Yeremia

30 Icebo caishile kuli Yeremia ukufuma kuli Yehova, aciti: 2 “Yehova Lesa wa kwa Israele atila, ‘Lemba mwi buuku fyonse ifyo nalakweba.+ 3 Pantu, “mona! inshiku shileisa,” e fyo Yehova asosa, “kabili nkalonganika bankole ba bantu bandi, Israele na Yuda,”+ e fyasosa Yehova, “kabili nkababwesesha ku calo ico napeele ifikolwe fyabo, kabili cikaba calo cabo na kabili.”’”+

4 Kabili ifi e fyo Yehova asosele kuli Israele na kuli Yuda. 5 Pantu Yehova atila: “Natumfwa icongo ca kututuma, no mwenso,+ kabili tapali umutende. 6 Ipusheni, mwe baume imwe, nga ca kutila umwaume kuti afyala umwana. Nomba cinshi ico ndemwena umwaume onse naikata amaboko mu musana kwati mwanakashi uulepaapa,+ ne finso fyonse nafyaluka?+ 7 Iye! Pantu ubushiku bulya bukalamba,+ kabili takwaba ubwaba nga bwena,+ kabili ni nshita ya kucula kuli Yakobo.+ Lelo akapusuka.”

8 “Kabili mu bushiku bulya,” e fyasosa Yehova wa mabumba, “nkafuna ikoli ukulifumya pa mikoshi yenu, nkaputaula ne nshinga,+ kabili abantu bambi bambi tabakamulenge ukuba umubomfi wabo. 9 Kabili bakabombela Yehova Lesa wabo na Davidi imfumu yabo,+ uo nkabemisha.”+

10 “Lelo iwe, we mubomfi wandi Yakobo, witiina,” e fyasosa Yehova, “kabili witutuma, we Israele.+ Pantu mona, nkakupususha ukufuma ukutali na bana bobe ukufuma mu calo umo baba muli bunkole.+ Kabili Yakobo akabwela no kwikala mu mutelelwe na mu mutende, takwakabe na wa kutiinya.”+

11 “Pantu ndi na iwe,” e fyasosa Yehova, “pa kuti nkupusushe;+ lelo nkalofya inko shonse umo nakusalanganishishe.+ Lelo iwe nshakakulofye.+ Kabili nkakusalapula ukusalapula ukwalinga, nshakakuleke fye ukwabula ukukandwa.”+

12 Pantu e fyasosa Yehova: “Takuli ukundapwa ku kufunika kobe.+ Impumo yobe ya mutatakuya.+ 13 Takuli uwa kukupapaatilako pa kuti icilonda cobe cipole.+ Takuli inshila ya kundapilwamo, nangu kuposhiwa.+ 14 Bonse abakutemwa sana nabakulabako.+ Tabalekufwaya. Pantu ninkuuma ngo kuuma kwa mulwani,+ ukusalapula kwa muntu umunkalwe,+ pa mulandu wa filubo+ fyobe ifingi; imembu shobe nashifula.+ 15 Nga cinshi ico ulelilila pa mulandu wa kufunika kobe?+ Ukukalipwa kobe takwakapwe pa mulandu wa kufulisha kwa filubo fyobe; imembu shobe nashifula.+ Nine ncitile ifi kuli iwe. 16 E ico bonse abalekonaula na bo bakonaulwa;+ na balwani bobe bonse bakaya muli bunkole.+ Na bakakusansa na bo bakasanswa, kabili bonse abakakupokolola ifipe, na bo nkalenga ukuti babapokolole ifipe.+

17 “Pantu nkakundapa, kabili nkaposha impumo shobe,”+ e fyasosa Yehova. “Pantu balekwita ati umwanakashi uwatamfiwa.+ Batila: ‘Ni Sione, uushakwata na wa kumufwaya.’”+

18 Yehova atila: “Moneni, nkalonganika bankole ba mu matenti ya kwa Yakobo,+ kabili nkomfwila amatenti yakwe uluse. No musumba ukakuulwa apalundumana;+ kabili ing’anda ya malinga ikaba palya pene ifwile ukuba.+ 19 Kabili e mukalafuma ukutasha, ne congo ca baleseka.+ Kabili nkabafusha, na bo tabakacepe;+ nkabasandulula, kabili tabakasuulwe.+ 20 Na bana bakwe bakaba filya fine bali kale, no lukuta lwakwe lukekalilila ku cinso candi.+ Kabili nkakanda abalemucusha.+ 21 No mukankaala wakwe akafuma muli ena,+ na kateka wakwe akafuma mu kati kakwe;+ kabili nkamupalamika, na o akapalama kuli ine.”+

“Nga kanshi nani uyu uupeele umutima wakwe ukuba iciikatilo pa kuti apalame kuli ine?”+ e fyasosa Yehova. 22 “Kabili mukaba abantu bandi,+ na ine nkaba Lesa wenu.”+

23 Moneni! inkuuka ya kwa Yehova naifuma, no bukali, ne cikuuku ca mwela icilekukulula.+ Pa mitwe ya mbifi e po cileshunda.+ 24 Ubukali bwa kwa Yehova ubulepya ngo mulilo tabwakabwele mpaka akacite ubupingushi, mpaka akacite ifyaba mu mutima wakwe.+ Mu nshiku sha ku mpela mukeluka bwino bwino umo cilolele.+