Yeremia

32 Icebo icaishie kuli Yeremia ukufuma kuli Yehova mu mwaka walenga ikumi (10) ukutula apo Sidekia imfumu ya kwa Yuda, atendekeele ukuteka,+ uwali e mwaka walenga ikumi na cinekonsekonse (18) ukutula apo Nebukadresari atendekeele ukuteka.+ 2 Kabili pa nshita ilya, ibumba lya bashilika ba mfumu ya ku Babiloni lyaleshinga Yerusalemu;+ na Yeremia kasesema alisaliilwe mu Lubansa lwa Balinshi+ ulwaba mu ng’anda ya mfumu ya kwa Yuda; 3 pantu Sidekia imfumu ya kwa Yuda alimwisaliile,+ no kumweba ati:

“Cinshi ico ulesesemena+ auti, ‘Yehova atila: “Moneni, ndepeela uno musumba mu minwe ya mfumu ya ku Babiloni, na yo ikaupoka;+ 4 na Sidekia, imfumu ya kwa Yuda, takafyuke mu minwe ya bena Kaldi, pantu akapeelwa mu minwe ya mfumu ya ku Babiloni, kabili akalanda na yo, na menso yakwe yakamona amenso ya iko”’;+ 5 ‘kabili ikatwala Sidekia ku Babiloni, kabili e ko akekala mpaka nkamupempule,’+ e fyasosa Yehova; ‘nangu mulelwa na bena Kaldi tamwakacimfye’?”+

6 Na o Yeremia atile: “Icebo ca kwa Yehova nacisa kuli ine no kutila, 7 ‘Mona, Hanamele mwana Shalumu wiso mwaice aleisa kuli iwe, ku kusosa ati: “Shita impanga yandi iyaba mu Anatote,+ pantu ni we ukwete insambu ya kushita.”’”+

8 Awe Hanamele umwana wa batata mwaice alishile kuli ine, ukulingana ne cebo ca kwa Yehova, no kwingila mu Lubansa lwa Balinshi,+ kabili atile kuli ine: “Ushite impanga yandi iyaba mu Anatote,+ iyaba mu calo ca kwa Benjamini,+ pantu ni we ukwete insambu ya kuipyana ukuti ibe yobe, kabili ni we ukwete insambu ya kuishita. Shita ibe yobe.” Na ine naishileishiba ukuti cebo ca kwa Yehova.+

9 E ico nashitile kuli Hanamele+ mwana batata mwaice impanga iyali mu Anatote.+ Kabili namupimiine indalama+ amashekele cinelubali (7), ne sha silfere ikumi (10). 10 Kabili nalembele kalata+ no kukakatikapo icikakatikilo,+ nalengele ne nte+ ukumonako ilyo nalepima+ indalama pali sekelo. 11 E lyo nabuulile kalata wa kushitilapo, uwakakatikwepo icikakatikilo ukulingana na mafunde ne fipope,+ na kalata uushakakatikwepo icikakatikilo;12 kabili napeele kalata wa kushitilapo kuli Baruki+ mwana Neria+ mwana Maaseya pa menso ya kwa Hanamele mwana batata mwaice na pa menso ya bakambone, abalembele pali kalata wa kushitilapo,+ pa menso ya bena Yuda bonse abaikele mu Lubansa lwa Balinshi.+

13 Kabili naebele Baruki pa menso yabo, nati:14 “Yehova wa mabumba, Lesa wa kwa Israele, atila, ‘Buula bakalata aba, kalata uyu uwa kushitilapo, na kalata uukakatikwepo icikakatikilo, na kalata umbi uushikakatikwepo icikakatikilo,+ ubabike mu cipe ce bumba, pa kuti bakekale inshiku ishingi.’15 Pantu Yehova wa mabumba, Lesa wa kwa Israele, atila, ‘Amayanda ne mpanga na mabala ya myangashi fikashitwa muli cino calo.’”+

16 E lyo napepele+ kuli Yehova pa numa ya kupeela kalata wa kushitilapo kuli Baruki+ mwana Neria,+ nati:17 “Iye, mwe Shikulu Mulopwe Yehova!+ Moneni, ni mwe mwapanga umuulu ne sonde ku maka yenu ayakalamba+ na ku kuboko kwenu ukwatambalikwa.+ Te kuti cimupeshe amano icintu nangu cimo,+ 18 Mwe baba ne cikuuku ku bantu amakana,+ kabili mwe bakanda abana pa filubo fya bashibo,*+ mwe Lesa wa cine, Umukulu,+ Uwa maka,+ Yehova wa mabumba+ e shina lyenu,+ 19 mwe bashifilwa ukucita ukufwaya kwenu+ kabili impalume ku milimo,+ mwe bo amenso yenu yamona imibele yonse iya bana ba bantu,+ pa kuti mupeele cila muntu ukulingana ne mibele yakwe no kulingana ne fifuma mu micitile yakwe;+ 20 mwe bacitile ifishibilo ne fipesha amano mu calo ca Egupti ifyo caishibikwa na lelo na mu bena Israele na mu bantu,+ pa kuti muipangile ishina mwe bene, ifyo lyaba buno bushiku.+ 21 Kabili mwafumishe abantu benu abena Israele mu calo ca Egupti,+ ku fishibilo na ku fipesha amano+ na ku kuboko ukwakosa na ku kuboko ukwatambalikwa na ku fya kutiinya ifikalamba.+

22 “Mwasukile mwapeela na cino calo ico mwalapile ku fikolwe fyabo ukuti mukabapeela,+ icalo umwaba umukaka no buci.+ 23 Kabili balishile no kupyana icalo,+ lelo tabaumfwile kwi shiwi lyenu, kabili tabaendele mu mafunde yenu.+ Fyonse ifyo mwabebele ukucita tabacitile,+ e ico mwalengele ubucushi bonse ubu ukubaponena.+ 24 Moneni! Abantu nabesa no kupanga icibumba ca maloba+ ukushinguluka umusumba pa kuti bausanse,+ kabili ukapeelwa mu minwe ya bena Kaldi abaleulwisha,+ pa mulandu wa lupanga+ ne cipowe+ ne cikuko;+ kabili ico mwasosele nacicitika, na imwe mulemona.+ 25 Lelo imwe, mwe Shikulu Mulopwe Yehova, munjebele amuti, ‘Shita impanga mu ndalama,+ pabe ne nte,’+ nangu ca kuti umusumba uli no kupeelwa mu minwe ya bena Kaldi.”+

26 E lyo icebo ca kwa Yehova caishile kuli Yeremia, no kutila:27 “Mona, ine ndi Yehova, Lesa wa bantunse bonse.+ Bushe kwaliba icintu icingampesha amano?+ 28 E ico Yehova atila, ‘Mona, ndepeela uno musumba mu minwe ya bena Kaldi na mu minwe ya kwa Nebukadresari, imfumu ya ku Babiloni, na o akaupoka.+ 29 Kabili abena Kaldi abalelwisha uno musumba bakesa no kusonteka umulilo muli uno musumba no kuoca+ pamo na mayanda ayo bafutumwinapo icushi ca malambo kuli Baali pa mitenge ya yako no kupongolwelapo imituulo ya mwangashi kuli balesa bambi, pa kuti bankalifye.’+

30 “‘Pantu abana ba kwa Israele na bana ba kwa Yuda bacita ifyabipa mu menso yandi, ukufuma fye ku bwaice bwabo;+ pantu abana ba kwa Israele balenkalifya na ku milimo ya minwe yabo,’+ e fyasosa Yehova. 31 ‘Pantu uno musumba, ukutula pa bushiku baukuulile, ukufika na kuli buno bushiku, undetela fye ubukali+ ne cipyu pa kuti ngufumye ku cinso candi,+ 32 pa mulandu wa bubi bonse ubo abana ba kwa Israele+ na bana ba kwa Yuda+ bacita pa kuti bankalifye,+ bena, ishamfumu shabo,+ bacilolo babo,+ bashimapepo babo,+ na bakasesema babo,+ na bena Yuda na bekashi ba mu Yerusalemu. 33 Kabili balemfutatila, no kulosha icinso kumbi;+ nangu ca kuti nalebasambilisha, nalecelela no kubasambilisha, lelo takwali nangu bamo abaleumfwa ukuti bapokelele ukusalapulwa.+ 34 Babikile ne fya bunani mu ng’anda iyainikwa ishina lyandi, pa kuti baikoweshe.+ 35 Kabili bakuuliile Baali+ ififulo fya kupepelapo ifyaba mu mupokapoka wa mwana wa kwa Hinomu,+ pa kuti boce abana babo abaume na bana babo abanakashi mu mulilo+ no kubatuula kuli Moleke,+ icintu ico nshabebele,+ kabili tacaishile mu mutima wandi ukucita ici ica bunani,+ pa kuti balenge Yuda ukubembuka.’+

36 “E ico nomba Yehova Lesa wa kwa Israele atila pali uno musumba uo imwe muleti ukapeelwa mu minwe ya mfumu ya ku Babiloni ku lupanga na ku cipowe na ku cikuko,+ 37 ‘Moneni, nkabalonganika bonse ukufuma mu fyalo fyonse umo nkabapashila mu bukali bwandi na mu cipyu candi na mu cifukushi candi;+ nkabaleta na kuli cino cifulo no kubaleka bakekale umutelelwe.+ 38 Kabili bakaba abantu bandi,+ na ine nkaba Lesa wabo.+ 39 Kabili nkabapeela umutima umo+ ne nshila imo, pa kuti balentiina lyonse, pa kuti cikalebawamina, pamo na bana babo abakakonkapo.+ 40 Kabili nkapangana na bo icipangano ca muyayaya,+ ica kuti nshakaleke ukubakonka, ku kubacitila ifisuma;+ kabili nkabika akatiina ka kuntiina mu mitima yabo pa kuti bekafuma kuli ine.+ 41 Kabili nkasekelela pali bena pa kuti mbacitile ifisuma,+ kabili nkabalimba muli cino calo+ mu cishinka no mutima wandi onse no mweo wandi onse.’”

42 “Pantu Yehova atila, ‘Filya fine naletele pali aba bantu ububi bonse ubu ubukalamba, e fyo nkaleta no busuma bonse ubo ndesosa pali bena.+ 43 Ne mpanga ikashitwa muli ici calo+ ico imwe mukalasosa amuti: “Matololo+ umushaba umuntu ne fitekwa. Nacipeelwa mu minwe ya bena Kaldi.”’+

44 “‘Abantu bakashita impanga mu ndalama, kukaba no kulemba pa nkalata+ no kukakatikapo icikakatikilo no kubuula inte,+ mu calo ca kwa Benjamini+ na mu ncende shashingulukako isha Yerusalemu+ na mu misumba ya kwa Yuda+ na mu misumba ya citungu ca mpili na mu misumba ya mpanga yabatama+ na mu misumba ya ku kapinda ka ku kulyo,+ pantu nkabwesha bankole babo,’+ e fyasosa Yehova.”