Kalata wa Ntanshi ku Bena Korinti

1 Ine ne Paulo, uwaitilwe ukuba umutumwa+ wa kwa Yesu Kristu ku kufwaya+ kwa kwa Lesa, na Sostene+ munyinefwe, 2 twamulembela mwe cilonganino ca kwa Lesa icaba mu Korinti,+ mwe basangululwa+ muli Kristu Yesu, abaitwa ukuba aba mushilo,+ pamo pene na bonse abalelilila pe shina+ lya kwa Shikulwifwe, Yesu Kristu, Shikulwibo kabili Shikulwifwe:+

3 Icikuuku+ no mutende+ ififuma kuli Lesa Shifwe na kuli Shikulwifwe Yesu Kristu+ fibe na imwe.

4 Lyonse ndamutashishako kuli Lesa pa cikuuku+ cakwe icapeelwe kuli imwe muli Kristu Yesu;+ 5 pantu muli fyonse mwacindamikilwa+ muli Kristu, mu maka ya kubila imbila nsuma na mu kwishiba konse,+ 6 ica kuti mwalikosa icine cine mu kushimika ubunte pali Kristu,+ 7 kabili tamwabulishapo ica bupe+ nangu cimo, ilyo mulelolela no kufulukisha ukusokoloka+ kwa kwa Shikulwifwe Yesu Kristu. 8 Na Lesa akamukosha+ ukufika na ku mpela, pa kuti mukasangwe ababula umulandu+ mu bushiku+ bwa kwa Shikulwifwe Yesu Kristu.+ 9 Lesa, uwamulengele ukwishiba+ Umwana wakwe Yesu Kristu Shikulwifwe, tabepa.+

10 Awe ndemukonkomesha,+ mwe bamunyinane, mwi shina+ lya kwa Shikulwifwe Yesu Kristu ukuti bonse mulesosa fimo fine,+ kabili pelaba amalekano+ pali imwe, lelo muleba abaikatana mu mano yamo yene na mu kutontonkanya kumo kwine.+ 11 Pantu aba mu ng’anda ya kwa Kloe banjebele+ pali imwe, mwe bamunyinane, abati mulapusana. 12 Ico ndelandapo ca kutila uuli apa aleti: “Ine ndi wa kwa Paulo,” umbi na o aleti, “Ine ndi wa kwa Apolo,”+ umunankwe na o aleti, “Ine ndi wa kwa Kefasi,” na umbi ati, “Ine ndi wa kwa Kristu.” 13 Kristu nayakanikana.+ Bushe Paulo e wapoopelwe pa cimuti pa mulandu wa imwe? Nelyo bushe mwabatishiwe+ mwi shina lya kwa Paulo? 14 Cawama apo nshabatishepo nangu umo pali imwe kano fye Krispi+ na Gai+ epela, 15 pa kuti kwiba nangu umo uwa kusosa ati mwabatishiwe mwi shina lyandi. 16 Ca cine, nabatishe na ba mu ng’anda ya kwa Stefanasi.+ Lelo abashala, nshileibukisha nga nalibabatishepo. 17 Pantu Kristu tantumine+ ku kubatisha, lelo ku kubila imbila nsuma, te kuibilila ku milandile ya bucenjeshi,+ epali ukucula kwa kwa Kristu pa cimuti kwaba ukwa fye.

18 Pantu ukulanda pa cimuti Yesu afwililepo kumonwa kwati buwelewele+ ku baleonaika,+ lelo kuli ifwe fwe balepusuka+ e mumonekela amaka ya kwa Lesa.+ 19 Pantu calembwa ati: “Nkonaula+ amano ya ba mano, no kucenjela kwa bacenjela+ nkakufumyapo.”+ 20 Muli buno bwikashi,+ bali kwi aba mano? Bali kwi bakalemba?+ Bali kwi aba fikansa?+ Bushe Lesa talengele amano ya ba muli ici calo ukuba ubuwelewele?+ 21 Pantu ukulingana na mano ya kwa Lesa, aba muli ici calo tabaishibe Lesa+ ku mano+ yabo, Lesa mu mbila nsuma iyasuulwa+ aali uwaitemenwa ukupususha abaletetekela.

22 AbaYuda bena bafwaya ukumona ifishibilo+ e lyo abaGriki bena bafwaya amano;+ 23 nomba ifwe tushimika pali Kristu uwapoopelwe.+ Amashiwi tushimika, ku baYuda ca kuipununako+ e lyo ku bena fyalo ya buwelewele;+ 24 lelo, ku baitwa, bonse abaYuda na baGriki, muli Kristu e mumonekela amaka+ ya kwa Lesa na mano+ yakwe. 25 Pantu ico Lesa amona ukuti ca buwelewele, ku bantu kwena ca mano, kabili icanaka kuli Lesa, ku bantu calikosa.+

26 Mwe bamunyinane, ibukisheni ifyo mwali ilyo mwaitilwe. Pali imwe banono fye abaali na mano+ ku buntunse abaitilwe,+ abengi tabakwete ne fifulo fya maka,+ na bashimucindikwa na bo bali fye aba mpendwa; 27 lelo Lesa asalile abawelewele ba muli ici calo,+ ku kulenga aba mano bekatwe insoni; kabili Lesa asalile abanaka aba pano calo, ku kulenga abakosa bekatwe nsoni;+ 28 kabili Lesa asalile ifyo abantu bamona ukuti fya fye muli ici calo ne fyo basuula, ifimoneka nge fishabapo,+ ukuti onaule+ ifyabapo, 29 pa kuti umuntunse nangu umo eitakisha+ kuli Lesa. 30 Lelo ni pa mulandu wakwe mwabela muli Kristu Yesu, uwaisaba kuli ifwe amano+ ayafuma kuli Lesa, kabili ubulungami,+ ukusanguluka+ no kulubuka;+ 31 pa kuti cibe filya calembwa ati: “Uuleitakisha, aitakishishe muli Yehova.”+

2 E ico na ine, mwe bamunyinane, ilyo naishile kuli imwe, nshaishile ne milandile+ ya bucenjeshi nelyo iya kuilanga uwa mano pa kubila kuli imwe inkama+ ya kwa Lesa. 2 Pantu ilyo nali na imwe nshalefwaya ukwishiba akantu nangu kamo kano fye Yesu Kristu,+ uwapoopelwe. 3 Ilyo naishile kuli imwe nali uwanaka, uwa mwenso, kabili naletutuma nga nshi;+ 4 kabili imilandile yandi ne fyo nashimikile tafyali mashiwi ya fya kunashanasha aya kucenjela fye lelo e mwamonekele umupashi na maka ya kwa Lesa,+ 5 ukuti icitetekelo cenu ciiba mu mano+ ya buntunse, lelo cibe mu maka+ ya kwa Lesa.

6 Awe tulanda ifya mano ku bakosoka,+ lelo te mano+ ya bwikashi buno nelyo aya ntungulushi sha bwikashi+ buno, abo impela yabo ili mupepi.+ 7 Lelo tulandila amano ya kwa Lesa mu nkama+ yakwe, amano ayafiswa, ayo Lesa alingiile kabela ilyo buno bwikashi+ tabulabako ku kutuletela ubukata. 8 Aya mano takuli nangu umo pa ntungulushi+ sha bwikashi buno uwayeshibe,+ pantu abayeshiba nga tabapoopele+ Shikulu uwacindama pa cimuti. 9 Lelo filya calembwa ati: “Ifyo Lesa apekanishisha abamutemwa,+ ilinso talyafimwene no kutwi takwafyumfwile, nangu mutima wa muntu tawafitontonkenye.” 10 Pantu ni kuli ifwe Lesa afisokolwela+ mu mupashi+ wakwe, pantu umupashi+ ufwailisha muli fyonse, na mu fyashika+ ifya kwa Lesa.

11 Pantu takwaba umuntu uwaishiba ifyaba mu kati ka munankwe kano umupashi+ uwaba muli ena. E fyo caba na kuli Lesa, takwaba uwaishiba ifyaba muli Lesa, kano umupashi+ wakwe. 12 Awe ifwe tatwapokelele umupashi+ uwa ici calo, lelo twapokelele umupashi+ uwafuma kuli Lesa, pa kuti twishibe ifintu ifyo twapeelwa fye kuli Lesa.+ 13 Ifi fintu na ifwe tufilandila mu mashiwi ayasambilishiwa ku mupashi,+ te ku mano+ ya buntunse, ilyo tulebomfya ifyebo fya kwa Lesa ku kulondolola ifya kwa Lesa.+

14 Lelo umuntu uukonkelela ififwaya umutima wakwe tatemwa ifya mupashi wa kwa Lesa, pantu kuli ena buwelewele; kabili te kuti afishibe,+ pantu umupashi e uficeeceeta. 15 Lelo umuntu uutungululwa no mupashi+ wa kwa Lesa aceeceeta fyonse, lelo ena umuntu nangu umo te kuti amwishibe.+ 16 Pantu “nani uwaishiba ifyo Yehova atontonkanya,+ pa kuti amusambilishe?”+ Lelo ifwe tutontonkanya+ nge fyo Kristu atontonkanya.

3 E ico, mwe bamunyinane, na ine nafililwe ukulanda kuli imwe nga ku bantu abatungululwa no mupashi wa kwa Lesa,+ lelo nalelanda kuli imwe nga ku bantu abakonka ififwaya imitima yabo, e kutila nga ku tucece+ mu buKristu. 2 Namunwenseshe umukaka, nshamulishishe ifya kulya,+ pantu mwali tamulakosa. Na kuba, na nomba mucili tamulakosa,+ 3 pantu mucili mulekonkelela ififwaya imitima yenu.+ Pantu apo muli imwe mwaba akalumwa ne fikansa,+ cilelanga fye ukuti mulakonkelela ififwaya imitima yenu kabili mucita ificita abantu bonse.+ 4 Pantu ilyo umo atila: “Ine ndi wa kwa Paulo,” na umbi atila: “Ine ndi wa kwa Apolo,”+ bushe tamuli fye nga bantu bambi?

5 Nga kanshi Apolo+ nani? Paulo na o nani? Babomfi+ fye ababomba umulimo Shikulu atupeele, abamwafwile ukutetekela. 6 Ine nalilimbile,+ Apolo alitapilile,+ lelo Lesa e wameseshe;+ 7 kanshi uulimba+ nangu uutapilila taba kantu, kano Lesa uumesha.+ 8 Awe uulimba no utapilila bamo bene,+ lelo onse umo umo akapokelela icilambu cakwe ukulingana no mulimo wakwe.+ 9 Pantu ifwe tubombela pamo na Lesa.+ E lyo imwe muli bala lya kwa Lesa ililelimwa,+ kabili muli ng’anda iyo Lesa akuula.+

10 Ukulingana ne cikuuku+ ca kwa Lesa ico napeelwe, ngo mukalamba wa makuule uwa mano, napangile umufula wa kukuulapo,+ lelo umbi e ulekuula. Awe onse umo umo abike amano ku fyo alekuula.+ 11 Pantu takuli uwingapanga umufula wa kukuulapo+ uwingacila uwapangwa kale, no yo mufula ni Yesu Kristu.+ 12 Awe umuntu umo nga akuula pali uyu mufula ukubomfya golde, silfere, amabwe ayauma umutengo, umbi na o abomfya ifimuti, icani, impimbili, 13 umulimo wa aba bonse ukeshibikwa, ilyo ubushiku bwa kwesha bukesa,+ pantu umulilo e ukasokolola fyonse no kulanga umusango wa mulimo uwa muntu onse. 14 Nga ca kuti ifyo akuula pa mufula fyashala,+ akapokelela icilambu;+ 15 lelo nga fyapya, akapelwapo fye, nangu ca kuti umwine akapusuka;+ nomba akapusuka fye kwempe ngo wasompolwa mu mulilo.+

16 Bushe tamwaishiba ukuti imwe muli tempele lya kwa Lesa,+ no kuti umupashi wa kwa Lesa waikala muli imwe?+ 17 Umuntu nga aonaula itempele lya kwa Lesa, Lesa akamonaula;+ pantu itempele lya kwa Lesa lya mushilo,+ itempele+ ili ni mwe.+

18 Umuntu nangu umo eibepa: Ngo muntu umo pali imwe aleimona ukuti wa mano+ muli buno bwikashi, lekeni abe umuwelewele, pa kuti abe uwa mano.+ 19 Pantu amano ya ici calo buwelewele kuli Lesa;+ pantu calembwa ati: “E wikata aba mano mu bucenjeshi bwabo.”+ 20 Na kabili calembwa ati: “Yehova aishiba ukuti amatontonkanyo ya ba mano, ya fye.”+ 21 E ico umuntu nangu umo eitakishisha mu bantunse; pantu fyonse fyenu,+ 22 nampo nga ni Paulo nelyo nga ni Apolo+ nelyo nga ni Kefasi nelyo nga calo nelyo nga mweo nelyo nga ni mfwa nelyo nga fintu ifyabako nelyo nga fintu ifikesabako,+ fyonse fyenu; 23 na imwe muli ba kwa Kristu;+ Kristu na o, wa kwa Lesa.+

4 Umuntu onse aletumona fye ukuti tuli babomfi+ ba kwa Kristu abasalwa ukwangalila+ inkama+ sha kwa Lesa. 2 Na kuba, muli ci, icifwaikwa ku babomfi+ ca kuti umuntu asangwe uwa cishinka.+ 3 Lelo ine tacinsakamika ukwipushiwa na imwe nelyo ukwipushiwa ne cilye.+ Lelo nangu nine ne mwine nshiitwishika. 4 Pantu ndi wa kaele.+ Nomba ici tacinenga ukuba uwalungama iyo, lelo uumpingula ni Yehova.+ 5 E ico mwipingula+ icintu nangu cimo ilyo inshita tailafika, akasuke Shikulu akese,+ uukaleta mu lubuuto+ ifyafiswa fya mu mfifi no kulenga amapange ya mu mitima ukumoneka,+ e lyo cila muntu akatashiwa kuli Lesa.+

6 Awe, mwe ba bwananyina, ifi fintu mfiloseshe kuli Apolo+ na kuli ine wine pa mulandu wenu, pa kuti musambilile ifunde lya kuti: “Mulekonka ifyalembwa,”+ e pa kuti mwiba na cilumba ca kuitakisha+ no kusuula abanenu.+ 7 Pantu nani amupusanya?+ Nga kanshi cinshi ukwete ico ushapokelele?+ Lelo, nga cine cine walicipokelele,+ cinshi ico uitakishisha+ ngo ushacipokelele?

8 Bushe kanshi imwe mwalikuta kale? Bushe mwe banensu mwalicindama kale?+ Bushe mwalitendeka ukuteka+ ukwabula ifwe? Napamo mwe banensu mwalitendeka ukuteka, uleke na ifwe tutekele pamo na imwe.+ 9 Pantu ndemona ukuti fwe batumwa Lesa atubika pa bulangisho,+ nga ba kulekelesha, nga bantu abalingilwa ukufwa,+ pantu twaba ica kutamba+ ku ba muli ici calo, na kuli bamalaika,+ na ku bantu.+ 10 Imwe mutumona abawelewele+ pa mulandu wa kukonka Kristu, lelo mwe bene muimona abashilimuka+ pa mulandu wa kukonka Kristu; ifwe tuli abanaka,+ lelo imwe muli abakosa;+ imwe muli abacindikwa,+ lelo ifwe tuli abasaalulwa.+ 11 Ukufika kuli ino nshita tucili tulomfwa insala+ ne cilaka+ kabili tulasapula+ no kupumwa tulapumwa+ no kubulwa amayanda+ 12 no kucucutika+ ilyo tuleibombela.+ Ilyo baletutuka, tulapaala;+ ilyo baletucusha, tulashipikisha;+ 13 ilyo baletuseebanya, ifwe tubasuka no mutembo;+ ukufika kuli nomba batumona nge fisooso fya muli ici calo, kabili nge fiko.+

14 Nshilelemba ifi fintu ku kumulenga insoni, lelo ku kumukonkomesha nga bana bandi abatemwikwa.+ 15 Pantu nelyo mwingaba na bakafundisha*+ amakana ikumi (10,000) muli Kristu, tamuli na bashinwe+ abengi nangu panono; pantu muli Kristu Yesu ine ndi shinwe mu mbila nsuma.+ 16 E ico ndemupapaata, ndeti mulempashanya.+ 17 E mulandu wine ndetumina Timote kuli imwe,+ pantu ena mwana+ wandi uwatemwikwa kabili uwa cishinka muli Shikulu; kabili akesamwibukishako imibele yandi iya muli Kristu Yesu,+ nge fyo na ine nsambilisha mu filonganino fyonse.

18 Bamo pali imwe nabatampa ukulaitutumuna+ kwati nshakese kuli imwe nakalya. 19 Lelo nkesa nomba line, nga Yehova atemwa,+ e lyo nkesaishiba amaka ya baleitutumuna te fintu basosa iyo. 20 Pantu ubufumu bwa kwa Lesa tabwaba mu kulanda fye, lelo bwaba mu maka.+ 21 Cinshi ico mulefwaya? Bushe nkese kuli imwe ne cikoti,+ nelyo bushe nkese no mutima wa kutemwa no mutembo?+

5 Na kabushe nacishimikwa ukuti muli imwe mwaba ubulalelale,+ na bo ubwa kuti nangu ni mu bena fyalo te kuti mubusange, ubwa kuti umo pali imwe alyupa umukashi wa kwa wishi.+ 2 Lelo imwe mulaitakisha no kuitakisha.+ Bushe tamufwile ukuloosha+ no kufumya umuntu uwacitile ici cintu mu kati kenu?+ 3 Awe ine, nangu ndi ukutali, mu mupashi mwena ndi pamo na imwe,+ kabili nimpingula kale umuntu uwacita ifi, kwati fye e ko ndi, 4 ukuti mwi shina lya kwa Shikulu Yesu, ilyo mukalongana pamo, na ine nkalongana pamo na imwe na maka ya kwa Shikulu Yesu,+ 5 mukapeele uyo muntu kuli Satana+ pa kuti iyi mibele yabipa ifume mu cilonganino+ pa kuti cikabe icasanguluka ukufika na ku bushiku bwa kwa Shikulu.+

6 Ukuitakisha+ kwenu takwawama. Bushe tamwaishiba ukuti icitutumushi+ cinono citutumusho mufuba onse?+ 7 Fumyenimo icitutumushi ca kale, ukuti imwe mube umufuba upya,+ apo tamufwile ukuba icitutumushi muli imwe. Pantu, Kristu,+ impaanga ya pa ca kucilila+ alipeelwa ilambo.+ 8 Kanshi natucite umutebeto+ uwa mukate ushatutumuka uwa bufumacumi ne cine+ te wa citutumushi ca kale,+ nangu uwa citutumushi+ ca bubi no lubembu.+

9 Muli kalata wandi namulembele ukukana-ampana na ba bulalelale, 10 nshaloseshe ku ba bulalelale+ bonse aba muli ici calo+ nelyo abafunushi na bapuupu nelyo abapepa utulubi. Nga ni umo naloseshe ninshi mufwile ukufuma muli ici calo.+ 11 Lelo nomba ndemulembela ukukanayampana+ no wa bwananyina onse nga aba uwa bulalelale nelyo uwa lunkumbwa+ nelyo uupepa utulubi nelyo uutukana nelyo cakolwa+ nelyo umupuupu, kabili te ca kwesha no kulya nankwe. 12 Pantu bushe nine mfwile ukupingula aba ku nse ya cilonganino?+ Bushe te ba mu kati imwe mupingula,+ 13 na ba ku nse bushe te Lesa ubapingula?+ “Fumyeni mwi bumba lyenu imbifi iyo.”+

6 Bushe umo pali imwe uuli no mulandu+ no muntu umbi kuti apama ukuya ku cilye pa ntanshi ya bashalungama,+ no kukanaya ku ba mushilo?+ 2 Atemwa bushe tamwaishiba ukuti aba mushilo bakapingula+ aba muli ici calo?+ Kabili aba muli ici calo nga bakapingulwa kuli imwe, bushe muli abashalinga ukupingula imilandu yacepesha?+ 3 Bushe tamwaishiba ukuti tukapingula bamalaika?+ Pali bufi, ifya buno bwikashi! 4 E ico, nga mupingula ifya buno bwikashi,+ bushe abo icilonganino cishacetekela e bo musonta ukuba bakapingula?+ 5 Ndesose ci ku kumulenga insoni.+ Bushe cishinka ukuti tamwaba uwa+ mano nangu umo muli imwe uwingapingula pa kati ka ba bwananyina banankwe? 6 Bushe kuti cawama uwa bwananyina ukutwala uwa bwananyina munankwe ku cilye, ku kuyamonekela pa ntanshi ya bashatetekela?+

7 E ico, pali ci mwaliluba nga nshi pantu mulatwalana ku filye.+ Cinshi ico mushisuulilako fye?+ Cinshi ico mushisalilapo ukufyengwa?+ 8 Lelo, mulabifya no kufyenga, aba bwananyina banenu.+

9 Yangu! Bushe tamwaishiba ukuti abashalungama tabakapyane ubufumu bwa kwa Lesa?+ Mwilufiwa. Aba bulalelale,+ nangu abapepa utulubi,+ nangu abacende,+ nangu abaume abasuminisha abaume banabo ukulaala na bo,+ nangu abaume abalaala na baume banabo,+ 10 nangu bapuupu, nangu bafunushi,+ nangu ni bacakolwa,+ nangu abatukana, nangu ni balya abacenjesha abanabo, tabakapyane ubufumu bwa kwa Lesa.+ 11 Kabili imwe bamo e fyo mwali.+ Lelo mwalisambwa,+ kabili mwalisangululwa,+ no kulungamikilwa+ mwi shina lya kwa Shikulwifwe Yesu Kristu+ na mu mupashi wa kwa Lesa wesu.+

12 Ine nalikwata insambu sha kucita fyonse; lelo te fyonse ifingangafwa.+ Nalikwata insambu sha kucita fyonse;+ lelo nshakasuminishe icintu nangu cimo ukulantungulula.+ 13 Ifya kulya fiya mwi fumo, ne fumo lyabelako ifya kulya;+ lelo Lesa akonaula fyonse fibili, ifumo ne fya kulya.+ Nomba umubili tawabelako ubulalelale, lelo wa kwa Shikulu;+ na Shikulu e mwine wa mubili.+ 14 Lelo Lesa uwabuushishe Shikulu,+ akabuusha+ na ifwe ku maka yakwe.+

15 Bushe tamwaishiba ukuti imibili yenu filundwa+ fya kwa Kristu?+ E ico, bushe mbuule ifilundwa fya kwa Kristu no kuficita ifilundwa fya kwa cilende?+ Nakalya! 16 Yangu! Bushe tamwaishiba ukuti uwa-ampana na cilende ninshi aba umubili umo nankwe? Pantu Lesa atile, “Aba babili bakaba umubili umo.”+ 17 Lelo uwaikuminisha kuli Shikulu atontonkanya+ nga ena.*+ 18 Fulumuka ubulalelale.+ Ulubembu lonse ulo umuntu engacita lwa ku nse ya mubili, lelo uucita ubulalelale abembukila umubili wakwe.+ 19 Yangu! Bushe tamwaishiba ukuti umubili wenu litempele+ lya mupashi wa mushilo uuli muli imwe,+ uo mwakwata ukufuma kuli Lesa? Kanshi tamuiteka iyo, muli ba kwa Lesa,+ 20 pantu mwashitilwe pa mutengo uukulu.+ E ico, cindikileni Lesa+ mu mibili+ yenu.

7 Awe ulwa fyo mwalembele, cisuma ku mwaume ukukanaikata+ mu mwanakashi; 2 lelo, pa mulandu wa bulalelale+ ubwingi, umwaume onse abe no mukashi+ wakwe kabili umwanakashi onse abe no mulume wakwe. 3 Umulume apeele umukashi ico afwile ukumupeela;+ no mukashi na o wine acite cimo cine ku mulume wakwe.+ 4 Umukashi tali na maka pa mubili wakwe, kano umulume wakwe;+ no mulume ifyo fine tali na maka pa mubili wakwe, kano umukashi wakwe.+ 5 Mwilatanana,+ kano fye nga namusuminishanya ukwikala fye pa nshita imo,+ pa kuti mubomfye iyo nshita ku kupepa e lyo pa numa mube pamo, epali Satana alamutunka+ pa kukanatekanya kwenu.+ 6 Awe, nalanda ifi ku kumupandako fye amano,+ te kumupangila ifunde iyo.+ 7 Kanshi abantu bonse nga baali ifyo naba.+ Lelo, cila muntu Lesa alimupeela ica bupe,+ uyu ica musango yu, umbi na o ica musango yu.

8 Awe nde-eba abashimbe+ na bamukamfwilwa, ndetila, cisuma nga baba ifyo naba.+ 9 Lelo nga bafilwa ukuilama,+ boope nelyo ukuupwa, pantu ukucita ifyo+ kwawama ukucila ukuba ne nsuuna.+

10 Nde-eba abaupana, awe te ine lelo ni Shikulu,+ ndeti umukashi tafwile ukufuma ku mulume wakwe;+ 11 nomba nga afumako, eupwa. Lelo nga afilwa ukushipikisha, abwelele ku mulume wakwe; no mulume tafwile ukufuma ku mukashi wakwe.

12 Lelo bambi na bo ndebeba, nine te Shikulu iyo,+ ndeti: Ngo wa bwananyina ali no mukashi uushatetekela, kabili umukashi asumina ukwikala nankwe, tafwile ukumusha; 13 kabili umwanakashi uuli no mulume uushatetekela, no mulume asumina ukwikala nankwe, tafwile ukusha umulume wakwe. 14 Pantu umukashi nalenga umulume uushatetekela ukuba uwa mushilo, no wa bwananyina nalenga umukashi uushatetekela ukuba uwa mushilo; nga te ifyo ninshi abana benu kuti baba abakowela,+ lelo nomba ba mushilo.+ 15 Nomba uushatetekela nga apingulapo ukufumako,+ nafumeko; uwa bwananyina umwaume atemwa umwanakashi te kuti amupatikishe mu milandu ya musango yo, lelo Lesa namwitila ku mutende.+ 16 Pantu waishiba shani, we mukashi limbi ni we ukapususha umulume obe?+ Na iwe we mulume, waishiba shani, limbi ni we ukapususha umukashi obe?+

17 Cila muntu abe ne ca bupe+ ico Yehova amupeela ukulingana fye ne fyo amwitile.+ Kabili ifyo fine e fyo nde-eba+ ifilonganino fyonse. 18 Bushe umuntu umo aitilwe uwasembululwa?+ Efumyapo ukusembululwa kwakwe. Bushe umo aitilwe uushasembululwa?+ Esembululwa.+ 19 Ukusembululwa+ te cintu, no kukanasembululwa+ te cintu, kano ukusunga amafunde ya kwa Lesa.+ 20 Umuntu onse umo aitiilwe,+ umo mwine e mo ekalilile.+ 21 Bushe waitilwe ninshi uli musha? Wisakamana;+ lelo nga wingamona apa kusangila ubuntungwa, shukila ilyo ishuko. 22 Pantu onse uwaitilwe muli Shikulu ilyo ali umusha, nomba muntungwa+ wa kwa Shikulu; ifyo fine uwaitilwe ilyo ali umuntungwa,+ musha+ wa kwa Kristu. 23 Mwashitilwe pa mutengo uukulu;+ mwilaaba abasha+ ba bantu. 24 Mwe ba bwananyina, umuntu onse umo aitiilwe,+ umo mwine e mo ekalilile kulila fye aleumfwana na Lesa.

25 Awe ulwa bashimbe, ifunde ilyafuma kuli Shikulu nshikwete, lelo apo Shikulu+ ku luse lwakwe alinenga ukuba uwa cishinka,+ nalamupandako amano.+ 26 E ico pa mulandu wa bucushi bwa shino nshiku, ndetila cisuma umuntu ukwikala fye umushimbe.+ 27 Nga walikakililwa ku mukashi,+ wilafwaya kuikakulako.+ Nga walikakulwa ku mukashi, wilafwaya ukukakwa ku mwanakashi. 28 Lelo nangu waupa, taubembwike.+ Kabili umushimbe nga aupa nelyo ukuupwa, ninshi tabembwike. Lelo, aboopa nelyo ukuupwa bakaba na macushi mu bumi bwabo.+ Lelo ine nati fye imupususheko.

29 Awe, mwe ba bwananyina, ndetila, inshita iisheleko naicepa.+ E ico, abaupa babe nga bashaupa,+ 30 na balila babe nga bashilila, na basekelela babe nga bashisekelela, na bashita babe nga bashikwete, 31 na babomfya cino calo+ babe nga bashicibomfya sana; pantu ifya pano calo filealuka.+ 32 Awe, ndefwaya imwe ukukanasakamikwa.+ Uushaupa abika amano ku fya kwa Shikulu, pa kuti amone ifyo engasekesha Shikulu. 33 Lelo uwaupa abika+ amano ku fya muli ici calo, pa kuti amone ifyo engasekesha umukashi wakwe,+ 34 kabili alatangalikwa. Nomba uushaupwa, e lyo no mushimbe, babika amano ku fya kwa Shikulu,+ pa kuti baipeeleshe kuli Lesa ku mubili na ku matontonkanyo. Lelo, uwaupwa abika amano ku fya muli ici calo, pa kuti amone ifyo engasekesha umulume wakwe.+ 35 Awe ico ndelandila ifi kufwaya ukumwafwilishako, te kufwaya ukumukaanya iyo, lelo ndefwaya ukuti mwishibe bwino icawama,+ ne ci ca kuti mulebombela Shikulu lyonse ukwabula ukupumfyanishiwa.+

36 Lelo ngo muntu asanga ukuti cilemwafya ukwikala umushimbe,+ e lyo nacila na pa mushinku wa bwaice, kabili ukuupa e kwamuwamina, nacite ico alefwaya; tabembwike. Nabopane.+ 37 Lelo nga umo nashipa mu mutima wakwe, talecushiwa, lelo ali na maka ya kuilama pa co alefwaya kabili napanga mu mutima wakwe ukuba fye umushimbe, ninshi talufyenye.+ 38 E ico uwaupa ninshi awamya,+ lelo uushupile ena awamya ukucilapo.+

39 Umukashi nakakwa pa nshita yonse umulume wakwe ali uwa mweo.+ Lelo umulume wakwe nga afwa,* muntungwa ukuupwa ku o alefwaya, nomba ni muli Shikulu epela.+ 40 Lelo akaba ne nsansa sana nga atwalilila fye ukwabula ukuupwa,+ uku e kupanda amano kwandi. Awe ndetila na ine nalikwata umupashi wa kwa Lesa.+

8 Awe ifwe bonse twalishiba+ ifyo caba pa mulandu wa fya kulya ifyo batuulila utulubi.+ Ukwishiba kulatuumika, lelo ukutemwa kulakuula.+ 2 Ngo muntu atila ukwishiba alishiba icintu,+ ninshi acili talaishiba ifyo afwile ukucishiba.+ 3 Lelo ngo muntu atemwa Lesa,+ uyu e waishibikwa kuli ena.+

4 Awe ulwa kulya+ ifyo batuulila utulubi, twaishiba ukuti akalubi takaba+ fye nangu cimo pano calo, no kuti kwaba fye Lesa umo.+ 5 Pantu nangu kube abetwa “balesa,”+ mu muulu+ nangu pano isonde,+ ni fyo fine kwaba “balesa” abengi na “bashikulu” abengi,+ 6 lelo kuli ifwe kwaba fye Lesa+ umo Shifwe,+ uko fyonse fyafuma, na ifwe tuli bantu bakwe;+ kwaba na Shikulu umo,+ Yesu Kristu,+ muli ena e mo fyonse fyabelako,+ na ifwe e mo twabela no mweo.

7 Lelo te bonse baishiba ifi;+ bamo bena, na nomba bacili batontonkanya pa kalubi, kabili ilyo balelya ifya kulya bamona kwati fyatuulilwa akalubi,+ kabili apo kampingu wabo alinaka, alakowela.+ 8 Lelo ifya kulya tafitupalamika kuli Lesa;+ nga tatuliile, tatulufyapo nangu cimo, kabili, nga twalya, tatunonkelapo nangu cimo.+ 9 Lelo mulesakamana epali ishi nsambu shenu shaba ica kupunwisha abanaka.+ 10 Pantu ngo muntu akumona, we waishiba, nawikala ulelya mwi tempele lya tulubi, bushe kampingu wa muntu uwanaka takapame ica kuti akalelya ne fyo baatuulila utulubi?+ 11 Cine cine, munonko uwanaka, uo Kristu afwilile, aleonaika pa mulandu wa kwishiba kobe.+ 12 Awe ilyo mwabembuka ifyo kuli bamunyinenwe no konaula kampingu+ wabo uwanaka, ninshi mulebembukila Kristu. 13 E ico, nge fya kulya filepunwisha munyinane,+ ndi no kulekelela fye ukulya inama, epali napunwisha munyinane.+

9 Bushe nshili muntungwa?+ Bushe nshili mutumwa?+ Bushe nshamwene Yesu Shikulwifwe?+ Bushe umulimo wandi muli Shikulu te imwe? 2 Nga nshili mutumwa kuli bambi, lelo kuli imwe kwena ndi mutumwa, pantu icifwati+ ca butumwa bwandi ni mwe muli Shikulu.

3 Ukuisosela kwandi ku balendubulwisha ni uku:+ 4 Bushe tatwakwata insambu+ sha kulya no kunwa? 5 Bushe tatwakwata insambu sha kwenda no mukashi,+ uwatetekela, nge fyo abatumwa banensu na bamunyina+ kwa Shikulu na Kefasi+ bacita? 6 Napamo bushe nine neka na Barnaba+ fwe bashakwata insambu sha kuleka ukubomba incito ya kusangilamo imiliile?+ 7 Bushe mushilika nshi uuilipilila ifya ku bulwi umwine? Nani alima ibala lya myangashi no kukanalyako ifisabo fya liko?+ Napamo nani acema umukuni wa nama no kukananwako umukaka wa isho nama?+

8 Bushe ifi fintu ndelanda ukulingana no buntunse?+ Napamo bushe amafunde+ te fyo na yo yasosa? 9 Pantu mu mafunde ya kwa Mose e mo calembwa, ati: “Wilakaka ing’ombe ku kanwa ilyo ilenyantaula ingano pa kushisokola.”+ Bushe ing’ombe e sho Lesa asakamana? 10 Nangu ni pa mulandu wesu asoseele ci? Awe na cine ni pa mulandu wesu calembeelwe,+ pa kuti uulelima afwile ukulima nasuubila ukuti mukafuma fimo no ulepuula afwile ukupuula nasuubila no kuti akalyako.+

11 Nga ca kuti ifwe twatandile kuli imwe ifyakuma kuli Lesa,+ bushe cintu cayafya nga twaseepa kuli imwe ififwaya imibili yesu?+ 12 Bambi nga balikwata insambu sha kulya kuli imwe,+ bushe ifwe tatucililepo? Lelo tatwacita ukulingana ne shi nsambu,+ lelo tushipikisha fye muli fyonse, pa kuti twicilikila umulimo wa mbila nsuma+ ya kwa Kristu. 13 Bushe tamwaishiba ukuti ababomba imilimo ya kwa Lesa balya+ ifya mwi tempele, kabili abapyungila+ pe ku ciipailo balya ifya ku ciipailo? 14 Ifyo fine, e fyo na Shikulu afwaile+ ukuti ababila imbila nsuma baleliila mu mbila nsuma.+

15 Lelo ine nshabomfyapo cimo ica ifi fintu nakalya.+ Ukulemba nshilembele ifi ukuti cibe ifyo kuli ine, pantu cawama ine ukufwa ukucila—takuli umuntu nangu umo uwinganengulula pa co njitakishishapo!+ 16 Pantu nga nabila imbila nsuma,+ te ca kuitakishishapo iyo, pantu e mulimo mfwile+ ukubomba. Iye, ca bulanda+ kuli ine nga nshibila imbila nsuma! 17 Nga ncita ici ku kuitemenwa,+ ndi ne cilambu;+ lelo nga ncita ukwabula ukuitemenwa, na lyo line nalipeelwa umulimo+ mfwile ukubomba. 18 Nga kanshi icilambu candi cinshi? Ni ci ica kuti ilyo mbila imbila nsuma ncite fyo ukwabula ukulipililwapo,+ e pa kuti nibomfya bubi bubi insambu shandi mu mbila nsuma.

19 Pantu nelyo ndi muntungwa kuli bonse, naiteka ubusha+ kuli bonse, ukuti nonke+ abengi. 20 E ico ku baYuda naishileba ngo muYuda,+ ukuti nonke abaYuda; ku bakonka amafunde naishileba ngo ukonka amafunde,+ ukuti nonke abakonka amafunde, nelyo nshikonka amafunde+ ne mwine. 21 Ku bashaba na mafunde+ naishileba ngo ushaba na mafunde,+ ukuti nonke abashaba na mafunde, nelyo nshili uwabulwa amafunde ya kwa Lesa lelo naba na mafunde+ ya kwa Kristu.+ 22 Ku banaka naishileba uwanaka, ukuti nonke abanaka.+ Kanshi ku bantu bonse mba fye nge fyo bali,+ pa kuti mu nshila iili yonse mpususheko bamo. 23 Awe ifintu fyonse ncitila imbila nsuma, pa kuti nshimikileko+ bambi.

24 Bushe tamwaishiba ukuti ababutuka+ ulubilo babutuka bonse, lelo umo fye e upokelela icilambu?+ Mulebutuka+ bwino pa kuti mukapoke icilambu.+ 25 Kabili, onse uuli mu mangalo ya kucimfyanya alailama+ muli fyonse. Balya, bena, bacita ifi pa kuti bapokelele icilongwe+ icingonaika, lelo ifwe tucita ifi pa kuti tupokelele icishingonaika.+ 26 E ico, ine ifyo mbutuka+ nshibutuka ngo ulebutuka icibutukebutuke; ifyo mpoosa inkonya te filya uuleuma umwela acita;+ 27 lelo ntuutaula umubili+ wandi no ku-uteka ubusha, pa kuti, ilyo nashimikila bambi, benkaana.+

10 Awe nshilefwaya imwe ukukanaishiba, mwe ba bwananyina, ukuti bashifwe bonse baali mwi samba lye kumbi+ kabili bonse bapitile muli bemba+ 2 kabili bonse babatishiwe muli Mose+ ninshi bali mwi samba lye kumbi ilyo bapitile muli bemba; 3 kabili bonse baliile ifya kulya fimo fine ifyo Lesa abapeele+ 4 kabili bonse banwene ifya kunwa fimo fine ifyo Lesa abapeele.+ Pantu balenwa mu cilibwe+ ca kwa Lesa icalebakonka, na cilya cilibwe+ ni Kristu.+ 5 Lelo, abengi pali aba bafwilile+ mu matololo, pantu Lesa alibakeene.+

6 Awe ifi fintu fyaishileba fya kutusambilisha, ukuti twilakumbwa ifibi,+ filya balya bakumbilwe. 7 Kabili twilapepa utulubi, nga filya bamo pali aba bacitile;+ nga filya calembwa, ati: “Abantu balikele balalya no kunwa, kabili balimine balasangalala.”+ 8 Kabili twilacita bulalelale, filya bamo pali aba bacitile,+ ica kuti mu bushiku fye bumo abantu amakana amakumi yabili na yatatu (23,000) pali aba balifwile.+ 9 Kabili twilaesha Yehova,+ filya bamo pali aba bamweseshe,+ no kwipaiwa ku nsoka.+ 10 Kabili twilailishanya, filya bamo pali aba bailishenye,+ no konaulwa kuli malaika.+ 11 Awe ifi fintu fyaleponena balya pa kuti tusambilileko, kabili fyalembeelwe ku kutusoka+ fwe baleikala mu nshiku sha kulekelesha.+

12 E ico uuletila naiminina ndi acenjele epali awa.+ 13 Takuli ubwesho ubwamuponena ubushiponenako abantu bambi.+ Lelo Lesa wa cishinka,+ kabili takamuleke ukweshiwa ubwesho ubo mushingashipikisha,+ lelo ilyo ubo bwesho bwaisa akafwaya na pa kuti mufuminemo+ pa kuti mube na maka ya kubushipikisha.

14 E ico, mwe batemwikwa bandi, fulumukeniko+ ku kupepa utulubi.+ 15 Ndesosa nge fyo ningasosa ku bashilimuka;+ pinguleni mwe bene ico ndesosa. 16 Kapu+ ye paalo iyo tupaalilapo, bushe tatumwenamo mu mulopa wa kwa Kristu? Umukate uo tumokaula,+ bushe tatumwenamo mu mubili wa kwa Kristu?+ 17 Pantu kuli umukate umo, no yo mukate ni fwe, nelyo twaba abengi,+ twaba fye umubili umo,+ pantu ifwe bonse tulya fye uyo mukate umo.+

18 Shi moneni ificita abena Israele:+ Bushe abalya amalambo te balya bene ababombela ku ciipailo?+ 19 Bushe nomba, ntile shani? Bushe ntile icacindama cintu batuulila akalubi, nangu kalubi e kacindama?+ 20 Iyo; ndetila amalambo ayo abena fyalo batuula, batuulile fibanda,+ te Lesa iyo; nomba nshilefwaya imwe ukwampana ne fibanda.+ 21 Te kuti mulenwena muli kapu ya kwa Yehova+ na muli kapu ya fibanda; te kuti mulelya “ifya kulya fya kwa Yehova”+ e lyo ne fya kulya fya fibanda. 22 Nalimo “bushe tulefwaya Yehova abe no bufuba”?+ Bushe twalikosa+ ukumucila?

23 Nangu fyonse fyalisuminishiwa; lelo te fyonse ifingatwafwa.+ Nangu fyonse fyalisuminishiwa;+ lelo te fyonse ifingatukuula.+ 24 Mwilafwaya fye ifingamuwamina,+ lelo mulefwaya ne fingawamina abanenu.+

25 Conse ico bashitisha pa maliketi ya nama mulelya,+ mwilaipusha iyo pa mulandu wa kampingu wenu;+ 26 pantu “pano isonde pa kwa Yehova+ na fyonse ifyabapo.”+ 27 Uushatetekela nga amwita kabili mulefwaya ukuyako, conse ico mwapeelwa lyeni,+ mwilaipusha nangu cimo pa mulandu wa kampingu wenu.+ 28 Lelo ngo muntu atila kuli imwe: “Ili lilambo ilyo batuulila akalubi,” mwilya pa mulandu wa umwebele na pa mulandu wa kampingu.+ 29 Awe “kampingu” uo ndelandapo, te kampingu obe iyo, lelo wa muntu umbi. Pantu cinshi kampingu wa muntu umbi engalapingwila ubuntungwa bwandi?+ 30 Pantu nga natasha Lesa pa fya kulya nalya, cinshi ico bengansaalwila pa cintu ico mpepeelepo?+

31 E ico, nga mulelya nalimo mulenwa nalimo fyonse ifyo mulecita, citeni fyonse ku kucindika Lesa.+ 32 Mwilapunwisha+ abaYuda na baGriki ne cilonganino ca kwa Lesa, 33 nge fyo na ine ncita icisuma kuli bonse muli fyonse,+ nshifwaya kumwenamo icisuma+ ne mwine kano icingawamina abengi, pa kuti bapusuke.+

11 Mulempashanya, ifyo na ine mpashanya Kristu.+

2 Awe ndemutasha pantu mulanjibukisha muli fyonse kabili mulakonka intambi+ ukulingana fye ne fyo namwebele. 3 Lelo ndefwaya mwishibe ukuti umutwe wa mwaume onse ni Kristu;+ no mutwe wa mwanakashi mwaume;+ no mutwe wa kwa Kristu ni Lesa.+ 4 Umwaume onse uulepepa napamo uulesesema nafimba ku mutwe, alenga umutwe wakwe insoni;+ 5 lelo umwanakashi onse uulepepa nalimo uulesesema+ nafimbulwa ku mutwe, alenga umutwe+ wakwe insoni, pantu aba pamo ngo mwanakashi uo babeya.*+ 6 Pantu umwanakashi nga tafimbile ku mutwe, cawama aputulwe no mushishi wine; apo ca nsoni ku mwanakashi ukumuputula umushishi nelyo ukumubeya,+ cawama alefimba ku mutwe.+

7 Umwaume ena tafwile ukufimba ku mutwe, pantu ena e cipasho+ ca kwa Lesa kabili e bukata+ bwakwe; lelo umwanakashi bukata bwa mwaume.+ 8 Pantu umwaume tafumine mu mwanakashi, lelo umwanakashi e wafumine mu mwaume;+ 9 na kuba, umwaume tabumbilwe pa mulandu wa mwanakashi, lelo umwanakashi e wabumbilwe pa mulandu wa mwaume.+ 10 Pali uyu mulandu na pa mulandu wa bamalaika+ umwanakashi afwile ukuba ne cishibilo ca kulanga ukunakila ku mutwe wakwe.+

11 Lelo, muli Shikulu umwanakashi te kuti abeko ukwabula umwaume no mwaume na o te kuti abeko ukwabula umwanakashi.+ 12 Pantu filya umwanakashi afumine mu mwaume,+ e fyo no mwaume afuma mu mwanakashi;+ lelo ifi fyonse fyafuma kuli Lesa.+ 13 Pinguleni mwe bene: Bushe nacilinga umwanakashi ukupepa kuli Lesa ukwabula ukufimba ku mutwe? 14 Bushe te ca cifyalilwa fye ukuti umwaume nga aba no mushishi uutali, ca nsoni kuli ena?15 E lyo kabili umwanakashi nga aba no mushishi uutali, bushe mucinshi+ kuli ena? Pantu umushishi e o bamupeela ukucila ukumupeela ica kufimba ku mutwe.+ 16 Lelo, ngo muntu alefwaya+ ulutambi+ lumbi ukucila pali ulu, ifwe tatwakwata ulutambi lumbi, nangu fye filonganino fya kwa Lesa na fyo tafyakwata ulutambi lumbi.

17 Mu mashiwi ya fya kukonka nalamweba, nshilemutasha, pantu te kukucita icisuma mulonganina lelo ni kukucita icabipa.+ 18 Pantu ica kubalilapo fye, nalyumfwa ukuti kulaba ukupusana muli imwe ilyo mwalongana ku kupepa;+ kabili nalisumina ukuti fimo pa fyo naumfwa fya cine. 19 Pantu amalekano+ yafwile ukubako, pa kuti abasambi bene bene beshibikwe.+

20 E ico, ilyo mulongana ku kulya umulaalilo wa kwa Shikulu, te mulaalilo wa kwa Shikulu mulya iyo.+ 21 Pantu, pa kulya umulaalilo wa kwa Shikulu, bamo mubalilapo ukulya ifya kulya fya cungulo, bamo bekala fye ne nsala, bambi na bo balakolwa. 22 Bushe kwena tamwakwata amayanda aya kuliilamo no kunwenamo?+ Nalimo bushe mulesuula icilonganino ca kwa Lesa no kulenga insoni abashakwata nangu kamo?+ Nsose shani kuli imwe? Bushe imutashe? Muli ci nshamutashe.

23 Pantu ico napokelele kuli Shikulu e co namushiilile, ica kuti ubushiku+ Shikulu Yesu alefutukwamo abuulile umukate 24 kabili, ilyo atootele,+ aliumokawile no kutila: “Uyu mukate cimpashanya ca mubili+ wandi uulepeelwa pa mulandu wenu. Mulecita ici ku kunjibukisha.”+ 25 Acitile cimo cine na kuli kapu,+ ilyo apwa ukulya umulaalilo, atile: “Iyi kapu cipangano+ cipya pa mulandu wa mulopa wandi.+ Mulecita ici, pantu lyonse ilyo mwanwamo, ninshi mulenjibukisha.”+ 26 Pantu ilyo lyonse+ mwalya uyu mukate no kunwena muli kapu iyi, ninshi mulebila imfwa+ ya kwa Shikulu, akasuke akese.+

27 E ico onse uwalya umukate napamo uwanwena muli kapu ya kwa Shikulu mu musango uushilingile akaba no mulandu+ ku mubili na ku mulopa+ wa kwa Shikulu. 28 Umuntu atale aimone+ nga nalinga ukulyako, e lyo alyeko umukate no kunwena muli kapu. 29 Pantu uulelya no kunwa ukwabula ukwishiba bwino bwino uyu mubili, ailetelela ubupingushi.+ 30 E mulandu wine abengi muli imwe babela abanaka kabili abalwalilila, e lyo bambi na bo balifwa.*+ 31 Lelo atulaisakamana ukumona nga natulinga, teti tupingulwe.+ 32 Lelo, ilyo twapingulwa,+ tusalapulwa kuli Yehova,+ ukuti twikandilwa+ pamo na ba muli ici calo.+ 33 E ico, mwe bamunyinane, ilyo mwalongana ku kulya umulaalilo,+ mulepembelana. 34 Umuntu nga ali ne nsala, alye ku mwakwe,+ pa kuti mwipingwilwa pamo.+ Awe ifyashalako nkalungika ilyo nkesa.

12 Nomba mwe bamunyinane nshilefwaya ukuti mwi-ishibapo nangu kamo pa mulandu wa fya bupe fya mupashi.+ 2 Mwalishiba ukuti ilyo mwali abena fyalo,+ mwalepepa utulubi+ utushilanda,+ utu e to mwaikalile fye ukupepa. 3 E ico ndefwaya mwishibe ukuti takuli uulandila mu mupashi wa kwa Lesa uwingatila: “Yesu alitiipwa!”+ kabili takuli uwingatila: “Yesu e Shikulu!” kano atungululwa no mupashi wa mushilo.+

4 Awe kwaba ifya bupe+ ifyalekanalekana, lelo umupashi wena waba fye umo;+ 5 kabili kwaba imilimo iyalekanalekana,+ lelo kwena kwaba fye Shikulu umo;+ 6 kabili kwaba imisango ya kubombelamo iyalekanalekana,+ lelo Lesa,+ uulenga ukuti bonse babombe iyi milimo yonse, aba fye umo.+ 7 Lelo umupashi umonekela mu muntu umo umo pa kuti ciwamine bonse.+ 8 Awe umuntu umo umupashi wamupeela amashiwi ya mano,+ umbi na o umupashi umo wine wamupeela amashiwi ya kwishiba,+ 9 e lyo umbi umupashi umo wine wamupeela icitetekelo,+ na umbi wamupeela ica bupe ca kuposha,+ 10 umbi na o wamupeela ica bupe ca kucita ifipesha amano,+ umbi na o wamupeela ica bupe ca kusesema,+ e lyo umbi wamupeela ica bupe ca kwiluka+ amashiwi ukumona nga yafumine kuli Lesa atemwa ku fibanda,+ umbi na o wamupeela ica bupe ca kulanda indimi shapusanapusana,+ e lyo umbi wamupeela ica bupe ca kwilula+ indimi. 11 Lelo iyi milimo yonse umupashi umo wine e ubomba,+ e upeela+ umuntu umo umo ifyo wafwaya.+

12 Nangu ca kutila ifilundwa fya muntu fyaba ifingi, umubili wena waba fye umo, ne filundwa fyonse ifya uyo mubili, nelyo fyabe fingi, fyaba umubili umo,+ e fyo na Kristu aba.+ 13 Pantu cine cine ku mupashi umo e ko ifwe bonse twabatishiwe+ ukuti twingile mu mubili umo, abaYuda atemwa abaGriki, abasha atemwa abantungwa, kabili ifwe bonse twalengelwe ukunwa+ umupashi umo.

14 Pantu no mubili, cine cine, te cilundwa cimo, lelo wakwata ifilundwa ifingi.+ 15 Ulukasa nga lwatila: “Ifi nshili minwe, kanshi nshili cilundwa ca mubili,” te kutila ninshi ulukasa te cilundwa ca mubili iyo.+ 16 Kabili ukutwi nga kwatila: “Ifi nshili linso, kanshi nshili cilundwa ca mubili,” te kutila ninshi ukutwi te cilundwa ca mubili iyo.+ 17 Umubili onse auba ilinso, umuntu kuti alaumfwila kwi? Umubili onse auba ukutwi, umuntu kuti alanunshisha kwi? 18 Lelo nomba Lesa abikile ifilundwa mu mubili, cimo cimo ukulingana ne fyo atemenwe.+

19 Bushe ifilundwa fyonse ifya mubili afibe cilundwa cimo,+ kuti waba mubili? 20 Awe kwaba ifilundwa ifingi,+ lelo umubili wena umo. 21 Ilinso teti lyebe iminwe, aliti: “Nshilemukabila”; umutwe na o teti webe amakasa, auti: “Nshilemukabila.” 22 Nangu fye filundwa ifimoneka ifyanaka+ filafwaikwa, 23 kabili ifilundwa fya mubili ifyo tumona ukuti tafyacindama sana, e fyo tucindika sana,+ ne filundwa fyesu ifishimoneka bwino e fyacilanapo kuba bwino, 24 lelo ifilundwa fyesu ifimoneka bwino tafikabila nangu cimo. Na lyo line, Lesa alundinkenye umubili, pa kupeela umucinshi uwacilamo ku cilundwa icabulwa umucinshi, 25 pa kuti mwiba amalekano mu mubili, kano pa kuti cila cilundwa ca mubili cilesakamana icinankwe.+ 26 Kabili icilundwa cimo nga cacula, ninshi ifilundwa fyonse fyaculila+ pamo na co; atemwa icilundwa cimo nga cacindikwa,+ ninshi ifilundwa fyonse fyasekelela pamo na co.+

27 Awe imwe muli mubili wa kwa Kristu, kabili umo umo cilundwa ca mubili wa kwa Kristu.+ 28 Kabili Lesa abika mu cilonganino abalekanalekana,+ aba ntanshi, batumwa;+ aba cibili, ni bakasesema;+ aba citatu ni bakasambilisha;+ e lyo pakonka abacita ifipesha amano;+ e lyo pakonka ababa ne ca bupe ca kuposha;+ e lyo babomfi,+ pakonka na baishiba ukutungulula,+ e lyo na balandila mu ndimi shapusanapusana.+ 29 Bushe bonse batumwa? Bushe bonse ni bakasesema? Bushe bonse ni bakasambilisha? Bushe bonse balacita ifipesha amano? 30 Bushe bonse balikwata ica bupe ca kuposha? Bushe bonse balalandila+ mu ndimi? Bushe bonse balelula+ indimi? 31 Lelo beni no mukoosha wa kufwaisha ifya bupe ifyacilamo.+ Kabili ne nshila iyacilamo nalamulanga.+

13 Nga nalandila mu ndimi+ sha bantu ne sha bamalaika lelo ukutemwa nshakwata, ninshi ndi fye kwati cela ca mukuba icilelilalila fye nelyo nga malimba ya nyenjele.+ 2 Kabili nga nalikwata ica bupe ca kusesema,+ nangu nga nalishiba ifya nkama+ ya kwa Lesa fyonse no kwishiba ifingi,+ kabili nga nalikwate citetekelo cakosa ica kuti kuti nasesha ne mpili,+ lelo ukutemwa nshakwata, ninshi tapali ico ndi.+ 3 Kabili nga napeela fyonse ifyo nakwata ku kuliishishamo bambi,+ nangu nga naipeela ne mwine ukuti banjipaye,+ pa kuti njitakishe, lelo ukutemwa nshakwata,+ te ca kwafwa kuli ine nakalya.

4 Mu kutemwa+ mwaba ukushishimisha+ ne cikuuku.+ Mu kutemwa tamwaba ubufuba,+ tamwaba ukuitakisha,+ nangu ukuituumika.+ 5 Mu kutemwa tamwaba ukucita ifishayana,+ tamwaba ukucita ifya kuisekesha,+ tamwaba ukukalifiwa.+ Tamwaba ukusunga ifilubo.+ 6 Tamwaba ukusekelela pa fishilungeme,+ lelo mwaba ukusekelela pa cine.+ 7 Ukutemwa kulasuulako+ ku fya bubifi fyonse, kusumina fyonse,+ kusuubila fyonse,+ kushipikisha fyonse.+

8 Ukutemwa takupwa.+ Lelo nangu kube ica bupe ca kusesema, nangu ica kulandila mu ndimi, nangu ica bupe ca kwishiba ifintu mu cipesha amano, fyonse ifi fikapwa.+ 9 Pantu tatwaishiba+ fyonse kabili tatusesema fyonse;+ 10 lelo ilyo tukeshiba fyonse,+ kabili ilyo tukasesema fyonse, ifi ifya lubali fikapwa. 11 Ilyo nali umwaice, nalelanda ngo mwaice, naletontonkanya ngo mwaice, nalepelulula ngo mwaice; lelo nomba ndi mukalamba,+ nalileka ifya bwaice. 12 Pantu pali nomba tumwena mu cilola ca cela icishilenga ifintu ukumonekesha,+ lelo pali ilya nshita cikaba kwati tulemonana icinso ne cinso.+ Pali ndakai nshaishiba fyonse, lelo pali ilya nshita nkeshiba bwino bwino nga filya fine fye Lesa anjishiba bwino.+ 13 Awe, nomba, kwashala icitetekelo, isubilo, ukutemwa, ifi fitatu; lelo icacilapo pali ifi fyonse kutemwa.+

14 Konkeleleni ukutemwa, lelo muleba no mukoosha wa kufwaisha ifya bupe+ fya mupashi, maka maka ica bupe ca kusesema.+ 2 Pantu uulandila mu lulimi lumbi talanda ku bantu, lelo ni kuli Lesa alanda, pantu tapaba nangu umo uumfwa+ ifyo alanda, alandila mu mupashi inkama ya kwa Lesa.+ 3 Lelo, uusesema alakuula+ kabili alakoselesha no kusansamusha abantu ku milandile yakwe. 4 Uulandila mu lulimi lumbi ninshi aleikuula fye umwine, lelo uusesema akuula icilonganino. 5 Awe kuti natemwa imwe bonse ukulandila mu ndimi+ shimbi, lelo ndefwaya ukuti mulesesema.+ Cine cine, uusesema alicila uulandila mu ndimi shimbi,+ lelo uulandila mu ndimi shimbi nga ailula ifyo alelanda, icilonganino cilakuulwa. 6 Lelo nomba, mwe bamunyinane, nga naisa kuli imwe ndelandila mu ndimi, ukwabula ukusokolola+ ifyo ndelanda, atemwa nga nshilengele imwe ukufiishiba+ nelyo nga nshifilandiile mu kusesema nelyo mu kusambilisha, bushe ninshi namwafwa?

7 Awe ne filimba pa kulila,+ nampo nga mutoolilo nelyo iseese; nga tafilelekaanina imililile, bushe iciunda icilefuma ku mutoolilo atemwa kwi seese kuti caishibikwa shani? 8 Pantu cine cine, ipenga nga lyalila icililelile, nani engaipekanya ukuya ku bulwi?+ 9 Ifyo fine na imwe, nga mulelandila mu ndimi shimbi ifishileumfwika,+ bushe ico mulelanda kuti caishibikwa shani? Pantu ninshi mulelandila mu mwela.+ 10 Kwena pano calo pabe ndimi ishalekanalekana, kabili tapali nangu lumo ulwabula umo lwalola. 11 Lelo nga nshaishiba umwalola ululimi, kuti naba umwina fyalo+ ku ulelanda, no ulelanda kuti aba kuli ine ngo mwina fyalo. 12 Ifyo fine na imwe, apo mulefwaisha ifya bupe fya mupashi,+ bikeni imitima pali fi pa kuti mulekoselesha icilonganino.+

13 E ico uulandila mu lulimi lumbi apepe pa kuti eshibe umwa kwilwila ifyo alesosa.+ 14 Pantu nga ndepepela mu lulimi lumbi, ninshi umupashi e ulepepa,+ lelo amano yandi tayaliko. 15 Nga kanshi, cifwile ukuba shani? Nga napepela mu mupashi, mfwile ukubikako na mano. Nga naimbila isha malumbo+ mu mupashi, mfwile ukubikako na mano.+ 16 Lelo nga wapepa ipepo lya kutootela mu lulimi lumbi, umuntu yaweyawe kuti alandako shani “Ameni”+ ku fyo uletootela, apo teshibe ico ulesosa? 17 Ca cine, ukutootela kwena uletootela fye bwino, lelo umunobe talekuulwa.+ 18 Ndetootela Lesa pantu nandila mu ndimi ishingi ukucila imwe bonse.+ 19 Lelo, mu cilonganino cawama nalanda amashiwi yasano ayo njishibe, pa kuti nsambilisheko na bambi, ukucila ukulandila mu lulimi lumbi amashiwi amakana ikumi (10,000) ayo nshishibe.+

20 Mwe ba bwananyina, mwilatontonkanya nga baice,+ ku fyabipa+ e ko mube abacece; lelo muletontonkanya nga bakalamba.+ 21 Mu mafunde mwalembwa ati: “‘Mu ndimi sha bena fyalo e mo nkalandila na mu bantu bambi bambi+ e mo nkalandila kuli aba bantu,+ lelo tabakang’umfwe iyo,’ e fyasosa Yehova.”+ 22 E ico indimi cishibilo+ ku bashatetekela, te ku batetekela,+ lelo ukusesema cishibilo ku batetekela, te ku bashatetekela.+ 23 E ico, icilonganino conse nga calongana pamo kabili bonse balalandila mu ndimi shimbi,+ lelo abantu yaweyawe nelyo abashatetekela baisamo, bushe teti bamone ati mwalipena? 24 Lelo nga bonse mulesesema* kabili uushatetekela nelyo umuntu yaweyawe aisamo, amashiwi yenu bonse kuti yamufunda no kumushinina;+ 25 ifyafiswa fya mu mutima wakwe kuti fyamoneka,+ ica kuti awa ubukupeme no kupepa Lesa, alebilisha ati: “Lesa aba muli imwe cine cine.”+

26 Nga kanshi cifwile ukuba shani, mwe bamunyinane? Ilyo mwalongana ku kupepa, umo asamune ulwimbo, umbi na o asambilishe, umubiye na o ashimike ifyo Lesa amusokolwelele, umbi na o alandile mu lulimi lumbi, e lyo pabe no wa kwilula.+ Lekeni fyonse fibe fya kwafwa icilonganino.+ 27 Kabili umuntu nga alandila mu lulimi lumbi, lekeni balande babili fye nalimo batatu epela, kabili balelekanina; e lyo umbi aleilula.+ 28 Lelo nga takuli uwa kwilula, uwa lulimi lumbi atalale mu cilonganino no kulandila mu mutima+ na kuli Lesa. 29 Kabili, bakasesema+ balande babili nalimo batatu, na bambi beluke umo calola.+ 30 Lelo nga kwaba ukusokolwela umbi+ uwikele mulya, uwa ntanshi atalale. 31 Awe e fyo mulesesema+ bonse umo umo, ukuti bonse basambilile kabili bonse bakoseleshiwe.+ 32 Ni bakasesema fye e bakwete amaka pa ca bupe ca mupashi ica kusesema. 33 Pantu Lesa te wa cimfulunganya,+ ni Lesa wa mutende.+

Nga filya fine caba mu filonganino fyonse ifya ba mushilo, 34 abanakashi baleikala tondolo+ mu filonganino, pantu tabasuminishiwa ukulanda, lelo balenakila fye,+ ifyo na mafunde+ yasosa. 35 Lelo, nga balefwaya ukwishibapo cimo, nabepushe abalume babo ku ng’anda, pantu ca nsoni+ umwanakashi ukulanda mu cilonganino.

36 Yangu! Bushe ni kuli imwe e ko icebo ca kwa Lesa cafumine,+ atemwa bushe ni kuli imwe mweka e ko cafikile?

37 Ngo muntu atila ni kasesema nalimo aba ne ca bupe ca mupashi, nasumine ifi fintu ndelemba kuli imwe, pantu mafunde ya kwa Shikulu.+ 38 Lelo ngo muntu taishiba, natwalilile ukukanaishiba. 39 E ico, mwe bamunyinane, mube no mukoosha wa kufwaisha ukusesema,+ lelo kwena mwibinda ukulandila mu ndimi.+ 40 Nomba fyonse filecitika bwino bwino kabili ukwabula icimfulunganya.+

15 Nomba bamunyinane, ndefwaya ukumwibukishako imbila nsuma+ iyo nabilile kuli imwe,+ iyo na imwe mwapokelele, kabili iyo mukonka.+ 2 Mukapusukila+ mu mashiwi nalandile ilyo nabilile imbila nsuma kuli imwe, nga muleyakonka, nga te ifyo, ninshi mwatetekele fye apa fye.+

3 Pantu icacindama sana pa fyo namushilile ni co na ine napokelele,+ ica kuti Kristu afwilile imembu shesu ukulingana ne fisosa Amalembo;+ 4 no kuti alishiikilwe,+ kabili pa bushiku+ bwalenga shitatu alibuukile+ ukulingana ne fisosa Amalembo;+ 5 no kuti amoneke kuli Kefasi,+ e lyo na ku basambi ikumi na babili (12).+ 6 Kabili amoneke ku ba bwananyina abacilile imyanda isano (500) bonse pamo, kabili abengi pali aba na nomba e po bacili,+ lelo bamo balifwa.* 7 E lyo amoneke kuli Yakobo,+ na ku batumwa bonse;+ 8 lelo mu kulekelesha amoneke kuli ine,+ ne wali ngo mwana uwafyalwa bwangu ilyo inshita ya kufyalwa tailafika.

9 Pantu nine nacepesha+ pa batumwa, kabili nshalinga ukwitwa umutumwa, pa mulandu wa kuti nacushishe+ icilonganino ca kwa Lesa. 10 Lelo icikuuku+ ca kwa Lesa e calenga ukuti mbe fino ndi. Kabili icikuuku cakwe ico nalangilwe tacali ica fye,+ lelo canengele ukubombesha ukucila bonse,+ kwena te ine lelo cikuuku ca kwa Lesa icaba muli ine e calengele.+ 11 E ico, nampo nga nine mbila atemwa ni bena, ifyo e fyo tubila kabili e fyo mwatetekela.+

12 Nomba nga tubila ukuti Kristu alibuuka ku bafwa,+ cinshi bamo muli imwe basosela abati abafwa tabakabuuke?+ 13 Nga cine cine abafwa tabakabuuke, ninshi na Kristu wine tabuukile.+ 14 Lelo Kristu nga tabuukile, ninshi ne fyo tubila fya fye, ne citetekelo cesu ninshi ca fye.+ 15 Te ico ceka, lelo ninshi na ifwe tubepesha fye Lesa.+ Pantu ifwe tusosa+ ukuti ca cine Lesa alibuusha Kristu+ ku bafwa. Nomba nga ca cine ukuti abafwa tababuuka, ninshi na Kristu wine Lesa tamubuushishe.+ 16 Pantu abafwa nga tabakabuushiwe, ninshi na Kristu tabuuka. 17 Kabili, Kristu nga tabuuka, ninshi ne citetekelo cenu ca fye; ninshi mucili mu membu.+ 18 Kabili na baafwila muli+ Kristu ninshi baliloba.+ 19 Iye, nga ca kuti isubilo lyesu muli Kristu lya muli buno bwine fye ubwikashi,+ ninshi pa bantu bonse ni fwe twingaba ne nkumbabulili icine cine.

20 Lelo, nomba Kristu alibuuka ku bafwa,+ e cisabo ca ntanshi+ ku bafwa.+ 21 Pantu apo ni mu muntu umo e mwaishiile imfwa,+ e fyo no kubuuka+ kwaishila mu muntu umo. 22 Pantu filya fine fye bonse bafwila muli Adamu,+ e fyo na bonse bakalengelwa aba mweo muli Kristu.+ 23 Lelo onse akabuuka ukulingana ne bumba abamo: Mu fisabo fyabalilapo ukupya,+ uwa ntanshi ni Kristu; e lyo pakakonke aba kwa Kristu muli ilya nshita akabapo.+ 24 Na pa kulekelesha, akalubwila ubufumu kuli Lesa kabili Wishi, ilyo akonaula ubuteko bonse no butungulushi bonse na maka.+ 25 Pantu ali no kuteka mpaka Lesa akabike abalwani bonse pe samba lya makasa yakwe.+ 26 No mulwani wa kulekelesha ukonaulwa ni mfwa.+ 27 Pantu Lesa “abikile fyonse pe samba lya makasa yakwe.”+ Lelo ilyo kemba wa malumbo atile ‘fyonse filemunakila,’+ naci-ilanga fye ukuti tabikileko uwalengele fyonse ukulamunakila.+ 28 Nomba ilyo fyonse fikalengwa ukunakila ena,+ e lyo no Mwana wine akainashisha ku Walengele+ fyonse ukunakila ena, pa kuti Lesa akabe fyonse kuli bonse.+

29 Nga te ifyo, ninshi bakacita shani abalebatishiwilwa ukufwa?+ Abafwa nga tabakabuushiwe nakalya,+ nga cinshi balebatishiwilwa+ ukufwa? 30 Cinshi ico na ifwe twabela mu busanso inshita yonse?+ 31 Cila bushiku ndalolenkana ne mfwa.+ Mwe ba bwananyina, ndeshininkisha ici pa mulandu wa kusekelela+ uko nakwata pali imwe, uko naba na ko muli Kristu Yesu Shikulwifwe. 32 Pantu nga nalwile ne fiswango mu Efese,+ ifyo na bantu bambi bacita, ca kwafwa nshi kuli ine? Abafwa nga tabakabuushiwe ninshi “tulye no kunwa, pantu mailo tukafwa.”+ 33 Mwilufiwa. Ukwampana pamo na babi kulonaula imibele isuma.+ 34 Beni abatuntulu+ umwalola ubulungami kabili mwilacita lubembu, pantu bamo tabaishiba Lesa.+ Ndesosa ici ku kumulenga insoni.+

35 Lelo umo kuti atila: “Bushe abafwa bakabuushiwa shani? Bakeshila mu mubili wa musango nshi?”+ 36 We mbula mano we! Ico ubyala tacilengwa ica mweo kano cabala cafwa;+ 37 Kabili te mubili wa co ubyala e ukamena iyo, lelo luseke fye,+ ulwa ngano atemwa ulwa musango fye umbi; 38 Lelo Lesa alupeela umubili+ ukulingana ne fyo alefwaya,+ kabili apeela ulubuto lumo na lumo umubili wa luko. 39 Imibili yonse tayaba umusango umo wine, lelo kuli umubili uwa bantunse, e lyo kuli no mubili wa finama, no mubili wa fyuni, e lyo no we sabi.+ 40 Kabili kuli ne mibili ya mu muulu,+ ne mibili+ ya pano isonde; lelo ubukata+ bwa mibili ya mu muulu bwena bwali-ibela, no bukata bwa mibili ya pano isonde na bo bwali-ibela. 41 Ubukata bwa kasuba bwali-ibela,+ no bukata bwa mweshi+ na bo bwali-ibela, ubukata bwa ntanda+ na bo bwali-ibela; na kuba ulutanda lwalipusana no lutanda lubiye ku bukata.

42 E fyo caba na ku kubuuka kwa bafwa.+ Bashiikwa no mubili uubola, babuushiwa no mubili uushibola.+ 43 Bashiikwa mu museebanya,+ babuushiwa mu bukata.+ Bashiikwa no mubili wanaka,+ babuushiwa no mubili wa maka.+ 44 Bashiikwa no mubili wa pano isonde,+ babuushiwa no mubili wa ku muulu.+ Apo kwaba umubili wa pano isonde, kwaba no mubili wa ku muulu. 45 Kabili nga filya calembwa, ati: “Umuntu wa ntanshi Adamu aishileba uwa mweo.”+ Adamu wa kulekelesha ena aishileba umupashi+ uupeela umweo.+ 46 Uwa ntanshi te mupashi, lelo muntunse, e lyo nomba pakonka umupashi.+ 47 Umuntu wa ntanshi wa pano isonde kabili abumbilwe kwi loba;+ umuntu wa bubili afumine ku muulu.+ 48 Ifyo uwabumbilwe kwi loba+ aali, e fyaba na bonse ababumbwa kwi loba; kabili ifyo uwafumine ku muulu+ aba, e fyaba na ba ku muulu.+ 49 Kabili filya twapala+ uwabumbilwe kwi loba, e fyo tukapala+ uwafumine ku muulu.

50 Awe ndemwebe ci, mwe bamunyinane, ukuti iyi mibili yesu iya munofu no mulopa te kuti ibe mu bufumu bwa kwa Lesa,+ filya fine fye umubili uubola te kuti uye ku muulu mu musango uyu wine.+ 51 Moneni ndemwebe nkama ya kwa Lesa iya kuti: Tatwakafwe bonse, lelo tukaalulwa bonse,+ 52 mu kashita akanininini, mu kukapakapa kwa linso, ilyo ipenga lya kulekelesha likalila. Pantu ilyo lilya ipenga+ likalila, e lyo abafwa bakabuuka ne mibili iishibola, na ifwe tukaalulwa. 53 Pantu uyu mubili uubola ukaalulwa ukuba uushibola,+ kabili uyu mubili uufwa+ ukaalulwa ukuba uushifwa. 54 Lelo ilyo uyu mubili uubola ukaalulwa ukuba uushibola na lintu umubili uufwa ukaalulwa ukuba uushifwa, e lyo cikesafishiwa icalembwa, ati: “Imfwa+ naiminwa pe na pe.”+ 55 “We Mfwa, kuli kwi ukucimfya kobe? We mfwa, luli kwi ulubola lobe?”+ 56 Awe ulubola+ ululeta imfwa lubembu, lelo amafunde e yalenga ulubembu ukuba na maka.+ 57 Awe kube ukutootela kuli Lesa, pantu atupeela ukucimfya muli Shikulwifwe Yesu Kristu!+

58 E ico, mwe bamunyinane abatemwikwa, beni abashangila,+ abashitelententa, abacincila pe mu mulimo wa kwa Shikulu,+ pa kwishiba ukuti ukucucutika kwenu mu mulimo wa kwa Shikulu te kwa fye.+

16 E ico filya naebele aba mu filonganino fya ku Galatia+ ukupeela umusangulo+ ku ba mushilo,+ e fyo na imwe bene mucite. 2 Pa bushiku bonse ubwa ntanshi ubwa mulungu, onse alepaatulapo fimo mu ng’anda mu mwakwe no kusunga ukulingana no mo akwatila, ukuti ilyo nkesa kwikaba ukusangula. 3 Lelo ilyo nkafika, abaume abo mukasuminisha muli bakalata,+ e bo nkatuma ukutwala ubupe bwenu ubwa kwafwilisha ku Yerusalemu. 4 Awe nga cawamina ine ukuya, bakaya pamo na ine.

5 Lelo nkesa kuli imwe ilyo nkapita mu Makedonia, pantu ndi no kupita mu Makedonia;+ 6 kabili nalimo nkekala na imwe nelyo ukupwisha fye inshita yonse iya mpepo pamo na imwe, pa kuti imwe mukanshindike+ uko nkaya. 7 Pantu nshilefwaya ukumumwena fye mu lupita, ico ndesuubila ukwikalako akashita na imwe,+ nga Yehova+ akansuminisha.+ 8 Lelo ndeikala mu Efese+ kukasuke akuba umutebeto wa Pentekoste; 9 pantu ninkwata ishuko ilikalamba* ilya kuti mombeshe,+ lelo kuli abengi abalekaanya.

10 Nomba Timote+ nga aisa uko, mukamupokelele bwino pa kuti ekaba no mwenso, pantu alebomba umulimo wa kwa Yehova,+ ifyo na ine ndebomba. 11 E ico, umuntu nangu umo emusuula.+ Lelo mukamushindike, ukuti akese kuli ine, pantu ine na ba bwananyina tulemulolela.

12 Awe Apolo+ munyinefwe, nalimupapaatile nga nshi ukuti ese ku mwenu pamo na ba bwananyina, lelo umwine talefwaya ukwisa ino nshita; lelo akesa ilyo akamona inshita isuma.

13 Beni abalola,+ iminineni ndi mu citetekelo,+ mube abashipa nga baume,+ koseni.+ 14 Lekeni fyonse ifyo mulecita ficitilwe mu kutemwa.+

15 Awe ndemukonkomesha, mwe bamunyinane: Mwalishiba ukuti aba mu ng’anda ya kwa Stefana e fisabo fyabalilepo ukupya+ mu Akaya kabili bali-ipeela nga nshi mu kubombela aba mushilo.+ 16 Ndemupapaata ukuti na imwe munakile ababa ifi na bonse abalebombela pamo na imwe no kucucutika.+ 17 Awe ndi ne nsansa pa kumona ukuti Stefana,+ Fortunati na Akaiki nabesa, pantu bamwimininako mwe bashilipo. 18 Awe nabasansamusha nga nshi umutima+ wandi pamo no wenu. E ico cindikeni ababa ifi.+

19 Bamunyinefwe mu filonganino fya ku Asia* bamuposha.+ Akula na Priska* pamo na bonse abalonganina mu ng’anda+ yabo bamuposha nga nshi muli Shikulu. 20 Bamunyinefwe bonse bamuposha. Muposhanye mu kutomona kwa mushilo.+

21 Ine, ne Paulo, nalemba no kuboko kwandi aya mashiwi ya kuposha.+

22 Umuntu nga tatemwa Shikulu, natiipwe.+ Mwe Shikulu, iseni!+ 23 Icikuuku ca kwa Shikulu Yesu cibe na imwe. 24 Ukutemwa kwandi kube na imwe bonse muli Kristu Yesu.