Kuli Tito
1 Ine ne Paulo, ne musha+ wa kwa Lesa kabili umutumwa+ wa kwa Yesu Kristu ukulingana ne citetekelo ca basalwa+ aba kwa Lesa kabili ukulingana no kwishiba+ bwino bwino icine+ ca bukapepa+ 2 apashintilila isubilo lya mweo wa muyayaya,+ uo Lesa uushingabepa+ alaile kale sana,+ 3 kabili mu nshita yalinga alengele icebo cakwe ukusokolokela mu mulimo napeelwe uwa kushimikila,+ ukulingana ne fyo Lesa, Umupusushi+ wesu anjebele; 4 nalemba uno kalata kuli Tito, umwana+ wine wine ukulingana ne citetekelo ico bonse twakwatako:
Icikuuku no mutende ukufuma kuli Lesa Shifwe+ na kuli Kristu Yesu Umupusushi wesu fibe na iwe.+
5 Ico nakushiilile mu Krete,+ ni pa kuti ulungike ifyalubana no kusonta+ abakalamba mu misumba yonse, ukulingana ne fyo nakwebele,+ 6 ukuti umukalamba afwile ukuba uwabula umulandu,+ umulume wa mukashi umo,+ uwaba na bana abasumina abashingapeelwa umulandu wa kuilekelesha nelyo uwa bucintomfwa.+ 7 Apo kangalila mubomfi+ wa kwa Lesa, afwile ukuba uushitungwa akabi,+ te munshebwa,+ te wa cipyu,+ te cakolwa,+ te upuma,+ tafwile ukuba no lunkumbwa lwa fyuma,+ 8 lelo afwile ukuba uupokelela abeni,+ uwatemwa ubusuma, uwa mano,+ uwalungama, uwa cishinka,+ uwailama,+ 9 uukonka sana icebo ca kwa Lesa ica cishinka mu misambilishishe+ yakwe, pa kuti abe na maka ya kukoselesha abantu mwi sambilisho ilituntulu+ no kukalipila+ abapilika ili sambilisho.
10 Pantu kuli abengi abashinakila lelo abasabaila fye,+ kabili ababeleleka abantu, maka maka balya abakoselesha abantu ukukonka intambi sha baYuda.+ 11 Tufwile ukutalalika utunwa twa aba bantu, pantu aba e bonaula indupwa+ pa kusambilisha ifyo bashifwile ukusambilisha pa kuti banonkelemo ifyuma fya lunkumbwa.+ 12 Umo uwa muli bena, kasesema wa ku mwabo, atile: “Abena Krete lyonse balanda fye ifya bufi, ni nama mbi,+ kabili banang’ani abafunuka nga nshi.”
13 Ifyo alandile fya cine. Ni pali uyu wine mulandu ndekwebela nati utwalilile ukubakalipila,+ pa kuti babe abatuntulu+ mu citetekelo, 14 belabika amano ku milumbe+ ya baYuda na ku mafunde ya bantu+ abasuula icine.+ 15 Ifintu fyonse fyalisanguluka ku bantu abasanguluka.+ Lelo ku bakowela+ kabili abashakwata icitetekelo+ takwaba nangu cimo icasanguluka, lelo amatontonkanyo yabo na bakampingu+ babo fyalikowela. 16 Basosa abati balishiba Lesa,+ lelo ku fyo bacita+ balamukaana, pantu bantu ababipa kabili ni bacintomfwa kabili te kuti+ babombe umulimo uusuma nangu umo.
2 Lelo iwe ulelanda ifileumfwana ne sambilisho ilituntulu.+ 2 Abaume+ abakalamba babe abatekanya, abaicindika,+ aba mano, abashinenuka mu citetekelo,+ mu kutemwa, na mu kushipikisha.+ 3 Ifyo fine eba na banakashi+ abakalamba ukuti babe ne mibele ya mushilo, te ba lwambo,+ nangu abatekwa ubusha ku kunwa umwangashi uwingi, lelo balesambilisha ifisuma; 4 pa kuti balesambilisha abakashana ukutemwa abalume babo,+ ukutemwa abana babo,+ 5 ukuba na mano, ukuba abasanguluka,+ abasunga bwino amayanda yabo, abasuma, abanakila+ abalume babo, pa kutila icebo ca kwa Lesa cipontelwa.+
6 Ifyo fine ulekonkomesha na balumendo ukuba na mano,+ 7 kabili muli fyonse ube icilangililo kuli bambi ica milimo iisuma;+ ulesambilisha+ abantu ifya cine,+ ulebikako amano, 8 uleba ne milandile iisuma iishingakalifya bambi;+ pa kuti uulekaanya omfwe insoni, pa kusanga ukuti tapali nangu cimo ico engatwitila ukuti tuli bantu ababi.+ 9 Eba na basha+ ukuti balenakila ababashita muli fyonse,+ no kulabasansamusha, te kulabapilika,+ 10 belaiba,+ lelo baleba aba cishinka sana,+ pa kuti muli fyonse bayemfye isambilisho lya kwa Lesa, Umupusushi+ wesu.
11 Pantu icikuuku+ ca kwa Lesa icilepususha+ abantu+ abalekanalekana calimoneka,+ 12 muli ici cikuuku e mo tusambilila ifya kukaana imikalile+ iishili ya bwina Lesa no lunkumbwa+ lwa pano calo lelo tusambililamo ifya kuba na mano, ifya kuba abalungami ne fya kuba na bukapepa+ muli buno bwikashi bwa nomba,+ 13 ilyo tulelolela isubilo+ ilishaiwamina no kumoneka kwa bukata+ ukwa kwa Lesa mukulu no kwa Mupusushi wesu, Kristu Yesu, 14 uwaipeele+ pali ifwe ukuti atulubule+ ku musango onse uwa bumpulamafunde no kusangulula+ abantu pa kuti babe abantu bakwe abaibela,+ kabili abapimpa ukubomba imilimo isuma.+
15 Ulebomfya amaka yobe yonse ayo wapeelwa ku kucincisha no kukalipila abalekumfwa.+ Wileka umuntu nangu umo akusuule.+
3 Ulebebukisha ukunakila+ no kulaumfwila ubuteko na balashi,+ ukuba abaiteyanya ukubomba umulimo onse uusuma,+ 2 ukukanapontela umuntu nangu umo, ukukanaba no lubuli,+ ukukanapampamina fye pa cintu cimo,+ ukuba abafuuka ku bantu bonse.+ 3 Pantu na ifwe bene kale twali impelwa mano kabili ababula icumfwila. Twalilufiwe kabili twatekelwe ubusha ku lunkumbwa ulwalekanalekana no kwangala ukwalekanalekana, twalecita ububi kabili twali no mufimbila, twali abaselausha, kabili twalepatana.+
4 Lelo, ilyo icikuuku+ ca kwa Lesa Umupusushi+ wesu no kutemwa uko atemwa abantu fyamoneke,+ 5 e lyo atupuswishe, te pa mulandu wa milimo+ iisuma iyo twacitile+ nakalya, lelo ni ku luse+ lwakwe fye e ko atupusushishe pa kutusamba+ no kutulenga ukuba no mweo+ na pa kutulenga abapya ku mupashi wa mushilo.+ 6 Uyu mupashi e o atupongolwelele muli Yesu Kristu Umupusushi wesu,+ 7 pa kuti pa numa ya kulungamikwa+ ku maka ya cikuuku cakwe,+ tube impyani+ ukulingana ne subilo lya mweo wa muyayaya.+
8 Aya mashiwi ya cishinka,+ kabili ndefwaisha iwe ukulakomailapo nga nshi pali ifi fintu, pa kuti abasumina muli Lesa babike amatontonkanyo yabo pa kutwalilila ukubomba imilimo iisuma.+ Ifi fintu fisuma kabili fya kwafwa abantu.
9 Lelo taluka ku fipusho+ fya buwelewele, ku kufwaya ukwishiba intuntuko sha fikolwe,+ ku kuumana+ na ku kulwila pa Mafunde,+ pantu tafyafwa kantu kabili fya fye. 10 Umuntu uuleleta isambilisho lya bufi+ umukaane+ pa numa ya kumusoka umuku wa ntanshi no wa cibili;+ 11 pa kwishiba ukuti uwa musango yo alifuma mu nshila kabili alabembuka, no kuishinina aleishinina umwine.+
12 Ilyo nkatuma Artema nelyo Tukiki+ kuli iwe, wikafilwa ukwisa kuli ine ku Nikopoli, pantu e ko ndefwaya nkekale pa nshita ya mpepo.+ 13 Upekanishishe bwino bwino Sena, uwaishibisha Amafunde, na Apolo ifya pa lwendo lwabo, ukuti bebulwa nangu cimo.+ 14 Awe na bantu besu basambilile ukulabomba imilimo iisuma pa kuti balekumanisha ifyo bakabila sana,+ ukuti beba abashitwala ifisabo.+
15 Bonse abali pamo na ine bakuposha.+ Posha abatutemwa mu citetekelo.
Icikuuku cibe na imwe bonse.+