Kalata wa Bubili ku Bena Korinti

1 Ine ne Paulo, uwaishileba umutumwa+ wa kwa Kristu Yesu ku kufwaya kwa kwa Lesa, pamo na Timote+ munyinefwe, twalembela imwe mwe cilonganino ca kwa Lesa ica mu Korinti, pamo na ba mushilo+ bonse abali mu Akaya monse:+

2 Tuleti icikuuku no mutende ififuma kuli Lesa Shifwe na kuli Shikulu Yesu Kristu fibe na imwe.+

3 Acindikwe Lesa kabili Wishi+ wa kwa Shikulwifwe Yesu Kristu, Shifwe wa nkumbu+ kabili Lesa wa cisansamushi conse,+ 4 uutusansamusha mu macushi yesu yonse,+ pa kuti tube na maka ya kusansamusha+ abali na macushi yalekanalekana ku cisansamushi ico Lesa atusansamushishako.+ 5 Pantu filya ukucula tucula pa mulandu wa kwa Kristu kwafula,+ e fyo ne cisansamushi cesu cafulisha muli Kristu.+ 6 Lelo nga twacula, ninshi twaculila pa mulandu wa kuti imwe musansamushiwe no kuti imwe mupusuke;+ kabili nga twasansamuka, ninshi twasansamukila pa mulandu wa kuti imwe musansamuke pa kuti icisansamushi cimulenge ukushipikisha amacushi ayo na ifwe tuculako.+ 7 Kanshi pali uyu mulandu ukucetekela twamucetekela kwalikosa, pantu twalishiba ukuti nangu ca kuti na imwe bene mulacula, e fyo no kusansamuka mukasansamuka.+

8 Pantu tatulefwaya imwe, mwe bamunyinefwe, ukukanaishiba ubucushi ubwatuponene mu citungu ca Asia,*+ ukuti ubu bucushi bwalikulile ukucila pa maka yesu, ica kuti twatile twalafwa fye.+ 9 Na kuba, fwe bene twalishininwe mu mitima yesu ukuti ukufwa tulefwa. Lelo ici cacitike pa kuti twi-icetekela+ fwe bene, lelo tucetekele Lesa uubuusha abafwa.+ 10 Apo alitupokolwele ku cintu cabipa ifi, tatuletwishika ukuti akulatupokolola;+ kabili e o twasubila ukuti na kabili akatupokolola.+ 11 Na imwe kuti mwatwafwa pa kutupapaatilako,+ pa kuti abengi bakatootele+ Lesa pa bupe ubo atupeela pa mulandu wa mapepo ya bengi.+

12 Pantu tuitakishisha pali ici, ico na kampingu wesu aleshininkisha ukuti ca cine,+ ica kuti twali aba mushilo kabili abafumacumi ku ba muli ici calo kabili twalicililepo ukuba ifyo kuli imwe ukulingana ne fyo Lesa atusambilishe. Ne calengele te mano+ ya buntunse lelo ni pa mulandu wa cikuuku ca kwa Lesa. 13 Pantu tatulelemba fimbi kuli imwe iyo kano ifyo mwaishiba bwino nelyo ifyo mwingomfwa; kabili ifyo ndesubila ukuti mukatwalilila ukufyumfwa ukufika na ku mpela,+ 14 filya mwaumfwako panono, ukuti ni fwe mutakishishapo,+ filya fine na imwe muli no kuba ica kutakishishapo cesu mu bushiku bwa kwa Shikulu Yesu.+

15 E ico, pa kuba no kucetekela uku, nalepanga ukubalilapo ukwisa kuli imwe,+ pa kuti musekelele na kabili,+ 16 nalepanga ukumupempula pa kuya ku Makedonia+ no kumupempula na kabili pa kufuma ku Makedonia,+ pa kuti mukanshindike+ pa kuya ku Yudea. 17 Ilyo nalepanga ukucita ifi, bushe naleangala+ fye? Nalimo ifintu ifyo mpanga, bushe mpanga ukulingana no buntunse,+ “pa kuti nsose ati ‘Ee,’ e lyo kabili ntile ‘Iyo’”?+ 18 Lelo filya fine twingacetekela Lesa, e fyo na mashiwi yesu kuli imwe yashingaba Ee e lyo kabili yaisaba Iyo. 19 Pantu Umwana wa kwa Lesa,+ Kristu Yesu, uo ine na Silbani* na Timote,+ twabilile kuli imwe taishileba Ee e lyo kabili aba Iyo, lelo Ee yaisaba Ee muli ena.+ 20 Pantu amalayo+ ya kwa Lesa nelyo yafula shani, yaisaba Ee muli ena.+ E ico kabili ni muli ena e mo tusosela ati “Ameni”+ kuli Lesa pa kuti tucindike Lesa. 21 Lelo uutila ifwe na imwe tuli ba kwa Kristu ni Lesa umwine kabili e watusuba.+ 22 Kabili alifwatika ne cifwati+ cakwe pali ifwe no kutupeela icishibilo+ ca fikesa, ici cifwati ne cishibilo e mupashi+ uwaba mu mitima yesu.

23 Awe ndetila Lesa e nte+ yandi iya kunshinina ukuti ico nshaishila ku Korinti kukanafwaya ukumukalifya imitima.+ 24 Te kutila ni fwe bakapitao+ pa citetekelo cenu, lelo tuli babomfi+ banenu aba kumuletela insansa, pantu icitetekelo+ cenu e cimulenga ukuti mube abashangila.+

2 Awe natila ilyo nkesa ku mwenu na kabili, nshilefwaya ukwisamulenga ubulanda.+ 2 Pantu nga nalenga imwe ubulanda,+ mwe banenga ukusekelela, nga kanshi ni bani bakanenga ukusekelela? Bushe te imwe bene mwe bo nalenga ubulanda? 3 Kanshi e co namulembeele ulya kalata, pa kuti ilyo nkesa, nikalengwa ubulanda+ pa bo mfwile ukusekelelapo;+ pantu nincetekela+ ukuti ifinenga ukusekelela na imwe e fimulenga ukusekelela. 4 Pantu mu bucushi ubwingi na mu kukalipwa umutima na mu filamba+ ifingi e mo nalembeele ulya kalata kuli imwe. Nshamulembeele ukuti imulenge ubulanda,+ lelo nalefwaya fye mwishibe ifyo namutemwa icine cine.

5 Awe nga umo aleta ubulanda,+ te ine neka aletela ubulanda, lelo aletela na imwe bonse ubulanda. Lelo kwena nshilefwaya ukukosha umulandu. 6 Uku kwine ukukalipila+ uko mwe bengi mukalipile uwaba ifi nakulinga, 7 kanshi imwe nomba, mumubelele+ fye uluse no kumusansamusha, epali uwaba ifi afwa ku cikonko.+ 8 E ico ndemukoselesha ukuti mumulange ukuti mwalimutemwa.+ 9 Ici cine e co namulembela uno kalata pa kuti njishibe no kushininkisha nga muli ba cumfwila mu fintu fyonse.+ 10 Onse uo mwabelela uluse pa cilubo, na ine ninshi nimubelela uluse.+ Na kuba, icilubo conse ico ine nabelelapo umuntu uluse, nga ca kutila pali icilubo ico nabelelapo umuntu uluse, ncita ifyo pa mulandu wenu kabili Kristu e nte;11 epali Satana atucimfya,+ pantu twalishiba amapange yakwe.+

12 Awe ilyo naile mu kubila imbila nsuma pali Kristu mu musumba wa Troa,+ nakwete ishuko lya kubomba umulimo wa kwa Shikulu,+ 13 lelo icansakamike fye ca kuti Tito+ munyinane nshamusangileko, e ico nashalikepo abasambi abali kulya no kuya ku Makedonia.+

14 Lelo ndetootela Lesa uutungulula+ ifwe capamo+ na Kristu mu kusefya kwa kucimfya kabili uulenga icena cisuma ica kumwishiba cishibikilwe muli ifwe mu ncende yonse!+ 15 Pantu kuli Lesa twaba nge cena+ icinunkila bwino ica mbila nsuma iibilwa pali Kristu iyo abaleya kwi pusukilo na baleya ku bonaushi bomfwa;+ 16 ku baleonaika ici cena citwala ku mfwa,+ e lyo ku balepusuka citwala ku mweo. Kabili nani uwafikapo bwino bwino ku kubomba uyu mulimo?+ 17 Ifwe twalifikapo; pantu tatuli nga bengi+ abaya baleshitisha icebo ca kwa Lesa,+ lelo tuli abafumacumi, e kutila abo Lesa atuma, kabili tulandila muli Kristu pa menso ya kwa Lesa.+

3 Bushe twalatendeka kabili ukuitasha fwe bene?+ Nelyo bushe tulekabila ukulemba bakalata+ ba kuitasha atemwa imwe ukutulembela bakalata ba kututasha filya bamo bakabila bakalata? 2 Imwe bene ni mwe kalata+ wesu, uwalembwa mu mitima yesu uo na bantu bonse baishiba kabili uo babelenga.+ 3 Pantu mwalimoneka ukuti ni mwe kalata wa kwa Kristu uwalembwa na ifwe fwe babomfi,+ uwalembwa ku mupashi+ wa kwa Lesa wa mweo te kuli inki iyo, nangu pa mabwe ayapaapaatala,+ lelo pa mitima+ ya buntunse.

4 Awe muli Kristu e mo twingasosela atuti twalicetekela+ Lesa. 5 Te kuti tuitakishe ukuti icalenga ukuti tufikepo bwino bwino kubombesha kwesu;+ lelo uwalenga ukuti tube fyo ni Lesa,+ 6 pantu cine cine e watulenga ukufikapo bwino bwino pa kuti tube ababomfi ba cipangano+ cipya, te babomfi abakonka amafunde yalembwa,+ lelo ababomfi abatungululwa no mupashi;+ pantu amafunde ayalembwa+ yapingwila umuntu ku mfwa, lelo umupashi ulenga umuntu ukuba no mweo.+

7 Kabili, nga ca kutila amafunde yene aya ayapingwila umuntu ku mfwa+ kabili ayalembelwe pa mabwe+ yaishiile mu bukata,+ ica kuti abana ba kwa Israele bafililwe ukulolekesha icinso ca kwa Mose pa mulandu wa bukata bwa kubalika kwa cinso cakwe,+ ubukata ubwali no kufumishiwapo, 8 bushe ifyo umupashi+ ubomba teti fibe no bukata bwacilapo?+ 9 Pantu nga ca kutila amafunde ayapingwila umuntu ku kukandwa+ yali no bukata+ bwa musango yo, ninshi ubulungami+ bwena kuti bwacilapo ukuba no bukata.+ 10 Na kuba, nangu fye ni cilya icali no bukata kale calipokwa ubukata,+ pa mulandu wa bukata ubwacicila.+ 11 Pantu nga ca kutila icali no kufumishiwapo caishiile mu bukata,+ ninshi ici icikekalilila, cena cikaba no bukata ubwacilapo.+

12 E ico, apo tuli ne subilo+ lya musango yu, tatutiina ukulanda ico tufwile ukulanda, 13 kabili tatucita nge fyalecita Mose uwaleifimba icifimbo+ ku menso, pa kuti abana ba kwa Israele beiluka impela+ ya cali no kufumapo. 14 Nomba amatontonkanyo yabo yalitaleme.+ Ukufika na ku bushiku bwa lelo cilya cine cifimbo caikalilila ukwabula ukufimbulwa ilyo balebelenga icipangano ca kale,+ pantu ni muli Kristu fye e mo cifumishiwapo.+ 15 Na kuba, ukufika kuli buno bushiku lyonse ilyo amabuuku ya kwa Mose yabelengwa,+ icifimbo cifimba ku mitima yabo.+ 16 Lelo ilyo bapilibukila kuli Yehova, icifimbo cilafimbulwa.+ 17 Lelo Yehova Mupashi;+ kabili ukuli umupashi+ wa kwa Yehova,+ e kuli ubuntungwa.+ 18 Kabili ifwe bonse,+ ilyo ubukata bwa kwa Yehova+ bulemonekela pa mpumi shesu ishafimbulwapo nga filya ifintu fimonekela mu filola, tulaaluka+ twasuka twaba mu cipasho+ cakwe mu bukata+ ubukulilako, uucita fyonse fi ni Yehova,+ Umupashi.

4 Apo twalipeelwa uyu mulimo+ ukulingana no luse lwakwe kuli ifwe,+ tatunenuka; 2 awe twalikaana ifya nkama fyonse ifilenga insoni,+ ifwe tatwaba na bucenjeshi, kabili tatukowesha icebo ca kwa Lesa,+ lelo tusambilisha abantu icine no kulenga bakampingu babo ukufwaya ukutupashanya ku menso ya kwa Lesa.+ 3 Awe, imbila nsuma iyo tubila nga yalifimbwapo, ninshi ni ku baleonaika yafimbwa,+ 4 abashatetekela+ abo lesa wa bwikashi+ buno apofwisha amatontonkanyo, ku kulesha+ ukubalika+ muli bena ulubuuto lwa mbila nsuma+ ya bukata bwa kwa Kristu, uuli cipasho+ ca kwa Lesa. 5 Pantu ifyo tubila te fya pali ifwe iyo, lelo tubila pali Kristu Yesu ukuti e Shikulu,+ lelo ifwe tuli basha+ benu pa mulandu wa kwa Yesu. 6 Pantu Lesa e watile: “Ulubuuto lusanike mu mfifi,”+ kabili alisanika mu mitima yesu pa kuti iyi mitima ishibe+ Lesa bwino+ ukupitila muli Kristu.+

7 Lelo, tuli ne cuma+ ici mu fipe+ fye bumba,+ pa kuti amaka+ yacila aya bantunse yabe aya kwa Lesa+ kabili te yantu yafuma kuli ifwe.+ 8 Monse monse balatutitikisha,+ lelo tabatufyenenkesha ica kuti twafilwa na pa kusunkanina; tulapeshiwa amano, lelo te kupeshiwa amano ica kuti twafilwa no mwa kulosha;+ 9 balatucusha, lelo tatulekeleshiwa;+ nangu batupoosa pa nshi,+ tatonaika.+ 10 Lyonse fye konse uko tuli tulashipikisha ubucushi bwa kutwala ku mfwa ubo tuculako ubo na Yesu aculileko,+ pa kuti na ifwe tupite mu fyo Yesu apitilemo.+ 11 Pantu fwe ba mweo lyonse fye tulolenkana ne mfwa+ pa mulandu wa kwa Yesu, pa kuti ifyo Yesu apitilemo fimonekele mu mibili yesu iifwa.+ 12 E ico imfwa e ibomba muli ifwe, nomba muli imwe mweo.+

13 Lelo apo twaba ne citetekelo cimo cine nga cilya cakwete uwatile: “Icitetekelo e canengele ukulanda,”+ na ifwe ico tulandila mulandu wa kuti twalitetekela, 14 pa kwishiba ukuti uwabuushishe Yesu akatubuusha nge fyo abuushishe Yesu kabili akatuleta pamo na imwe pa ntanshi yakwe.+ 15 Pantu ifintu fyonse fyabelapo imwe,+ e pa kuti icikuuku ca kwa Lesa icasalanganine ku bengi cikule, pa kutila aba kutootela Lesa no kumuletela ubukata bafulileko.+

16 E ico tatunenuka, lelo nelyo umubili wesu wile ulepwa, mu kati+ mwena tulalengwa abapya cila bushiku. 17 Pantu nangu ca kutila ubucushi tuculako bwa pa kashita fye+ kabili bwalyanguka, bukatuletela ubukata ubwapulamo kabili ubwa muyayaya;+ 18 pali nomba tatulebika imitima yesu pa fimoneka kano pa fishimoneka.+ Pantu ifimoneka fya pa kashita fye,+ lelo ifishimoneka fya muyayaya.+

5 Pantu twalishiba ukuti ing’anda+ yesu iya pano isonde, e kutila lino itenti,+ nga yawishiwa+ tukakwata imbi iikafuma kuli Lesa, ing’anda iishakuulwa ku minwe,+ kabili iya muyayaya+ mu muulu. 2 Pantu muli ino ng’anda, e kutila umubili wesu, tulateta,+ kabili tulafulukisha ukuyaingila mu ng’anda imbi iyaba ku muulu, e kutila umubili umbi+ 3 pa kuti ilyo tukengilamo, twikasangwa ubwamba.+ 4 Na kuba, ifwe fwe bali muli ili tenti tulateta, pa mulandu wa kuti twalifinininwa; te pa kuti tulefwaya ukulifuula iyo, lelo tulefwaya ukufwalako lilya limbi,+ pa kutila pali ili tenti ilifwa pakapyane ilya mweo.+ 5 Awe uwatupekenye ukuti tukabe muli uyu musango ni Lesa,+ uwatupeele iciikatilo+ ica fili no kwisa, e kutila, umupashi wakwe.+

6 E co lyonse twabela abashipa kabili twalishiba ukuti, ilyo tuli muli iyi ng’anda, tatuli pamo na Shikulu,+ 7 pantu twendela mu kutetekela, te mu kumona.+ 8 Awe twalishipa nga nshi kabili ico twingatemwa sana, kufuma muli uyu mubili no kuyaikala na Shikulu.+ 9 E ico kabili ico tufwaya fye ca kuti, nangu tuli pamo nankwe nelyo nga tatuli nankwe,+ tube abapokelelwa kuli ena.+ 10 Pantu tuli no kumoneka bonse ku cipuna ca bupingushi ica kwa Kristu,+ ukuti onse umo umo akapokelele icilambu pa fyo acitile mu mubili, ukulingana ne fyo acitile, napamo ifisuma nelyo ifibi.+

11 E ico, apo twalishiba ukuti tufwile ukuba na katiina+ kuli Shikulu, tulanashanasha+ abantu, lelo Lesa alitwishiba. Lelo, ndesubila ukuti bakampingu wenu nabalenga mwaishiba ifyo twaba.+ 12 Na pa pene tatuleitasha+ kuli imwe, lelo tulemupeela apa kututashisha,+ ukuti mukwate umwa kwasukila abaitakisha ku mimonekele+ yabo ukucila ifyo baba mu mutima.+ 13 Pantu nga tusabaila fye,+ ni kuli Lesa tusabaila; lelo nga tulanda ifya mano,+ ninshi ni pa mulandu wa imwe. 14 Pantu ukutemwa kwa kwa Kristu e kutucincisha, pa kuti ici e co twapingula, atuti apo umuntu umo afwilile bonse;+ ninshi bonse balifwile;15 kabili afwilile bonse pa kuti aba mweo belaikalila abene beka+ kano ukulaikalila+ uwabafwilile kabili uwabuushiwe.+

16 E ico ukufuma pali nomba tatumona umuntu ukulingana no buntunse.+ Nelyo ca kuti twalishibe Kristu ukulingana no buntunse,+ pali nomba te fyo twamwishiba.+ 17 E ico umuntu nga aba Umwina Kristu, alalengwa cipya cipya;+ ifya kale nafipita,+ moneni! kwaisa ifipya.+ 18 Lelo fyonse fyafuma kuli Lesa, uwatulengele ukuti tubwelele+ kuli ena muli Kristu no kutupeela umulimo+ wa kubwesesha abantu kuli Lesa, 19 e kutila, Lesa alelenga aba pano calo+ ukuti babwelele kuli ena+ muli Kristu,+ ukukanabapendela imembu shabo,+ kabili ni fwe apeele aya mashiwi+ aya kubwesesha abantu kuli ena.+

20 E ico ifwe+ tuli nkombe+ ishibomba umulimo wa kwa Kristu,+ caba kwati ni fwe Lesa alebomfya ukukunkumba abantu.+ Apo tuli beminishi ba kwa Kristu tupapaata, atuti:+ “Bweleleni kuli Lesa.” 21 Uushakwete ulubembu+ amulengele ukuba ilambo lya pa lubembu+ pa mulandu wa ifwe, pa kuti tube abalungama+ mu menso ya kwa Lesa.

6 Apo tubombela pamo nankwe,+ tulemupapaata ukuti mwilacita ifipusene no bufwayo bwa cikuuku ico Lesa alanga kuli imwe.+ 2 Pantu atile: “Mu nshita ya kupokelelwamo nalikumfwile, na mu bushiku bwe pusukilo nalikwafwile.”+ Moneni! Ino ine e nshita ya kupokelelwamo.+ Moneni! Buno e bushiku bwe pusukilo.+

3 Tatucita nangu cimo icingapunwisha bambi,+ pa kuti abantu beba na pa kusangila ifilubo mu mulimo wesu;+ 4 lelo muli fyonse tulanga+ ukuti tuli babomfi ba kwa Lesa, ilyo tuleshipikisha ifingi, mu macushi, mu kukabila, mu mafya,+ 5 mu mpumo, mu fifungo,+ mu fimfulunganya, mu kucucutika, mu kufufiwa utulo, na mu kubulwa ifya kulya.+ 6 Kabili tulanga ukuti tuli babomfi ba kwa Lesa pa kuba abasanguluka, e lyo na mu kwishiba Lesa, mu kushishimisha,+ na mu kuba ne cikuuku.+ Kabili ukukwata umupashi wa mushilo no kuba no kutemwa ukushili kwa bumbimunda,+ 7 no kusosa icishinka na fyo filalanga ukuti tuli babomfi ba kwa Lesa. Kabili ku maka+ ya kwa Lesa na ku kubomfya ifyanso+ fya bulungami ifya kulwishishako no kuipokolwelako,* na ko tulalangilako ukuti tuli babomfi ba kwa Lesa. 8 Ilyo batucindika ne lyo batusaalula, ilyo batwamba ne lyo balanda ifisuma pali ifwe; ilyo batumona kwati tuli ncenjeshi+ nangu ca kuti tuli ba cishinka, 9 ilyo batumona kwati tatwaishibikwa nangu ca kuti twalishibikwa bwino,+ ilyo batumona nga bafwa nomba moneni tucili abomi,+ ilyo batumona kwati tulingile ukukandwa+ nangu ca kuti tatufwile ukwipaiwa, ifwe tulalanga ukuti tuli babomfi ba kwa Lesa.+ 10 Nangu ca kuti batumona kwati tuli no bulanda, ifwe tulasekelela lyonse, nangu ca kuti batumona kwati tuli bapiina ni fwe tulenga abengi ukuba abakankaala, nangu ca kuti batumona kwati tatwakwata kantu, twalikwata fyonse. Ukucita ifi fyonse e kulanga ukuti tuli babomfi bwa kwa Lesa.+

11 Natumweba fye fyonse, mwe bena Korinti, ifwe twalikusha ukutemwa kwesu. 12 Mwalikwata incende iikalamba mu mitima yesu+ lelo inkumbu shalicepa mu mitima yenu.+ 13 Nomba pa kuti na imwe mube nge fyo twaba, ndesosa nga ku bana+ ndeti, kusheni ukutemwa kwenu.

14 Mwiba kwi koli limo line na bashatetekela+ pantu tamwaba cimo cine. Bushe ubulungami na bumpulamafunde kuti fyaumfwana shani?+ Napamo ulubuuto ne mfifi kuti fyaikala shani pamo?+ 15 Kabili, Kristu kuti aumfwana shani na Beliali?*+ Napamo uwatetekela kuti aumfwana shani+ no ushatetekela? 16 Kabili bushe itempele lya kwa Lesa kuti lyaumfwana no tulubi?+ Pantu ifwe tuli itempele+ lya kwa Lesa wa mweo; filya Lesa umwine asosele, ati: “Nkekala muli bena+ no kwendaendamo, kabili nkaba Lesa wabo, na bo bakaba abantu bandi.”+ 17 “‘E ico fumenimo muli bena, no kuipaatulako,’ e fyasosa Yehova, ‘kabili mwi-ikatako ku cishasanguluka’”;+ “‘na ine nkamupokelela.’”+ 18 “‘Kabili nkaba Shinwe,+ na imwe mukaba abana bandi abaume na bana bandi abanakashi,’+ e fyasosa Yehova Wa Maka Yonse.”+

7 E ico apo balitulaya aya malayo,+ mwe batemwikwa, tuisangulule+ kuli fyonse ifikowesha umubili no mupashi,+ no kuba aba mushilo icine cine mu kutiina Lesa.+

2 Tupokeleleni mu mitima yenu.+ Tatwabifya muntu nangu umo, tatwalenga umuntu nangu umo ukuba ne mibele iibi, tatwaliila umuntu nangu umo.+ 3 Nshilesosa ifi ku kumupeela umulandu. Pantu ninsosa kale ukuti twalimutemwa nga nshi kabili twaba fye pamo pe fye mu bumi na mu mfwa.+ 4 Ine nanda kuli imwe ukwabula umwenso nangu panono. Ndomfwa icilumba nga nshi pa mulandu wa imwe.+ Ne ci cilansansamusha+ nga nshi, kabili ndasekelela nga nshi na mu macushi yesu yonse.+

5 Na kuba, ilyo twafikile mu Makedonia,+ tatwamwene na pa kutuushisha,+ lelo twatwalilile ukucula+ mu fyalekanalekana—kwali ubulwi ku nse, no mwenso mu kati. 6 Lelo Lesa uusansamusha+ abali no bulanda, alitusansamwishe ilyo Tito aishile no kwikala na ifwe; 7 awe twalisansamwike te pa mulandu fye wa kuti Tito aali na ifwe, lelo na pa mulandu wa kuti mwamulengele ukusansamuka, pantu aishiletushimikila+ ifyo mufwaisha ukulapila, no kuloosha kwenu, e lyo ne fyo mwaletontonkanya nga nshi pali ine; ica kuti nalisekelele nga nshi.

8 E ico nelyo namulengele ubulanda kuli kalata wandi,+ nshumfwa ububi pali ico. Nangu ca kutila pa kubala nalyumfwile ububi, (kwena nimona ukuti ulya kalata alimulengele ubulanda pa kashita akanono) 9 ndesekelela nomba, te pa mulandu fye wa kuti mwalengelwe ubulanda, lelo ni pa mulandu wa kuti ubulanda mwakwete bwamulengele ukulapila;+ pantu ubulanda mwali na bo e bo Lesa afwaya,+ pa kuti ifintu fimubipila pa mulandu wa ifwe. 10 Pantu ubulanda ubo Lesa afwaya bulenga umuntu ukulapila, ukulapila ukwingamutwala ku kupusuka ukwabula ukumuletela amalangulushi;+ lelo ubulanda bwa ba muli ici calo buleta imfwa.+ 11 Pantu, moneni! ubulanda bwine ubu, ubo Lesa afwaya,+ bwamulengele ukucincila nga nshi, ukuisangulula ku filubo, ukubipilwa, ukuba na katiina, ukufwaisha ukulapila, ukupimpa, ukulungika icilubo!+ Muli fyonse mwailangile ukuti muli ba kaele muli uyu mulandu. 12 E ico, nelyo nalembele kuli imwe, nshalembeele uwabifishe, nangu uo babifishe,+ lelo ico nalembeele ni pa ukufwaisha kwenu ukwa kumfwa ifyo twasosele kumoneke pa menso ya kwa Lesa. 13 E mulandu wine tusansamukile.

Lelo, ukulunda pa cisansamushi cesu twalisansamwike nga nshi pa nsansa sha kwa Tito, pa kumfwa ukuti imwe bonse mwalimutalalika umutima.+ 14 Pantu nga nalanda ifisuma pali imwe kuli Tito, teti nengwe insoni; lelo filya fine lyonse tulanda ifya cishinka kuli imwe, e fyo tulanda ifya cishinka+ na pali imwe kuli Tito. 15 Kabili ni mwe atemwisha, pantu alebukisha icumfwila+ cenu bonse, ne fyo mwamupokelele na katiina. 16 Awe mwandini ine ndi ne nsansa nga nshi pa kumona ukutila kuti namucetekela muli fyonse.+

8 Nomba, mwe ba bwananyina, tulefwaya ukumweba pa cikuuku ca kwa Lesa icapeelwa ku filonganino fya mu Makedonia,+ 2 ukuti na lintu balecula ilyo kwali ukweshiwa ukukalamba, balisekelele icine cine kabili bali na bukapekape ubwine bwine, nangu ca kutila bali bapiina nga nshi.+ 3 Pantu ndemweba icine cine, nati, bapeele ukulingana na maka yabo,+ kabili bapeele ukucila fye na pa maka yabo, 4 pantu aba bamunyinefwe ku kuitemenwa fye baletulomba no kutupapaata ukuti bapeele ubupe ku ba mushilo pa kuti mu kucita ifyo bababombele capamo na bantu bambi.+ 5 Kabili bapeele ukucila pa fyo twale-enekela. Babalile baipeela abene kuli Shikulu+ na kuli ifwe ukulingana no kufwaya kwa kwa Lesa. 6 E catulengele ukukoselesha Tito+ ukuti, apo e watendeke uyu mulimo muli imwe, no kupwisha e o akapwishe ukupoka ubupe bwenu ubwa nkumbu. 7 Lelo, filya fine mwacishamo muli ifi fyonse,+ e kutila mu citetekelo, mu kwishiba ukulanda, mu kwishiba+ Lesa na mu kucincila konse na mu kutemwa uko twamutemwa, e fyo mucishemo na mu kupeela ifya bupe.

8 Ifi ndesosa nshilemupatikisha iyo,+ lelo ndefwaya fye ukumona apo ukutemwa kwenu kwapela pa kumulanga ifyo bambi bacincila pali uyu mulimo. 9 Pantu mwalishiba icikuuku ca kwa Shikulwifwe Yesu Kristu, ukuti nelyo ali uwacindama aisangwile umupiina pa mulandu wenu,+ ukuti mu bupiina bwakwe e mo imwe mucindamine.+

10 Kabili ukutontonkanya kwandi pali uyu mulandu ni uku:+ Kuti cawama+ nga mwapwisha uyu mulimo uo mwatendeke uyu mwaka wapwile pantu ni mwe mwabalilepo ukusangula kabili ni mwe mwabalilepo no kufwaya ukusangula;+ 11 awe, nomba, mupwishishishe umulimo mwatendeke, pa kuti filya mwalefwaisha ukusangula, e fyo mufwaishe no kupwisha ukusangula pa fyo mukwete. 12 Pantu nga cine cine mulefwaya ukusangula, Lesa akapokelela ubupe bwenu nga mwapeela ukulingana na po mukwatile+ te pa fintu mushikwete. 13 Pantu nshiletila bambi bangukilwe sana,+ na imwe mufinininwe; 14 lelo ndeti kube ukulingana, ifyapula pa fyo mukwete filunde pa finono ifikwete bambi, pa kuti na bo ifikapula pa fyo bakakwata fikalunde pa finono ifyo mukakwata, pa kuti kukabe ukulingana.+ 15 No kulembwa e fyo calembwa, ati: “Uwali ne fingi takwete ifyacilamo, no wali no tunono takwete utwacepesha.”+

16 Awe ndetasha Lesa pa kulenga Tito amusakamane nga filya ifwe tusakamana imwe,+ 17 pantu alyumfwile ifyo twamukoseleshe, kabili apo alicincila nga nshi, aishile fye umwine kuli imwe. 18 Lelo twatuma uwa bwananyina pamo nankwe uo baletasha mu filonganino fyonse pa mulandu wa kushimika imbila nsuma. 19 Te ici ceka, lelo no kusala e o ifilonganino fyasalile+ ukuti ale-enda na ifwe mu kubomba uyu mulimo wa nkumbu uo tulebomba ku kuleta ubukata+ kuli Shikulu no kulanga ifyo tulefwaisha ukwafwa bambi.+ 20 E ico tatulefwaya ukuti umuntu uuli onse abe na pa kutupeelela umulandu+ muli uyu mulimo wa kupeela+ uo tulebomba. 21 Pantu “tufwaya ukuba abafumacumi muli fyonse, te ku menso fye ya kwa Yehova eka, lelo na ku menso ya bantu.”+

22 Awe twatuma uyu munyinefwe ukuti aye pamo na bena, munyinefwe uo twaeseshe mu fintu ifingi no kumona ukuti alicincila, lelo nomba alicincila nga nshi pa mulandu wa fyo amucetekela nga nshi. 23 Bamo limbi kuti batwishika Tito, uyu e o tubomba nankwe kabili tuba nankwe mu kumubombela;+ e lyo aba bamunyinefwe bambi, bena batumwa ba ku filonganino kabili bukata bwa kwa Kristu. 24 E ico mubalange ukuti mwalibatemwa+ nge fyo twamulumbilishe+ ku filonganino fyonse.

9 Awe pa lwa kubombela+ aba mushilo, kwena te kuti nandepo no kulandapo, 2 pantu nalishiba ukuti mulafwaisha ukwafwa kabili ndamulandapo na ku bena Makedonia. Ndabeba ukuti nomba napapita umwaka apo aba bwananyina ba ku Akaya baiteyanishisha ukwafwa,+ kabili ukucincila kwenu e kwalenga abengi pali bena ukucincila. 3 Nomba natuma aba bamunyinefwe, pa kuti muiteyanye+ filya nalesosa ukuti muleipekanya e pa kuti ukutasha uko tumutasha kwiba kwa bufi. 4 Pantu abena Makedonia nga baisa pamo na ine no kumusanga abashaiteyanya, ninshi ifwe twalengwa insoni lelo pali bufi imwe mu fyo twamucetekela. 5 E ico natile mfwile ukukoselesha aba bwananyina ukuti batangile ukwisa kuli imwe no kupekanishisha kabela ifya bupe ifyo mwalaile kale,+ e pa kuti cikamoneke ukuti mupeela fye ku kuitemenwa te ku kupatikishiwa iyo.+

6 Ifi nalanda fileumfwana na mashiwi ya kuti uutanda aleceefya+ no kuseepa akaseepa ifinono; kabili uutanda alefusha+ no kuseepa akaseepa ifingi. 7 Onse acite umo apangile mu mutima wakwe, te kupeela na mutimako+ nangu mu kupatikishiwa, pantu Lesa atemwa uupeela ne nsansa.+

8 Awe Lesa ali na maka ya kulenga icikuuku cakwe ukuti cifulishe kuli imwe, e pa kuti lyonse mulekwata fyonse ifyo mukabila e lyo mukwate na fimbi ifingi pa kwafwako bambi.+ 9 (Nga filya calembwa, ati: “Ni kapekape, apeela abapiina. Ubulungami bwakwe bwa muyayaya.”+ 10 Awe uupeela imbuto ishingi kuli katanda no kupeela abantu ifya kulya,+ akamupeela imbuto sha kutanda kabili akashifusha kabili akafusha ne fisabo fya bulungami bwenu.)+ 11 Muli fyonse Lesa alamupaala pa kuti na imwe mube na bukapekape muli fyonse, ubulenga bambi ukutootela Lesa pa mulandu wa fyo tubapeela ififuma kuli imwe;+ 12 pantu uyu mulimo wa kwafwilisha te wa kupeela fye ifingi ku ba mushilo+ ababulishe lelo wa kulenga no kuti abantu abengi baletasha Lesa. 13 Ilyo abantu bamona ifyo mulebomba uyu mulimo, balacindika Lesa pantu mulenakila imbila nsuma mushimikila pali Kristu,+ kabili bonse balamumona ilyo muleshimikila kabili tamwaba na kaso pantu mulabapeela sana no kupeelako bambi bonse;+ 14 kabili ilyo balepepa amapepo ya kumupapaatilako balafwaisha no kumumona pa mulandu wa cikuuku+ ca cipesha amano Lesa amukwatila.

15 Ala natuletasha Lesa pa bupe bwakwe ubushaikulila.+

10 Awe ine ne Paulo, ndemupapaatila mu kunakilila+ na mu cikuuku+ ca kwa Kristu, nangu imoneka+ uwapetama muli imwe, lelo ilyo ndi kumbi mba uwashipa ilyo ndelanda kuli imwe.+ 2 Awe ndepapaata ukuti, ilyo nkesa, nikaba no kushipa no kuicetekela ifyo ndepanga ukuba na fyo+ pali bamo abaletumona kwati twalekonka fye ififwaya imitima yesu. 3 Pantu nangu twaba nge fyaba fye abantu bonse,+ tatulwishisha mu buntunse.+ 4 Pantu ifyanso fya bulwi bwesu te fya buntunse,+ lelo fyanso fya maka ifyo Lesa atupeele+ ku kuwisha fyonse ifyaba nga malinga ayakosa. 5 Pantu tulewisha amatontonkanyo yalubana na conse icasansabala icilwisha ukwishiba Lesa;+ kabili tulanasha amatontonkanyo yonse pa kuti yanakile Kristu. 6 Ilyo mukalanga ukuti muleumfwila+ muli fyonse e lyo tukakanda umuntu onse pali bucintomfwa+ bwakwe bonse.

7 Mulemona ifintu ukulingana ne fyo fyaba.+ Ngo muntu aicetekela ukuti wa kwa Kristu, lekeni abale atontonkanye na pali ici, ica kuti, filya ena wa kwa Kristu, e fyo na ifwe twaba.+ 8 Pantu nelyo ningacishamo ukutakishisha+ amaka ayo Shikulu Yesu atupeele ku kumukuula, te ku kumubongolola iyo,+ nshakalengwe insoni, 9 epali namoneka ngo ulemutiinya kuli bakalata bandi. 10 Pantu bamo batila: “Bakalata bakwe bena balyafya kabili balikosa, nomba umwine nga e po ali, tamoneka bwino+ ne milandile yakwe yabe fye iya fye.”+ 11 Uusosa ifi eshibe ukuti ifyo tumulembela muli bakalata ilyo tuli ukutali, tafyakapusane ne fyo tukacita ilyo tukaba na imwe uko.+ 12 Pantu ifwe te kuti tupame ukuipalanya fwe bene kuli balya nelyo ukuilinganya na balya abaitasha abene.+ Awe bena tabakwata amano pantu baipimina abene beka ku cipimo baipangila abene, kabili bailinganya ku bene na bene.+

13 Pantu ifwe ukuitakisha kwesu teti kucile mu cipimo.+ Ifwe ukuitakisha kwesu kwaba fye ukulingana no mwapelela imipaka yesu iyo Lesa atupeela, ukufika fye na kuli imwe.+ 14 Awe tatuipamfya ukucilamo kwati tatwafikile kuli imwe, pantu twali aba ntanshi ukufika na kuli imwe mu kubila imbila nsuma ya kwa Kristu.+ 15 Tatuleitakishisha pa mipaka iishili yesu nangu ukuitakishisha pa milimo ya muntu umbi,+ lelo tuli ne subilo lya kuti, ilyo icitetekelo cenu cilekula,+ na ifwe bene tube na maka ya kubombesha mu mulimo ukalamba pa kati kenu, ukulingana no mwapelela imipaka yesu.+ E lyo tukabombesha no kucilapo, 16 ukuti tukabile imbila nsuma mu fyalo bushilya bwa calo cenu,+ pa kuti twi-itakishisha mu ciputulwa ca muntu umbi umo ifintu fyateyanishiwa kale kale. 17 “Lelo uutakisha, aitakishishe muli Yehova.”+ 18 Pantu uo Yehova atemwa te ulya uuitasha,+ kano uo Yehova+ umwine atasha.+

11 Kuti cawama nga mwantekanishisha nangu ca kutila moneka uwa-afya panono.+ Awe na kuba, mwalintekanishisha! 2 Filya Lesa aba no bufuba+ pali imwe e fyo na ine naba no bufuba pali imwe, pantu nine wine namulaile ukuti mukoopwa+ ku mwaume+ umo, e kutila kuli Kristu,+ kabili ndefwaya nkamupeele kuli ena nga nacisungu uwasanguluka.+ 3 Lelo ndetiina ukutila, nga filya insoka yabepele Efa+ mu bucenjeshi bwa iko, e fyo na matontonkanyo yenu yengonaika+ ica kuti mwaleka ukuba aba kaele nangu ukuba abasanguluka, ifyo mufwile ukulanga kuli Kristu.+ 4 Pantu pali nomba, mulomfwila bwangu uwaisa ku kubila pali Yesu umbi uo tushabilile,+ kabili mulapokelela umupashi umbi uo mushapokelele,+ mulomfwila ne mbila nsuma+ imbi iyapusana na ilya mwaumfwile.+ 5 Pantu ndemona ukuti abo mwe bene mutila abatumwa bene bene+ tabancila nangu panono.+ 6 Awe nangu nshacenjela mu milandile,+ mu kwishiba+ mwena nalicenjela; kabili muli fyonse, twalimulangile ifyo twaishiba mu nshila shalekanalekana.+

7 Nelyo bushe nalilufyenye pa kuiceefya+ pa kuti imwe musansabikwe, no kubila imbila nsuma ya kwa Lesa kuli imwe apabula amalipilo?+ 8 Napuswile ifilonganino fimbi pa kupokelela ifya kulya fya pa bulendo kuli bena pa kuti fye mombele imwe;+ 9 kabili ilyo nabulishe ifyo nalekabila pa nshita nali na imwe, nshali icisendo ku muntu nangu umo,+ pantu aba bwananyina abafumine ku Makedonia+ balindeteele ifingi ifyo nalekabila. Filya fine nshali icisendo kuli imwe muli fyonse e fyo nkaba.+ 10 Ndelanda icine+ ifyo na Kristu engalanda, kabili ndeti nshakaleke ukuitakisha+ pali ici mu misumba yonse iya mu Akaya. 11 Cinshi nshafwaile ukuba icisendo kuli imwe? Bushe ni co nshamutemwa? Lesa alishiba ukuti nalimutemwa.+

12 Awe ifyo ndecita e fyo nakulakonkanyapo ukucita lyonse,+ pa kuti abaibepesha kwati batumwa belakwata apa kuitakishisha kabili belakwata apa kusosela ukuti umulimo tubomba e o na bo babomba. 13 Pantu aba musango yo batumwa ba bufi, ababepa+ bambi kabili abaifungushanya kwati batumwa ba kwa Kristu.+ 14 Kabili tamufwile no kupapa, pantu na Satana umwine alaifungushanya kwati ni malaika wa lubuuto.+ 15 E ico te ca kupapa nga ca kuti ababomfi+ bakwe na bo baleifungushanya kwati babomfi ba bulungami. Lelo impela yabo ikaba ukulingana ne milimo yabo.+

16 Ndebwekeshapo, ndeti, Umuntu etila nalyafya. Na lyo line, nga cine cine mwatila nalyafya, mpokeleleni ngo wa-afya, pa kuti na ine mbe ne ca kutakishishapo cinono.+ 17 Ifyo ndelanda, te fyo Shikulu engalanda iyo, lelo ndelandila mu buwelewele, muli uku ukuicetekela ukumoneka mu kuitakisha.+ 18 Apo abengi baleitakisha ukulingana no buntunse,+ na ine nalaitakisha. 19 Imwe tamusakamikwa no kusakamikwa ilyo muleshipikisha ificita abawelewele, pantu muimona ukuti muli ba mano. 20 Na kuba, mulashipikisha ngo muntu amuteka ubusha,+ nangu amuliila ifyenu, nangu amupokolola ifintu fyenu, nangu aisansabika pali imwe, nangu amuuma pa menso.+

21 Ca nsoni ukusosa ifi pantu bamo bamona kwati twalifililwe ukubomfya amaka yesu bwino.

Lelo umuntu nga apama ukuitakisha mu cintu cimo—ndelanda ngo muwelewele+—na ine ndepama ukuitakisha muli co cine. 22 Bushe baHebere? Na ine ndi muHebere.+ Bushe bena Israele? Na ine ndi mwina Israele. Bushe bana ba kwa Abrahamu? Na ine ndi mwana wa kwa Abrahamu.+ 23 Bushe babomfi ba kwa Kristu? Ndeasuka ngo wapena, ine nacilapo nga nshi:+ mu kubombesha nabacila,+ imiku nakakwa mu fifungo nabacila,+ impumo napumwa te sha kupenda, libili libili nalepana mfwe.+ 24 Imiku isano nauminwe ku baYuda ifikoti+ amakumi yatatu na pabula (39), 25 imiku itatu napuminwe ku nkonto,+ umuku umo napoolelwe amabwe,+ imiku itatu ubwato naalimo bwalibundile,+ umuku umo nali pali bemba akasuba no bushiku;26 inshita ishingi naleba pa lwendo, naleponena mu masanso pa mimana, nalesanswa ku fipondo,+ nalesanswa ku bantu bandi,+ nalesanswa ku bena fyalo,+ nalesanswa mu musumba,+ nalesanswa mu matololo, nalesanswa pali bemba, nalesanswa ku ba bwananyina ba bufi, 27 nalebombesha no kucucutika, libili libili nalefufiwa utulo ubushiku bonse,+ naleikala ne nsala ne cilaka,+ imiku iingi nshalelya,+ nalecula ku mpepo na ku kusapula.

28 Ukulunda pali fi nalanda, cila bushiku naba uwasakamana nga nshi pa mulandu wa filonganino fyonse.+ 29 Umwina Kristu umo nga aleumfwa ukunaka, na ine ndomfwa ukunaka.+ Umwina Kristu umo nga apunwishiwa, na ine cilankalipa.

30 Nga ndi no kuitakisha, ndeitakishisha+ pa kunaka kwandi. 31 Lesa kabili Wishi wa kwa Shikulu Yesu, uufwile ukulumbanishiwa pe na pe, naishiba ukuti nshilebepa. 32 Mu Damaseke umulashi uwasontelwe ne mfumu Areta aalelinda umusumba wa bena Damaseke pa kuti anjikate,+ 33 lelo banjikishishe mu museke+ pe windo, e fyo namufyukile.

12 Ndeitakisha nangu ca kuti tapali icabamo mu kuitakisha; nomba nalalanda pa fipesha amano+ ifyo Shikuku alengele ukuti mone ne fyo ansokolwelele. 2 Nalishibapo Umwina Kristu umo uwasendelwe+ ku muulu walenga itatu, nomba papita imyaka ikumi limo na ine (14). Kwena nshishibe nga asendelwe umutuntulu no mubili, nangu nalimo cali fye cimonwa, ico cena Lesa e waishiba. 3 Cine cine nalishiba uyu muntu—nshishibe nga asendelwe umutuntulu no mubili,+ nangu nalimo cali fye cimonwa, ico cena Lesa e waishiba— 4 asendelwe ku paradaise+ kabili aumfwile amashiwi ayashingasoswa ayashasuminishiwa ku muntu ukulanda. 5 Pali uyu muntu pena e po ningaitakishisha, nomba pali ine ne mwine te kuti njitakishe, kano mu kunaka kwandi.+ 6 Pantu nelyo ningafwaya ukuitakisha,+ nshabe umuwelewele, pantu ndesosa icine. Lelo nshaitakishe, pantu nshilefwaya umuntu nangu umo ukulantasha sana ukucila pa fintu amona ndecita na pa fyo omfwa ndesosa, 7 lelo pa mulandu fye wa bukulu bwa fyo bansokolwelele.

E ico pa kuti ni-isansabika+ ukucilamo, nalashilwe umuunga mu mubili,+ uwali kwati ni malaika wa kwa Satana uwalentobaula amapi, pa kuti ni-isansabika ukucilamo. 8 Napapeete Shikulu imiku itatu+ ukuti amfumye uyu muunga; 9 lelo Shikulu anjebele ati: “Icikuuku ico nakulanga kale calikulinga;+ pantu mu kunaka+ kobe e mo amaka yandi yamonekesha.” E ico, ndeitakisha nga nshi no kusekelela mu kunaka+ kwandi, pa kuti amaka ya kwa Kristu yabe pali ine nge tenti lya kwikalamo. 10 E ico pa mulandu wa kwa Kristu nsansamukila mu kunaka kwandi, mu kupontelwa, mu kubulisha, mu kuncusha na mu mafya. Pantu ilyo ndi uwanaka, e lyo nkwata amaka.+

11 Namumpwisha amano. Ni mwe mwalengele+ ukuti mbe fi, pantu amuntasha nga nshili fino. Pantu abo mwe bene mutila abatumwa bene bene+ tabancilile nangu panono, nangu ca kutila tapali ico naba.+ 12 Cine cine, mu kushipikisha+ kwandi konse na mu fishibilo na mu fipesha amano na mu fya maka+ e mo mwamwenene ubushininkisho bwa kuti ndi mutumwa.+ 13 Imwe umo mwapusanako fye ne filonganino fimbi ni mu kuti nshali icisendo kuli imwe+ nge fyo nali ku filonganino fimbi. Shi mbeleleni uluse pali uku kulufyanya.

14 Moneni! Uno e muku+ walenga butatu ndeisa kuli imwe, kabili nshakabe icisendo. Ico ine mfwaya ni mwe, te fyuma iyo;+ pantu te bana+ abafwile ukubikila abafyashi babo ifyuma, lelo abafyashi e bafwile ukubikila abana babo.+ 15 Awe ine ndesekelela nga nshi ukubomfya fyonse ifyo nakwata no kupoosa umweo wandi pa mulandu wenu.+ Apo nalimutemwisha, bushe imwe mufwile ukuntemwa panono? 16 Lelo, ine nshali icisendo kuli imwe.+ Nomba mutila, nali “incenjeshi” kabili namwikatile “ku longolo.”+ 17 Bushe nalimuliliile ukupitila muli abo natumine kuli imwe? 18 Nacincishe Tito ukwisa kuli imwe, kabili namutumine pamo no wa bwananyina umbi. Bushe Tito alimuliliilepo?+ Bushe Tito na ine tatwali abaikatana?+ Kabili bushe tatwalecita fimo fine bonse?

19 Bushe inshita yonse iyi muletontonkanya ukuti tuleipokolola fye kuli imwe? Ni ku cinso ca kwa Lesa tulelandila fwe Bena Kristu. Lelo, mwe batemwikwa, fyonse fyabelako ku kumukuula.+ 20 Pantu ndetiina epali ilyo naisa,+ nshimusangile ngo mo ndefwaila kabili epali na ine tamunsangile ngo mo mulefwaila, pantu nalimo kuti kwaba ifikansa, umufimbila,+ icipyu, ulubuli, ulwambo, umulomo, ukuituumika, ne fimfulunganya.+ 21 Napamo ilyo nkesa na kabili, nalimo Lesa wandi akanseebanya ilyo nkaba na imwe, no kunenga ukuloosha abengi abaali ababembu+ kale kabili abacili tabalalapila ku kukowela kwabo na ku bulalelale+ na ku mibele yabo iya kuilekelesha.+

13 Uyu e muku+ walenga butatu ndeisa kuli imwe. “Pa kuti umulandu onse ushininkishiwe pafwile ukuba inte shibili nangu shitatu.”+ 2 Nangu ca kutila ndi ukutali, amashiwi yandi yena muyamone nga yo ndemweba mu lwendo lwandi ulwalenga bubili. E ico, nga filya fine nacitile na ku numa, e fyo ndesoka ababembwike e lyo na bambi bonse, ndeti, nga naisa na kabili nshakabaleke,+ 3 pantu mulefwaya ubushininkisho bwa kwa Kristu uulandila muli ine,+ Kristu uushanaka kuli imwe lelo uwa maka muli imwe. 4 Cine cine, apo tali na maka+ alipoopelwe,+ lelo aba uwa mweo ku maka ya kwa Lesa.+ Ca cine, na ifwe, nangu tatwaba na maka pali nomba, nge fyo na o ashali na maka, tukaba no mweo pamo nankwe+ pantu amaka+ ya kwa Lesa yaba pali imwe.

5 Muleyesha mwe bene mumone nga muli mu citetekelo, muleilinga mwe bene.+ Nalimo bushe tamwailuka ukuti Yesu Kristu aba muli imwe?+ Nga te ifyo ninshi muli abasuulwa kuli Lesa. 6 Lelo ndesuubila ukuti mukeshiba ukuti ifwe tatwasuulwa.

7 Awe tulepepa+ kuli Lesa ukuti imwe mwicita icibi nangu cimo, tatulepepa ifi pa kuti tumoneke abasuminishiwa, lelo ni pa kuti imwe mulecita icawama, nelyo ifwe twingamoneka abasuulwa. 8 Pantu ifwe te kuti tucite nangu cimo ica kukaanya icine, kano ica kwafwilisha icine.+ 9 Awe ukusekelela tulasekelela ilyo twanaka na imwe mwaba na maka;+ kabili ici e co tulepepela,+ ukuti mulealululwa. 10 E mulandu wine nalembela uno kalata ilyo ndi ukutali no ko muli, pa kuti ilyo nkesa kuli imwe, nikakalipa,+ pantu amaka Shikulu ampeele, te ya kumubongolola iyo, lelo ya kumukuula.+

11 Ica kulekelesha, mwe bamunyinane, ndemukoselesha ukuti: mulesekelela, mulealululwa, mulesansamuka,+ muletontonkanya cimo cine,+ muleikala umutende;+ e lyo Lesa wa kutemwa kabili uwa mutende+ akaba na imwe. 12 Poshanyeni mu kutomona kwa mushilo.+ 13 Aba mushilo bonse bamuposha.

14 Icikuuku ca kwa Shikulu Yesu Kristu, no kutemwa kwa kwa Lesa, no mupashi wa mushilo uo ifwe bonse twakwata, fibe na imwe bonse.+