Amashiwi ya Kutampilapo

MULI Baibolo wa Mushilo mwaba amashiwi ayo Shikulu Mulopwe Yehova asokolwela abantu bonse pano isonde. Abantu fye bonse pano isonde balitemwa ili ibuuku lyafuma kuli Lesa, pa mulandu wa kuti lilanda pa mbila nsuma iya Bufumu bwa kwa Lesa, ubukaleta umutende no bulungami. Isonde likasanguka paradaise umo abantu bonse bakekala. Baibolo ilondolola ukuti Lesa mu kutemwa kwakwe alipeela abantunse ababembu inshila ya kupusukilamo ku mfwa ukupitila mwi lambo lya cilubula ilya Mwana wakwe, Yesu Kristu.—Yohane 3:16.

Pa kubalilapo fye, Baibolo yalembelwe mu ciHebere, mu ciAramaiki (ululimi ulumfwika kwati ciHebere), e lyo na mu ciGriki. Apo pali lelo banono sana abaishiba ishi ndimi, e calenga ukuti Baibolo ya Mushilo ipilibulwe mu ndimi ishilelandwa pali ndakai pa kuti amashiwi yabamo ayengatungulula umuntu ku mweo yomfwike ku ba nko shonse.

Uno Baibolo mupya uwa Cibemba apilibwilwe ukufuma kuli Baibolo wa ciNgeleshi uwa New World Translation of the Holy Scriptures uwa mu 1984. Muli amabuuku 39 ayapanga Amalembo ya ciHebere ne ciAramaiki kabili muli na mabuuku 27 ayapanga Amalembo ya Bwina Kristu aya ciGriki ayapilibwilwe mu Cibemba mu 2002 lelo ayo bapitulwikemo no kuyawamya bwino bwino. Abalepilibula Baibolo wa Amalembo ya Calo Cipya basalilepo ukwinika ishi mbali shibili isha Malembo ya Mushilo ukukonka indimi shalembelwemo pa kubala fye ukucila ukubomfya amashina yaseeka pali lelo aya kuti “Icipangano ca Kale” nangu “Icipangano Cipya.” Icalengele ukuti bacite fi mulandu wa kuti Baibolo yaba libuuku fye limo, kabili tamwaba ulubali ulo twingatila lwalileka ukubomba, atemwa ukuti “lwa kale.” Amashiwi yabamo yalanda fye pali cimo cine, ukutendekela fye kwi buuku lya kubalilapo mu Malembo ya ciHebere ukufika na kwi buuku lya kulekeleshako mu Malembo ya ciGriki. Pa kwafwa uulebelenga ukusambilila Baibolo yonse, muli amalembo ukucila pali 125,000 ayali pa kati ke bula limo na limo apo engasanga ilyashi lipalileko e lyo muli ne cisontelelo ca mashiwi ya mu Baibolo.

Apo Baibolo e ilondolola bwino bwino ubufwayo bwa kwa Lesa, Mulopwe uwa muulu na pano isonde, kuti caba kumusaalula nga nshi e lyo no kusuusha icifulo akwata, nga ca kutila twafumyamo atemwa ukufishilisha ishina lyakwe ilyaibela, ilisangwa fye apengi mu malembo ya ciHebere ukufika fye na ku miku mupepi na 7,000. E ico umulimo wacindama sana uo ino Baibolo ibombele kubwesesha ishina lya kwa Lesa mu malembo ya mu Baibolo umo lifwile ukusangwa. Tubomfeshe ishiwi lya Cibemba ilyaishibikwa sana ilya kuti “Yehova” imiku 6,973 mu Malembo ya ciHebere ne miku 237 mu Malembo ya ciGriki aya Bena Kristu. Nga mulefwaya ukwishibilapo na fimbi pali uyu mulandu, moneni icipande ca Ifyalundwako muli uno wine Baibolo.

Bakapilibula ba uno Baibolo, abatemwa Lesa Umwine wa Malembo ya Mushilo, balishibe ukuti bafwile ukupilibula bwino bwino amatontonkanyo ya kwa Lesa e lyo ne fyebo fyakwe. Kabili balishibe no kuti abantu abafwaya ukwishiba icine, balakabila Icebo ca kwa Lesa Wa Maka Yonse icapilibulwa bwino pa kuti bakapusuke no kwikala umuyayaya. Ico tulesubila ca kuti ino Baibolo ikafwe abakalabelengamo ukusanga inshila iitwala ku mweo wa pe mu calo cipya ica kwa Lesa Wa Maka Yonse, umukaba ubulungami.—Esaya 65:17; 2 Petro 3:13.