Amalumbo

86 Teyamikeni ukutwi kwenu, mwe Yehova. Njasukeni,+

Pantu nincula kabili ndi mulanda.+

 2 Lindeni umweo wandi, pantu ndi wa cishinka.+

Pususheni umubomfi wenu—uwamutetekela+—ni mwe Lesa wandi.

 3 Mbeleleni uluse, mwe Yehova,+

Pantu kuli imwe e ko ndilila akasuba konse.+

 4 Lengeni umutima wa mubomfi wenu ukusekelela,+

Pantu kuli imwe, mwe Yehova, e ko nalosha umweo wandi.+

 5 Pantu imwe, mwe Yehova, muli basuma+ kabili mwali-iteyanya ukwelela;+

Kabili mwalikwatisha icikuuku ku balilila kuli imwe.+

 6 Kutikeni, kwi pepo lyandi,+ mwe Yehova;

Kabili kutikisheni ku kupapaata kwandi.+

 7 Mu bushiku bwa kucula kwandi nkalilila kuli imwe,+

Pantu mukanjasuka.+

 8 Tapali uwaba nga imwe pali tulesa, mwe Yehova,+

Kabili tapali imilimo iyaba nge yenu.+

 9 Inko shonse isho mwapanga shikesa,+

Kabili shikafukama ku cinso cenu, mwe Yehova,+

No kucindika ishina lyenu.+

10 Pantu muli bakulu kabili mucita ifipesha amano;+

Ni mwe Lesa, mweka fye.+

11 Mwe Yehova, nsambilisheni inshila shenu.+

Nkenda mu cine cenu.+

Nengeni ukuba no mutima umo ku kutiina ishina lyenu.+

12 Ndemulumbanya, mwe Yehova Lesa wandi, no mutima wandi onse,+

Kabili nakulacindika ishina lyenu umuyayaya,

13 Pantu mwalikwatisha icikuuku kuli ine,+

Kabili mwampokolola ku Nshiishi, ukwashika nga nshi.+

14 Mwe Lesa, abaituntumba nabanjimina;+

No lukuta lwa bankalwe lwafwaya umweo wandi,+

Kabili tababika imwe pa ntanshi yabo.+

15 Lelo imwe, mwe Yehova, muli Lesa wa nkumbu kabili uwa mutembo,+

Uukokola ukukalipa+ kabili uwafulisha icikuuku ne cishinka.+

16 Alukileni kuli ine no kumbelela uluse.+

Peeleni umubomfi wenu amaka yenu,+

No kupususha umwana mwaume wa musha wenu umwanakashi.+

17 Ncitileni icishibilo ca busuma,

Pa kuti abampata bacimone no kumfwa insoni.+

Pantu imwe, mwe Yehova, ni mwe mwangafwa no kunsansamusha.+