Ku Bena Efese

1 Ine ne Paulo, ne o Lesa asalile+ ukuba umutumwa+ wa kwa Kristu Yesu ukulingana no kufwaya kwakwe, nalembela imwe mwe ba mushilo abali mu Efese kabili aba cishinka+ muli+ Kristu Yesu:

2 Ndeti icikuuku+ no mutende+ ukufuma kuli Lesa Shifwe na Shikulu Yesu Kristu fibe na imwe.

3 Abe uwacindikwa Lesa kabili Wishi wa kwa Shikulwifwe Yesu Kristu,+ pantu pa mulandu wa kukonka Kristu, Lesa alitupeela+ amapaalo ya mupashi mu muulu.+ 4 Ilyo icalo tacilabako,+ ninshi Lesa alitusala+ kale pa kuti tube aba mushilo kabili ababula akalema+ ku cinso cakwe mu kutemwa.+ 5 Pantu Lesa atusalile+ kabela ukuba+ abana+ bakwe muli Yesu Kristu. Ni ku kutemwa fye umwine afwaile ukuti cibe fi,+ 6 pa kuti Lesa alumbanishiwe+ pa cikuuku+ cakwe icacindama ico atulangile ukupitila mu Mwana wakwe uwatemwikwa.+ 7 Kristu alitulubula ku mulopa+ wakwe, kabili umulopa wakwe walenga ukuti tubelelwe+ uluse pa membu shesu, ukulingana no bukulu bwa cikuuku ca kwa Lesa.+

8 Atulangile icikuuku icikalamba nga nshi no kutupeela amano+ yonse no kwiluka, 9 pantu afwaile ukuti twishibe inkama+ ya kufwaya kwakwe. Inkama ya kwa Lesa ilomfwana no kufwaya kwakwe uko apangile mu mano yakwe umwine+ 10 ukwa kubikako ubutungulushi+ ilyo inshita yafika,+ no ku kufwaya kwakwe kwa kulonganya+ na kabili ifintu fyonse muli Kristu,+ ifya mu muulu+ ne fya pano isonde.+ Cine cine, muli ena, 11 e kutila muli uyo atusaliile ukuba impyani,+ pantu Lesa atusalile kabela ukulingana no kufwaya kwakwe umwine uucita ifintu fyonse umo alefwaila,+ 12 pa kuti muli ifwe, fwe babalilapo ukusubila muli Kristu,+ e mo tulumbanishishe Lesa no kumupeela umucinshi.+ 13 Lelo na imwe mwasubile muli Kristu ilyo mwaumfwile icebo ca cine,+ e kutila imbila nsuma iya kumupususha.+ Ilyo mwatetekele Kristu, Lesa amupeele+ umupashi wa mushilo+ uo bamulaile, icishibilo ca kulanga ukuti muli bantu ba kwa Lesa. 14 Umupashi wa mushilo e cikatilo+ icilenga tushininkishe ukuti Lesa akatupeela ico atulaya ukupyana,+ mpaka akapwishe umulimo wa kulubula+ abantu bakwe.+ Ne ci cikalenga bakalelumbanya ubukata bwakwe.

15 E ico na ine, ukutula apo naumfwilile ukuti mwalitetekela Shikulu Yesu na ba mushilo bonse,+ 16 nshaleka ukutootela Lesa pa mulandu wa imwe. Ndatwalilila ukumupepelako,+ 17 ukuti Lesa wa kwa Shikulwifwe Yesu Kristu, umwine wa bukata, amupe umupashi wa mano+ kabili ukuti mumfwikishe ifyo asokolola.+ 18 Kabili ndapepa pa kuti amenso+ ya mitima yenu yamone,+ pa kuti mwishibe isubilo+ ilyo amwitileko, no bukankaala+ bwa bukata ubo asungila aba mushilo ku kuba ubupyani bwabo.+ 19 Kabili ndalomba no kuti mwishibe ifyo amaka+ yakwe yakula ayabomba muli ifwe fwe batetekela. Amaka yakwe ayabomba+ muli ifwe, maka ayakalamba nga nshi, 20 ayo abomfeshe pa kubuusha Kristu ku bafwa+ no kumwikalika ku kwa kulyo+ kwakwe mu muulu.+ 21 Nomba alimucindamika, amupeela ubufumu ubwacila sana ubuteko bonse no butungulushi na maka na bukateka+ ne shina lyonse ililumbulwa,+ muli buno bwikashi,+ e lyo na mu bwikashi ubukesa.+ 22 Kabili Lesa alengele ukuti fyonse fibe pe samba lya makasa+ ya kwa Kristu, kabili amulengele ukuba umutwe wa fintu+ fyonse ku cilonganino. 23 Icilonganino e mubili+ wa kwa Kristu, kabili Kristu e wakwata+ amaka pa cilonganino conse.+

2 Kabili ni mwe Lesa alengele aba mweo nangu ca kutila kale mwali abafwa pa mulandu wa filubo fyenu ne membu,+ 2 ifyo mwalecita kale ukulingana no bwikashi+ bwa cino calo, ukulingana na kateka+ wa bufumu bwa mu lwelele, e kutila umupashi+ uyo nomba ubomba mu bana bacintomfwa.+ 3 Kwena pa nshita imo na ifwe e fyo twali lilya twalekonkelela ulunkumbwa lwa mubili wesu,+ twalecita ifyo imibili+ yesu na matontonkanyo yesu fyalefwaya, kabili ku buntunse twali abana ba bukali+ ifyo na bambi baba. 4 Lelo Lesa, uwakwatisha uluse,+ kabili pa mulandu wa kutemwa kwakwe ukukalamba uko atutemenwe,+ 5 atulengele ukuba aba mweo pamo na Kristu, na lintu fye twali abafwa mu membu+—ni ku cikuuku ca kwa Lesa mwapusukila+— 6 kabili atubuushishe+ capamo nankwe no kutwikalika capamo mu muulu+ apo tuli ba kwa Kristu Yesu. 7 Ico Lesa acitile ifyo, ni pa kuti mu nshita iikesa+ akalange ifyo icikuuku+ atukwatila cakula nga nshi ukupitila mu luse lwakwe kuli ifwe pa+ mulandu wa kwa Kristu Yesu.

8 Pantu ni kuli ci cikuuku ca kwa Lesa ico mwatetekela e ko mwapusukila;+ kabili ici tacafuma kuli imwe,+ bupe fye bwa kwa Lesa.+ 9 Tacafuma mu milimo+ iyo, pa kuti umuntu nangu umo eba na pa kuitakishisha.+ 10 Pantu e watupangile+ kabili twapangilwe+ muli+ Kristu Yesu ku kubomba imilimo isuma,+ iyo Lesa apekanishishe libela+ ukuti tulebomba.

11 E ico muleibukisha ukuti kale mwali abena fyalo;+ abantu abaita abene ati “abasembululwa,” pa mulandu fye ne fyo bacita ku mibili yabo, balemwita ati, “abashasembululwa”+— 12 kabili muleibukisha ukuti pali ilya nshita tamwaishibe Kristu,+ mwali abapaatuka+ ku bwina Israele kabili apo mwali abeni, tamwalimo mu fipangano umo Lesa alaile+ ifyo aali no kupeela abantu bakwe. Kabili mwaleikala ababula isubilo+ kabili ababulwa Lesa muli ici calo.+ 13 Lelo nomba mwe bakonka Kristu Yesu, mwe batalwike kuli Lesa kale, umulopa+ wa kwa Kristu walimupalamika kuli ena. 14 Pantu ena alituletela umutende,+ e walengele bonse+ abaYuda na bena fyalo ukuba umo+ no kubongolola icibumba*+ ca pa kati icabapaatukenye.+ 15 Ilyo apeele umubili+ wakwe ilambo afumishepo ubulwani,+ no bu bulwani mafunde, umwali ifyebo fya kukonka ne fipope,+ pa kuti alenge abaYuda na bena fyalo+ ukuba umuntu+ umo umupya no kuba no mutende pa kati kabo pa kuti babe umo na Kristu;16 no kuti mu mfwa yakwe iya pa cimuti+ akumbinkanye+ abaYuda na bena fyalo mu mubili+ umo no kubabwesesha bonse kuli Lesa, pantu umwine ali nafumyapo ubulwani.+ 17 Kabili alishile no kubila imbila nsuma ya mutende+ kuli imwe, mwe bali ukutali, kabili abilile umutende na ku bali mupepi,+ 18 pantu ni muli Kristu e mo ifwe bonse, abaYuda na bena fyalo,+ tupalamina+ kuli Shifwe mu mupashi umo.+

19 E ico, kanshi, nomba tamuli beni+ kabili abalebeshi,+ lelo muli bakaya+ pamo na ba mushilo+ kabili muli ba mu ng’anda+ ya kwa Lesa, 20 kabili mwakuulwa pa mufula+ wa batumwa+ na bakasesema,+ e lyo Kristu Yesu umwine aba e libwe lya pa koona ilya mu mufula wa kukuulapo.+ 21 Muli Kristu e mo icikuulwa conse, pa kulundinkana bwino bwino,+ cilekuulwa ku kuba itempele lya mushilo ilya kwa Yehova.+ 22 Na imwe bene mwe bena fyalo, muli Kristu e mo+ mulekuulilwa pamo ukuba ica kwikalamo Lesa mu mupashi.+

3 Ni pali uyu wine mulandu ine, ne Paulo, umufungwa+ wa kwa Kristu Yesu pa mulandu wenu, mwe bena fyalo+— 2 kwena mufwile mwalyumfwa umulimo+ wa cikuuku ca kwa Lesa ico napeelwe pa mulandu wenu, 3 ukuti ukupitila mu fyo bansokolwelele, inkama ya kwa Lesa yalengelwe ukwishibikwa kuli ine,+ ifyo nalembele kale ifinono. 4 Pali uyu mulandu imwe, ilyo mwabelenga, kuti mwailuka+ ifyo naishibapo pa nkama+ ya kwa Lesa iya muli Kristu. 5 Mu nkulo shapita iyi nkama+ tayalengelwe ukwishibikwa ku bana ba bantu nge fyo yasokoloka+ nomba mu mupashi ku batumwa bakwe na kuli bakasesema+ bakwe aba mushilo, 6 pa kuti abena fyalo babe impyani shinensu kabili ifilundwa fya mubili+ umo wine kabili abalelolela pamo na ifwe ubulayo+ muli Kristu Yesu ubwaishiile mu mbila nsuma. 7 Nabele umubomfi+ wa iyi nkama ukulingana ne cikuuku ca kwa Lesa. Ampeele ubu bupe ku kulanga amaka yakwe.+

8 Ine, ne muntu uwacepesha+ pa ba mushilo bonse, napeelwe ici cikuuku+ ca kwa Lesa, ku kuyabila ku bena fyalo+ imbila nsuma pa bukankaala+ bushingapimwa ubwa kwa Kristu 9 no kulenga abantu bamone ifyo inkama+ ya kwa Lesa ilesokoloka+ iyo ukutula ku kale sana yafishilwe muli Lesa, uwabumbile ifintu fyonse.+ 10 E pa kuti nomba mu kubomfya icilonganino+ cakwe, bakateka na ba maka+ bonse aba mu muulu beshibe amano ya kwa Lesa+ aya misango ne misango, 11 ukulingana no kufwaya kwakwe ukushakaaluke uko apangile muli Kristu+ Yesu Shikulwifwe, 12 muli uyu wine e mo twabela no kushipa kabili e mo tupalamina+ kuli Lesa pa kucetekela ena. 13 E ico ndemulomba ukukananenuka pa mulandu wa bucushi+ ubu ubumuponena pa mulandu wenu, pantu ifi fya kumuletela ubukata.

14 Pali uyu mulandu mfukamina+ Shifwe,+ 15 kuli uyo ulupwa+ lonse mu muulu na pano isonde lwainikwako ishina,+ 16 kabili ndelomba Lesa ukuti apo e wakwatisha+ ubukata alenge imitima+ yenu ukushipa ukupitila mu mupashi wakwe,+ 17 pa kuti Kristu aleikala mu mitima yenu ukupitila mu citetekelo cenu no kutemwa.+ Kabili ndepepa ukuti mube abalimbwa+ kabili abakuulwa pa mufula,+ 18 pa kuti mukwatishe amaka ya kulingulula+ pamo na ba mushilo bonse ifyaba ubwipi no butali no kulepa no kushika kwa cine,+ 19 no kwishiba ukutemwa kwa kwa Kristu+ ukwacila pa kwishiba, ukuti mwisulemo+ imibele ya kwa Lesa yonse.

20 Kanshi natulecindika uwaba na maka ya kucita fyonse no kulundapo ukucila na pa fyo twingalomba nangu pa fyo twingatontonkanya,+ ukulingana na maka yakwe ayabombela+ muli ifwe, 21 kuli ena kube ubukata mu cilonganino na muli Kristu Yesu ku nkulo shonse umuyayaya umuyayaya.+ Ameni.

4 E ico ine, ne mufungwa+ muli Shikulu, ndemupapaata ukuti muleikala ukulingana+ no bwite ubo Lesa amwitako.+ 2 Muleicefya+ nga nshi kabili muleba abafuuka, muleshishimisha+ no kushipikishanya mu kutemwa.+ 3 Mule-esha nga nshi ukusungilila ukwikatana uko umupashi wamupeela mu mutende uwikatanya.+ 4 Kwaba umubili+ umo, no mupashi+ umo, filya fine mwasubile mwi subilo+ limo ilyo mwaitilwe; 5 Shikulu+ umo, icitetekelo+ cimo, ulubatisho+ lumo; 6 Lesa+ umo kabili Wishi wa bantu bonse, uwaba pa muulu wa bonse kabili uubombela muli bonse kabili uwaba muli bonse.

7 Awe ifwe bonse umo umo twapokelele icikuuku+ ca kwa Lesa ukulingana ne fyo Kristu atwakenye ici ca bupe.+ 8 E ico atila: “Ilyo aninine ukuya mu muulu asendele bankole; apeele ne fya bupe ku bantu.”+ 9 Nomba ishiwi lya kuti “aninine,”+ lyalola mwi nga te kutila abalile aikila pa nshi, e kutila, pano isonde?+ 10 Uyu wine uwaikile e waninine+ apula na mu myulu+ yonse, pa kuti afikilishe+ ifintu fyonse.

11 Kabili apeele ku cilonganino bamo ukuba abatumwa,+ bakasesema,+ bakabila ba mbila nsuma,*+ bakacema na bakasambilisha,+ 12 ku kulungika+ aba mushilo, ku kubombela bambi, ku kukuula umubili wa kwa Kristu,+ 13 mpaka bonse twikatane mu citetekelo na mu kwishiba bwino bwino Umwana wa kwa Lesa, pa kuti tube nga bakalamba,+ ukufika ku ciimo ca kwa Kristu;+ 14 pa kuti twiba na kabili nga bana abanono, kabili twilasendwa+ nga ku mabimbi nangu ukutwalwa uku no ku, ku mwela onse uwe sambilisho+ ku bucenjeshi+ bwa bantu, ku longolo lwa mapange ayalubana. 15 Lelo pa kuba abalanda icine,+ mu kutemwa tukule+ muli fyonse ukupashanya Kristu uuli e mutwe+ wesu. 16 Muli ena e mo umubili+ onse, walundinkana bwino bwino no kulengwa ukubombela pamo mu mfyufyu shonse. E lyo cila cilundwa na co cilabomba umulimo wa ciko pa kuti umubili wikatane kabili umubili onse ulakulilako no kukoselako mu kutemwana.+

17 E ico, ndesosa ici no kumukonkomesha muli Shikulu, nati, mwilaenda ifyo abena fyalo+ benda mu buwelewele bwa mano yabo,+ 18 pantu amatontonkanyo+ yabo yaba mu mfifi, kabili balitaluka+ ku mweo uufuma kuli Lesa, pa mulandu wa kukanaishiba+ nangu kamo, kabili pa mulandu wa kutalama+ kwa mitima yabo. 19 Pa kuba abakunkuma icine cine,+ baipoosele mu mibele ya nsoni+ pa kuti balecita ifyakowela+ fyonse no kucishamo.+

20 Lelo imwe te fyo mwasambilile Kristu,+ 21 nga, cine cine, e o mwaumfwile kabili muli ena e mo mwasambilishiwe,+ ifyo icine+ caba muli Yesu. 22 Mwasambilishiwe ukuti mufuule ubuntu+ bwa kale ubwalingana ne mibele yenu iya kale kabili ubuleonaika+ pamo no lunkumbwa+ lwa buko ulwa bucenjeshi; 23 no kuleka ukutontonkanya ifya kale lelo ukulatontonkanya ifipya,+ 24 no kuti mufwale+ ubuntu+ bupya ubwalengelwe+ ukulingana no kufwaya kwa kwa Lesa mu bulungami+ bwa cine na mu cishinka.

25 E ico, nomba apo mwalipoosa ubufi,+ mulelanshanya icine,+ pantu tuli filundwa fya mubili umo.+ 26 Kalipeni, lelo mwibembuka;+ mwileka akasuba kawe mucili abakalipa,+ 27 kabili mwipeela Satana Kaseebanya apa kwikala.+ 28 Uwibile eiba na kabili,+ lelo abombeshe, abombe umulimo+ usuma ku minwe yakwe, pa kuti akwate ica kupeelako uushikwete.+ 29 Mwileka amashiwi yabola yafume mu kanwa kenu,+ kano amashiwi ayasuma aya kukuula ukulingana no kukabila, pa kuti yengakuula abaleumfwa.+ 30 Kabili, mwilalenga umupashi wa mushilo uwa kwa Lesa ubulanda,+ muli uyo mwashininkishishako+ ukuti muli bana ba kwa Lesa abo akalubula pa bushiku bwa kulubulwa.+

31 Mwilaba ne mpatila+ ku banenu, muleke icipyu no bukali no kootoka no musaalula+ pamo no bubi bonse.+ 32 Lelo mubelane icikuuku,+ mube aba mitima ya nkumbu,+ abaitemenwa ukubelelana uluse filya na Lesa aitemenwe ukumubelela uluse muli Kristu.+

5 E ico, mulepashanya Lesa,+ apo muli bana bakwe abo atemwa, 2 kabili muletemwana,+ filya na Kristu amutemenwe+ no kuituula pa mulandu wenu ngo mutuulo+ kabili nge lambo kuli Lesa ku kuba icena icinunkila.+

3 Ubulalelale+ no kukowela kwa musango onse nelyo ukufwaisha ukukwata ifingi+ te kwesha no kulafilumbula apo muli,+ filya fine cifwile ukuba ku bantu ba mushilo.+ 4 Te kwesha ukuba ne myendele+ ya nsoni nangu imilandile ya buwelewele nangu imipuulwe yabipa,+ ifintu ifishawama, kano fye ukulatootela Lesa.+ 5 Pantu mwalimona no kwishiba bwino bwino ici, ukuti uwa bulalelale+ nangu uwakowela nangu uufwaisha ukukwata ifingi+—e kutila kapepa wa tulubi—takengile mu bufumu bwa kwa Kristu no bwa kwa Lesa.+

6 Mwileka umuntu nangu umo amubepe ku mashiwi ya fye,+ pantu ni pali ifi fine fintu ubukali bwa kwa Lesa buleishila pa bana bacintomfwa.+ 7 E ico mwiampana na bo;+ 8 pantu kale mwali imfifi,+ lelo nomba muli lubuuto+ muli Shikulu. Mule-enda nga bana ba lubuuto, 9 pantu ulubuuto lwena luleta fye ifisuma fyeka fyeka, no bulungami, ne cishinka.+ 10 Ilyo mushilacita icintu mulebala mwamona nga kuti casekesha+ Shikulu; 11 kabili mwicita+ na bo imilimo iishitwala iya mfifi,+ kano ukukalipila+ kwena mulebakalipila, 12 pantu ifyo bacita mu bumfisolo ca nsoni ukufishimika.+ 13 Nomba ifintu fyonse ifisokoloka,+ lubuuto e lufisokolola.+ 14 E ico atila: “Shibuka,+ we uleele, no kwima ku bafwa,+ na Kristu akabalikila+ pali iwe.”

15 E ico cenjeleni, mwilaenda+ kwati bawelewele lelo mule-enda nga ba mano, 16 mulebomfya bwino inshita+ yonse iyo mwashukila, pantu ishi nshiku sha bubifi.+ 17 Pali uyu mulandu mwiba nga bashashilimuka, lelo muleiluka+ icaba ukufwaya+ kwa kwa Yehova. 18 Kabili, mwilakolwa+ umwangashi, uulenga abantu ukuipoosaika,+ lelo muleisulamo umupashi.+ 19 Ilyo mulelanshanya mulebomfya amashiwi ya mu malumbo,+ kabili mulelumbanya+ Lesa mu nyimbo shakwe. Muleimbila+ Yehova no kumulumbanya+ mu mitima yenu, 20 mwi shina lya kwa Shikulwifwe Yesu Kristu lyonse muletootela+ pali fyonse kuli Lesa wesu kabili Shifwe.

21 Mulenakilana+ mu kutiina Kristu. 22 Abakashi banakile+ abalume babo kwati ni Shikulu balenakila, 23 pantu umulume e mutwe wa mukashi+ wakwe ifyo na Kristu e mutwe wa cilonganino,+ pantu e mupusushi wa mubili uyu. 24 Na kuba, filya icilonganino cinakila Kristu, e fyo na bakashi balenakila abalume babo muli fyonse.+ 25 Mwe balume, muletemwa abakashi+ benu, filya na Kristu atemenwe icilonganino no kuipeela pali cena,+ 26 pa kuti acilenge ukuba ica mushilo,+ ukucisangulwila ku menshi ya mu musambilo, e kutila ku cebo ca kwa Lesa,+ 27 ukuti aituulile umwine icilonganino icasambika,+ icabulamo ifiko atemwa inkanshi nangu akabi akali konse, lelo ukuti cibe ica mushilo kabili icabula akalema.+

28 E fyo na balume bafwile ukulatemwa abakashi babo nge mibili yabo. Uwatemwa umukashi wakwe ali-itemwa umwine, 29 pantu takwatala akuba umuntu nangu umo uwapata umubili wakwe; lelo alauliisha no ku-usunga bwino,+ filya Kristu na o aliisha no kusunga bwino icilonganino, 30 pantu tuli filundwa fya mubili wakwe.+ 31 “E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo.”+ 32 Iyi nkama+ ya kwa Lesa ikalamba. Nomba ndelanda pali Kristu ne cilonganino.+ 33 Lelo, na imwe umo umo, onse atemwe umukashi+ wakwe ifyo aitemwa umwine; umukashi na o abe na katiina+ ku mulume wakwe.

6 Mwe bana, muleumfwila abafyashi+ benu ukulingana+ ne fyo Shikulu afwaya, pantu ici e calungama:+ 2 “Ulecindika wiso na noko”;+ ilili e funde lya ntanshi ilyaba ne ci cilayo:+ 3 “Pa kuti ifintu fikuwamine no kuti wikale nshiku ishingi pano isonde.”+ 4 Na imwe, mwe bashibo, mwilakalifya abana+ benu, lelo mulebakusha+ ukulingana no kusalapula+ kwa kwa Yehova no kukonkomesha+ kwakwe.

5 Mwe babomfi, muleumfwila abamwingisha incito,+ mulebacindika no kuba na katiina kuli bena.+ Mulecita ifi ne mitima ya cishinka, nga kuli Kristu, 6 te ku kufwaya fye ukumonwa pa kuti musekeshe abantu,+ lelo nga basha ba kwa Kristu, abacita ukufwaya kwa kwa Lesa no mweo onse.+ 7 Mulebomba no mutima uusuma, nga kuli Yehova,+ kabili te ku bantu iyo, 8 pantu mwalishiba ukuti cila muntu, icisuma conse ico acita, akalambwilwapo kuli Yehova,+ nampo nga musha atemwa muntungwa.+ 9 Na imwe mwe bashikulwibo, mulecita ifyo fine kuli bena, mwilabatiinya,+ pantu mwalishiba ukuti imwe na bena+ mwakwata fye Shikulwinwe umo uwaba mu muulu, kabili kuli ena takwaba kapaatulula.+

10 Ica kulekelesha, mulekosa+ muli Shikulu na mu maka+ ya bukose bwakwe. 11 Fwaleni ifya bulwi+ fyonse ifya kwa Lesa ukuti mube na maka ya kwiminina ndi ku kulwisha imicenjelo+ ya kwa Satana Kaseebanya; 12 pantu ukushomboka kwesu,+ te kwa kushomboka na bantu bakwata umubili wa munofu no mulopa, lelo kwa kushomboka na mabuteko,+ na bamulopwe,+ na bakateka+ ba calo cino icaba mu mfifi, ne mipashi+ ibifi iyaba mu muulu. 13 Apo cili ifi buuleni ifya bulwi fyonse ifya kwa Lesa,+ pa kuti mube na maka ya kulwisha umulwani mu bushiku bwa bubifi, kabili ilyo mwaipangasha bwino bwino, mwiminine ndi.+

14 E ico, iminineni ndi, abaikaka+ icine+ mu misana yenu, kabili abafwala ubulungami+ nge ca kucinga icifuba, 15 na ku makasa+ yenu fwaleniko insapato sha mbila nsuma iya mutende.+ 16 Icacindamisha, buuleni inkwela iikalamba iya citetekelo,+ e mo muli no kushimisha imifwi yonse iya mulilo iya mubifi.+ 17 Buuleni ne cisote+ ce pusukilo, no lupanga+ lwa mupashi,+ e kutila, icebo ca kwa Lesa.+ 18 Pa nshita imo ine, mulepepa lyonse kuli Lesa mu mupashi,+ ukupepa umusango onse uwa mapepo+ ne mipapaatile. Kabili pa kucita ico muleba abalola inshita yonse no kupapaatilako aba mushilo bonse, 19 pamo pene na ine, ukuti mpeelwe amaka ya kusosa+ no kulanda ukwabula umwenso+ ku kulenga inkama ya kwa Lesa iya mbila nsuma ishibikwe.+ 20 Pali nomba ndi mu cifungo pa mulandu wa kuti ndi nkombe+ ya kwimininako imbila nsuma. Kanshi mulempepelako pa kuti nande pa mbila nsuma no kushipa ifyo mfwile ukulanda.+

21 Nomba pa kuti na imwe mwishibe ifilencitikila, e kutila ifyo ndi, Tukiki,+ munyinefwe watemwikwa kabili umubomfi wa cishinka muli Shikulu, akamwishibisha fyonse.+ 22 Ndemutuma kuli imwe pali uyu wine mulandu, ukuti mwishibe ifiletucitikila no kuti asansamushe imitima yenu.+

23 Mwe bamunyinefwe mube no mutende no kutemwa ne citetekelo ukufuma kuli Lesa Shifwe na Shikulwifwe Yesu Kristu. 24 Icikuuku+ ca kwa Lesa cibe kuli bonse abatemwa Shikulwifwe Yesu Kristu ukutemwa ukushipwa.