Ku Bena Filipi
1 Ine ne Paulo na Timote, fwe basha+ ba kwa Kristu Yesu, twamulembela mwe ba mushilo bonse muli Kristu Yesu abali mu Filipi,+ pamo pene na bakangalila na babomfi batumikila, tuletila:+
2 Icikuuku ca kwa Lesa e lyo no mutende ukufuma kuli Lesa Shifwe na kuli Shikulwifwe Yesu Kristu fibe na imwe.+
3 Ntootela Lesa wandi, lyonse ilyo naibukisha imwe+ 4 mu kupapaata kwandi konse uko imupapaatilako+ imwe bonse, ilyo mpapaata no kusekelela, 5 pa mulandu wa fyo mwa-afwilishako+ mu kusabankanya imbila nsuma ukutula pa bushiku bwa ntanshi ukufika pali ino nshita. 6 Pantu nincetekela ici cine, ukuti uwatendeke umulimo usuma muli imwe akaupwisha+ ukufika pa bushiku+ bwa kwa Yesu Kristu. 7 Nacilinga nga nshi ukuti ndetontonkanya ifi pali imwe bonse, pantu ndamwibukisha mu mutima,+ imwe bonse pa kuba abakumako+ pamo na ine ku cikuuku ca kwa Lesa, na mu fikakilo+ fyandi na mu kucingilila+ no kukosha imbila nsuma ukulingana ne funde.+
8 Pantu Lesa e waishiba ifyo mfuluka imwe bonse pa mulandu wa kumutemwisha+ ifyo na Kristu Yesu amutemwisha. 9 Kabili ici e co ntwalilila ukupepela, ukuti ukutemwa kwenu kulekulilako fye+ lyonse pamo no kwishiba+ kwine kwine no kwiluka+ ukufwaya kwa kwa Lesa; 10 ukuti mwishibe bwino bwino ifyacilapo ukucindama,+ pa kuti mube ababula akabi+ kabili abashipunwisha+ bambi ukufika pa bushiku bwa kwa Kristu, 11 na pa kuti mube ne fisabo fya bulungami,+ ifiishila muli Yesu Kristu, pa kuti kube ubukata no kutasha kuli Lesa.+
12 Awe ndefwaisha imwe mwe bamunyinane, mwishibe ukuti, ifyancitikiile fyalilundulula imbila nsuma+ ukucila ukuicilikila, 13 ica kuti nacishibikwa+ kuli bonse ukuti ndi mu cifungo+ pa mulandu wa kutetekela Kristu, nacishibikwa ku balinshi bonse aba kwa Kateka na ku bashala bonse;+ 14 kabili aba bwananyina abengi mu mulimo wa kwa Shikulu, pa kuicetekela pa mulandu wa kuti ndi mu cifungo, nabacilapo ukukosa ukulanda icebo ca kwa Lesa ukwabula umwenso.+
15 Ca cine, bamo baleshimikila pali Kristu pa mulandu wa kafindwe no kucimfyanya,+ lelo bambi bena pa mulandu wa kuitemenwa fye.+ 16 Aba bena balebila pali Kristu pa mulandu wa kutemwa, pantu balishiba ukuti nabikwa kuno ku kusosela+ imbila nsuma;17 lelo balya bambi babilila pa mulandu wa kucimfyanya,+ te ku mutima wa cishinka, pantu bena baleti bakandetela ubucushi+ ilyo ndi mu cifungo. 18 Nga kanshi nsose shani? Ukuti mu musango onse, nampo nga ni ku kabepesho+ nelyo mu cishinka, Kristu alebilwa,+ kabili muli ici ndasekelela. Na kuba, na kabili nakulasekelela, 19 pantu ninjishiba ukuti ici cikampususha pa mulandu wa kupapaata+ kwenu no kupeelwa umupashi wa kwa Yesu Kristu,+ 20 ukulingana no kwenekela no kufulukisha+ kwandi ne subilo+ ukuti nshakalengwe insoni+ nangu panono, lelo ukuti mu kulanda no kushipa konse,+ ifyo caba na kale, Kristu nomba akacindikilwa mu mubili wandi,+ nampo nga ni ku bumi nangu ni ku mfwa.+
21 Pantu kuli ine ukuba uwa mweo ni pa mulandu wa kwa Kristu,+ kabili ukufwa+ na ko bunonshi. 22 Awe nga natwalilila ukuba no bumi, ninshi ici kuli ine e fisabo fya mulimo wandi+—lelo kwena te kuti nande ico ningasala. 23 Ndecula ne fi fibili;+ lelo ico mfwaisha kufwa no kuba pamo na Kristu,+ pantu ici ukwabula ukutwishika, e cacilapo ukuwama.+ 24 Lelo, kuli ine ukwikala mu mubili uno e kulingile sana pa mulandu wa imwe.+ 25 E ico, pa kucetekela ici, ninjishiba ukuti nkekala+ kabili nkaba pamo na imwe bonse pa kuti mulunduluke+ kabili pa kuti musekelele pa mulandu wa citetekelo cenu, 26 pa kuti ukusekelela kwenu kufule nga nshi apo muli basambi ba kwa Kristu Yesu pa mulandu wa ine pa kubapo kwandi ilyo nkaba na imwe na kabili.
27 Nomba ikaleni imikalile iyawamina+ imbila nsuma iya kwa Kristu, pa kuti nga naisa no kumumona nelyo nga nshishile, ng’umfwe ukuti mwaba abakosa ndi, aba mutima+ umo ababombela pamo ku citetekelo ca mbila nsuma, 28 kabili abashitiina abalwani benu nangu panono.+ Ici cine e bushininkisho bwa kuti bakonaulwa, lelo imwe mukapusuka;+ kabili ica kulanga ici cafuma kuli Lesa, 29 pantu kuli imwe kwapeelwe ishuko pa mulandu wa kwa Kristu, te kumutetekela+ fye, lelo no kumuculila+ kwine. 30 Kanshi muli no kushomboka kumo kwine uko mwamwene muli ine+ kabili uko nomba muleumfwa ukuti ncili ndeshomboka.+
2 E ico, nga ca kutila muli Kristu+ mwaliba ukukoselesha, nga ca kutila mwaliba ukusansamusha pa mulandu wa kutemwa, nga ca kutila mwaliba ukulangulukilana,+ nga ca kutila mwaliba icitemwishi+ ne nkumbu, 2 munenge ukusekelela nga nshi pantu mwaliba na mano+ yamo yene no kutemwa kumo kwine, umutima umo wine, ukutontonkanya kumo kwine,+ 3 kabili tamukansana+ nelyo ukuibililika,+ lelo mwali-icefya pantu mumona bambi ukuti balimucila,+ 4 e lyo tamubika fye amano ku fyo mulefwaya fye mwe bene,+ lelo mulabika amano na ku fyo bambi bafwaya.+
5 Mube no mutima uyu wine uwali na muli Kristu Yesu,+ 6 uyo, nangu ca kutila aali mu cipasho ca kwa Lesa,+ tatalile atontonkanya ukutila kuti alingana na Lesa.+ 7 Iyo, lelo aisangwile uwa fye no kubuula icipasho+ ca busha kabili aishileba mu cipasho ca bantu.+ 8 Lelo, ilyo aisangile mu mibele ya buntu,+ ali-iceefeshe kabili aishileba uwa cumfwila ukufika na ku mfwa,+ awe ukufika ku mfwa pa cimuti.+ 9 E ico Lesa na o alimusansabike+ kabili mu cikuuku amupeele ishina ilyacila amashina yonse,+ 10 pa kuti mwi shina lya kwa Yesu ikufi lyonse lifukame ilya ba mu muulu ne lya ba pano isonde ne lya ba pa nshi ya calo,+ 11 no lulimi lonse lusose+ apabuuta ukuti Yesu Kristu e Shikulu+ pa kuti Lesa Shifwe acindikwe.+
12 E ico, mwe batemwikwa bandi, ifyo mwaba ne cumfwila+ lyonse, ilyo ndipo kabili maka maka ilyo nshilipo, mulebombela ipusukilo lyenu no mwenso+ no kututuma;13 pantu Lesa e ulebombela muli imwe,+ pa mulandu wa kufwaya kwakwe+ pa kuti mulefwaya e lyo kucitapo cimo. 14 Twalilileni ukucita ifintu fyonse ukwabula ukuilishanya+ no kukansana,+ 15 pa kuti mube ababula umulandu+ kabili aba kaele, abana+ aba kwa Lesa ababula akalema mu nkulo+ iyapondama kabili iyapotama, muli iyo mulebalika nge fyengelo muli ici calo,+ 16 ukwikatisha icebo ca mweo,+ pa kuti nkwate ica kwangilapo mu bushiku bwa kwa Kristu,+ ica kuti nshabutwike apa fye nelyo ukubombesha apa fye.+ 17 Lelo, nangu ca kutila ndetuulwa kwati mutuulo+ wa mwangashi uuleitululwa pe lambo+ no kubombela icintubwingi pa mulandu wa citetekelo,+ ndeanga no kusekelela+ pamo na imwe bonse. 18 Awe, mu musango umo wine na imwe mwange no kusekelela pamo na ine.+
19 Shikulu Yesu nga atemwa, ndesubila ukutuma Timote kuli imwe bwangu bwangu, pa kuti nkasangalale+ ilyo nkomfwa ifyo muli. 20 Pantu nshikwete umuntu umbi uwakwata umutima uwalingana no wakwe, uwingamusakamana+ icine cine. 21 Pantu bonse abashala baleifwaila fye ifyabo abene,+ te fya kwa Kristu Yesu iyo. 22 Lelo mwalishiba ubushininkisho aishininkishishe umwine, acucutike na ine ku kulundulula imbila nsuma kwati ni filya umwana+ acucutikila pamo na wishi. 23 E ico, uyu e muntu ndesubila ukutuma bwangu bwangu fye ilyo namona ifyo ifintu fili kuli ine. 24 Shikulu nga atemwa, nincetekela ukuti na ine wine nkesa bwangu.+
25 Lelo, namona ukuti mfwile ukumutumina Epafroditi,+ munyinane kabili umubomfi+ munandi kabili umushilika+ munandi, lelo uo mwatumine kabili umubomfi wenu uwa kumombela, 26 pantu alefuluka ukumumona bonse kabili nakungumana ico mwalyumfwile ukuti alilwele. 27 Ca cine, alilwele ni cikanga ne mfwa; lelo Lesa alimubelele uluse,+ na kuba, te eka fye abelele uluse, lelo na ine wine pa kuti niba no bulanda pa bulanda bubiye. 28 E ico ndeangufyanya nga nshi ukumutuma, pa kuti nga mwamumona musekelele na kabili, na ine niba no bulanda. 29 E ico mupokeleleni+ nga filya fine mupokelela Abena Kristu no kusekelela konse; kabili twalilileni ukucindika ababa ifi,+ 30 pantu pa mulandu wa mulimo wa kwa Shikulu apene afwe, pa kuba mu kapoosa mweo,+ pa kuti fye abombe imilimo imwe mwali no kumombela.+
3 Ica kulekelesha, mwe bamunyinane, twalilileni ukusekelela mu mulimo wa kwa Shikulu.+ Ukumulembela ifintu fimo fine takuntendusha, lelo ca kumucingilila.
2 Cenjeleni ku mbwa,+ cenjeleni ku bacita ububi, cenjeleni ku basembulula pa mulandu fye wa ntambi.+ 3 Pantu ifwe tuli bena kusembululwa+ kwine kwine, abalebombela Lesa ku mupashi+ wakwe kabili tutakishisha muli Kristu Yesu+ kabili tatwacetekela ifya buntunse,+ 4 nga kwingasangwa uuletontonkanya ukuti e wacetekela ifya buntunse, ninshi nine.
Nga kuli uuletontonkanya ukuti alicetekela ifya buntunse, ine nalimucila:+ 5 nasembulwilwe pa bwalenga cinekonsekonse (8),+ ndi wa mu bana ba kwa Israele, uwa mu mukowa wa kwa Benjamini,+ umuHebere uwafyalwa ku baHebere;+ kumfwa ku mafunde, nali umuFarise;+ 6 kumfwa ku kupimpa, nalecusha icilonganino;+ kumfwa ku bulungami ubwishila pa kunakila amafunde, nali uwabula akalema. 7 Na lyo line ifintu ifyali ubunonshi kuli ine, mfimona ukuti fya fye pa mulandu wa kwa Kristu.+ 8 Awe, pali ico cena, nalisumina ukulufya fyonse pa mulandu wa cuma capulamo ica kwishiba Kristu Yesu Shikulu.+ Ni pa mulandu wakwe nashiliile fyonse kabili mfimona ukuti fisooso fye,+ pa kuti fye nonke Kristu 9 no kwishibikwa ukuti ndi mubomfi wakwe, uushaba no bulungami bwandi ne mwine, ubufuma ku mafunde,+ lelo ubwishila mu citetekelo+ muli Kristu, ubulungami ubufuma kuli Lesa pa mulandu wa citetekelo,+ 10 pa kuti njishibe ena na maka ya kubuuka+ kwakwe no kuculako ifyo aculile,+ ukuinashisha ne mwine ku mfwa iyapalana ne yakwe,+ 11 pa kumona nga kuti nafika ku kubuuka+ kwa ku bafwa ukwa kubalilapo.
12 Te kutila nalipokelela icilambu kale nelyo ukutila nalipwililika kale,+ lelo ndefwaisha+ ukumona nga kuti nanonka+ ico Kristu Yesu anjitiile.+ 13 Bamunyinane, nshi-imona ngo wanonka icilambu; lelo icintu cimo ni ci: Nalilaba ifya ku numa+ no kukonkelela ifya ku ntanshi,+ 14 ndekonkelela ubuyo+ bwa cilambu+ ca bwite+ bwa ku muulu ubwafuma kuli Lesa ukupitila muli Kristu Yesu. 15 E ico, kanshi, fwe cinabwingi fwe bakosoka,+ tube no yu mutima;+ kabili nga umutima wenu walemenena kuli fimbi, Lesa akamusokolwela iyi ine mibele. 16 Awe, ukulingana ne fyo twalunduluka, natutwalilile ukulaenda bwino+ muli uyu wine musango.
17 Mwe bamunyinane, bonse pamo mulempashanya,+ kabili mulelolekesha abale-enda ukulingana ne ca kumwenako cesu.+ 18 Pantu kuli abengi, abo nalelumbula ilingi line lelo nomba mbalumbula ninshi ndelila, abale-enda nga balwani ba cimuti ico Kristu afwililepo,+ 19 kabili impela yabo bonaushi,+ na mafumo+ yabo e lesa wabo, kabili mu fya nsoni+ fyabo e mwaba ubukata bwabo, kabili babika amano yabo ku fya pano isonde.+ 20 Lelo ifwe, ubwana calo+ bwesu bwa ku muulu,+ uko tulelolela no kufwaisha+ umupusushi, Shikulu Yesu Kristu,+ 21 uukalenga cipya cipya imibili+ yesu iyasaaluka ikapalane no mubili+ wakwe uwa bukata ukulingana no kubomba+ kwa maka yakwe, no kulenga ifintu fyonse ukunakila+ ena.
4 E ico, mwe bamunyinane abo natemwa kabili abo mfuluka, mwe kusekelela kwandi kabili mwe cisote+ candi ica bukata, e fyo mwiminine ndi+ muli Shikulu, mwe batemwikwa.
2 Nakoselesha Yuodia kabili nakoselesha na Suntuki ukuti babe abaikatana+ muli Shikulu. 3 Awe, ndelomba na iwe, we mubomfi munandi,+ ukuti utwalilile ukwafwa aba banakashi ababombela pamo na ine+ mu mbila nsuma capamo na Klementi na babomfi banandi bambi,+ abo amashina+ yabo yaba mwi buuku lya mweo.+
4 Sekeleleni lyonse muli Shikulu.+ Ndetila na kabili, Sekeleleni!+ 5 Lekeni abantu bonse beshibe ukuti muli ba mutembo.+ Shikulu ali mupepi.+ 6 Mwisakamikwa nangu kamo,+ lelo muli fyonse lekeni ifyo mulelomba fishibikwe kuli Lesa+ mu kupepa no kupapaata+ pamo no kutootela; 7 no mutende+ wa kwa Lesa uwacila amatontonkanyo yonse ukalinda imitima+ yenu na matontonkanyo yenu muli Kristu Yesu.
8 Ica kulekelesha, mwe bamunyinane, muletontonkanya pali fyonse ifya cine, pali fyonse ifya mucinshi, pali fyonse ifyalungama, pali fyonse ifyasanguluka,+ pali fyonse ifyatemwikwa, pali fyonse ifyawama, pali conse icisuma icabako na pali conse ica kutasha icabako, twalilileni ukutontonkanya pali fi fintu.+ 9 Ifintu ifyo mwasambilile no kutetekela ne fyo mwaumfwile ne fyo mwamwene muli ine, mulecita ifi fine;+ na Lesa wa mutende+ akaba na imwe.
10 Apo ndi mubomfi wa kwa Shikulu, ndesekelela nga nshi ukuti nomba muletontonkanya pali ine,+ kwena mwaletontonkanyapo icine cine, lelo ni co fye mushakwete ishuko lya kulanga ifyo. 11 Te kutila ico ndelandila ni co nimbulwa, pantu nalisambilila ukuteka umutima kuli fyo fine ifilipo.+ 12 Cine cine nalishiba ifya kwikala ilyo nkwete ifinono,+ kabili nalishiba ne fya kwikala ilyo nkwete ifingi. Muli fyonse na mu mibele yonse nalisambilila inkama ya kwikuta ne ya kuba ne nsala, iya kukwata ifingi ne ya kubulwa.+ 13 Muli fyonse ndi na maka pantu kuli uulenkosha.+
14 Lelo, mwacitile icisuma pa kungafwa+ mu kucula kwandi.+ 15 Na kuba, imwe mwe bena Filipi, mwalishiba no kuti pa kutendeka kwa kubila imbila nsuma, ilyo nafumine ku Makedonia, takwali icilonganino nangu cimo icabombele pamo na ine mu mulandu wa kupeela no kupokelela, kano imwe mweka;+ 16 pantu na mu Tesalonika mwine, mwalintumiine ifyo nalekabila ukucila pa muku umo. 17 Te kutila ndefwaisha ica bupe,+ lelo ndefwaisha icisabo+ icileta ubunonshi ubwacilamo kuli imwe. 18 Lelo, ninkwata fyonse ifyakumanina kabili ifingi. Umutima wandi nawikala, apo nomba nimpokelela kuli Epafroditi+ ifyafuma kuli imwe, icena icanunkila,+ ilambo ilyapokelelwa,+ ilya kusekesha Lesa. 19 Awe, Lesa+ wandi uwakwata ifintu ifingi nga nshi+ akamupeela fyonse ifyo mukabila+ ukupitila muli Kristu Yesu. 20 Nomba kuli Lesa wesu kabili Shifwe kube ubukata pe na pe.+ Ameni.
21 Posheni+ uwa mushilo onse muli+ Kristu Yesu. Aba bwananyina abali pamo na ine bamuposha. 22 Aba mushilo bonse, lelo maka maka aba mu ng’anda ya kwa Kaisare,* bamuposha.+
23 Icikuuku ca kwa Shikulu Yesu Kristu cibe na imwe pa mulandu ne mibele iisuma iyo mwakwata.+
E kutila “Kateka.”