwana Ahikamu+ atile kuli Yohanani mwana Karea: “Wicita ifyo, pantu ulebepesha fye Ishmaele.”+