Ku Bena Galatia

1 Ine ne Paulo,+ ne mutumwa,+ uushasalilwe na bantu nangu ukusontwa no muntu, lelo ne wasalilwe na Yesu Kristu+ na Lesa Shifwe,+ uwaimishe Yesu ku bafwa,+ 2 ine pamo na ba bwananyina bonse abali na ine,+ nalembela imwe mwe filonganino fya ku Galatia, nati:+

3 Icikuuku ca kwa Lesa no mutende+ ukufuma kuli Lesa Shifwe na kuli Shikulu Yesu Kristu fibe na imwe. 4 Aipeele pa mulandu wa membu+ shesu pa kutila atupokolole kuli buno bwikashi+ bwabipa ukulingana no kufwaya+ kwa kwa Lesa wesu kabili Shifwe, 5 kuli ena kube ubukata umuyayaya.+ Ameni.

6 Napapa nga nshi ifi muleangufyanya ukufuma ku wamwitile+ mu cikuuku+ ca kwa Kristu, no kuya ku mbila nsuma ya musango umbi.+ 7 Lelo te mbila nsuma imbi; ni co fye kuli bamo abalemufulunganya+ no kufwaya ukwalula imbila nsuma ya kwa Kristu.+ 8 Lelo, nga ca kuti umo pali ifwe nelyo malaika ukufuma ku muulu abila kuli imwe imbila nsuma iyapusana ne yo twabilile kuli imwe, abe uwatiipwa.+ 9 Nge fyo tusosele, ndesosa na kabili ukuti, Onse uulebila kuli imwe imbila nsuma iyapusana ne yo mwasumine,+ abe uwatiipwa.

10 Na kuba, bushe bantu ndefwaya ukupapaata atemwa ni Lesa? Nelyo bushe ndefwaya ukusekesha abantu?+ Nga ncili ndesekesha abantu,+ te kuti mbe umusha wa kwa Kristu.+ 11 Pantu ico ndefwaya mwishibe, mwe bamunyinane, ca kuti imbila nsuma iyo nabilile te ya buntunse;+ 12 pantu nshapokelele iyi mbila nsuma ku muntu iyo, kabili takwali uwansambilishe, lelo Yesu Kristu e waisokolwele kuli ine.+

13 Kwena, mwalyumfwile ifyo nali kale ilyo nalekonka ubuYuda,+ ukuti nalecusha+ nga nshi icilonganino ca kwa Lesa no kuconaula,+ 14 kabili nalelunduluka bwangu bwangu mu buYuda ukucila abengi aba mushinku wandi pa baYuda banandi,+ pantu nalicilile bonse ukupimpila+ intambi+ sha fikolwe fyandi. 15 Lelo lintu Lesa, uwanengele ukuti mfyalwe no kunjita+ mu cikuuku cakwe,+ amwene ukuti cili fye bwino 16 ukusokolwela Umwana wakwe muli ine,+ pa kuti mbile imbila nsuma pali Yesu Kristu ku bena fyalo,+ nshaile apo pene ku kuyaipusha umuntu nangu umo ifya kucita.+ 17 Kabili nshaile ku Yerusalemu ku babalilepo ukuba abatumwa,+ lelo naile ku Arabia, kabili nabweleele ku Damaseke.+

18 Nomba pa numa ya myaka itatu naile ku Yerusalemu+ ku kutandalila Kefasi,+ kabili naikele nankwe inshiku ikumi na shisano (15). 19 Lelo nshamonene no mutumwa umbi, kano fye Yakobo+ munyina+ wa kwa Shikulu. 20 Ifi ndemulembela, fya cine. Moneni! Ndelanda icishinka pa menso ya kwa Lesa.+

21 Pa numa ya ifi, naile+ ku calo ca Siria na ku calo ca Kilikia. 22 Lelo abali mu filonganino fya Bena Kristu ifya ku Yudea tabatalile abamonapo;+ 23 baleumfwa fye ukuti: “Uwaletucusha+ kale nomba alebila imbila nsuma iya mipepele iyo kale aleonaula.”+ 24 Awe batendeke ukucindika+ Lesa pa mulandu wa ine.

2 Awe pa numa ya myaka ikumi na ine (14), naile na kabili ku Yerusalemu+ pamo na Barnaba,+ na Tito na o nalimusendele. 2 Lelo ico nailileko mulandu wa fyo bansokolwelele.+ Kabili nalondolwelele+ ku mbali abaali abalumbuka imbila nsuma iyo ndeshimikila mu bena fyalo, epali imilimo ndebomba+ ne yo nabomba kale yaba ya kuicusha fye.+ 3 Na Tito,+ uo nali nankwe, nangu ena aali muGriki, tapatikishiwe ukusembululwa.+ 4 Lelo pa mulandu wa ba bwananyina+ ba bufi abaishile mu bumfisolo,+ abasokelele nge nengu ku kwisalengula ubuntungwa+ bwesu ubo twakwata muli Kristu Yesu, ukuti batutwale mu busha+— 5 tatwanakiileko kuli aba bantu,+ nangu fye ni pa kashita akanono, pa kuti icine+ ca mbila nsuma citwalilile ukuba na imwe.

6 Lelo ku balemoneka ukucindama+—ifyo bali kale te cintu kuli ine+—pantu Lesa takonka ifyo umuntu amoneka+—kuli ine, na kuba, abo bantu balumbuka takuli icipya ico bansambilishe. 7 Lelo, bena, ilyo bamwene ukuti nalipeelwe+ umulimo wa kubila imbila nsuma ku bashasembululwa,+ ifyo na Petro apeelwe umulimo wa kubila ku basembululwa+— 8 pantu uwapeele Petro amaka ya kuba umutumwa ku basembululwa na ine+ e wampeela amaka ya kuba umutumwa ku bena fyalo; 9 cine cine, ilyo baishibe icikuuku+ ca kwa Lesa ico napeelwe,+ Yakobo+ na Kefasi na Yohane, abaishibikwe ukuti ni nceshi+ sha cilonganino, baposeshe ine na Barnaba+ ku kuboko kwa ku kulyo ku kulanga ukuti bonse tulebomba fye umulimo umo wine,+ kabili batwebele ukuti tuye ku bena fyalo, e lyo bena baye ku basembululwa. 10 Cimo fye ico batulombele ca kuti tuleibukisha abapiina.+ Ici cine e co na ine njesha ukucita.+

11 Lelo, ilyo Kefasi+ aishile ku Antioke,+ nalimwebelepo fye ukwabula ukupita na mu mbali, pantu alilufyenye.+ 12 Pantu ilyo abafumine kuli Yakobo+ tabalafika, aleliila+ pamo na bena fyalo; lelo ilyo bafikile, alifumineko no kuipaatulako, pantu aletiina+ abasembululwa.+ 13 AbaYuda bambi na bo balimukonkele muli ubu bumbimunda,+ ica kuti na Barnaba+ wine awilamo mu bumbimunda bwabo. 14 Lelo ilyo namwene ukuti tabalekonka icine ca mbila nsuma,+ naebele Kefasi pa menso ya bonse nati:+ “Iwe, nangu uli muYuda, wikala ifyo abena fyalo bekala, kabili te pamo nga baYuda, nomba cinshi ico ulefwaila abena fyalo ukulaikala nge fyo abaYuda bekala?”+

15 Ifwe fwe bafyalwa+ fye abaYuda, kabili fwe bashili bena fyalo ababembu,+ 16 twaishiba ukuti umuntu talungamikilwa+ ku kusunga amafunde, lelo alungamikilwa pa kutetekela+ Kristu Yesu, ifyo na ifwe twatetekela Kristu Yesu, pa kuti tulungamikilwe pa mulandu wa kutetekela Kristu,+ te pa mulandu wa kusunga amafunde iyo, pantu umuntu nangu umo takalungamikilwe pa kusunga amafunde.+ 17 Nomba ifwe, fwe bafwaya ukulungamikilwa muli Kristu,+ nga batusanga ukuti tuli babembu,+ bushe ninshi Kristu e wafwilisha+ abantu ukubembuka? Nakalya! 18 Pantu nga nabwekeshapo ukukuula ifyo nabongolwele,+ ninshi nailanga fye ukuti ndi mpulamafunde.+ 19 Awe ine, mu mafunde+ e mo nafwilile ukuti nitekwa ku mafunde, pa kutila mbe uwa mweo kuli Lesa.+ 20 Nalipoopelwa pamo na Kristu.+ Te ine ndi no bumi+ kabili iyo, lelo ni Kristu e uli no bumi muli ine.+ Cine cine, ubumi ubo ndi na bo,+ ndi na bo pa mulandu wa kutetekela umwana wa kwa Lesa, uwantemenwe no kuipeela pa mulandu wa ine.+ 21 Nshilesuula icikuuku ca kwa Lesa;+ pantu ubulungami nga bwishila mu mafunde,+ ninshi Kristu afwilile apa fye.+

3 Mwe bena Galatia impelwa mano, nani uwamubeleleke,+ mwe bo balondolwelele bwino bwino, ica kutila na menso yenu yali nga yamwene Yesu Kristu napoopelwa pa cimuti?+ 2 Kamwipusheko fye icintu cimo: Bushe mwapokelele umupashi+ pa mulandu wa kusunga amafunde+ nelyo ni pa mulandu wa kutetekela ifyo mwaumfwile?+ 3 Bushe e fyo mwapelwa mano ifi? Pa numa ya kutendeka ukucita ukufwaya+ kwa kwa Lesa bushe nomba mulefwaya ukulacita ukufwaya kwenu?+ 4 Bushe mwaculile ifi fyonse apa fye?+ Nshilemona ukuti mwaculile apa fye. 5 E ico, uumupeela umupashi+ no kucita ifya maka+ muli imwe, bushe ni co mulasunga amafunde e co acitila ifi atemwa ni pa mulandu wa kutetekela ifyo mwaumfwile? 6 Filya fine Abrahamu “atetekele Yehova, kabili Lesa amumwene ukuti mulungami.”+

7 Cine cine mwalishiba ukuti abatetekela+ e bana ba kwa Abrahamu.+ 8 Awe amalembo ya mushilo pa kumwena kabela ukuti Lesa akalungamika abena fyalo pa mulandu wa citetekelo, yabilile imbila nsuma kuli Abrahamu, ayati: “Muli iwe e mo inko shonse shikapaalilwa.”+ 9 E ico abatetekela balepaalilwa+ pamo na Abrahamu wa citetekelo.+

10 Pantu abo bonse abashintilila pa mafunde balitiipwa; pantu calembwa ati: “Abe uwatiipwa onse uushikonka fyonse ifyalembwa mu cimfungwa ca mafunde no kuficita.”+ 11 Kabili, cailanga fye ukuti takuli umuntu uo amafunde yengalungamika+ kuli Lesa, pantu “uwalungama akaba no mweo pa mulandu wa citetekelo cakwe.”+ 12 Awe amafunde tayafwaya ukuti umuntu atetekele, lelo “uuyakonka akaba no mweo.”+ 13 Ilyo Kristu atushitile,+ atulubwile+ ku citiipu ca mafunde pa kutiipwa+ umwine pa mulandu wesu, pantu calembwa ati: “Abe uwatiipwa onse uwakulikwa pa cimuti.”+ 14 Ne ci cacitike pa kuti muli Yesu Kristu ipaalo, ilyo balaile Abrahamu lifike na ku bena fyalo+ na pa kuti mu kutetekela+ e mo tupokelele umupashi+ uo Lesa alaile.

15 Mwe bamunyinane, ndelanda pa ficitika: Abantu nga bapangana icipangano no kucikosha bacikosha, tapali nangu umo uwingonaula ico cipangano nelyo ukulundapo.+ 16 Awe ifilayo fyalailwe kuli Abrahamu+ na ku mwana+ wakwe. Ilembo talyatile: “Na ku bana,” kwati ni ku bengi, lelo nga kuli umo:+ “Na ku mwana+ obe,” uyo e Kristu.+ 17 Kabili, ndetila: Pa lwa cipangano ico Lesa akoseshe kale,+ amafunde ayaishilebapo pa numa ya myaka imyanda ine na makumi yatatu (430)+ tayanashishe icipangano, ica kuti no bulayo bufumepo.+ 18 Pantu icalo nga cabelako pa mulandu wa mafunde, ninshi te ca mu cilayo+ kabili iyo; lelo Lesa alangile icikuuku pa kucipeela kuli Abrahamu mu cilayo.+

19 Nga kanshi, cinshi aya mafunde yabeleleko? Yalundilweko ku kulenga bumpulamafunde bumoneke,+ mpaka umwana akese+ uo balaile; kabili yapeelelwe muli bamalaika+ mu minwe ya kwa kawikishanya.+ 20 Awe kawikishanya takabilwa nga pali fye umuntu umo, lelo Lesa aba fye umo.+ 21 E ico, bushe amafunde yalapusana ne fyo Lesa alaya?+ Nakalya! Pantu ifunde aliba na maka ya kupeela ubumi,+ ninshi ubulungami nga bwali no kulafuma mwi funde.+ 22 Lelo Amalembo+ yaisalile fyonse pamo ku lubembu,+ ukuti icilayo ca mu kutetekela muli Yesu Kristu cipeelwe ku baletetekela.+

23 Lelo, ilyo icitetekelo cali tacilafika,+ twalesungwa kwi funde,+ abaisalilwa capamo, ukulolela icitetekelo icali no kusokololwa.+ 24 E ico amafunde yaisaba aya kututungulula kuli Kristu,+ ukuti tulungamikilwe+ ku citetekelo. 25 Lelo apo icitetekelo caliisa,+ tatutungululwa na kabili no mubomfi.+

26 Na kuba, imwe bonse muli bana+ ba kwa Lesa mu citetekelo cenu muli Kristu Yesu. 27 Apo mu kubatishiwa imwe bonse mwa-ampana na Kristu,+ kanshi nomba mwafwala Kristu.+ 28 Takwaba ati uyu muYuda nangu ati uyu muGriki,+ takwaba ati uyu musha nangu ati uyu muntungwa,+ takwaba ati uyu mwaume nangu ati uyu mwanakashi;+ pantu imwe bonse muli bamo muli Kristu Yesu.+ 29 Kabili, nga ca kutila muli ba kwa Kristu, ninshi cine cine muli bana+ ba kwa Abrahamu, impyani ukulingana ne cilayo.+

4 Awe ndetila lyonse ilyo impyani icili iyaice taipusana no musha+ nangu panono, nangu ca kutila iba e yine ya fyonse, 2 lelo itekwa kuli bacilolo+ na ku babomfi ba pa ng’anda ukufikila ubushiku ubo wishi asaliile libela. 3 Ifyo fine na ifwe, ilyo twali abaice, twakonkenyepo fye ukutekwa ubusha ku fya ku bwaice+ ifya muli ici calo. 4 Lelo lintu inshita yakumene,+ Lesa atumine Umwana wakwe,+ uwaishilefyalwa ku mwanakashi+ no kufyalilwa mu mafunde,+ 5 ukuti atulubule pa kushita+ abatekwa ku mafunde,+ ukuti na ifwe, atupokelele nga bana.+

6 Nomba apo muli bana, Lesa alituma umupashi+ wa Mwana wakwe ukuba mu mitima yesu kabili ulabilikisha auti: “Abba,* Tata!”+ 7 E co kanshi, tamuli basha na kabili lelo muli bana; e lyo nga muli bana, ninshi na imwe bene Lesa alimulenga ukuba impyani.+

8 Lelo, lilya tamwaishibe Lesa,+ mwalebombela balesa ba bufi.+ 9 Lelo apo nomba mwalishiba Lesa, nelyo ntile apo nomba mwalishibikwa kuli Lesa,+ mulebwelela shani ku fya+ ku bwaice ifya fye+ kabili ifishafwa kantu no kufwaya ukufibombela na kabili?+ 10 Mubikile fye amano ku kusefya inshiku+ ne myeshi+ ne nshita ne myaka. 11 Awe ine ninsakamana pa mulandu wenu, nalimo naicushishe+ fye pa kumubombela.

12 Mwe bamunyinane, ndemupapaata ndeti, Beni nga ine,+ pantu na ine wine nali nga imwe.+ Tamwambifishe iyo.+ 13 Lelo mwalishiba ukuti ni mu bulwele bwandi e mo nabilile imbila nsuma kuli imwe umuku wa ntanshi.+ 14 Kabili nelyo ca kuti ubulwele bwandi bwali ca kwesha kuli imwe, tamwansaalwile nangu ukufwisa amate pa kuselaushiwa; lelo mwampokelele nga malaika+ wa kwa Lesa, nga Kristu Yesu.+ 15 Nga kanshi shili kwi shilya insansa mwakwete?+ Pantu ndesosa icine cine nati, acilacitwa nga mwalilobwelemo amenso yenu no kumpeela.+ 16 E ico, bushe naba umulwani+ wenu pantu namweba icishinka?+ 17 Balimupimpila,+ te mu musango usuma iyo, lelo ico bafwaya kumwisalila ku nse ukumufumya kuli ine, pa kuti e bo mulekonka fye.+ 18 Awe kuti cawama ukuti abalemupimpila, balemupimpilila pa cisuma+ inshita yonse, te lilya fye ndi+ na imwe. 19 Mwe twana+ twandi, ni mwe ndeculila ngo mwanakashi uukomenwe ne fumo ukufikila icipasho ca kwa Kristu cikamoneke muli imwe.+ 20 Awe kuti nafwaya ukuba na imwe nomba+ line pa kuti naishiba amashiwi ayalingile ukumweba, pantu namumpesha amano.+

21 Munjebe, mwe bafwaya ukutekwa na mafunde,+ Bushe tamumfwa ico amafunde yasosa?+ 22 Pantu calembwa ati Abrahamu akwete abana baume babili, umo mu mukashana+ umusha e lyo umbi mu mwanakashi umuntungwa;+ 23 lelo uwa mu mukashana umusha afyelwe fye ififyalwa bonse,+ e lyo uwa mu mwanakashi umuntungwa ena afyelwe ukulingana no bulayo.+ 24 Ifi fintu fyaba cilangililo;+ pantu aba banakashi fipangano+ fibili, cimo ca mu lupili lwa Sinai,+ ici cipangano e Hagari, uufyala abana ba mu busha. 25 Nomba uyu Hagari e Sinai,+ ulupili lwa mu Arabia, kabili alingene na Yerusalemu wa lelo, pantu aba mu busha+ pamo na bana bakwe. 26 Lelo Yerusalemu+ wa mu muulu ena muntungwa, kabili e nyinefwe.+

27 Pantu calembwa ati: “Sansamuka, we ng’umba iishifyala; aula akapundu no kuwelesha, we mwanakashi uushabala acula pa kupaapa; pantu bengi abana ba mwanakashi uwalekeleshiwa ukucila abana ba mwanakashi uwaba no mulume.”+ 28 Awe ifwe, mwe bamunyinane, tuli bana ba bulayo nga filya fine na Isaki aali.+ 29 Lelo ifyo cali lilya ukuti uwafyelwe ififyalwa fye bonse atendeke ukucusha+ uwafyelwe ku maka ya mupashi, e fyo cili na pali nomba.+ 30 Lelo, cinshi Ilembo lisosa? Litila, “Tamfya uyu mubomfi umukashana no mwana wakwe umwaume, pantu umwana wa uyu mubomfi takabe impyani pamo no mwana mwaume uwa mwanakashi umuntungwa.”+ 31 E ico, mwe bamunyinane, tatuli bana ba mubomfi umukashana,+ lelo tuli bana ba mwanakashi umuntungwa.+

5 Kristu alitulubwile pa kuti tube no bu ubuntungwa.+ E ico iminineni ndi,+ kabili mwisumina ukuti bamubike mwi koli lya busha na kabili.+

2 Moneni! Ine, ne Paulo, ndemweba nati nga mwasembululwa,+ ninshi ico Kristu acita cikaba ca fye kuli imwe. 3 Awe, ndebwekeshapo ukweba onse uwasumina ukusembululwa ukuti afwile no kulasunga amafunde yonse.+ 4 Mwalifuma kuli Kristu, mwe bafwaya ukulungamikilwa ku mafunde;+ kabili mwali-italusha ku cikuuku cakwe.+ 5 Lelo ifwe pa kutungululwa no mupashi tulelolela ubulungami twasubila pa mulandu wa citetekelo.+ 6 Pantu kuli Kristu Yesu ukusembululwa takwafwa kantu nangu kukanasembululwa,+ kano icitetekelo+ icibombela mu kutemwa.+

7 Mwale-enda fye bwino.+ Nani amuleseshe ukulaumfwila icine?+ 8 Uumuleseshe te Lesa uwamwitile.+ 9 Icitutumushi cinono citutumuna umufuba onse.+ 10 Nincetekela+ ukuti imwe mwe baba+ muli Shikulu tamwakakonke fimbi; lelo uulemufulunganya+ akapingulwa,+ te mulandu abe ni nani. 11 Lelo ine, mwe bamunyinane, nga ncili ndeshimikila pa kusembululwa, cinshi ndeculila na nomba? Ninshi cine cine, ukubila+ pa cimuti+ Yesu afwililepo teti kulete impasase.+ 12 Cawama kanshi abale-esha ukumufulunganya+ baitungule abene.+

13 Ukuba kwena, imwe bamunyinane, mwaitilwe ukuba abantungwa;+ nomba mwileka ubu buntungwa bumulenge ukulakonkelela ifyo mulefwaya,+ lelo mu kutemwa e mo mubelane abasha.+ 14 Pantu amafunde yonse yakakilwa+ mu cebo cimo, icitila: “Uletemwa umunobe nge fyo waitemwa we mwine.”+ 15 Lelo, nga mulasumana no kucenana,+ cenjeleni epali mwayonaula bonse.+

16 Lelo ndetila, Muletungululwa no mupashi,+ nga mwacita ifyo ninshi tamwakalekonka ififwaya imitima yenu nakalya.+ 17 Pantu ififwaya imitima fyalipusana ne fifwaya umupashi,+ ne fifwaya umupashi fyalipusana ne fifwaya imitima; pantu ifi fibili fyalipusana. E co mushakwatila amaka ya kucita ifyo mufwaya.+ 18 Kabili, nga muletungululwa no mupashi,+ ninshi tamutekwa ku mafunde.+

19 Awe imicitile ya muntu umubembu yalishibikwa+ bwino bwino, ni yi, ubulalelale,+ ukukowela, imibele ya nsoni,+ 20 ukupepa utulubi, ukupupa imipashi,*+ ukupatana, ifikansa, ubufuba, icipyu, ulubuli, ifyakaniko, amalekano, 21 umufimbila, ukukolwakolwa,+ iciwowo, ne fyapala ifi. Ndemusokela libela pali ifi fintu, filya namusokele kale, ukuti abalecita+ ifyaba ifi tabakengile mu bufumu bwa kwa Lesa.+

22 Lelo, ifisabo+ fya mupashi kutemwa, ukusekelela, umutende, ukushishimisha, icikuuku, ubusuma,+ icitetekelo, 23 ukufuuka, no kuilama.+ Takuli ifunde nangu limo ililesha ifya musango yu.+ 24 Lelo, aba kwa Kristu Yesu balipoopela pa cimuti ififwaya umutima no lunkumbwa lwa uko.+

25 Nga ca kuti imikalile yesu ileumfwana ne fifwaya umupashi wa kwa Lesa, natutwalilile ukukonka ifyo umupashi uletutungulula.+ 26 Twiba na matutumuko, twilasonsombana,+ twilafimbilana.+

6 Mwe bamunyinane, umuntu nga alufyanya ukwabula ukwishiba,+ imwe mwe bafikapo mu buKristu+ esheni ukulungika uwa musango yo no mutima uwafuuka,+ kabili mulecenjela+ epali na imwe bene mwatunkwa.+ 2 Mulesendelana ifisendo,+ e kufishapo ifunde lya kwa Kristu.+ 3 Pantu ngo muntu aimona ukuba icintu ilyo tapali ifyo ali,+ ninshi aleibepa fye umwine. 4 Lelo umo na umo alange umulimo wakwe,+ e lyo akasansamuka pa mulimo wakwe, te kuilinganya+ ku muntu umbi iyo. 5 Pantu cila muntu ali no kuisendela icipe cakwe umwine.+

6 Kabili uulesambilishiwa+ icebo ca kwa Lesa afwile ukucitako+ fyonse ifisuma ificita uumusambilisha.+

7 Mwilufiwa:+ Lesa tatumpikwa.+ Pantu ico umuntu alebyala, e co akalobolola;+ 8 pantu uulebyala ku buntunse akalobololako imfwa,+ lelo uulebyala ku mupashi,+ akalobololako umweo wa muyayaya.+ 9 E ico twinenuka ukucita icawama,+ pantu mu nshita yalinga tukalobolola nga tatutompweke.+ 10 E ico kanshi, lyonse ilyo twaba ne nshita,+ tucite ifisuma kuli bonse, lelo maka maka ku batetekela banensu.+

11 Moneni ifilembo ubukulu ifyo namulembela ku minwe yandi.+

12 Bonse abafwaya fye ukutashiwa ku bantu e besha ukumupatikisha ukusembululwa,+ pa kuti fye beculila pa cimuti ico Kristu+ Yesu afwililepo. 13 Pantu na balesembululwa tabasunga amafunde,+ lelo bafwaya imwe musembululwe pa kuti fye baleitakishishapo fye. 14 Awe ine nshakatale njitakisha, kano fye ukuitakishisha pa cimuti+ ico Shikulwifwe Yesu Kristu afwililepo, pa mulandu wa kwa Kristu, ine+ mona ukuti icalo calipopelwa, na co cimona ukuti nalipopelwa pa cimuti. 15 Pantu ukusembululwa kwa fye no kukanasembululwa+ na ko kwine kwa fye, lelo ukuba no buntu+ bupya e cacindama. 16 Kabili pali bonse abakalakonka ili funde, e kutila bonse abapanga Israele wa kwa Lesa, pali bena pabe umutende no luse.+

17 Nomba umuntu nangu umo elancusha, pantu nalikwata imikofu+ iilanga ukuti ndi musha wa kwa Yesu.+

18 Icikuuku ca kwa Shikulwifwe Yesu Kristu cibe na imwe bamunyinane, pa mulandu wa mibele yenu.+ Ameni.