IBUUKU LYA BUBILI ILYA IMILANDU
1 Ilyo Solomone umwana wa kwa Davidi ali imfumu, alekoselako fye na Yehova Lesa wakwe ali nankwe, kabili alimucindamike nga nshi.+
2 Solomone atumine abakuyaita abena Israele bonse, abaletungulula amabumba ya bantu 1,000 na baletungulula amabumba ya bantu 100, bakapingula, intungulushi sha bena Israele shonse e lyo ne ntungulushi sha mayanda ya bashibo. 3 Lyena Solomone no lukuta lonse baile pa ncende balepepelapo mu Gibeone,+ pantu e pali itenti lya kukumaninamo ilya kwa Lesa wa cine, ilyo Mose umubomfi wa kwa Yehova apangiile mu matololo. 4 Lelo Davidi alifumishe icipao ca kwa Lesa wa cine ku Kiriati-yearimu,+ acitwala ku cifulo ico acipekanishishe kabili acipangiile itenti mu Yerusalemu.+ 5 Kabili iciipailo ca mukuba+ ico Besalele+ umwana wa kwa Uri umwana wa kwa Huri apangile bacibikile pa ntanshi ye tenti lya kwa Yehova, kabili Solomone no lukuta lonse balepepa pa ntanshi ya ciko.* 6 Palya e po Solomone atuuliile Yehova imituulo, atuliile imituulo ya koca 1,000 pa ciipailo ca mukuba+ icali pe tenti lya kukumaninamo na Lesa.
7 Pali bulya bwine bushiku mu nshita ya bushiku, Lesa amoneke kuli Solomone e lyo amweba ati: “Lomba ifyo ulefwaya nkupeele!”+ 8 E lyo Solomone aebele Lesa ati: “Mwalilangile sana Davidi+ tata ukutemwa ukushipwa kabili nimwe mumbikile pa bufumu pa kuti imupyane.+ 9 Nomba mwe Yehova Lesa fikilisheni ubulayo mwalaile Davidi tata,+ pantu nimwe munsontele ukuba imfumu pa bantu abafula ngo lukungu lwa pe sonde.+ 10 Mpeeleni amano kabili nengeni njishibe+ ifya kutungulula aba bantu, pantu nani uwingapingula aba bantu benu abafula ifi?”+
11 Lyena Lesa aebele Solomone ati: “Apo ifi e fyo umutima obe ulefwaisha kabili taulombele ifyuma nelyo ubucindami, kabili taulombele ukuti abakupata bafwe nelyo ukuti ukekale imyaka iingi,* lelo walomba amano no kwishiba ifyo wingalapingula abantu bandi abo nakusontapo ukuba imfumu,+ 12 ndekupeela amano kabili ndelenga wishibe ifya kutungulula abantu bandi; nalakucindamika no kukupeela ifyuma ifyo imfumu shonse ishabalilepo shishatalile ashikwata, kabili ifyo imfumu shonse ishikakukonkapo shishakatale ashikwata.”+
13 E ico Solomone afumine pa ncende ya kupepelapo mu Gibeone+ apali itenti lya kukumaninamo na Lesa, aya ku Yerusalemu kabili aileteka abena Israele. 14 Solomone alelonganika fye amaceleta na bakabalwe.* Akwete amaceleta 1,400 na bakabalwe* 12,000+ kabili afisungiile mu misumba ya maceleta+ mupepi ne mfumu mu Yerusalemu.+ 15 Imfumu yalengele silfere na golde yafula nga nshi mu Yerusalemu kwati mabwe,+ kabili yalengele imbao sha fimuti fya mikedari shafula nga nshi kwati fimuti fya mikunyu ifya mu Shefela.+ 16 Bakabalwe abo Solomone akwete babafumishe ku Egupti,+ kabili bashimakwebo ba mfumu baleshita bakabalwe abengi* pa mutengo umo.+ 17 Iceleta lya ku Egupti limo balelishita pa ndalama sha silfere 600, kabili kabalwe umo balemushita pa ndalama sha silfere 150; Lyena balefishitisha ku mfumu shonse isha bena Hiti ne mfumu sha bena Siria.
2 Solomone nomba aebele abantu ukukuula ing’anda iyali no kulenga ishina lya kwa Yehova lyacindikwa,+ kabili abebele no kukuula isano lyakwe.+ 2 Solomone asalile abaume 70,000 aba kubomba imilimo iyalekanalekana,* abaume 80,000 aba kuputula amabwe mu mpili,+ na ba kubangalila 3,600.+ 3 Solomone alitumine na mashiwi kuli Hiramu+ imfumu ya ku Turi aya kuti: “Filya fine waletumina Davidi tata imikedari ya kukuulila ing’anda* ya kwikalamo e fyo na ine uncitile.+ 4 Ndekuula ing’anda iikalenga ishina lya kwa Yehova Lesa wandi likacindikwe kabili nkalenga ikabe iya mushilo, pa kuti ndeoca ububani bwanunkila+ kuli ena, no kutuula umukate wa kutuula uwa lyonse+ ne mituulo ya koca ulucelo ne cungulo,+ pa Masabata+ na pa kutendeka kwa myeshi+ na pa nshita ya mitebeto+ ya kwa Yehova Lesa wesu. Ifi e fyo abena Israele bafwile ukulacita umuyayaya. 5 Ing’anda ndekuula ikaba ya lulumbi, pantu Lesa wesu mukalamba ukucila balesa bambi. 6 Kabili nani uwingamukuulila ing’anda? Pantu imyulu ne myulu ya myulu te kuti imukumane,+ e ico nine nani uwa kuti imukuulile ing’anda? Ine ico ningacita fye kumukuulila ing’anda iya kumutuulilapo amalambo. 7 E ico nomba untumine umuntu uwaishiba ukupanga ifintu ukubomfya golde, silfere, umukuba,+ icela, ubushishi bwa kashikila no bwa kashika ce e lyo no bwa bluu, kabili uwaishiba ukulemba ifya kuyemfya pa fintu. Akulabombela pamo na baume bandi abaishiba ifya kupangapanga mu Yuda na mu Yerusalemu, abo Davidi tata asalile.+ 8 Kabili untumine ifimuti fya mikedari, imikupri+ ne mialgumi+ iya ku Lebanone, pantu nalishiba ukuti ababomfi bobe balishiba sana ukutema ifimuti fya mu Lebanone.+ Ababomfi bandi bakabombela pamo na babomfi bobe+ 9 pa kuti bakampekanishishe imbao ishingi, pantu ing’anda ndekuula ikaba ya lulumbi. 10 Kabili mona! Ababomfi bobe abatema ifimuti nkalabapeela ifya kulya.+ Nkalabapeela amadalamu* 20,000 aya ngano, amadalamu 20,000 aya barle, imitondo* 20,000 iya mwangashi ne mitondo 20,000 iya mafuta.”
11 E ico Hiramu imfumu ya bena Turi alembeele Solomone ati: “Apo Yehova alitemwa abantu bakwe nakusonta ukuba imfumu yabo.” 12 Lyena Hiramu alandile ati: “Acindikwe Yehova Lesa wa bena Israele, uwapangile imyulu ne sonde, pantu alipeela Imfumu Davidi umwana wa mano,+ uwacenjela kabili uwiluka ifintu,+ uukakuulila Yehova ing’anda kabili uukaikuulila isano. 13 Nomba ndetuma Hiramu-abi,+ umwaume uwaishiba ifya kupangapanga kabili uwiluka ifintu. 14 Hiramu-abi mwana wa mwanakashi umwina Dani, lelo wishi ali mwina Turi. Alishiba ukupanga ifintu ukubomfya golde, silfere, umukuba, icela, amabwe, imbao, ubushishi bwa kashikila, ubwa bluu, insalu ishisuma, e lyo no bushishi bwa kashika ce.+ Alishiba ukulemba pa fintu ifyalekanalekana kabili kuti apanga ifili fyonse ifya kuyemfya ifyo mwingamweba.+ Akulabombela pamo na baume benu abaishiba ifyakupangapanga, e lyo na baume abaishiba ifyakupangapanga abo shikulu Davidi shinwe asalile. 15 E ico nomba mwe shikulu, tumineni ababomfi benu ingano, barle, amafuta no mwangashi ifyo mwabalaile.+ 16 Ifwe tukatema ifimuti ifingi ku Lebanone+ ukulingana ne fyo mulefwaya, tukafikaka pamo no kufipoosa pali bemba pa kuti fikaye file-elela ukuyafika ku Yopa,+ kabili kulya e ko mukafisenda pa kuti mukafitwale ku Yerusalemu.”+
17 Lyena Solomone apendele abaume bonse abalebeshi abaleikala mu Israele+ nga filya wishi Davidi+ abapendele, kabili asangile ukuti bali 153,600. 18 E ico asalile aba kubomba imilimo iyalekanalekana* abali 70,000, aba kuputula amabwe mu mpili abali 80,000+ na ba kwangalila abalebomba imilimo abali 3,600.+
3 Lyena Solomone atendeke ukukuulila Yehova ing’anda+ mu Yerusalemu pa Lupili lwa Moria,+ apo Yehova amonekele kuli wishi Davidi,+ pa ncende iyo Davidi apekenye apo Ornani+ umwina Yebusi alepumina ingano. 2 Atendeke ukukuula pa bushiku bwalenga bubili ubwa mweshi walenga bubili, mu mwaka walenga 4 ukutula apo atendekeele ukuteka. 3 Umufula Solomone aimbile uwa kukuulapo ing’anda ya kwa Lesa wa cine, walepele imikono 60 mu butali e lyo imikono 20 mu bwipi+ ukulingana ne fyo balepima kale.* 4 Umuputule wa kwingililapo uwali pa ntanshi wali imikono 20 mu butali, nge fyo ing’anda yalepele mu bwipi, kabili wasanseme imikono 20;* kabili mu kati abikilemo golde iisuma.+ 5 Ku fibumba fya ng’anda iikalamba abikileko imbao sha mukupri, e lyo abikako golde iisuma.+ Lyena alengelepo utuncindu+ na maceni+ pa kufiyemfya. 6 Abikileko na mabwe aya mutengo sana kabili ayalemoneka bwino;+ kabili golde+ iyo abomfeshe yafumine ku Paravaimu. 7 Abikile golde ku ng’anda,+ ku nsonta, ku minshi na ku fibumba; kabili pa fibumba alengelepo bakerubi.+
8 Lyena apangile Umuputule wa Mushilo Nga Nshi*+ uwalepele imikono 20 ukulingana ne fyo ing’anda yalepele mu bwipi, kabili mu bwipi walepele imikono 20 kabili abikileko amatalanti* 600 aya golde iisuma.+ 9 Golde babikile ku misomali yafinine amashekele* 50 kabili ku miputule ya pa muulu abikileko golde.
10 Lyena mu Muputule wa Mushilo Nga Nshi* apangiilemo bakerubi babili kabili alibabikileko golde.+ 11 Amapindo ya bakerubi+ yonse pamo yalepele imikono 20. Ipindo limo ilya kwa kerubi wa kubalilapo lyalepele imikono 5 kabili lyafikile ku cibumba ca ng’anda, ipindo limbi nalyo lyalepele imikono 5 kabili lyafikile kwi pindo lya kwa kerubi umbi. 12 Kabili ipindo lya kwa kerubi umbi lyalepele imikono 5 kabili lyafikile ku cibumba cimbi ica ng’anda, e lyo ipindo limbi nalyo lyalepele imikono 5 kabili lyafikile kwi pindo lya kwa kerubi wa kubalilapo. 13 Amapindo ya bakerubi yalifungulwike kabili yalepele imikono 20. Bakerubi baliminine kabili baloseshe ifinso fyabo ku Muputule wa Mushilo.
14 Apangile ne nsalu ya kucingilako+ iya bushishi bwa bluu, ubwa kashikila, ubwa kashika ce, no bwa nsalu iisuma, kabili apikwililemo bakerubi.+
15 Lyena apangile inceshi shibili+ pa ntanshi ya ng’anda ishalepele imikono 35, kabili ifyali nge mitondo ifyali pa muulu wa ishi nceshi shibili fyalepele imikono 5.+ 16 Kabili apangile utumaceni utwaba kwati tumaceni twa mu mukoshi no kutubika pa muulu wa nceshi, kabili apangile ne fya kuyemfeshako ifyaba nga mapomegranate ifili 100 e lyo afibika pa tumaceni. 17 Aimike inceshi pa ntanshi ye tempele, lumo ku kulyo* na lumbi ku kuso.* Ainike ulwali ku kulyo ati Yakini* e lyo ulwali ku kuso alwinike ati Boasi.*
4 Lyena apangile iciipailo ca mukuba+ icali imikono 20 mu butali e lyo mu bwipi namo cali imikono 20, kabili casanseme imikono 10.
2 Apangile icishiba*+ ca mukuba. Cali icabulungana kabili pa kanwa cakulile imikono 10, casanseme imikono 5, kabili intambo iyalepele imikono 30 e yalekumana ukushingulusha conse.+ 3 Kabili balibikile utwa kuciyemfya utwapala inkombo+ mwi samba lya ciko ukucishingulusha, mu mukono umo mwaleba utuli 10 ukushinguluka icishiba conse. Utwapala inkombo twali mu mitande ibili, kabili batwengeele ku Cishiba. 4 Bacibikile pa ng’ombe ishilume 12,+ shitatu shaloseshe ku kapinda ka ku kuso, shitatu shaloseshe ku masamba, shitatu shaloseshe ku kapinda ka ku kulyo e lyo shitatu shaloseshe ku kabanga; icishiba bacitekele pali ishi ng’ombe kabili shonse shaloseshe inuma mu kati. 5 Catikeme ngo lupi mu bwipi;* kabili imilomo ya ciko baipangile nge milomo ya kapu, kwati liluba ilyabalula. Ici icishiba pa kuti cisule mwaleingila imitondo* ya menshi 3,000.
6 Kabili apangile ifya kubikamo amenshi ya kusamba ifili 10, ifili 5 afibikile ku kulyo e lyo fimbi 5 afibikile ku kuso.+ Muli ifi e mo balesamfisha ifyo balebomfya pa kutuula imituulo ya koca.+ Lelo mu cishiba e mo bashimapepo balefumya amenshi ya kusamba.+
7 Lyena apangile ifya kutekapo inyali ifya golde+ ifyali 10 ukulingana ne fyo fyalingile ukupangwa+ kabili afibikile mwi tempele, ifili 5 ku kulyo e lyo fimbi 5 ku kuso.+
8 Apangile na matebulo 10 kabili ayabikile mwi tempele. Abikile ayali 5 ku kulyo e lyo yambi 5 ayabikile ku kuso,+ kabili apangile ne mbale shafonka 100 isha golde.
9 Lyena apangile ulubansa+ lwa bashimapepo+ no lubansa ulukalamba+ e lyo ne fiibi fya lubansa, kabili ku fiibi abikileko umukuba. 10 Kabili abikile Icishiba ku kulyo kwa ng’anda lwa ku kabanga.+
11 Hiramu apangile ne fya kukushilamo imito, amafosholo ne mbale shafonka.+
E ico Hiramu alipwishishe imilimo yonse iyo abombeele Imfumu Solomone pa ng’anda ya kwa Lesa wa cine:+ 12 inceshi shibili+ ne fyali nge mitondo pa muulu wa nceshi shibili; utwa kuyemfeshako tubili+ uto babikile ku fyali nge mitondo fibili ifyali pa muulu wa nceshi; 13 ifyali nge fisabo fya mapomegranate 400+ ifyo babikile ku twa kuyemfeshako tubili, imitande ibili iya fyali nge fisabo fya mapomegranate ifyo babikile ku twa kuyemfeshako kamo na kamo uto babikile ku fyali nge mitondo fibili ifyali pa nceshi shibili;+ 14 ifya kusendelapo amenshi ifili 10 ne fya kubikamo amenshi ifili 10 ifyali pa fya kusendelapo amenshi;+ 15 icishiba ne ng’ombe ishilume 12 isho batekelepo icishiba;+ 16 ne fya ku kushilamo imito, amafosholo, ifya kutunkwilako,+ ne fipe fyonse ifya mukuba uusuma ifyo Hiramu-abivu+ apangiile Imfumu Solomone ifya mu ng’anda ya kwa Yehova. 17 Imfumu yafipangiile mu fikombola fye bumba pa kati ka Sukote+ na Sereda mu citungu ca Yordani. 18 Ifipe fyonse ifi ifyo Solomone apangile fyali ifingi nga nshi, kabili umukuba walifulile sana ica kuti tabaishibe ne fyo wafinine.+
19 Solomone apangile ifipe fyonse+ ifya mu ng’anda ya kwa Lesa wa cine: iciipailo ca golde,+ amatebulo+ apa kubika umukate wa mutuulo;+ 20 ifya kutekapo inyali e lyo ne nyali sha fiko isha golde iisuma,+ pa kuti shilesanika pa ntanshi ya muputule wa mu kati sana ukulingana ne funde; 21 na maluba ayabalula, inyali ne fya kumanikilako ifya golde, fyonse ifi afipangiile na golde iisuma; 22 apangile no twa kushimishako inyali, imbale shafonka, amakapu ne fifutumwino, fyonse ifi afipangiile na golde iyalopololwa, kabili ku fiibi fya mu Muputule wa Mushilo Nga Nshi+ na ku fiibi fya mwi tempele abikileko golde.+
5 E ico Solomone alipwishishe ukubomba imilimo yonse iyakumine ng’anda ya kwa Yehova.+ Lyena Solomone aletelemo ifipe ifyo Davidi wishi alengele ukuba ifya mushilo,+ kabili abikile silfere, golde ne fipe umwa kusungila ifipe fya mu ng’anda ya kwa Lesa wa cine.+ 2 Pali ilya nshita Solomone alonganike abakalamba ba mu Israele, intungulushi shonse isha mikowa ne ntungulushi sha ndupwa isha bena Israele. Baishile ku Yerusalemu pa kuti balete icipao ca cipangano ica kwa Yehova icali mu Musumba wa kwa Davidi,+ e kutila Sione.+ 3 Abaume bonse abena Israele balongene pa ntanshi ya mfumu pa nshita ya mutebeto* uwalebako mu mweshi walenga 7.+
4 E ico abakalamba bonse aba mu Israele balishile, kabili abena Lebi balisendele Icipao.+ 5 Baletele Icipao, itenti lya kukumaninamo na Lesa+ ne fipe fyonse ifya mushilo ifyali muli ili itenti. Bashimapepo na bena Lebi* e bafiletele. 6 Imfumu Solomone no lukuta lonse ulwa bena Israele abo baitile pa kuti bamonane ne mfumu, baiminine pa ntanshi ya Cipao. E ico baletuula impaanga ne ng’ombe ishingi nga nshi+ ica kuti balifililwe no kushipenda. 7 Lyena bashimapepo batwele Icipao ca cipangano ica kwa Yehova apo balingile ukucibika, mu muputule wa mu kati sana mu ng’anda, e kuti mu Muputule wa Mushilo Nga Nshi, mwi samba lya mapindo ya bakerubi.+ 8 E ico babikile Icipao mwi samba lya mapindo ya bakerubi ayali ayafungululwa, ica kuti bakerubi bafimbile Icipao ne mitembo ya ciko.+ 9 Imitembo yali iitali sana ica kuti impela ya iyi mitembo iyali mu muputule wa mu kati sana yalemoneka mu Muputule wa Mushilo, lelo kunse kwena tayalemoneka. Kabili yaba mulya mwine ukufika na lelo. 10 Mu Cipao mwali fye amabwe yabili ayapaapaatala ayo Mose abikilemo ku Horebu,+ ilyo Yehova apangene icipangano+ na bena Israele ilyo bafumine mu Egupti.+
11 Ilyo bashimapepo bafumine mu muputule wa mushilo (pantu bashimapepo bonse abaliko bali-isangulwile+ te mulandu ne bumba balimo),+ 12 abena Lebi bonse abaleimba+ abo Asafi,+ Hemani,+ Yedutuni+ na bana babo na bamunyinabo bonse baletungulula, bafwele insalu ishisuma kabili bali na malimba ne filimba fya nsale ne nsango, baiminine ku kabanga ka ciipailo kabili bali pamo na bashimapepo 120, balelisha amapenga.+ 13 Ilyo abalelisha amapenga na baleimba balelumbanishisha Yehova pamo no kumutasha, kabili ilyo amapenga, amalimba ne filimba fimbi fyalelila ninshi balelumbanya Yehova abati, “pantu musuma, ukutemwa kwakwe kwa muyayaya,”+ lyena mu ng’anda, e kutila mu ng’anda ya kwa Yehova monse mwali ikumbi.+ 14 Bashimapepo tabatwalilile ukubomba pa mulandu we kumbi, pantu ubukata bwa kwa Yehova bwali mu ng’anda ya kwa Lesa wa cine monse.+
6 E lyo Solomone alandile ati: “Yehova atile akekala mwi kumbi ilyafiita.+ 2 Nomba nimukuulila ing’anda ya lulumbi, icifulo ico mukalaikalamo umuyayaya.”+
3 Lyena imfumu yalipilibwike yatendeka no kupaala ulukuta lonse ulwa bena Israele, ninshi bonse aba muli ulu lukuta nabeminina.+ 4 Yalandile aiti: “Acindikwe Yehova Lesa wa kwa Israele, uwalaile Davidi tata kabili uufikilishe ifyo alaile ati, 5 ‘Ukutula pa bushiku nafumishe abantu bandi mu Egupti, nshasalapo umusumba nangu umo mu mikowa yonse iya bena Israele umwa kukuulila ing’anda iikalenga ishina lyandi likacindikwe muli uyo musumba,+ kabili nshasala umwaume nangu umo uwa kuti aletungulula abantu bandi abena Israele. 6 Lelo nalisala Yerusalemu+ ukuti e mo ishina lyandi likacindikilwe, kabili nalisala Davidi ukuti akaletungulula abantu bandi abena Israele.’+ 7 Kabili Davidi tata alefwaisha ukukuulila Yehova Lesa wa bena Israele ing’anda iya kulenga ishina lyakwe lilecindikwa.+ 8 Lelo Yehova aebele Davidi tata ati, ‘Filya walefwaisha ukukuula ing’anda iya kulenga ishina lyandi lyacindikwa walicitile bwino. 9 Nomba te iwe ukakuula ing’anda, lelo umwana obe umwaume uo ukafyala* e ukakuula ing’anda iikalenga ishina lyandi likacindikwe.’+ 10 Yehova nafikilisha ifyo alaile pantu nalipyana Davidi tata kabili nalikala pa cipuna ca bufumu ica kwa Israele,+ nga fintu Yehova alaile.+ Na kabili ninkuula ing’anda iya kulenga ishina lya kwa Yehova Lesa wa bena Israele lilecindikwa, 11 kabili nimbikamo Icipao umwaba icipangano+ Yehova apangene na bena Israele.”
12 Lyena aiminine pa ntanshi ya ciipailo ca kwa Yehova, pa ntanshi ya lukuta lonse ulwa bena Israele, kabili aimishe amaboko yakwe mu muulu.+ 13 (Pantu Solomone alipangile icisebele ca mukuba kabili acibikile pa kati ka lubansa.+ Cali imikono* 5 mu butali, mu bwipi namo cali imikono 5 kabili casanseme imikono itatu; kabili e po aiminine.) Alifukeme pa ntanshi ya lukuta lonse ulwa bena Israele aimisha na maboko yakwe mu muulu.+ 14 E lyo atila: “Mwe Yehova Lesa wa kwa Israele, takwaba Lesa uwaba nga imwe mu muulu monse nelyo pano isonde ponse. Mulasunga icipangano kabili mulalanga ababomfi benu abacita ifyo mufwaya ne mitima yabo yonse ukutemwa ukushipwa.+ 15 Mwalifikilisha ifyo mwalaile umubomfi wenu Davidi tata.+ Mwalilaile kabili buno bushiku namufikilisha ifyo mwalaile.+ 16 E ico nomba mwe Yehova Lesa wa kwa Israele, citileni umubomfi wenu Davidi tata ico mwamulaile ilyo mwatile: ‘Nga ca kuti abana bobe bakalakonka ifyo nkalabeba+ nge fyo ucita+ ninshi abakatuntuka muli iwe e bakalaikala pa cipuna ca bufumu ica kwa Israele.’ 17 E ico nomba mwe Yehova Lesa wa kwa Israele, fikilisheni ifyo mwalaile umubomfi wenu Davidi.
18 “Lelo bushe cine cine Lesa kuti aikala na bantu pano isonde?+ Moneni umuulu nangu fye umuulu wa myulu te kuti umukumane,+ pali bufi ing’anda iyi iyo nkuulile!+ 19 Nomba umfweni ipepo lya mubomfi wenu ne fyo alelomba ukuti mube ne cikuuku kuli ena mwe Yehova Lesa wandi, umfweni ne fyo umubomfi wenu alelomba ukuti mumwafwe kabili umfweni ipepo alepepa kuli imwe. 20 Amenso yenu nayalelinda ino ng’anda akasuba no bushiku, pali cino cifulo ico mwalandile ukuti e po ishina lyenu likaba,+ pa kuti muleumfwa ipepo ilyo umubomfi wenu akulapepa ninshi nalosha kuli cino cifulo. 21 Kabili mulekutika ifyo umubomfi wenu akulalomba ukuti mumwafwe ne fyo abantu benu abena Israele bakulapepa ninshi nabalosha kuli cino cifulo,+ kabili muleumfwa ku muulu uko mwaikala,+ muletubelela no luse.+
22 “Umuntu nga abembukila umunankwe kabili uo abembukila amweba ukuti alape umulapo uwingalenga atiipwa, nga alapa ubufi nelyo nga tafikilishe e lyo aisa pa ntanshi ya ciipailo cenu muli ino ng’anda+ ninshi alilapa uyo mulapo, 23 lyena mukomfwe ku muulu kabili mukapingule ababomfi benu, mukakande umubifi pa fyabipa ifyo acitile+ kabili mukatile umulungami wa kaele* e lyo mukamulambule pa kuba umulungami.+
24 “Kabili abantu benu abena Israele nga babacimfya ku balwani pa mulandu wa kuti balebembukila imwe,+ babwelela kuli imwe, bacindika ne shina lyenu+ kabili bapepa+ kuli imwe, balomba no kuti mubabelele uluse ninshi bali pali ino ng’anda,+ 25 lyena mukomfwe ku muulu+ kabili mukelele abantu benu abena Israele. Mukababweseshe ku calo ico mwabapeele kabili ico mwapeele ifikolwe fyabo.+
26 “Nga mwaisala imyulu ica kuti ne mfula yaleka ukuloka+ pa mulandu wa kuti balemubembukila,+ kabili nga bapepa kuli imwe ninshi nabalosha kuli cino cifulo, balumbanya ne shina lyenu kabili baleka ukumubembukila pantu mwalenga baicefya,*+ 27 lyena mukomfwe ku muulu kabili mukelele ababomfi benu abena Israele, pantu mukabasambilisha inshila iisuma iyo bafwile ukwendamo,+ kabili mukaloshe imfula+ pa calo cenu ico mwapeele abantu benu pa kuti cibe ubupyani bwabo.
28 “Nga ca kuti mu calo mwapona icipowe+ nelyo icikuko,+ amabula nga yababuka, amabula yafufuma,+ kwaba makanta+ nelyo amapantankolo,* nelyo abalwani babo nga babashinga mu misumba yabo,+ nangu nga kwapona icinkunka ca musango onse, nelyo ubulwele bwa musango onse,+ 29 umuntu onse nga apepa+ nelyo abantu benu bonse abena Israele nga bapepa nangu bamulomba ukuti mubabelele uluse+ (pantu cila muntu alishiba icimucusha ne fyo akalipwa),+ nga baimya amaboko yabo ninshi nabalosha kuli ino ng’anda,+ 30 lyena mukomfwe ku muulu ku cifulo uko mwikala,+ mukababelele uluse;+ kabili mukalambule umuntu onse ukulingana ne mibele yakwe pantu mwalishiba umutima wa muntu (nimwe mweka mwaishiba bwino imitima ya bantu bonse),+ 31 pa kuti bakale-enda mu nshila shenu shonse pa kulanga ukuti balamutiina inshiku shonse isho bali abomi mu calo ico mwapeele ifikolwe fyesu.
32 “Kabili uwa ku calo cimbi uushili wa mu bantu benu abena Israele kabili uwafuma ku calo ca kutali pa mulandu we shina lyenu ilikalamba,*+ ukuboko kwenu ukwa maka no kuboko kwenu ukwatambalikwa, nga aisa mu kupepa ninshi nalosha kuli ino ng’anda,+ 33 lyena mukomfwe ku muulu, ku cifulo uko mwikala, kabili mukacite fyonse ifyo uwa ku calo cimbi akamulomba, pa kuti abantu bonse pano isonde bakeshibe ishina lyenu+ kabili bakalemutiina nge fyo abantu benu abena Israele bamutiina, na pa kuti bakeshibe ukuti ishina lyenu lyaba pali ino ng’anda iyo nakuula.
34 “Konse uko abantu benu bakulaya mu kulwa inkondo na balwani babo,+ kabili nga bapepa+ kuli imwe ninshi nabalosha kuli uno musumba uo mwasala na kuli ino ng’anda iyo nakuula iya kulenga ishina lyenu lyacindikwa,+ 35 mukomfwe ipepo lyabo ku muulu ne fyo bakalomba ukuti mukabe ne cikuuku kuli bena kabili mukabafwe.+
36 “Nga bamubembukila (pantu takwaba umuntu uushibembuka),+ kabili mwabafulilwa mwaleka na balwani babo babacimfya, kabili abalwani babo babasenda pa kuti bayeba bankole ku calo cabo ica kutali nelyo ica mupepi,+ 37 kabili nga bailuka ilyo bali mu calo umo bayaba bankole, babwelela na kuli imwe kabili ilyo bacili mu calo umo bayaba bankole balomba ukuti mubabelele uluse, batila, ‘Twalibembuka, twalilufyanya; kabili twalicita ifyabipa,’+ 38 kabili babwelela kuli imwe ne mitima yabo yonse+ ne myeo* yabo yonse ilyo bacili mu calo ca balwani babo umo baba bankole,+ kabili nga bapepa kuli imwe ninshi nabalosha ku calo cabo ico mwapeele ifikolwe fyabo na ku musumba uo mwasala,+ kabili nabalosha na ku ng’anda iyo nakuula iya kulenga ishina lyenu lyacindikwa, 39 lyena mukomfwe ipepo lyabo ku muulu uko mwikala, kabili mukomfwe ifyo bakalomba ukuti mube ne cikuuku kuli bena kabili mukabafwe,+ mukelele abantu benu abamubembukiile.
40 “Nomba mwe Lesa wandi, nga twapepa kuli imwe pali cino cifulo+ muletumona kabili mulekutika. 41 E ico nomba mwe Yehova Lesa, kabiyeni mu cifulo cenu ica kutuushishamo,+ imwe ne Cipao ca maka yenu. Lekeni bashimapepo benu, mwe Yehova Lesa, bafwale ipusukilo, kabili lekeni abantu benu aba cishinka basekelele pa mulandu ne fisuma ifyo mucita.+ 42 Mwe Yehova Lesa, mwikaana* uwasubwa wenu.+ Ibukisheni ifyo mwalangile Davidi umubomfi wenu ukutemwa ukushipwa.”+
7 Nomba ilyo Solomone apwishishe fye ukupepa,+ umulilo wafumine ku muulu+ no koca umutuulo wa koca na malambo, kabili ubukata bwa kwa Yehova bwali mu ng’anda yonse.+ 2 Bashimapepo balifililwe ukwingila mu ng’anda ya kwa Yehova pantu ubukata bwa kwa Yehova bwali mu ng’anda ya kwa Yehova monse.+ 3 Kabili abena Israele bonse balimwene ilyo umulilo wafumine ku muulu, balimwene ne fyo ubukata bwa kwa Yehova bwaiswile mu ng’anda monse, kabili ilyo line fye balikonteme balosha ne finso fyabo panshi apo balambatike amabwe kabili balifukeme no kutasha Yehova, “pantu musuma kabili ukutemwa kwakwe kwa muyayaya.”
4 Nomba imfumu na bantu bonse batuulile Yehova amalambo.+ 5 Imfumu Solomone yatuulile ilambo lya ng’ombe 22,000 ne mpaanga 120,000. E fyo imfumu na bantu bonse bapeele Lesa wa cine ing’anda.+ 6 Bashimapepo baiminine pa fifulo fyabo ifyo balebombelapo. Bali pamo na bena Lebi ninshi abena Lebi nabakwata ifilimba ifyo balelisha ilyo baleimbila Yehova ulwimbo.+ Imfumu Davidi e yapangile ifi filimba ifyo balebomfya pa kutasha Yehova kabili e fyo yalebomfya pa kumulumbanya,* “pantu ukutemwa kwakwe takupwa,” kabili bashimapepo balelisha sana amapenga+ pa ntanshi yabo, ninshi abena Israele bonse nabeminina.
7 Lyena Solomone asangulwile pa kati ka lubansa ulwali pa ntanshi ya ng’anda ya kwa Yehova, pantu e po ali no kutuulila imituulo ya koca+ na mafuta ya malambo ya mutende, pantu iciipailo ca mukuba+ ico Solomone apangile calicepele, nga tacakumene ukutuulilapo amalambo ya koca, umutuulo wa ngano+ e lyo na mafuta.+ 8 Pali ilya nshita, Solomone na bena Israele bonse, ulukuta ulukalamba, ukufuma ku Lebohamati* ukufika ku mumana wa Egupti,+ bapangile umutebeto pa nshiku 7.+ 9 Lelo pa bushiku bwalenga 8* balilongene ukulongana kwacindamisha,+ pantu ukusefya kwa kupeela iciipailo kuli Lesa kwaliko pa nshiku 7 e lyo no mutebeto na o waliko pa nshiku 7. 10 Lyena pa bushiku bwalenga 23 mu mweshi walenga 7 alekele abantu babwelela ku mayanda yabo, ninshi balesekelela+ kabili bali ne nsansa pa fisuma ifyo Yehova acitiile Davidi, Solomone na bantu bakwe abena Israele.+
11 E fyo Solomone apwishishe ukukuula ing’anda ya kwa Yehova+ ne ng’anda ya mfumu;* kabili alicitile fyonse ifyo alefwaya ifyakumine ing’anda ya kwa Yehova ne ng’anda yakwe.+ 12 Lyena Yehova amoneke kuli Solomone+ ubushiku kabili amwebele ati: “Ning’umfwa ipepo lyobe, kabili ninsala cino cifulo pa kuti cibe ing’anda yandi iya malambo.+ 13 Nga naisala imyulu pa kuti imfula iloka, nga naeba ifipaso ukuti filye ifimenwa fya mu calo kabili nga natuma icikuko pa bantu bandi, 14 kabili abantu bandi abetilwa kwi shina lyandi+ nga baicefya+ kabili bapepa kuli ine, bafwaya ne cinso candi kabili baleka no kucita ifyabipa,+ ine nkomfwa ku muulu kabili nkeleela ulubembu lwabo, nkaposha ne calo cabo.+ 15 Nomba nakulamona kabili nakulakutika amapepo ayo mwakulapepa pali cino cifulo.+ 16 E ico nomba ninsala no kulenga ino ng’anda ukuba iya mushilo pa kuti ishina lyandi likabe pali iyi ing’anda umuyayaya,+ kabili amenso yandi no mutima wandi fya kulaba pali iyi ing’anda lyonse.+
17 “Kabili nga wakulacita ifyo mfwaya, nga wakulasunga amafunde yandi yonse, nga wakulakonka ifyo nakulakweba e lyo no bupingushi bwandi nga filya Davidi wiso alecita,+ 18 lyena nkakosha ubufumu bobe+ nga filya fine napangene icipangano na Davidi wiso+ ukuti, ‘Takwakabe inshita ilyo kushakabe uukatuntuka muli iwe uukalateka abena Israele.’+ 19 Lelo nga mwaleka ukunkonka, mwaleka no kukonka amafunde yandi ne fyo namweba kabili mwaya mukubombela balesa bambi no kubakontamina,+ 20 nkalofya abena Israele bonse mu calo ico nabapeela,+ kabili nkafumya amenso pa ng’anda iyo nabikapo ishina lyandi kabili abantu bonse bakalatumfya abena Israele no kulabaseka.*+ 21 Kabili iyi ing’anda ikashala icitantaala. Na onse uukalapitapo akalapapa nga aimona+ kabili akalalanda ati, ‘Mulandu nshi Yehova aonawila ici calo ne yi ing’anda?’+ 22 Lyena bakatila, ‘Ni co balishile Yehova+ Lesa wa fikolwe fyabo uwabafumishe mu calo ca Egupti,+ kabili baile kuli balesa bambi e bo balakontamina no kubombela.+ E mulandu wine aletele ifyabipa fyonse ifi pali bena.’”+
8 Ilyo imyaka 20 yapwile iyo Solomone akuulilemo ing’anda ya kwa Yehova ne ng’anda yakwe,*+ 2 Solomone akuulile cipya cipya imisumba iyo Hiramu+ amupeele kabili aebele abena Israele* ukuti baleikalamo. 3 Solomone aile na ku musumba wa Hamati-soba kabili aliucimfishe. 4 Lyena akuulile* Tadmore mu matololo ne misumba yonse umwali amatala+ iyo akuulile mu Hamati.+ 5 Kabili akuuliile ilinga kuli Bete-horone ya pa muulu+ na kuli Bete-horone ya kwi samba,+ kabili abikileko ifiibi ne milando, 6 kabili akuulile Baalati+ ne misumba yonse umwali amatala ya kwa Solomone, imisumba yonse iya maceleta,+ imisumba umwaleikala abalenina pali bakabalwe na fyonse ifyo Solomone alefwaya ukukuula mu Yerusalemu, mu Lebanone na mu calo conse ico aleteka.
7 Nomba abantu bonse abashelepo pa bena Hiti, pa bena Amore, pa bena Perisi, pa bena Hibi na pa bena Yebusi+ abashali bena Israele,+ 8 abatuntwike muli bena abashele mu calo, abo abena Israele bashaipeye,+ Solomone abapeele umulimo wa kulaya mu kumubombela kwati basha kabili e mulimo babomba ukufika na lelo.+ 9 Lelo pa bena Israele tapali nangu umo uo Solomone atekele ubusha,+ pantu bali bashilika bakwe, intungulushi shakwe isha bashilika, kabili bali intungulushi sha bale-ensha amaceleta na balenina pali bakabalwe.+ 10 Abakalamba ba bakapitao abaleangalila abalebomba umulimo+ wa Mfumu Solomone, bali 250.
11 Kabili Solomone afumishe umwana mwanakashi wa kwa Farao+ ku Musumba wa kwa Davidi, amuleta ku ng’anda iyo amukuuliile,+ pantu atile: “Nangu ca kuti mukashi wandi, tafwile ukwikala mu ng’anda ya kwa Davidi imfumu ya bena Israele, pantu incende umo icipao ca kwa Yehova capitile sha mushilo.”+
12 Lyena Solomone atuuliile Yehova amalambo ya koca+ pa ciipailo ca kwa Yehova+ ico akuulile pa ntanshi ya muputule wa kwingililapo,+ 13 Solomone alepeela amalambo ayo baletuula cila bushiku nga fintu amafunde ya kwa Mose yalandile. Alepeela amalambo ya pa Masabata,+ pa myeshi ipya+ e lyo na pa mitebeto iyo batantike iyalebako imiku itatu mu mwaka,+ e kutila Umutebeto wa Mukate Uushatutumuka,+ Umutebeto wa Milungu+ no Mutebeto wa Nsakwe.+ 14 Kabili ayakenye bashimapepo+ mu mabumba ukulingana ne milimo balingile ukulabomba nga filya fine Davidi wishi acitile, kabili ayakenye abena Lebi ukulingana ne milimo balebomba, pa kuti balelumbanya+ Lesa kabili balemubombela pa ntanshi ya bashimapepo ukulingana ne milimo balingile ukulamubombela cila bushiku. Ayakenye na balinshi mu mabumba pa kuti balebombela pa mpongolo shalekanalekana,+ ayakenye imilimo yonse iyi ukulingana ne funde lya kwa Davidi umuntu wa kwa Lesa wa cine. 15 Kabili tabalekele ukukonka ifunde ilyo imfumu yapeele bashimapepo na bena Lebi ilyalandile pa mwa kusungila ifintu e lyo na pa fintu fye fimbi. 16 E ico Solomone alipekenye bwino ifya kubomba imilimo yonse ukutendekela pa bushiku baimbile umufula wa ng’anda ya kwa Yehova+ ukufikila ilyo yapwile, e fyo ing’anda ya kwa Yehova yapwile.+
17 Lyena Solomone aile ku Esione-gebere+ na ku Elote+ mu lulamba lwa mumana mu calo ca Edomu.+ 18 Hiramu+ alimutumiine amato na baume abaishibe bwino ukwensha amato abo ababomfi bakwe baleangalila. Baile na babomfi ba kwa Solomone ku Ofiri,+ kabili kulya basendeleko amatalanti* ya golde 450+ kabili bayaletele ku Mfumu Solomone.+
9 Nomba namfumu wa ku Sheba+ aumfwile ululumbi lwa kwa Solomone, e ico aishile ku Yerusalemu mu kwesha Solomone na mepusho ayakosa.* Aishile ne bumba lya bantu ilikalamba ne ngamila ishasendele amafuta ya balsamu, na golde iingi nga nshi+ e lyo na mabwe ayakosa umutengo. Aingile umwali Solomone kabili amwebele fyonse ifyali ku mutima wakwe.+ 2 Lyena Solomone alimwaswike amepusho yonse ayo amwipwishe, takwali ico Solomone afililwe ukumulondolwela.
3 Ilyo namfumu wa ku Sheba amwene ukuti Solomone ali sana na mano,+ amona ne ng’anda iyo akuulile,+ 4 ifya kulya fya pe tebulo lyakwe,+ ifyo ababomfi bakwe baleikala pa kulya, ifyo abalepekanya ifya kulya balebomba ne fyo balefwala, kabili ilyo amwene abalepeela Solomone ifya kunwa ne fyo balefwala na malambo ya koca ayo aletuula lyonse pa ng’anda ya kwa Yehova,+ alipeshiwe amano nga nshi.* 5 E ico aebele imfumu ati: “Ifyo naumfwile pa fintu ifingi ifyo wacita na pa mano ayo wakwata ilyo nali ku calo candi, fya cine. 6 Lelo nshasumiine ifyo naumfwile mpaka naisaimwena.+ Kabili mona ifyo banjebele tafifikile na kuli hafu ya mano yobe.+ Ifyo mwene naficila pa fyo naumfwile.+ 7 Abantu bobe balaba ne nsansa, kabili ababomfi bobe ababa na iwe lyonse nabo balaba ne nsansa pantu balomfwa ifya mano ifyo ulanda. 8 Yehova Lesa obe acindikwe, uwa kubika pa cipuna cakwe ica bufumu pa kuti uletekelako Yehova Lesa obe. Apo Lesa obe alitemwa abena Israele,+ pantu afwaya batwalilile ukubako, alikusonta ukuba imfumu pa kuti uleba no mulinganya pa kupingula kabili uletekela mu bulungami.”
9 Lyena apeele imfumu amatalanti* ya golde 120+ na mafuta ya balsamu ayengi nga nshi, e lyo na mabwe ayakosa umutengo. Takwali nangu umo uwaleteelepo Imfumu Solomone amafuta ya balsamu ayengi, nga yalya ayo namfumu wa ku Sheba aleteele Imfumu Solomone.+
10 Kabili ababomfi ba kwa Hiramu na babomfi ba kwa Solomone abaletele golde ukufuma ku Ofiri,+ baletele imbao sha fimuti fya mialgumi na mabwe yakosa umutengo.+ 11 Mu mbao sha fimuti fya mialgumi, imfumu yapangilemo amatabo ya ng’anda ya kwa Yehova+ na ya ng’anda ya mfumu.*+ Yapangilemo ne nsango ne filimba fya nsale ifya bakemba,+ nomba imbao sha musango yu tashatala ashimonekapo mu Yuda ukushinta na lelo.
12 Imfumu Solomone yapeele namfumu wa ku Sheba fyonse ifyo alefwaya na fyonse ifyo alombele, ukucila pa fyo namfumu aleteele imfumu. Lyena alibwelelemo ku calo cakwe pamo na babomfi bakwe.+
13 Kabili golde iyo baleletela Solomone mu mwaka umo yalefina amatalanti 666,+ 14 ukufumyako iyo abaume abaleya balecita amakwebo baleleta ne yo bashimakwebo baleleta, e lyo ne yalefuma ku mfumu shonse isha bena Arabia ne ntungulushi ishaleletela Solomone golde na silfere.+
15 Imfumu Solomone yapangile inkwela ishikalamba 200 isha golde iyo basaakenye ne cela cimbi+ (pa kupanga inkwela imo na imo yabomfeshe amashekele* 600 aya golde iyo basaakenye ne cela),+ 16 ne nkwela ishinono* 300 isha golde iyo basaakenye ne cela cimbi (pa kupanga inkwela imo na imo yabomfeshe ba maina* ba golde batatu). Lyena imfumu yafibikile mu ng’anda iyo baleita ati Umutengo wa Lebanone.+
17 Imfumu yapangile ne cipuna ca bufumu ica meno ya nsofu, yabikako na golde iyalopololwa.+ 18 Pa kufika pa cipuna ca bufumu pali amatabo 6 kabili ku cipuna ca bufumu babikileko akakunyantapo amakasa aka golde. Icipuna calikwete ifya kushintilishapo amaboko uku no ku, kabili ku lubali lumo na lumo ulwa fya kushintilishapo amaboko kwali nkalamo imo imo.+ 19 Kabili pa matabo 6 pali inkalamo 12.+ Ku lubali lumo ulwa matabo kwali inkalamo 6, na ku lubali lumbi nako kwali inkalamo 6. Takwali ubufumu bumbi ubwapangile icipuna ca bufumu nge ci. 20 Fyonse ifyo Imfumu Solomone yalenwenamo fyali fya golde, kabili ifipe fyonse ifya mu ng’anda iyo baleita abati Umutengo wa Lebanone fyali fya golde iisuma nga nshi. Tamwali icipe ca silfere nangu cimo, pantu mu nshiku sha kwa Solomone silfere tayacindeme.+ 21 Amato ya mfumu yaleya ku Tarshishi+ na babomfi ba kwa Hiramu.+ Lyonse nga papita imyaka itatu amato ya ku Tarshishi yaleleta golde na silfere, ameno ya nsofu,+ fikolwe ne fyuni beta ati bapikoko.
22 E ico Imfumu Solomone yali ne fyuma na mano ukucila imfumu shonse isha pano isonde.+ 23 Kabili imfumu shonse isha pano isonde shalefwaya ukumona Solomone pa kuti shumfwe amano ayo Lesa wa cine abikile mu mutima wakwe.+ 24 Bonse abaleisa mu kumumona balemuletela ubupe. Balemuletela ifipe fya silfere, ifipe fya golde, ifya kufwala,+ ifyanso, amafuta ya balsamu, bakabalwe ne mfalashi. Ifi fine e fyo abantu balecita cila mwaka. 25 Kabili Solomone akwete amatanga ya bakabalwe na ya maceleta 4,000, akwete na bakabalwe 12,000,+ kabili afisungiile mu misumba ya maceleta mupepi ne mfumu mu Yerusalemu.+ 26 Kabili aleteka imfumu shonse ukutendekela pa Mumana wa Yufrate ukufika na ku calo ca baPelishiti na ku mupaka wa Egupti.+ 27 Imfumu yalengele silfere yafula nga nshi mu Yerusalemu kwati mabwe, kabili yalengele imbao sha fimuti fya mikedari shafula nga nshi kwati fimuti fya mikunyu ifya mu Shefela.+ 28 Kabili abantu baleletela Solomone bakabalwe ukufuma ku Egupti+ na ku fyalo fimbi.
29 Amalyashi yambi aya kwa Solomone,+ ukufuma pa kutendeka ukufika na lintu afwile, baliyalembela pamo na mashiwi ya kwa Natani+ kasesema na mashiwi ayo Ahiya+ umwina Shilo aseseme e lyo ne fimonwa ifyo balembele ifyo Ido+ uwalemona ifimonwa amwene pali Yeroboamu umwana wa kwa Nebati.+ 30 Solomone atekele abena Israele bonse mu Yerusalemu pa myaka 40. 31 Lyena Solomone alifwile nga filya fine ifikolwe fyakwe fyafwile. E ico bamushiikile mu Musumba wa kwa Davidi wishi;+ kabili umwana wakwe Rehoboamu e wamupyene pa bufumu.+
10 Rehoboamu aile ku Shekemu,+ pantu e ko abena Israele bonse baile pa kuti bamubike pa bufumu.+ 2 Ilyo fye Yeroboamu+ umwana wa kwa Nebati aumfwile ifi (ninshi acili mu Egupti pantu alibutwike pa mulandu wa kuti aletiina Imfumu Solomone),+ alibwelele. 3 Lyena batumine aba kuyamwita, kabili Yeroboamu na bena Israele bonse baishile kuli Rehoboamu e lyo balamweba abati: 4 “Wiso alengele ikoli lyesu lyaba ilyafina.+ Nomba iwe nga watwangushishako umulimo wa kwa wiso ne koli ilyafina ilyo abikile pali ifwe, tukalakubombela.”
5 E lyo Rehoboamu abebele ati: “Mukabwele pa numa ya nshiku shitatu.” E ico abantu baliile.+ 6 Lyena Imfumu Rehoboamu yaipwishe abakalamba abalebombela Solomone wishi ilyo ali uwa mweo, yabepwishe aiti: “Bushe aba bantu nkese basuka shani?” 7 Ba-aswike imfumu abati: “Nga mwaba ne cikuuku kuli aba bantu, nga mwabacitila ifyo balefwaya kabili nga mwalabasuka bwino, ninshi bakaba ababomfi benu inshiku shonse.”
8 Lelo yalisuulile amano ayo abakalamba baipandile. Yaileipusha abalumendo abo yakulile nabo abaleibombela.+ 9 Yabepwishe aiti: “Mano nshi mwalampandako pa fyo tulingile ukwasuka aba bantu abanjebele abati, ‘Twangushisheniko ikoli ilyo shinwe abikile pali ifwe’?” 10 Abalumendo abo yakulile nabo bayaswike abati: “Abantu abacimweba abati wiso alengele ikoli lyesu lyafina, lelo imwe mulyangushe mukabasuke amuti, ‘Ine nkamucusha ukucila ifyo tata alemucusha.* 11 Tata abikile ikoli ilyafina pali imwe, lelo ine nkalenga likafinineko. Tata alemuma ifikoti pa ku mukanda, lelo ine nkalamufopaula ifikoti ifikali sana.’”
12 Yeroboamu na bantu bonse babweleele ku Mfumu Rehoboamu pa bushiku bwalenga shitatu, nga filya fine yabebele aiti: “Mukabwele pa numa ya nshiku shitatu.”+ 13 Lelo imfumu yabaswike bukali bukali. E fyo Imfumu Rehoboamu yasuulile amano ayo abakalamba baipandile. 14 Yabebele ukulingana na mano ayo abalumendo baipandile, yabebele aiti: “Nkalenga ikoli lyenu ilyafina, likafinineko. Tata alemuma ifikoti pa kumukanda, lelo ine nkalamufopaula ifikoti ifikali sana.” 15 E ico imfumu tayakutike ku bantu, pantu Lesa wa cine e walengele ukuti ifintu fibe ifi,+ pa kuti Yehova afikilishe ifyo aebele Yeroboamu umwana wa kwa Nebati ukupitila muli Ahiya+ umwina Shilo.
16 Ilyo abena Israele bonse bamwene ukuti imfumu yakaana ukumfwa kuli bena, abantu baebele imfumu abati: “Tatuli bantu ba kwa Davidi! Kabili tapali nangu cimo ico tukanonkelamo mu mwana wa kwa Yese. Mwe bena Israele bonse kabiyeni mu kupepa balesa benu! Nomba iwe Davidi+ wakulaisungila ing’anda yobe.” E lyo abena Israele babweleele ku mayanda* yabo.+
17 Lelo Rehoboamu alitwalilile ukuteka abena Israele abaleikala mu misumba ya kwa Yuda.+
18 Lyena Imfumu Rehoboamu yatumine Hadoramu+ uwaleangalila abo bapeele umulimo wa kulaya mu kubombela imfumu, lelo abena Israele balimupoolele amabwe mpaka afwa. Imfumu Rehoboamu yaninine mwi celeta yafulumukila na ku Yerusalemu.+ 19 Kabili abena Israele balitwalilila ukupondokela aba mu ng’anda ya kwa Davidi ukufika na lelo.
11 Ilyo Rehoboamu afikile mu Yerusalemu, ilyo line fye alonganike aba mu ng’anda ya kwa Yuda na ba mu mukowa wa kwa Benjamini.+ Alonganike abashilika 180,000 abasambilile* ifya kulwa inkondo, aba kuti balwe na bena Israele pa kuti babweseshe Rehoboamu ubufumu.+ 2 Lyena Yehova aebele Shemaya+ umuntu wa kwa Lesa wa cine ati: 3 “Eba Rehoboamu umwana wa kwa Solomone imfumu ya baYuda na bena Israele bonse aba mu mukowa wa kwa Yuda no wa kwa Benjamini auti, 4 ‘Yehova alanda ati: “Tamulingile ukuyalwisha bamunyinenwe. Cila muntu abwelele ku ng’anda yakwe, pantu nine nengele ukuti ici cicitike.”’”+ E ico balyumfwile ifyo Yehova abebele kabili balibwelelemo, tabailelwa na Yeroboamu.
5 Rehoboamu aleikala mu Yerusalemu kabili akuulile imisumba ya malinga mu Yuda. 6 E fyo akuulile* Betelehemu,+ Etamu, Tekoa,+ 7 Betsuri, Soko,+ Adulamu,+ 8 Gati,+ Maresha, Sifi,+ 9 Adoraimu, Lakishi,+ Aseka,+ 10 Sora, Ayalone+ na Hebrone,+ imisumba ya malinga iyali mu Yuda na mu citungu ca kwa Benjamini. 11 Kabili akoseshe imisumba ya malinga, abikamo ne ntungulushi, ifya kulya, amafuta no mwangashi. 12 Kabili mu misumba iyalekanalekana alitwelemo inkwela ishikalamba na mafumo, kabili ali-ikoseshe nga nshi. Alitwalilile ukuteka aba mu mukowa wa kwa Yuda no wa kwa Benjamini.
13 Kabili bashimapepo na bena Lebi abali mu Israele monse, bafumine mu fitungu fyabo fyonse pa kuti bamutungilile. 14 Abena Lebi bashiile impanga shabo isha mulemfwe ne fintu fyabo,+ baya ku Yuda na ku Yerusalemu, pantu Yeroboamu na bana bakwe balibaleseshe ukubombela Yehova umulimo wa bushimapepo.+ 15 Lyena Yeroboamu aisonteele bashimapepo aba kubombela pa fifulo fya kupepelapo,+ aba kubombela ifibanda* ifimoneka nge mbushi,+ e lyo na ba kubombela abana ba ng’ombe abo apangile.+ 16 Kabili abafumine mu mikowa yonse iya bena Israele abalefwaya ukulabombela Yehova Lesa wa bena Israele, balikonkele abena Lebi na bashimapepo ku Yerusalemu pa kuti batuulile Yehova Lesa wa fikolwe fyabo amalambo.+ 17 Pa myaka itatu balekosha ubufumu bwa kwa Yuda kabili baletungilila Rehoboamu umwana wa kwa Solomone, pantu pa myaka itatu balecita ifyo Davidi na Solomone balecita.
18 Lyena Rehoboamu aupile Mahalati umwana mwanakashi wa kwa Yerimote umwana wa kwa Davidi. Abihaili nyina wa kwa Mahalati ali mwana wa kwa Eliabu+ umwana wa kwa Yese kabili e wali umukashi wa kwa Yerimote. 19 Mu kupita kwa nshita balikwete abana abaume, Yeushi, Shemaria na Sahamu. 20 Pa numa aupile Maaka umwishikulu wa kwa Abishalomu.+ Mu kupita kwa nshita bafyele Abiya,+ Atai, Sisa na Shelomiti. 21 Rehoboamu atemenwe sana Maaka umwishikulu wa kwa Abishalomu ukucila ifyo atemenwe abakashi bambi abo akwete ne fyo atemenwe bakanakashi,*+ pantu akwete abakashi 18 na bakanakashi 60, kabili afyele abana abaume 28 na bana abanakashi 60. 22 E ico Rehoboamu asontele Abiya umwana wa kwa Maaka ukuba umukalamba kabili intungulushi pali bamunyina, pantu alefwaya ukumubika pa bufumu. 23 Nomba apo alilwike ifyo abana bakwe nalimo bali no kucita, atumine* abana bakwe bamo mu fitungu fyonse ifya mu Yuda na mu Benjamini, na mu misumba yonse iya malinga,+ kabili abapeele ifintu ifingi abafwaila na bakashi abengi.
12 Ilyo fye ubufumu bwa kwa Rehoboamu bwakosele+ kabili ilyo fye no mwine akosele, ena na bena Israele bonse balekele ukukonka amafunde ya kwa Yehova.+ 2 Mu mwaka walenga 5 ukutula apo Rehoboamu atendekeele ukuteka, Shishaki+ imfumu ya ku Egupti yalishile mu kulwisha Yerusalemu, pantu abantu tabali aba cishinka kuli Yehova. 3 Aishile na maceleta 1,200 na balenina pali bakabalwe 60,000, kabili aishile na bashilika abengi nga nshi, abena Libya, abena Sukimu na bena Etiopia.+ 4 Apokele imisumba ya malinga iya baYuda kabili asukile afika na ku Yerusalemu.
5 Shemaya+ kasesema aile kuli Rehoboamu na bacilolo ba baYuda abalongene mu Yerusalemu pa mulandu wa kuti baletiina Shishaki, kabili abebele ati: “Yehova atila, ‘Apo imwe namunsha, na ine nalaleka Shishaki amucimfye.’”+ 6 Ilyo bacilolo ba bena Israele ne mfumu baumfwile ifi, bali-icefeshe+ kabili balandile abati: “Yehova mulungami.” 7 Ilyo Yehova amwene ukuti bali-icefeshe, Yehova aebele Shemaya ati: “Nabaicefya. Nshabalofye+ kabili nomba line nalabapususha, kabili nshalete icipyu candi pali bena. Nshaleke Shishaki onaule Yerusalemu. 8 Lelo bakaba ababomfi bakwe pa kuti bakeshibe ubupusano bwaba pa kumombela no kubombela imfumu* sha ku fyalo fimbi.”
9 E ico Imfumu Shishaki iya ku Egupti yaishilesansa Yerusalemu. Yasendele ifipe fya mu ng’anda ya kwa Yehova+ ne fipe fya mu ng’anda ya mfumu.* Yasendele fye fyonse kumo ne nkwela sha golde isho Solomone apangile.+ 10 E ico Imfumu Rehoboamu yapangiilepo inkwela sha mukuba isha kupyanika pa sha golde kabili yapeele abakalamba ba balinshi* abalelinda pa mwinshi wa ng’anda ya mfumu ukuti baleshisunga. 11 Lyonse imfumu nga yaisa ku ng’anda ya kwa Yehova, abalinshi baleisa mu kusenda inkwela kabili baleshibwesesha mu muputule wa balinshi. 12 Apo imfumu yali-icefeshe, Yehova tatwalilile ukuifulilwa+ kabili tabalofeshe.+ Na kabili mu Yuda mwali abantu bamo abalecita ifisuma.+
13 Imfumu Rehoboamu yalekwatilako fye amaka mu Yerusalemu kabili yatwalilile ukuteka. Rehoboamu ali ne myaka 41 ilyo atendeke ukuteka, kabili atekele imyaka 17 mu Yerusalemu, umusumba uo Yehova asalile mu mikowa yonse iya bena Israele pa kuti abikemo ishina lyakwe. Nyina wa mfumu ali ni Naama, umwina Amone.+ 14 Lelo Rehoboamu alecita ifyabipa pantu tapangile mu mutima wakwe ukuti Yehova alemutungulula.+
15 Ilyashi lya kwa Rehoboamu ukufuma pa kutendeka ukufika ilyo afwile, balililembela pamo na mashiwi ya kwa Shemaya+ kasesema na ya kwa Ido+ uwalemona ifimonwa, bayalemba umo balembele intuntuko sha kufyalwa kabili Rehoboamu na Yeroboamu+ balelwa inkondo lyonse. 16 Lyena Rehoboamu alifwile nge fyafwile ifikolwe fyakwe kabili bamushiikile uko bashiikile ifikolwe fyabo mu Musumba wa kwa Davidi.+ Abiya umwana wakwe+ e wamupyene pa bufumu.
13 Mu mwaka walenga 18 ukutula apo Imfumu Yeroboamu yatendekele ukuteka, Abiya na o alitendeke ukuteka mu Yuda.+ 2 Atekele imyaka itatu mu Yerusalemu. Nyina ali ni Mikaya+ umwana mwanakashi wa kwa Uriele uwa ku Gibea.+ Abiya na Yeroboamu+ balelwa inkondo.
3 E ico Abiya aile mu kulwa inkondo na bashilika ba maka 400,000 abasambilile* ifya kulwa inkondo.+ Yeroboamu na o ali-ipekenye ukulwa inkondo, ali na bashilika ba maka 800,000 abasambilile* ifya kulwa inkondo. 4 Nomba Abiya aiminine pa Lupili lwa Semaraimu ulwaba mu citungu ca mpili ica kwa Efraimu, kabili alandile ati: “Umfweni ifyo nalalanda mwe mfumu Yeroboamu na mwe bena Israele bonse. 5 Bushe tamwaishiba ukuti Yehova Lesa wa bena Israele alipeela Davidi na bana bakwe amaka,+ aya kuti baleteka abena Israele umuyayaya+ ilyo apangene nankwe icipangano ca mucele?*+ 6 Lelo Yeroboamu+ umwana wa kwa Nebati, umubomfi wa kwa Solomone umwana wa kwa Davidi, alipondokeele shikulu wakwe.+ 7 Abaume abashakwete ifya kucita kabili ifinangwa baleya kuli ena. Basukile bapondokela Rehoboamu umwana wa kwa Solomone ninshi Rehoboamu ali umwaice kabili ali no mwenso, kabili alifililwe ukubalwisha.
8 “E ico nomba imwe mulemona ukutila kuti mwalwisha ubufumu bwa kwa Yehova ubo apeele abana ba kwa Davidi, pantu muli ibumba ilikalamba kabili namukwata abana ba ng’ombe aba golde abo Yeroboamu amupangiile pa kuti babe balesa benu.+ 9 Bushe tamwatamfya bashimapepo ba kwa Yehova+ abatuntuka muli Aarone na bena Lebi, kabili bushe tamwaisalila bashimapepo nga filya abantu ba mu fyalo fimbi bacita?+ Kabili onse uwaishile no mwana wa ng’ombe ne mpaanga ishilume 7 kuti aba shimapepo wa tulubi utushili tulesa. 10 Lelo ifwe, Yehova e Lesa wesu+ kabili tatwamusha; bashimapepo besu abatuntuka muli Aarone balebombela Yehova, kabili abena Lebi e balebafwilisha. 11 Baleocela Yehova imituulo ya koca cila lucelo ne cungulo+ pamo no bubani bwanunkila,+ kabili pe tebulo lya golde iisuma pali umukate wa kutuula,+ kabili cila cungulo+ balasanika inyali ishaba pa ca kutekapo inyali ica golde+ pantu tulebombela Yehova Lesa wesu, lelo imwe mwalimusha. 12 Nomba moneni! Lesa wa cine ali na ifwe kabili e uletutungulula. Bashimapepo bakwe tuli nabo kabili balelisha amapenga ya kuti twise tumulwishe. Mwe baume abena Israele, mwilwisha Yehova Lesa wa fikolwe fyenu pantu tamwakacimfye.”+
13 Lelo Yeroboamu atumine aba kubabelamina ku numa pa kuti abashilika bakwe babe ku ntanshi ya baYuda, e lyo abababelamine bena babe ku numa. 14 Ilyo abaYuda abaume bapilibwike, bamwene ukuti ku ntanshi na ku numa yabo kwali abalebasansa. E ico bapaapeete Yehova+ ukuti abafwe ninshi bashimapepo balelisha sana amapenga. 15 Abaume abaYuda baweleshe ukuwelesha kwa nkondo, kabili ilyo baweleshe, Lesa wa cine alengele Abiya na baYuda bacimfya Yeroboamu na bena Israele bonse. 16 Abena Israele bafulumwike abaYuda kabili Lesa alengele babacimfya ku baYuda. 17 Abiya na bantu bakwe balipeye abena Israele abengi nga nshi. Abaume abena Israele abali 500,000 abasambilile* ifya kulwa inkondo balibepeye. 18 E fyo abaume abena Israele babacimfishe pali ilya nshita, lelo icalengele abaume abaYuda bacimfye ni co balishintilile pali Yehova Lesa wa fikolwe fyabo.+ 19 Abiya atwalilile fye ukupepeka Yeroboamu kabili alimupokele ne misumba. Amupokele Betele+ ne misumba ya iko iinono, Yeshana ne misumba ya iko iinono, na Efrainu+ ne misumba ya iko iinono. 20 Kabili Yeroboamu tatalile abapo na maka na kabili mu nshiku sha kwa Abiya. Lyena Yehova alimukandile ica kuti alifwile.+
21 Lelo Abiya atwalilile fye ukukwatilako amaka. Mu kupita kwa nshita, aupile abanakashi 14,+ kabili afyele abana abaume 22 na bana abanakashi 16. 22 Amalyashi yambi aya kwa Abiya, ifyo acitile ne fyo alandile balifilembela pamo na mashiwi ya kwa kasesema Ido.+
14 Lyena Abiya alifwile nge fyafwile ifikolwe fyakwe, kabili bamushiikile mu Musumba wa kwa Davidi.+ Umwana wakwe Asa e wamupyene pa bufumu. Ilyo Asa aleteka mu calo mwali umutende pa myaka 10.
2 Asa alecita ifisuma kabili ifyalungama mu menso ya kwa Yehova Lesa wakwe. 3 Abongolwele ifiipailo fya bena fyalo+ ne fifulo balepepelapo, atobawile ne fimabwe ifyo baimike ifyo balepepelapo,+ kabili aputawile ifimuti ifyo baimike ifyo balepepelapo.*+ 4 Na kabili aebele abaYuda ukulapepa Yehova Lesa wa fikolwe fyabo no kulakonka amafunde yakwe na fyonse ifyo abebele ukulacita. 5 E ico aonawile ififulo balepepelapo ne fyo baleocelapo ububani+ mu misumba yonse iya mu Yuda, kabili ilyo aleteka mu bufumu bwakwe mwali umutende. 6 Akuulile imisumba ya malinga mu Yuda,+ pantu mu calo mwali umutende kabili muli ilya myaka takwali nangu umo uwalemulwisha, pantu Yehova alengele atuusha+ ku balwani bakwe. 7 Aebele abaYuda ati: “Natukuule iyi misumba tukuulileko na malinga, impungu+ ne mpongolo,* kabili tubikeko ne mipindo. Natukwata icalo pantu tulabombela Yehova Lesa wesu. Twalimufwaya na o nalenga tutuushe ku balwani besu bonse.” E ico balipwishishe ukukuula.+
8 Asa akwete abashilika abaYuda 300,000 abalesenda inkwela ishikalamba na mafumo. Abashilika abena Benjamini bali 280,000. Aba bali bashilika ba maka abalesenda inkwela ishinono,* kabili abaishibe ifya kubomfya ubuta.+
9 Pa numa Sera umwina Etiopia aishile mu kubalwisha ne bumba lya bashilika 1,000,000 na maceleta 300.+ Ilyo afikile ku Maresha,+ 10 Asa aile mu kulwa nankwe kabili balitanteme pa kuti balwe nankwe mu mupokapoka wa Sefata ku Maresha. 11 Lyena Asa apaapeete Yehova Lesa wakwe+ ati: “Mwe Yehova, mulafwa abantu benu nampo nga bengi nelyo tabakwata amaka.+ Twafweni mwe Yehova Lesa wesu, pantu tushintilile pali imwe,+ kabili twishile mu kulwisha ili ibumba mwi shina lyenu.+ Mwe Yehova, nimwe Lesa wesu. Mwileka abantu yaweyawe bamucimfye.”+
12 E ico Yehova alilengele Asa na baYuda bacimfya abena Etiopia kabili abena Etiopia balifulumwike.+ 13 Asa na bantu abo ali nabo balipepeke abena Etiopia ukuyafika fye na ku Gerari,+ kabili baile baleipaya abena Etiopia ica kuti tapali nangu umo uwapuswike, pantu uwalebepaya ni Yehova na bashilika bakwe. Pa numa balisendele ifipe ifingi ifya bena Etiopia. 14 Kabili balicimfishe ne misumba yonse iyali mupepi na Gerari, pantu Yehova alengele abaleikala mu misumba babe no mwenso. Kabili balisendele ifintu ifingi muli iyi misumba yonse, pantu mwali ifintu ifingi ifya kusenda. 15 Basanshile na bakacema abaleikala mu matenti, basenda ne fitekwa fyabo ifingi nga nshi ne ngamila, e lyo babwelela ku Yerusalemu.
15 Nomba umupashi wa kwa Lesa waishile pali Asaria umwana wa kwa Odedi. 2 E ico ailemonana na Asa kabili amwebele ati: “Umfweni mwe Mfumu Asa, na mwe baYuda bonse na mwe bena Benjamini! Yehova akulaba na imwe nga ca kuti na imwe mwakulaba nankwe,+ kabili nga mwamufwaya akaleka mukamusange,+ lelo nga mwamusha na o akamusha.+ 3 Pa nshita iitali* abena Israele tabalebombela Lesa wa cine, tabaleya kuli shimapepo pa kuti abasambilishe, kabili tabalekonka amafunde.+ 4 Lelo ilyo balecula balebwelela kuli Yehova Lesa wa bena Israele no kumufwaya kabili aleleka bamusanga.+ 5 Pali ilya nshita takwali uwale-enda umutende* pantu mu fitungu fyonse mwali ifimfulunganya. 6 Uluko balelucimfya ku luko lunankwe kabili umusumba baleucimfya ku musumba unankwe, pantu Lesa alengele kwaba ifimfulunganya pa mulandu wa mafya yalekanalekana ayaliko.+ 7 Lelo imwe koseni kabili mwifuupuka,*+ pantu Lesa akamulambula pa mulimo mubomba.”
8 Ilyo fye Asa aumfwile aya mashiwi ne fyo kasesema Odedi aseseme, alishipile kabili alyonawile utulubi tonse utwa bunani mu citungu conse ica kwa Yuda+ ne ca kwa Benjamin na mu misumba iyo apokele mu citungu ca mpili ica kwa Efraimu, kabili akuulile cipya cipya iciipailo ca kwa Yehova icali pa ntanshi ya muputule wa kwingililapo uwa kwa Yehova.+ 9 Kabili alonganike abaYuda bonse na bena Benjamini e lyo na balebeshi aba mu citungu ca kwa Efraimu ne ca kwa Manase ne ca kwa Simeone,+ pantu abalebeshi abengi nga nshi aba mu Israele bailundile kuli ena ilyo bamwene ukuti Yehova Lesa wakwe ali nankwe. 10 E ico balongene mu Yerusalemu mu mweshi walenga butatu, mu mwaka walenga 15 ukutula apo Asa atendekeele ukuteka. 11 Pali bulya bushiku batuulile Yehova ing’ombe 700 ne mpaanga 7,000. Ishi inama bashifumishe pa fyo bapokolwele. 12 Kabili bapangene icipangano ca kuti bakulabombela* Yehova Lesa wa fikolwe fyabo no mutima wabo onse no mweo*+ wabo onse. 13 Uushali no kubombela Yehova Lesa wa bena Israele bali no kumwipaya, nampo nga mwaice nelyo mukalamba, mwaume nelyo mwanakashi.+ 14 E ico balapile kuli Yehova mwi shiwi ilikalamba ninshi balesekelela kabili balelisha amapenga ne ntandala. 15 Kabili abaYuda bonse balisekelele pali uyu mulapo balapile, pantu balapile ne mitima yabo yonse kabili balimufwaile nga nshi, na o alekele bamusanga.+ Yehova alengele batuusha ku balwani babo bonse.+
16 Imfumu Asa yafumishe na Maaka+ nakulu pali bunamfumu, pantu alipangile akalubi ka bunani aka pa cimuti ca kupepelapo.*+ Asa aputwile akalubi ka bunani aka kwa Maaka nakulu, akashonaula e lyo akocela mu mupokapoka wa Kidrone.+ 17 Nomba ififulo fya kupepelapo fyena tafyonawile+ mu Israele.+ Lelo Asa alebombela Lesa no mutima wakwe onse inshiku shonse isho ali no mweo.+ 18 Kabili aletele ifipe mu ng’anda ya kwa Lesa wa cine ifyo ena na wishi bapeele Lesa, e kutila silfere, golde ne fipe fimbi.+ 19 Mu Yuda tamwali inkondo mpaka na mu mwaka walenga 35 ukutula apo Asa atendekeele ukuteka.+
16 Mu mwaka walenga 36 ukutula apo Asa atendekeele ukuteka, Baasha imfumu+ ya Israele aishile mu kulwisha abaYuda kabili atendeke ukukuula* umusumba wa Rama+ pa kuti umuntu nangu umo elafuma nangu ukuya* ku mfumu Asa iya baYuda.+ 2 E lyo Asa abulile silfere na golde mu cipao ca ng’anda ya kwa Yehova+ na mu cipao ca ng’anda ya mfumu,* kabili atumiine Ben-hadadi imfumu ya bena Siria+ uwaleikala mu Damaseke, kabili amwebele ati: 3 “Iwe na ine twalipangana icipangano kabili tata na wiso nabo balipangene icipangano. Nakutumina silfere na golde. Isa utobe icipangano wapangana na Baasha imfumu ya Israele, pa kuti afume mu calo candi.”
4 Ben-hadadi alyumfwile ifyo Imfumu Asa yalandile kabili atumine abakalamba ba bashilika bakwe abakwisalwisha imisumba ya mu Israele. Bapokele umusumba wa Iyone,+ uwa kwa Dani,+ uwa Abelemaimu ne ncende umwali amatala mu misumba ya kwa Naftali.+ 5 Ilyo Baasha aumfwile ifi, ilyo line alilekele ukukuula* Rama. 6 Lyena Imfumu Asa yaitile abaYuda bonse, kabili basendele amabwe ne mbao ifyali mu Rama+ ifyo Baasha alekuulila,+ kabili ifi fine e fyo yabomfeshe pa kukuula* Geba+ na Mispa.+
7 E lyo Hanani+ uwaleiluka ifimonwa aile kuli Asa imfumu ya baYuda no kumweba ati: “Apo washintilile pa mfumu ya bena Siria, tawashintilile pali Yehova Lesa obe, tawakacimfye abashilika abena Siria.+ 8 Bushe abena Etiopia na bena Libya tabali libumba ilikalamba ilya bashilika? Bushe tabakwete amaceleta ayengi na balenina pali bakabalwe abengi? Lelo apo walishintilile pali Yehova, alilengele wabacimfya.+ 9 Pantu amenso ya kwa Yehova yalamona mu calo monse+ pa kuti apeele amaka ababa ne mitima ya cishinka kuli ena.+ Ifi wacita buwelewele, ukufuma lelo wakulalwa fye inkondo.”+
10 Lelo Asa alifuliilwe uwaleiluka ifimonwa kabili amubikile mu cifungo pantu alikalipe nga nshi pa fyo alandile. Pali ilya nshita Asa atendeke ukucusha abantu. 11 Nomba ilyashi lya kwa Asa ukufuma pa kutendeka ukufika na lintu afwile, balililemba mwi Buuku lya mfumu sha baYuda ne sha bena Israele.+
12 Mu mwaka walenga 39 ukutula apo Asa atendekeele ukuteka, alilwele ubulwele bwa ku makasa kabili alilwalishe; na lintu alwele talombele Yehova ukuti amwafwe, lelo afwaile aba kumundapa. 13 Lyena Asa alifwile nge fyafwile ifikolwe fyakwe,+ afwile mu mwaka walenga 41 ukutula apo atendekeele ukuteka. 14 E ico bamushiikile mu nshiishi yakwe iya lulumbi iyo aimbiile umwine mu Musumba wa kwa Davidi,+ kabili bamulaalike pa busanshi apo babikile amafuta ya balsamu na mafuta yambi ayo basakenyemo ne fyanunkila fimbi.+ Na kabili pa cililo cakwe balyocele ifyanunkila ifingi nga nshi pa kumucindika.
17 Umwana wakwe Yehoshafati+ e wamupyene pa bufumu kabili alikoseshe ubufumu bwakwe mu Israele. 2 Abikile abashilika mu misumba ya malinga yonse iya mu Yuda kabili apangile inkambi sha bashilika mu citungu ca baYuda na mu misumba ya kwa Efraimu iyo Asa wishi apokele.+ 3 Yehova alitwalilile ukuba na Yehoshafati, pantu alecita ifyo Davidi+ icikolwe cakwe alecita kabili talebombela baBaali. 4 Alebombela Lesa wa kwa wishi+ kabili alekonka* amafunde yakwe, talecita nge fyo abena Israele balecita.+ 5 Yehova atwalilile ukukosha ubufumu bwakwe;+ kabili abaYuda bonse balitwalilile ukumupeela ubupe kabili alikwete ifyuma ifingi nga nshi na bantu balimucindike nga nshi.+ 6 Ali uwashipa pa kucita ifyo Yehova afwaya kabili alyonawile ne fifulo balepepelapo+ ne fimuti ifyo baimike* ifyo balepepelapo+ mu Yuda.
7 Mu mwaka walenga butatu ukutula apo atendekeele ukuteka, Yehoshafati atumine aba kuyaita bacilolo bakwe, e kuti Ben-hayili, Obadia, Sekaria, Netanele na Mikaya pa kuti balesambilisha abantu mu misumba ya mu Yuda. 8 Aba bacilolo bali pamo na ba abena Lebi: Shemaya, Netania, Sebadia, Asaele, Shemiramote, Yehonatani, Adoniya, Tobiya na Tob-adoniya e lyo na Elishama na Yehoramu bashimapepo.+ 9 Batendeke ukusambilisha abantu mu Yuda, kabili balesenda ibuuku lya mafunde ya kwa Yehova.+ Baleya mu misumba yonse iya baYuda mu kusambilisha abantu.
10 Kabili Yehova alengele aba mu mabufumu yonse ayali mu fyalo ifyali mupepi na Yuda balemutiina, kabili tabalelwisha Yehoshafati. 11 Kabili abaPelishiti baleletela Yehoshafati ifya bupe ne ndalama. Ifi baleleta fyali mutuulo. Abena Arabia balemuletela impaanga ishilume 7,700 ne mbushi ishilume 7,700 ukufuma pa mikuni yabo.
12 Yehoshafati alekwatilako fye amaka,+ kabili atwalilile ukukuula ififulo fya malinga+ ne misumba umwali amatala+ mu Yuda. 13 Alibombele imilimo iingi mu misumba ya mu Yuda, kabili alikwete abashilika aba maka mu Yerusalemu. 14 Aba abashilika babakenye mu mabumba ukulingana na mayanda ya bashibo. Bacilolo ba mabumba ya bantu 1,000 aba muli Yuda bali ni aba: Umukalamba ali ni Adna, akwete abashilika ba maka 300,000.+ 15 Uwamukonkelepo ali ni Yehohanani, akwete abashilika 280,000. 16 Na umbi uwamukonkelepo ali ni Amasia umwana wa kwa Sikri uwaitemenwe ukubombela Yehova, akwete abashilika ba maka 200,000. 17 Mu mukowa wa kwa Benjamini+ umukalamba ali ni Eliada, umushilika wa maka, akwete abaume 200,000 abaipangeshe na mata ne nkwela.+ 18 Uwamukonkelepo ali ni Yehosabadi, akwete abaume 180,000, abaipangeshe ukulwa inkondo. 19 Aba e balebombela imfumu ukulunda pali balya imfumu yabikile mu misumba ya malinga mu Yuda monse.+
18 Yehoshafati alikwete ifyuma ifingi kabili alicindeme nga nshi,+ lelo apangene icipangano na Ahabu+ ica kuti bakofishanye abana. 2 E ico ilyo papitile imyaka aile kuli Ahabu ku Samaria,+ kabili Ahabu aipeye impaanga ne ng’ombe ishingi ishakutuulilako Yehoshafati na bantu abo ali nabo ilambo, kabili amupaapeete ukuti aye nankwe mu kulwisha Ramote-gileadi.+ 3 Lyena Ahabu imfumu ya bena Israele aipwishe Yehoshafati imfumu ya kwa Yuda ati: “Bushe kuti twaya bonse ku Ramote-gileadi?” Na o amwaswike ati: “Ine cimo cine na iwe, abantu bandi cimo cine na bantu bobe, twalaya na iwe mu kulwa inkondo.”
4 Lelo Yehoshafati aebele imfumu ya Israele ati: “Tala ipusha Yehova tumfwe ifyo alalandapo.”+ 5 E ico imfumu ya Israele yalonganike bakasesema 400 kabili yabepwishe aiti: “Bushe ndeya mu kulwisha Ramote-gileadi nangu niyako?” Bayaswike abati: “Kabiyeni, Lesa wa cine aleyalenga mucimfye uyu musumba.”
6 Lyena Yehoshafati alandile ati: “Bushe kuno takwaba kasesema wa kwa Yehova?+ Lekeni na o atwipushisheko.”+ 7 E lyo imfumu ya Israele yaebele Yehoshafati aiti: “Umbi uwingatwipushishako+ kuli Yehova ni Mikaya umwana wa kwa Imla, nomba nalimupata pantu tasesema ifisuma pali ine kano fye ifibi.”+ Lelo Yehoshafati atile: “Mwe mfumu tamufwile ukulanda ifya musango yu.”
8 E ico imfumu ya Israele yaitile uwalebomba kwi sano kabili yamwebele aiti: “Kasende Mikaya umwana wa kwa Imla wise nankwe ili line.”+ 9 Nomba imfumu ya Israele na Yehoshafati imfumu ya Yuda baikele pa fipuna fyabo ifya bufumu, ninshi nabafwala ne fya kufwala fya bufumu. Baikele apo balepumina ingano pa mwinshi wa musumba wa Samaria, kabili bakasesema bonse balesesema pa ntanshi yabo. 10 Lyena Sidekia umwana wa kwa Kenaana aipangiile insengo sha cela e lyo alanda ati: “Yehova alanda ati, ‘Ishi insengo e sho ukasonkwelako* abena Siria mpaka ukubalofye.’” 11 Bakasesema bambi nabo balesesema cimo cine, abati: “Kabiyeni ku Ramote-gileadi pantu muleyacimfya,+ Yehova aleyalenga mucimfye uyu umusumba.”
12 E ico uo batumine mu kwita Mikaya amwebele ati: “Mona! Ifyo bakasesema bonse bebele imfumu nafiwama. Na iwe wine uyelanda fimo fine+ kabili uyelanda ifisuma.”+ 13 Lelo Mikaya amwebele ati: “Na pali Yehova, ifyo Lesa wandi alanjeba, e fyo nalayalanda.”+ 14 Lyena aile ku mfumu kabili imfumu yamwipwishe aiti: “Mikaya, bushe tuleya mukulwisha Ramote-gileadi nangu niyako?” Ilyo line aebele imfumu ati: “Kabiyeni kabili muleyacimfya; Lesa aleyalenga mubacimfye.” 15 E lyo imfumu yamwebele aiti: “Bushe miku inga mfwile ukukweba ukuti ulape ukutila unjebe fye icishinka ukulingana ne fyo Yehova akwebele?” 16 E ico alandile ati: “Ndemona abena Israele bonse nabasalangana pa mpili, kwati ni mpaanga ishabula kacema.+ Yehova atile: ‘Aba tabakwata shikulwibo. Lekeni cila muntu abwelelemo umutende ku mwakwe.’”
17 Lyena imfumu ya Israele yaebele Yehoshafati aiti: “Bushe nshacikweba nati, ‘Taseseme ifisuma pali ine kano fye ifibi’?”+
18 Lyena Mikaya alandile ati: “Umfweni ifyo Yehova alanda: Nacimona Yehova naikala pa cipuna cakwe ica bufumu+ kabili ibumba lya mu muulu+ lyaciminina ku kulyo na ku kuso kwakwe.+ 19 Lyena Yehova acilanda ati, ‘Nani alayabepa Ahabu imfumu ya Israele pa kuti ileya ku Ramote-gileadi bayeipaya?’ E lyo umo wacilanda ifi, umbi na o wacilanda fimbi. 20 E lyo umupashi*+ umo waciminina pa ntanshi ya kwa Yehova walanda auti, ‘Ine nalayamubepa.’ Yehova aciwipusha ati, ‘Walayamubepa shani?’ 21 Na o wacasuka auti, ‘Nalayalenga bakasesema bakwe bonse bamubepe.’ E ico Lesa acitila, ‘Walayamubepa, kabili ifyo walayacita fyalayabomba, kabiye kacite ifyo fine.’ 22 Nomba Yehova nalenga aba bakasesema benu bamubepe,+ lelo Yehova nalanda ukuti ifyabipa fili no kumucitikila.”
23 E lyo Sidekia+ umwana wa kwa Kenaana apaleme kuli Mikaya+ amuma na pe tobo+ e lyo atila: “Bushe umupashi wa kwa Yehova ufumine shani pali ine pa kuti ulande na iwe?”*+ 24 Mikaya amwaswike ati: “Mona! Ukeshiba ifyo ufumine pali iwe mu bushiku ukaya mu kufisama mu muputule wa mu kati sana.” 25 Lyena imfumu ya Israele yatile: “Sendeni Mikaya mu mutwale kuli Amone umukalamba wa musumba na kuli Yoashi umwana wa mfumu. 26 Muyebeba amuti, ‘Imfumu yatila: “Bikeni uyu muntu mu cifungo+ kabili mulemupeela ifya kulya ifinono na menshi ayanono mpaka nkabwele umutende.”’” 27 Lelo Mikaya atile: “Nga mukabwela umutende, ninshi Yehova talandile na ine.”+ Lyena alandile no kuti: “Mwe bantu bonse mwikalaba ifyo nalanda.”
28 E ico imfumu ya Israele na Yehoshafati imfumu ya Yuda baile ku Ramote-gileadi.+ 29 Nomba imfumu ya Israele yaebele Yehoshafati aiti: “Ine nalaifungushanya kabili nalayalwako inkondo, lelo iwe ufwile ukufwala ifya kufwala fyobe ifya bufumu.” E ico imfumu ya Israele yali-ifungushenye yaya na mu kulwako inkondo. 30 Nomba imfumu ya Siria yaebele abakalamba ba bashilika abalenina pa maceleta aiti: “Mwilwa no muntu uushacindama nelyo uwacindama, lelo mulwe fye ne mfumu ya Israele.” 31 Ilyo abakalamba ba bashilika abalenina pa maceleta bamwene fye Yehoshafati, batile: “Nangu cibe shani iyi e mfumu ya Israele.” E ico balimukonkele pa kuti balwe nankwe; lyena Yehoshafati atampile ukupunda mutuule,+ na Yehova alimwafwile kabili apo pene Lesa alengele baleka ukumukonka. 32 Ilyo abakalamba ba bashilika abalenina pa maceleta bamwene ukuti te mfumu ya Israele, ilyo line balilekele ukumukonka babweluluka no kubweluluka.
33 Lelo umuntu umo apoosele fye umufwi ukwabula ukwishiba uo alelasa, kabili alashile imfumu ya Israele apalundanina ica kucinga icifuba. E ico imfumu yaebele uwale-ensha iceleta lya iko ati: “Aluluka pa kuti umfumye mu nkondo* pantu nabancena ububi.”+ 34 Inkondo yalikosele akasuba konse bulya bushiku, kabili imfumu baiminike fye mwi celeta ninshi nailosha ku bena Siria mpaka icungulo, kabili yafwile ilyo akasuba kalewa.+
19 Lyena Yehoshafati imfumu ya baYuda abweleele umutende+ ku ng’anda ku mwakwe* ku Yerusalemu. 2 Yehu+ umwana wa kwa Hanani+ uwalemona ifimonwa aile ku Mfumu Yehoshafati kabili aipwishe ati: “Bushe mulemona ukuti cili fye bwino ukwafwilisha ababifi+ no kutemwa abapata Yehova?+ Pa mulandu ne fi mucitile Yehova namufulilwa nga nshi. 3 Na lyo line Lesa namona ifisuma muli imwe,+ pantu mwalifumya mu calo ifimuti ifyo baimike ifya kupepelapo* kabili mwalipanga mu mutima wenu ukuti mwakulabombela Lesa wa cine.”+
4 Yehoshafati atwalilile ukwikala mu Yerusalemu, aile na kabili ku Beere-sheba ayafika na ku citungu ca mpili ica kwa Efraimu,+ pa kuti abweseshe abantu kuli Yehova Lesa wa fikolwe fyabo.+ 5 Na kabili asontele bakapingula mu misumba yonse iya malinga iya mu citungu conse ica Yuda.+ 6 Kabili aebele bakapingula ati: “Mulebika amano ku fyo mwakulapingula, pantu te muntu mwakulapingwilako lelo ni Yehova, kabili akulaba na imwe ilyo mulepingula.+ 7 Nomba muletiina Yehova.+ Mulecenjela ilyo mulepingula pantu Yehova Lesa wesu tafyenga umuntu,+ taaba na kapaatulula+ kabili tapoka amafisakanwa.”+
8 Na mu Yerusalemu na mo Yehoshafati asontele abena Lebi bamo na bashimapepo na bakalamba ba ndupwa sha bena Israele bamo, pa kuti balepingwilako Yehova kabili balepingula imilandu ya bekala mu Yerusalemu.+ 9 Kabili abakonkomeshe ati: “Ilyo mulepingula muletiina Yehova, muleba aba cishinka kabili mulebomba no mutima wenu onse.* 10 Lyonse ilyo bamunyinenwe abekala mu misumba imbi baleta umulandu kuli imwe uukumine ukwipaya umuntu+ nelyo baisa mu kwipusha pa mafunde, ifipope nelyo ubupingushi, mukalebeba ifyo bashilingile ukucita pa kuti bekalaba no mulandu kuli Yehova, pantu nga tamubebele, akamufulilwa, akafulilwe na bamunyinenwe. Ifi e fyo mukalecita pa kuti mwikaba no mulandu. 11 Amaria shimapepo mukalamba e wakulamwangalila, kabili akulamwafwilisha pa kupingula imilandu iikumine ukupepa Yehova.+ Lyena Sebadia umwana wa kwa Ishmaele intungulushi ya ndupwa sha baYuda e wakulamutungulula pa kupingula imilandu yonse iikumine amafunde ya mfumu. Kabili abena Lebi e bakulamwafwilisha. Muleba abashipa ilyo mulebomba uyu mulimo, kabili Yehova nabe na bonse abacita ifisuma.”+
20 Pa numa abena Moabu+ na bena Amone+ pamo na baAmonimu* bamo baishile mu kulwa inkondo na Yehoshafati. 2 E ico kwali abaile-eba Yehoshafati abati: “Kuli ibumba lya bantu ilikalamba abeshile ku kumulwisha abafumine ku citungu ca bemba,* ku Edomu,+ bali mu Hasasone-tamari, e kutila mu Engedi.”+ 3 Ilyo Yehoshafati aumfwile ifi, alitiinine kabili apangile ukwipusha Yehova ifyo alingile ukucita.+ E ico abilishe mu Yuda monse ukuti abantu bafunge. 4 Lyena abantu bonse mu Yuda balongene pamo pa kuti bepushe Yehova ifya kucita;+ bafumine mu misumba yonse iya mu Yuda pa kuti bepushe Yehova ifyo balingile ukucita.
5 Lyena Yehoshafati aiminine pa ntanshi ya lukuta lwa mu Yuda no lwa mu Yerusalemu pa ng’anda ya kwa Yehova pa ntanshi ya lubansa ulupya, 6 kabili apepele ati:
“Mwe Yehova Lesa wa fikolwe fyesu, nimwe fye Lesa eka mu muulu,+ bushe tamwakwata amaka pa mabufumu yonse aya nko?+ Ukuboko kwenu kwa maka kabili kwalikosa, takuli nangu umo uwingamulwisha.+ 7 Mwe Lesa wesu, bushe te imwe mwatamfishe abaleikala muli cino calo, ninshi na bantu benu abena Israele balemonako, kabili bushe te imwe mwapeele abana* ba kwa Abrahamu+ cibusa wenu cino calo, pa kuti cibe icalo cabo umuyayaya? 8 Kabili e mo baleikala, bamukuulilamo ne ng’anda ya kulenga ishina lyenu lyacindikwa,+ kabili batile, 9 ‘Nga ca kuti ifyabipa fyatucitikila pa mulandu no lupanga, ubupingushi, icikuko, nelyo icipowe, tukesaiminina pa ntanshi ya ino ng’anda na pa cinso cenu (pantu pali ino ng’anda e paba ishina lyenu),+ kabili tukapepa kuli imwe ukuti mutupusushe ku bucushi bwesu, kabili mukomfwe no kutupususha.’+ 10 Nomba abaume abena Amone, abena Moabu na ba mu citungu ca mpili ica Seiri,+ abo mushasuminishe ukuti abena Israele babasanse ilyo balefuma mu calo ca Egupti, nabesa. Abena Israele bapitile kumbi kabili tabalofeshe aba bantu.+ 11 Nomba bena nabesa mu kutupoka icalo ico mwatupeele ukuti cibe icalo cesu.+ 12 Mwe Lesa wesu, bushe tamwabakande?+ Pantu ifwe tatukwete amaka ya kucimfya ili ibumba ilikalamba ilileisa mu kutulwisha; kabili tatwishibe ifyo tulingile ukucitapo+ pantu amenso yesu yaloleshe kuli imwe.”+
13 Pali iyi nshita, bonse aba mu Yuda baiminine pa cinso ca kwa Yehova, pamo na bakashi babo, na bana babo abanono na bana* babo abakalamba.
14 Lyena umupashi wa kwa Yehova waishile pali Yahasiele ninshi ali mu lukuta. Yahasiele ali mwana wa kwa Sekaria umwana wa kwa Benaya umwana wa kwa Yeiele umwana wa kwa Matania umwina Lebi uwatuntwike muli Asafi. 15 Abebele ati: “Umfweni ifyo nalalanda mwe baYuda bonse na mwe bekala mu Yerusalemu na mwe Mfumu Yehoshafati! Yehova atila, ‘Mwitiina kabili mwiba no mwenso pa mulandu wa ili ibumba ilikalamba, pantu ine ne Lesa wenu nine ndelwa iyi inkondo te imwe iyo.+ 16 Mailo mukaye mu kubalwisha. Bakeshila mu nshila beta ukuti Sisi, kabili mukayabasanga ku mpela ya mupokapoka mupepi na matololo ya Yeruele. 17 Tamwakalweko iyi inkondo. Mukayetantama fye, mukeminine shilili+ no kumona ifyo Yehova akamupususha.+ Mwikatiina kabili mwikaba no mwenso,+ mwe baYuda na mwe bekala mu Yerusalemu. Mailo mukaye mu kubalwisha kabili Yehova akaba na imwe.’”+
18 Ilyo line fye Yehoshafati alikonteme afisha ne mpumi panshi, na baYuda bonse na baleikala mu Yerusalemu bakonteme pa cinso ca kwa Yehova pa kuti bapepe Yehova. 19 Lyena abena Lebi abatuntwike mu bena Kohati+ na bena Kora balimine kabili batendeke ukulumbanya Yehova Lesa wa bena Israele ninshi nabasansula amashiwi.+
20 Ubushiku bwakonkelepo balimine lucelocelo pa kuti baye ku matololo ya Tekoa.+ Ilyo balefuma, Yehoshafati alimine e lyo abeba ati: “Umfweni mwe baYuda na mwe bekala mu Yerusalemu! Tetekeleni Yehova Lesa wenu pa kuti mube abashipa. Tetekeleni bakasesema bakwe+ kabili mwalayacimfya.”
21 Ilyo alanshenye na bantu, asontele abaume aba kwimbila+ Yehova no kumulumbanya ninshi nabafwala ifya kufwala fya mushilo, bali pa ntanshi ya baume abali ne fyanso, baleti:“Tooteleni Yehova, pantu ukutemwa kwakwe kwa muyayaya.”+
22 Ilyo batendeke ukwimba inyimbo sha kulumbanya Lesa ninshi bali ne nsansa, Yehova alengele abaume abena Amone, abena Moabu na baume ba mu citungu ca mpili ica Seiri abalesansa abaYuda batendeke ukwipayana.+ 23 Kabili abena Amone na bena Moabu baimiine abaleikala mu citungu ca mpili ica Seiri+ pa kuti babepaye no kubalofya. Ilyo bapwishishe ukwipaya abaleikala mu Seiri, batendeke ukwipayana.+
24 Nomba ilyo abaYuda baile ku lupungu lwa kwa kalinda mu matololo,+ balolesha no kwali ibumba bamwene ifitumbi nafilambalala panshi,+ takwali nangu umo uwapuswike. 25 Ilyo Yehoshafati na bantu bakwe baile mu kusenda ifintu fya balwani babo abafwile, basangile ifintu ifingi, ifya kufwala ne fintu fimbi ifisuma, ifyo basangile fyalifulile ica kuti balifililwe ukusenda fyonse.+ Ifyo basendele fyalifulile icine cine ica kuti bafisendele pa nshiku shitatu. 26 Pa bushiku bwalenga 4 balilongene pamo mu mupokapoka* wa Beraka, pantu mulya e mo balumbanishishe* Yehova. E mulandu wine betila ilya ncende ukuti Umupokapoka wa Beraka*+ ukufika na lelo.
27 Lyena abaume bonse abaYuda na baleikala mu Yerusalemu, babweleele ku Yerusalemu ninshi balesekelela, kabili Yehoshafati alebatungulula. Balesekelela pantu Yehova alicimfishe abalwani babo.+ 28 E ico bafikile ku Yerusalemu ninshi balelisha ifilimba fya nsale, insango+ na mapenga,+ kabili baile ku ng’anda ya kwa Yehova.+ 29 Kabili Lesa alengele aba mu mabufumu yonse aya mu fyalo batiine nga nshi ilyo baumfwile ukuti Yehova nacimfya abalwani ba bena Israele.+ 30 E ico mu bufumu bwa kwa Yehoshafati mwali umutende, kabili Lesa wakwe alengele batushe ku balwani babo bonse.+
31 Kabili Yehoshafati atwalilile ukuteka abaYuda. Ali ne myaka 35 ilyo atendeke ukuteka kabili atekele mu Yerusalemu imyaka 25. Nyina ali ni Asuba umwana wa kwa Shilhi.+ 32 Yehoshafati alecita ifisuma nga fintu Asa+ wishi alecita, talekele ukucita ifyalungama mu menso ya kwa Yehova.+ 33 Lelo ififulo fya kupepelapo fyena tafyonawile,+ kabili abantu bali tabalapanga mu mitima yabo ukuti bakulabombela Lesa wa fikolwe fyabo.+
34 Amalyashi yambi aya kwa Yehoshafati, ukufuma pa kutendeka ukufika na lintu afwile baliyalembela pamo na mashiwi ya kwa Yehu+ umwana wa kwa Hanani,+ ayo balembele mwi Buuku lya Mfumu sha mu Israele. 35 Pa numa ya ifi, Yehoshafati imfumu ya mu Yuda apangene icipangano na Ahasia imfumu ya Israele, uwalecita ifyabipa.+ 36 E ico atendeke ukubombela pamo nankwe pa kupanga amato ya kuya ku Tarshishi+ kabili bapangile amato mu Esione-gebere.+ 37 Lelo Eliesere umwana wa kwa Dodabahu uwa ku Maresha asesemene Yehoshafati ati: “Apo walipangana icipangano na Ahasia, Yehova akonaula imilimo yobe.”+ E ico amato yalyonaike,+ kabili tayaile ku Tarshishi.
21 Yehoshafati alifwile nge fyafwile ifikolwe fyakwe kabili bamushiikile uko bashiikile ifikolwe fyakwe mu Musumba wa kwa Davidi; lyena Yehoramu umwana wakwe alimupyene pa bufumu.+ 2 Abaice bakwe, abana ba kwa Yehoshafati bali ni Asaria, Yehiele, Sekaria, Asaria, Mikaele na Shefatia. Bonse aba bali bana ba mfumu Yehoshafati iya bena Israele. 3 Kabili wishi abapeele ifya bupe ifingi ifya silfere, ifya golde ne fintu fimbi ifisuma pamo ne misumba ya malinga mu Yuda;+ lelo ubufumu apeele Yehoramu+ pantu e wali ibeli.
4 Ilyo Yehoramu akwete amaka pa bufumu bwa kwa wishi, alikoseshe ubufumu bwakwe. Aipeye abaice bakwe bonse+ ku lupanga na bacilolo bamo aba bena Israele. 5 Yehoramu ali ne myaka 32 ilyo aishileba imfumu kabili atekele mu Yerusalemu imyaka 8.+ 6 Alecita ifyabipa nga filya fine imfumu sha mu Israele shalecita,+ ifyo na ba mu ng’anda ya kwa Ahabu balecita, pantu aupile umwana wa kwa Ahabu.+ Kabili alecita ifyabipa mu menso ya kwa Yehova. 7 Lelo Yehova talefwaya ukulofya aba mu ng’anda ya kwa Davidi pa mulandu wa kuti alipangene icipangano na Davidi,+ pantu alimulaile ukuti ena na bantu bakwe abali no kutuntuka muli ena ali no kubapeela inyali.+
8 Ilyo Yehoramu aleteka, abena Edomu bapondokeele ubuteko bwa baYuda+ kabili baisonteele imfumu.+ 9 E ico Yehoramu na bakalamba ba bashilika bakwe baile na maceleta ku Edomu. Aimine mu nshita ya bushiku kabili alicimfishe abena Edomu abamushingulwike na bakalamba ba bashilika abalenina pa maceleta. 10 Lelo Edomu alitwalilila ukupondokela Yuda ukufika na lelo. Pali ilya ine nshita Libna+ na o alipondokele Yuda pantu alilekele ukubombela Yehova Lesa wa fikolwe fyakwe.+ 11 Na kabili apangile ififulo fya kupepelapo+ pa mpili sha mu Yuda pa kuti abaleikala mu Yerusalemu balepepa tulesa,* kabili alilengele abaYuda baleka ukubombela Lesa.
12 Mu kupita kwa nshita kasesema Eliya+ amulembeele ati: “Yehova Lesa wa kwa Davidi icikolwe cobe atila, ‘Taucita ifyo Yehoshafati+ wiso alecita nelyo ifyo Asa+ imfumu ya Yuda yalecita. 13 Lelo ucita nge fyo imfumu sha bena Israele+ shicita kabili walilenga abaYuda nabekala mu Yerusalemu balepepa tulesa+ nga filya fine aba mu ng’anda ya kwa Ahabu bacita,+ kabili walipaya na ba munonko+ abana ba kwa wiso abaweme ukukucila. 14 E ico Yehova alekanda icabipisha abantu bobe, abana bobe na bakashi bobe, kabili aleonaula na fyonse ifyo wakwata. 15 Ukalwala amalwele ayengi ukubikako fye no bulwele bwa mu mala, mpaka amala yobe yakafume pa mulandu wa kuti ubo bulwele bwa kulakucusha cila bushiku.’”
16 Lyena Yehova alengele+ abaPelishiti*+ na bena Arabia+ abali mupepi na bena Etiopia baimina Yehoramu. 17 E ico balisanshile abaYuda, kabili balisendele ifipe fyonse ifyali mu ng’anda ya mfumu,*+ e lyo na bana ba iko na bakashi ba iko; bashileko fye umwana wa iko Yehoahasi*+ uwali umwaice pali bonse. 18 Pa numa ya ifi, Yehova alengele alwala ubulwele bwa mu mala+ ubushali no kupola. 19 Ilyo papitile imyaka ibili iituntulu amala yakwe yalifumine pa mulandu wa ubu ubulwele, kabili alifwile ilyo aculile sana kuli ubu bulwele; kabili abantu bakwe tabamoceleele ifyanunkila nge fyo bacitiile ifikolwe fyakwe.+ 20 Yehoramu ali ne myaka 32 ilyo atendeke ukuteka kabili atekele imyaka 8 mu Yerusalemu. Ilyo afwile takwali nangu umo uwaumfwile ububi. E ico bamushiikile mu Musumba wa kwa Davidi,+ lelo tabamushiikile mu nshiishi ya mfumu.+
22 Lyena abaleikala mu Yerusalemu babikile Ahasia umwana wakwe umwaicepo pali bonse pa bufumu pa kuti amupyane, pantu ibumba lya fipondo ifyalebelamina abantu ifyaishile na bena Arabia ku nkambi ya baYuda fyalipeye abakalamba bakwe bonse.+ E ico Ahasia umwana wa kwa Yehoramu atendeke ukuteka mu Yuda.+ 2 Ahasia ali ne myaka 22 ilyo atendeke ukuteka, kabili atekele umwaka umo mu Yerusalemu. Nyina ali ni Atalia+ umwishikulu* wa kwa Omri.+
3 Ahasia na o alecita ifyabipa nge fyo aba mu ng’anda ya kwa Ahabu+ balecita, pantu nyina e walemupanda amano ya kucita ifyabipa. 4 Kabili alecita ifyabipa mu menso ya kwa Yehova, nga filya fine aba mu ng’anda ya kwa Ahabu balecita, pantu e balemupanda amano ilyo wishi afwile, kabili balimuletelele. 5 Alecita ifyo abalemupanda amano balemweba, kabili aile na Yehoramu umwana wa kwa Ahabu imfumu ya Israele mu kulwa na Hasaele+ imfumu ya ku Siria mu Ramote-gileadi,+ uko abalepoosa imifwi balashiile Yehoramu. 6 Yehoramu abwelele ku Yesreele+ pa kuti apole ifilonda ifyo bamucenene mu Rama ilyo alelwa ne mfumu Hasaele iya bena Siria.+
Ahasia* umwana wa kwa Yehoramu+ imfumu ya baYuda, aile ku Yesreele mu kupempula Yehoramu+ umwana wa kwa Ahabu, pantu balimucenene.*+ 7 Lelo Lesa alengele Ahasia aye mu kupempula Yehoramu pa kuti Ahasia bayemwipaya. Ilyo afikile aile na Yehoramu kuli Yehu+ umwishikulu* wa kwa Nimshi, uo Yehova asubile pa kuti epaye aba mu ng’anda ya kwa Ahabu.+ 8 Ilyo Yehu atendeke ukwipaya aba mu ng’anda ya kwa Ahabu, asangile bacilolo ba mu Yuda na bana ba bamunyina ba kwa Ahasia abalebombela Ahasia, kabili alibepeye.+ 9 Lyena aile mu kufwaya Ahasia; bamwikatile mu Samaria umo ailebelama, kabili bamuletele kuli Yehu. Lyena balimwipeye, bamushiika no kumushiika+ pantu batile: “Mwishikulu wa kwa Yehoshafati uwabombeele Yehova no mutima wakwe onse.”+ Pa ba mu ng’anda ya kwa Ahasia tapali nangu umo uwakwete amaka ya kuteka.
10 Ilyo Atalia+ nyina wa kwa Ahasia amwene ukuti umwana wakwe nafwa, aliimine pa kuti epaye bonse abali no kuba imfumu mu Yuda.+ 11 Lelo Yehoshabeati umwana mwanakashi wa mfumu afumishe Yehoashi+ umwana wa kwa Ahasia pa bana ba mfumu abo bali no kwipaya. Ailemufisa mu muputule wa kulaalamo uwa mu kati sana pamo no walemonsha. Yehoshabeati umwana wa Mfumu Yehoramu,+ (ali mukashi wa kwa shimapepo Yehoyada+ kabili ali ni nkashi ya kwa Ahasia) alifishile Yehoashi ica kuti Atalia tamwipeye.+ 12 Afiseme pamo nabo pa myaka 6 mu ng’anda ya kwa Lesa wa cine, ninshi Atalia aleteka icalo.
23 Mu mwaka walenga 7, Yehoyada alicitile ifyalangile ukuti ali uwashipa kabili alipangene icipangano na bakalamba ba mabumba ya bashilika 100,+ e kutila Asaria umwana wa kwa Yerohamu, Ishmaele umwana wa kwa Yehohanani, Asaria umwana wa kwa Obedi, Maaseya umwana wa kwa Adaya na Elishafati umwana wa kwa Sikri. 2 Lyena baile mu Yuda monse mu kwita abena Lebi+ mu misumba yonse iya mu Yuda, kabili baitile na bakalamba ba ndupwa sha bena Israele. Ilyo baishile ku Yerusalemu, 3 ulukuta lonse lwapangene icipangano+ ne mfumu mu ng’anda ya kwa Lesa wa cine, lyena yabebele aiti:
“Moneni! Umwana wa mfumu akateka, nge fyo Yehova alaile pa bana ba kwa Davidi.+ 4 Ifi e fyo mukacite: Bashimapepo na bena Lebi bakakanikane mu mabumba yatatu. Ibumba limo ilikalabomba+ pe Sabata e likalalinda pa mwinshi.+ 5 Ibumba lyalenga bubili likabe pa ng’anda ya mfumu,*+ e lyo ibumba lyalenga butatu likabe pa Mpongolo ya Mufula. Abantu bonse bena bakabe mu mansa sha ng’anda ya kwa Yehova.+ 6 Kabili mwikaleka umuntu nangu umo akengile mu ng’anda ya kwa Yehova kano fye bashimapepo na bena Lebi abalebomba imilimo.+ Aba bena kuti baingila pantu Lesa alibapaatulako pa kuti balebomba umulimo wa mushilo, lelo abantu bonse bena bakalecita ifyo bafwile ukucita ifyo Yehova abeba. 7 Abena Lebi bafwile ukushinguluka imfumu ninshi cila muntu naikata ifyanso. Onse uukafwaya ukwingila mu ng’anda mukamwipaye. Mukaleba ne mfumu konse uko ikalaba.”*
8 Abena Lebi na baYuda bonse bacitile filya fine fye Yehoyada shimapepo abebele. E ico cila muntu asendele abantu bakwe abali no kubomba pe Sabata pamo na bashali no kubomba pe Sabata,+ pantu Yehoyada shimapepo tasuminishe aya amabumba+ ukuleka ukubomba imilimo yabo. 9 Lyena Yehoyada shimapepo apeele abakalamba ba mabumba ya bashilika 100+ amafumo ne nkwela ishinono* ne shabulungana ifyali fya Mfumu Davidi,+ ifyali mu ng’anda ya kwa Lesa wa cine.+ 10 Lyena aebele abantu bonse apo cila muntu alingile ukubombela ninshi bali ne fyanso mu minwe, baiminine ukufuma ku kulyo kwa ng’anda ukufika ku kuso kwa ng’anda, mupepi ne ciipailo kabili mupepi ne ng’anda, ninshi nabashinguluka imfumu. 11 Lyena bafumishe umwana wa mfumu,+ bamubika ne cisote ca bufumu* ne buuku lya Mafunde Ikumi*+ pa mutwe, kabili Yehoyada na bana bakwe abaume bamwitulwilile amafuta pa mutwe, bamubika na pa bufumu. Lyena balelanda abati: “Kalebalika mwe mfumu!”+
12 Ilyo Atalia aumfwile icongo ca bantu abalebutuka ninshi balelumbanya imfumu, ilyo line aishile ku bantu abali pa ng’anda ya kwa Yehova.+ 13 Lyena amwene imfumu naiminina mupepi no luceshi lwa iko pa mwinshi. Bacilolo+ na balelisha amapenga bali pamo ne mfumu, kabili abantu bonse aba mu calo balesekelela+ ninshi balelisha na mapenga, kabili bakemba abali ne filimba e balebatungulula* pa kusefya. Ilyo Atalia amwene ifi alepwile ifya kufwala fyakwe e lyo alapunda ati: “Nabampondokela! Nabampondokela!” 14 Lelo Yehoyada shimapepo afumiishe panse abakalamba ba mabumba ya bashilika 100, abo basontele ukwangalila abashilika, no kubeba ati: “Mufumyeni pa bashilika, kabili onse uwalamukonka, mumwipaye ku lupanga!” Pantu shimapepo atile: “Mwimwipaila mu ng’anda ya kwa Yehova.” 15 E ico balikete Atalia kabili ilyo afikile pa Mpongolo ya Bakabalwe iya ng’anda ya mfumu,* ilyo line fye balimwipeye.
16 Lyena Yehoyada alengele bapangane icipangano ca kuti ena na bantu bonse ne mfumu bali no kutwalilila ukuba abantu ba kwa Yehova.+ 17 Pa numa abantu bonse baishile ku ng’anda* ya kwa Baali kabili bali-ibongolwele.+ Batobawile ifiipailo fyakwe ne fimpashanya fyakwe,+ kabili baipaile Matani shimapepo wa kwa Baali+ pa ntanshi ya fiipailo. 18 Lyena Yehoyada apeele bashimapepo na bena Lebi umulimo wa kwangalila ing’anda ya kwa Yehova. Aba bashimapepo na bena Lebi ni balya Davidi abikile mu mabumba pa ng’anda ya kwa Yehova pa kuti baletuulila Yehova amalambo ya koca+ ukulingana ne fyalembelwe mu mafunde ya kwa Mose.+ Bali no kulasekelela no kwimba inyimbo pa kubomba uyu umulimo nga fintu Davidi abebele. 19 Abikile na balinshi pa mpongolo+ sha ng’anda ya kwa Yehova pa kuti umuntu nangu umo uwakowela elaingilamo. 20 Nomba asendele abakalamba ba mabumba ya bashilika 100,+ bashimucindikwa, intungulushi sha bantu e lyo na bantu bonse mu calo ilyo balefumya imfumu ku ng’anda ya kwa Yehova. Pa kwingila mu ng’anda ya mfumu* bapitile pa mpongolo iyabelele pa muulu kabili batekele imfumu pa cipuna ca bufumu.+ 21 E ico abantu bonse mu calo balesekelela kabili mu musumba tamwali ifimfulunganya, pantu balipeye Atalia ku lupanga.
24 Yehoashi ali ne myaka 7 ilyo bamubikile pa bufumu,+ kabili atekele imyaka 40 mu Yerusalemu. Nyina ali ni Sibia uwa ku Beere-sheba.+ 2 Yehoashi alitwalilile ukucita ifisuma mu menso ya kwa Yehova inshiku shonse isho Yehoyada shimapepo+ ali uwa mweo. 3 Yehoyada amufwaile abanakashi babili abakuupa, kabili afyele abana abaume na bana abanakashi.
4 Ilyo papitile inshita, Yehoashi alefwaya ukuwamya ifyaonaike ku ng’anda ya kwa Yehova.+ 5 E ico aitile bashimapepo na bena Lebi kabili abebele ati: “Kabiyeni mu misumba ya mu Yuda mupoke indalama ku bena Israele bonse isha kuwamisha ifyakulaonaika ku ng’anda ya kwa Lesa+ cila mwaka, kabili mwangufyanye ukucita ifi namweba.” Lelo abena Lebi taba-angufyenye ukucita ifyo abebele.+ 6 E ico imfumu yaitile Yehoyada shimapepo mukalamba kabili yamwipwishe aiti:+ “Cinshi ushaebela abena Lebi ukuya mu kupoka umutuulo ku baYuda na ku bekala mu Yerusalemu, uo Mose+ umubomfi wa kwa Yehova abebele ukuti baleleta, umutuulo wa mushilo uwa lukuta lwa bena Israele, uwa kubomfya ku milimo ya pe tenti lya mushilo umwaba icipao ca Cipangano?+ 7 Pantu abana ba kwa Atalia,+ ulya mwanakashi umubifi, balingile mu ng’anda ya kwa Lesa wa cine,+ basenda ifipe fyonse ifya mushilo ifyali mu ng’anda ya kwa Yehova e lyo bayafibomfya mu kupepa baBaali.” 8 Lyena imfumu yaebele aba kupanga icipao.+ Ilyo bacipangile bacibikile panse, pa mpongolo ya ng’anda ya kwa Yehova.+ 9 Lyena babilishe mu Yuda monse na mu Yerusalemu ukuti abantu baletele Yehova umutuulo wa mushilo+ uo Mose umubomfi wa kwa Lesa wa cine aebele abena Israele ukuleta mu matololo. 10 Bacilolo bonse na bantu bonse balisekelele,+ kabili batwalilile ukuleta umutuulo no ku-ubika mu cipao mpaka caisula.*
11 Lyonse abena Lebi nga bamona ukuti mu cipao muli indalama ishingi baletwala icipao ku mfumu. Kalemba wa mfumu no waleafwilisha shimapepo baleisula icipao bafumyamo indalama,+ lyena balebwesesha icipao apo caleikala. Ifi e fyo balecita cila bushiku, kabili balilonganike indalama ishingi. 12 Lyena imfumu na Yehoyada balepeela abaleangalila umulimo pa ng’anda ya kwa Yehova indalama, kabili baleingisha incito aba kuputula amabwe na baishibishe ifya kubomba imilimo pa kuti bawamye ifyaonaike ku ng’anda ya kwa Yehova.+ Balingishe na babomfi abaishiba ukupanga ifintu ukubomfya ifyela no mukuba pa kuti bawamye ing’anda ya kwa Yehova. 13 Kabili abaleangalila umulimo balitendeke ukubomba. Abo baleangalila balitwalilile ukubomba umulimo wa kuwamya ifyaonaike ku ng’anda ya kwa Lesa wa cine mpaka ing’anda yaba ukulingana ne fyo yalingile ukuba, kabili bali-ikoseshe. 14 Kabili ilyo bapwishishe fye ukuwamya ing’anda ya kwa Lesa, batwele indalama ishashelepo ku mfumu na kuli Yehoyada. Ishi ndalama balishibomfeshe ku mulimo wa kupanga ifipe fya mu ng’anda ya kwa Yehova ne fipe fimbi ifya pali iyi ing’anda e lyo ne fyo balebomfya pa kutuula imituulo. Balipangile na makapu ne fipe ifya golde na silfere.+ Kabili lyonse baletuula amalambo ya koca+ pa ng’anda ya kwa Yehova inshiku shonse isho Yehoyada ali uwa mweo.
15 Ilyo Yehoyada akotele, alifwile ninshi mukalamba kabili ali ne nsansa; ali ne myaka 130 ilyo afwile. 16 E ico bamushiikile mu Musumba wa kwa Davidi uko baleshiika imfumu,+ pantu alicitiile abena Israele na Lesa wa cine ifisuma+ kabili aliwemye ne ng’anda ya kwa Lesa.
17 Ilyo Yehoyada afwile, bacilolo ba mu Yuda balishile ku mfumu baikontamina, kabili imfumu yalyumfwile ifyo bayebele. 18 Abantu balilekeleshe ing’anda ya kwa Yehova Lesa wa fikolwe fyabo kabili batendeke ukupepa ifimuti ifyo baimike* ne filubi. E ico Lesa alifuliilwe nga nshi abaYuda na baleikala mu Yerusalemu pa mulandu wa kuti balecita ifyabipa. 19 Yehova alebatumina bakasesema pa kuti bababweseshe kuli ena, kabili balebasoka,* lelo tabaleumfwa.+
20 Umupashi wa kwa Lesa waishile* pali Sekaria umwana wa kwa Yehoyada+ shimapepo, kabili aiminine pa ntanshi ya bantu e lyo alabeba ati: “Ifi e fyo Lesa wa cine alanda, ‘Cinshi mushikonkela amafunde ya kwa Yehova? Ifintu tafyakulamuwamina! Apo mwalisha Yehova, na o alemusha.’”+ 21 E ico balimupangiile+ kabili bamutobeele amabwe mu lubansa lwa ng’anda ya kwa Yehova mpaka afwa, nga fintu imfumu yabebele.+ 22 Imfumu Yehoashi tayaibukishe ukutemwa ukushipwa uko Yehoyada wishi wa kwa Sekaria ailangile. Yaipeye Sekaria uwalandile ilyo alefwa ati: “Yehova akamukande pa fyo mwacita.”+
23 Pa kutendeka kwa mwaka* abashilika abena Siria balishile mu kulwisha Yehoashi, kabili balisanshile Yuda na Yerusalemu.+ Lyena balipeye bacilolo+ bonse kabili ifyuma fyonse ifyo bapokele bafitumine ku mfumu ya ku Damaseke. 24 Nangu ca kuti ibumba lya bashilika abena Siria lyali fye ilinono, Yehova alengele bacimfya ibumba ilikalamba ilya bashilika,+ pantu balishile Yehova Lesa wa fikolwe fyabo; e ico balikandile* Yehoashi. 25 Kabili ilyo abena Siria babwelelemo (pantu bamushile ninshi nacenekwa icine cine*), ababomfi bakwe balimupangiile pa mulandu wa kuti alipeye abana ba kwa Yehoyada+ shimapepo. E ico bamwipaile pa busanshi bwakwe.+ Kabili bamushiikile mu Musumba wa kwa Davidi,+ lelo tabamushiikile uko baleshiika imfumu.+
26 Aba mupangiile+ ni Sabadi umwana wa kwa Shimeati umwina Amone na Yehosabadi umwana wa kwa Shimriti umwina Moabu. 27 Ilyashi lya bana bakwe, ifyo bakasesema bamusokele+ e lyo ne fyo awemye ing’anda ya kwa Lesa wa cine,+ fyonse balifilemba mwi Buuku lya Mfumu. Lyena Amasia umwana wakwe e wamupyene pa bufumu.
25 Amasia ali ne myaka 25 ilyo atendeke ukuteka, kabili atekele imyaka 29 mu Yerusalemu. Nyina ali ni Yehoadani umwina Yerusalemu.+ 2 Amasia alecita ifisuma mu menso ya kwa Yehova, lelo talecita ifi no mutima onse. 3 Ilyo fye akoseshe ubufumu bwakwe, aipeye ababomfi bakwe abaipeye wishi ilyo ali imfumu.+ 4 Lelo abana babo bena tabepeye, pantu akonkele ifyalembelwe mu mafunde ayali mwi buuku lya kwa Mose. Yehova alandile ati: “Bashibo tabafwile ukufwila pa lubembu lwa bana babo, kabili abana babo nabo tabalingile ukufwila pa lubembu lwa bashibo. Cila muntu afwile ukufwila pa lubembu lwakwe.”+
5 Amasia aitile abaume bonse aba mu mukowa wa kwa Yuda na ba mu mukowa wa kwa Benjamini,+ kabili abebele ukwiminina ukulingana na mayanda ya bashibo. Abakalamba ba mabumba ya bantu 1,000 na bakalamba ba mabumba ya bantu 100 e bali intungulushi shabo. Abaume abo alembele abali ne myaka 20 ukuya pa muulu+ abali no kuba abashilika bali 300,000. Aba abaume balishibe ifya kubomfya ifumo ne nkwela iikalamba. 6 Na kabili alipile abashilika ba maka abena Israele amatalanti* ya silfere 100 pa kuti bamwafweko ukulwa inkondo. Aba abashilika bali 100,000. 7 Lelo umuntu wa kwa Lesa wa cine aishile kuli ena, kabili amwebele ati: “Mwe mfumu, mwileka abashilika abena Israele baye na imwe mu kulwa inkondo, pantu Yehova tali na bena Israele+ kabili tali na bena Efraimu bonse. 8 Lelo muye fye mweka mu kulwa inkondo, mucitepo cimo kabili mushipe. Nga tamucitile ifi, Lesa wa cine kuti alenga abalwani benu bamucimfya pantu alikwata amaka, kuti amwafwa+ nelyo kuti alenga bamucimfya.” 9 Lyena Amasia aebele umuntu wa kwa Lesa wa cine ati: “Calaba shani apo nalilipila abashilika abena Israele amatalanti 100? Umuntu wa kwa Lesa wa cine amwebele ati: “Yehova kuti akupeela indalama ishingi ukucila na pa sho walipile abashilika abena Israele.”+ 10 E ico Amasia aebele abashilika abafumine ku Efraimu ukuti babwelelemo ku mwabo. Lelo aba bashilika balifuliilwe abaYuda icine cine, kabili babweleelemo ku mwabo ninshi nabakalipa nga nshi.
11 Lyena Amasia alishipile, aile na bashilika bakwe ku Mupokapoka wa Mucele+ kabili aileipaya abaume abena Seiri 10,000.+ 12 Kabili abaume abaYuda baikete abaume 10,000 abena Seiri. Babatwele pa muulu wa cilibwe e lyo babapoosa panshi ica kuti balisansaike. 13 Lelo abashilika abo Amasia aebele ukubwelelamo,+ bafumine ku Samaria+ baya balesansa imisumba ya baYuda mpaka bayafika na ku Bete-horone.+ Baipeye abantu 3,000 kabili balipokolwele ifintu ifingi.
14 Nomba ilyo Amasia abwelele mu kusansa abena Edomu, aishile na tulesa twa bena Seiri+ kabili atendeke ukutupepa no kutufutumwina amalambo. 15 E ico Yehova alifuliilwe Amasia, kabili atumine kasesema uwailemweba ati: “Cinshi ulepepela tulesa utwafililwe ukupususha abantu ba tuko ilyo waile mu kubasansa?”+ 16 Ilyo kasesema alelanda ne mfumu, imfumu yamwebele ati: “Nani wa kusonta ukuba impanda mano ya mfumu?+ Ikala tondolo!+ Bushe ulefwaya bakwipaye?” Ilyo kasesema ashilaikala tondolo, aebele imfumu ati: “Ninjishiba ukuti Lesa alefwaya ukumulofya pantu ifyo mulecita nafibipa kabili tamukutike ku fyo ndemweba.”+
17 Pa numa ya kwipusha bampanda mano bakwe, Amasia imfumu ya Yuda atumine amashiwi kuli Yehoashi umwana wa kwa Yehoahasi umwishikulu wa kwa Yehu uwalipo imfumu ya Israele ati: “Isa tulwe inkondo.”*+ 18 Yehoashi imfumu ya Israele atumiine Amasia imfumu ya ku Yuda amashiwi ya kuti: “Icimenwa ca myunga ica mu Lebanone catumiine umukedari wa mu Lebanone amashiwi ya kuti, ‘Leka umwana obe umwanakashi abe umukashi wa mwana wandi umwaume.’ Lelo ilyo icinama ca mpanga ica mu Lebanone calepita canyantawile icimenwa ca myunga. 19 Iwe utila, Moneni! Nalicimfya* Edomu.+ E co wabela ne cilumba kabili e co ufwaila abantu balekucindika. Lelo uleikala fye mu ng’anda yobe.* Cinshi ulefwaila ukuiletelela, uletelele na baYuda?”
20 Lelo Amasia taumfwile+ pantu uwalengele cibe fi ni Lesa wa cine pa kuti alenge abalwani babo babacimfye,+ pantu balepepa tulesa twa ku Edomu.+ 21 E ico Yehoashi imfumu ya bena Israele ailelwa inkondo na Amasia imfumu ya baYuda. Bailelwila ku musumba wa Bete-shemeshe+ uwa mu Yuda. 22 Abena Israele balicimfishe abaYuda, ica kuti cila muntu afulumukiile ku mwakwe.* 23 Yehoashi imfumu ya Israele aikete Amasia imfumu ya baYuda, umwana wa kwa Yehoashi umwana wa kwa Yehoahasi,* ku Bet-shemeshe. Lyena amutwele ku Yerusalemu e lyo batula icipunda mu cibumba ca Yerusalemu, ukufuma pa Mpongolo ya kwa Efraimu+ ukufika pa Mpongolo ya pa kona,+ kabili cali imikono 400.* 24 Yehoashi asendele golde yonse na silfere yonse ne fipe fyonse ifyasangilwe mu ng’anda ya kwa Lesa wa cine ifyo Obedi-edomu alesunga. Alisendele ne fyali mu cipao ca ng’anda ya mfumu*+ kumo na bantu abo baikete. Lyena abwelele ku Samaria.
25 Ilyo Yehoashi+ umwana wa kwa Yehoahasi imfumu ya Israele afwile, Amasia+ umwana wa kwa Yehoahasi imfumu ya Yuda aikele imyaka 15.+ 26 Amalyashi yambi aya kwa Amasia, ukufuma pa kutendeka ukufika na lintu afwile, moneni! baliyalemba mwi Buuku lya Malyashi ya Mfumu sha mu Yuda ne sha mu Israele. 27 Ilyo Amasia alekele ukubombela Yehova, kwali abapangile ukumwipaya+ mu Yerusalemu. E ico afulumukile ku Lakishi, lelo balitumine abaume aba kumukonka ku Lakishi kabili kulya kwine e ko bamwipaile. 28 E ico bamusendeele pali bakabalwe pa kumubwesha kabili bamushiikile uko bashiikile ifikolwe fyakwe mu musumba wa mu Yuda.
26 Lyena abantu bonse aba mu Yuda babuulile Usia,+ ninshi ali ne myaka 16, bamubika pa bufumu pa kuti apyane Amasia wishi.+ 2 Ilyo imfumu* yafwile nge fyafwile ifikolwe fya iko,+ Usia alipokolwele umusumba wa Elote+ pa kuti ube wa mu Yuda na kabili e lyo aukuula cipya cipya. 3 Usia+ ali ne myaka 16 ilyo atendeke ukuteka, kabili atekele imyaka 52 mu Yerusalemu. Nyina ali ni Yekolia uwa mu Yerusalemu.+ 4 Alecita ifisuma mu menso ya kwa Yehova nga filya fine Amasia wishi alecita.+ 5 Kabili alitwalilile ukubombela Lesa inshiku shonse isho Sekaria uwalemusambilisha ukutiina Lesa wa cine ali no mweo. Ilyo alebombela Yehova, Lesa wa cine alimupaalile.+
6 Ilyo aile mu kulwa na baPelishiti+ alitobele icibumba ca Gati,+ icibumba ca Yabne+ ne cibumba ca Ashidode.+ Lyena akuulile imisumba mu citungu ca Ashidode na mu calo ca baPelishiti. 7 Lesa wa cine alemwafwa ukulwisha abaPelishiti, abena Arabia+ abaleikala mu Guri-baali na baMeunimu. 8 Abena Amone+ batendeke ukutuula umutuulo kuli Usia. Ululumbi lwakwe lwasukile lwafika na ku Egupti pantu alikwatishe amaka. 9 Usia akuulile ne mpungu+ mu Yerusalemu mupepi ne Mpongolo ya pa Koona,+ mupepi ne Mpongolo ya ku Mupokapoka+ na mupepi ne co bakuulile icaletungilila ilinga kabili alishikoseshe. 10 Na kabili akuulile impungu+ mu matololo kabili aimbile* ne fishima ifingi (pantu alikwete ifitekwa ifingi nga nshi); ifi fine e fyo acitile na mu Shefela na mu mpanga iyabatama. Alikwete abalimi na balesakamana imyangashi mu mpili na mu Karmele, pantu alitemenwe ubulimi.
11 Kabili Usia alikwete abashilika abaipangeshe ukulwa inkondo. Pa kuya mu kulwa inkondo balebakanya bwino bwino mu mabumba. Kalemba Yeiele+ na cilolo Maaseya e bapendele aba abashilika no kubalemba+ kabili Hanania umo pali bacilolo ba mfumu e waletungulula aba bashilika. 12 Intungulushi sha ndupwa ishaleangalila aba abashilika ba maka shali 2,600. 13 Ishi intungulushi shaleangalila abashilika 307,500 abaipangeshe ukulwa inkondo. Ili ibumba lya bashilika ba maka e lyaleafwa imfumu ukulwisha abalwani.+ 14 Usia alipekanishishe abashilika bonse inkwela, amafumo,+ ifisote, ifya kucinga icifuba,+ amata e lyo na mabwe ya mu fisukushilo.+ 15 Na kabili apangile ifyanso fya nkondo mu Yerusalemu ifyo abaishiba ifya kupangapanga baelengenye. Bafibikile pa mpungu+ na pa makoona ye linga kabili balefibomfya ukupooselako imifwi na mabwe ayakalamba. E ico ululumbi lwakwe lwafikile ukutali sana, pantu Lesa alimwafwile nga nshi kabili aishileba uwakosa.
16 Nomba ilyo akosele, aishileba ne cilumba ica kuti ali-iletelele. Alibembukile Yehova Lesa wakwe pantu aingile mwi tempele lya kwa Yehova pa kuti oce ububani pa ciipailo ca kocelapo ububani.+ 17 Ilyo line fye Asaria shimapepo na bashimapepo bambi 80 aba kwa Yehova abali abashipa balimukonkele. 18 Balileseshe imfumu Usia ukuti ileke ifyo yalecita, bayebele ati: “Te mulimo wenu mwe mfumu Usia ukocela Yehova ububani,+ mulimo wa bashimapepo pantu bena batuntuka muli Aarone,+ kabili balibasangulula. Fumeni mu ncende ya mushilo, pantu namubembuka kabili Yehova Lesa tamucindike pa fyo mucitile.”
19 Lelo Usia alikalipe nga nshi+ ninshi naikata ica kocelapo ububani pa kuti oce ububani. Kabili ilyo afuliilwe bashimapepo, ifibashi+ fyalimufulwime pa mpumi ninshi bashimapepo balemonako mu ng’anda ya kwa Yehova mupepi ne ciipailo ca kocelapo ububani. 20 Ilyo Asaria shimapepo mukalamba na bashimapepo bambi bamuloleshe, bamwene ukuti ifibashi nafimufuluma pa mpumi! E ico bwangu bwangu bamufumishe panse, kabili na o alyangufyenye ukufuma pantu Yehova alimukandile.
21 Imfumu Usia yali ne fibashi mpaka ubushiku yafwile. Ilyo yali ne fibashi yaleikala yeka mu ng’anda+ kabili tabaisuminishe ukwingila mu ng’anda ya kwa Yehova. Yotamu umwana waiko e waleangalila ing’anda ya mfumu,* alepingula ne milandu ya bantu ba mu calo.+
22 Kabili amalyashi yambi aya kwa Usia, ukufuma pa kutendeka ukufika na lintu afwile, baliyalemba kuli kasesema Esaya+ umwana wa kwa Amose. 23 Lyena Usia alifwile nge fyafwile ifikolwe fyakwe. Bamushiikile mupepi no ko bashiikile ifikolwe fyakwe mu ncende umo baleshiika imfumu, lelo tabamushiikile mu nshiishi ya mfumu, pantu batile: “Wa fibashi.” Lyena umwana wakwe Yotamu+ e wamupyene pa bufumu.
27 Yotamu+ ali ne myaka 25 ilyo atendeke ukuteka, kabili atekele imyaka 16 mu Yerusalemu. Nyina ali ni Yerusha umwana wa kwa Sadoke.+ 2 Alecita ifisuma mu menso ya kwa Yehova nga filya fine Usia wishi acitile.+ Nomba ena taingile mu muputule wa pe tempele lya kwa Yehova umo ashalingile ukwingila.+ Lelo abantu bena batwalilile fye ukucita ifyabipa. 3 Alipangile impongolo ya ng’anda ya kwa Yehova+ iyali apasansama, kabili alikuulile ifintu ifingi pa cibumba ca Ofele.+ 4 Akuulile ne misumba+ mu citungu ca mpili ica mu Yuda,+ kabili akuulile ne fifulo fya malinga+ ne mpungu+ mu mitengo. 5 Alwile inkondo ne mfumu ya bena Amone+ kabili asukile aicimfya. E ico muli ulya mwaka abena Amone bamupeele amatalanti* ya silfere 100, amadalamu* ya ngano 10,000 na madalamu ya barle 10,000. Ifi fine e fyo abena Amone bamupeele mu mwaka walenga bubili na mu walenga butatu.+ 6 E ico Yotamu alekoselako fye, pantu alipangile ukuti akulakonka mu nshila sha kwa Yehova Lesa wakwe.
7 Amalyashi yambi aya kwa Yotamu, inkondo isho alwile e lyo ne fyo acitile, balifilemba mwi Buuku lya Mfumu sha mu Israele ne sha mu Yuda.+ 8 Yotamu ali ne myaka 25 ilyo atendeke ukuteka, kabili atekele imyaka 16 mu Yerusalemu.+ 9 Lyena Yotamu alifwile nge fyafwile ifikolwe fyakwe, kabili bamushiikile uko bashiikile ifikolwe fyakwe mu Musumba wa kwa Davidi.+ Ahasi umwana wakwe e wamupyene pa bufumu.+
28 Ahasi+ ali ne myaka 20 ilyo atendeke ukuteka, kabili atekele imyaka 16 mu Yerusalemu. Ahasi alecita ifyabipa mu menso ya kwa Yehova. Taali nga Davidi icikolwe cakwe uwalecita ifisuma.+ 2 Alecita ifyabipa ifyo imfumu sha mu Israele shalecita.+ Alipangile ne fimpashanya fya baBaali ifya cela.*+ 3 Kabili alefutumwina amalambo mu Mupokapoka wa Mwana wa kwa Hinomu,* alyocele na bana bakwe mu mulilo.+ Ifi ifya bunani acitile e fyo ne nko isho Yehova atamfiisheko abena Israele shalecita.+ 4 Aletuula na malambo no kuyafutumwina pa fifulo fya kupepelapo+ pa tupili na mwi samba lya fimuti fyonse ifyafumba.+
5 E ico Yehova Lesa wakwe alilengele imfumu ya Siria yamucimfya,+ yasenda na bankole abengi ku Damaseke.+ Alilengele ne mfumu ya bena Israele yamucimfya kabili yalipeye abantu abengi nga nshi. 6 Pantu Peka+ umwana wa kwa Remalia aipeye abaYuda 120,000 mu bushiku bumo, pantu balishile Yehova Lesa wa fikolwe fyabo.+ Bonse abo aipeye bali baume abashipa. 7 Kabili Sikri umushilika wa maka umwina Efraimu, aipeye Maaseya umwana wa mfumu na Asrikamu uwaleangalila isano* e lyo na Elkana uwali inkonkani ya mfumu. 8 Kabili abena Israele basendele bamunyinabo 200,000 mu kuba bankole. Pa bo basendele pali abanakashi, abana abaume, na bana abanakashi. Balipokolwele ne fipe ifingi e lyo bafitwala ku Samaria.+
9 Lelo Odedi kasesema wa kwa Yehova e ko ali ilyo ifi fyalecitika. E ico aile mu kukumana na bashilika abaleisa ku Samaria kabili abebele ati: “Moneni! Ico mwacimfisha abaYuda nico Yehova Lesa wa fikolwe fyenu alibafuliilwe,+ kabili mwali no bukali ilyo mwalebepaya ica kuti Lesa alimwene ifyo mwakalipe. 10 Kabili nomba mulefwaya abaYuda na bena Yerusalemu babe ababomfi benu abaume na babomfi benu abanakashi.+ Bushe na imwe tamwaba no mulandu kuli Yehova Lesa wenu? 11 E ico nomba umfweni ifyo nalalanda. Bweseshenimo bamunyinenwe abo mwasendele pa kuti babe bankole, pantu ubukali bwa kwa Yehova ububilima ngo mulilo buleisa pali imwe.”
12 E ico abaume bamo pa ntungulushi sha bena Efraimu, e kutila Asaria umwana wa kwa Yehohanani, Berekia umwana wa kwa Meshileemote, Yehiskia umwana wa kwa Shalumu na Amasa umwana wa kwa Hadlai, baimiine abashilika abalefuma ku nkondo, 13 kabili babebele abati: “Mwileta bankole kuno, pantu twalaba no mulandu kuli Yehova. Ifyo mulefwaya ukucita fyalalenga tubembuke na kabili, tubeeleko no mulandu pantu umulandu twakwata kale uukalamba kabili Lesa alifulilwa nga nshi abena Israele.” 14 E ico abashilika abali ne fyanso bapeele bacilolo no lukuta lonse bankole ne fipe ifyo bapokele.+ 15 Lyena abaume abo basalile basendele bankole kabili bapeele abasapwile ifya kufwala ifyo bafumishe pa fyo abashilika bapokele. E ico balibapeele ifya kufwala, indyato, ifya kulya, ifya kunwa e lyo na mafuta ya kusuba pa nkanda. Lyena babikile abanakile sana pa mpunda e lyo batwala bankole bonse kuli bamunyinabo ku Yeriko, umusumba wa tuncindu. Pa numa balibweleelemo ku Samaria.
16 Pali ilya nshita Imfumu Ahasi yalombele imfumu sha ku Asiria ukuti bayafwe.+ 17 Abena Edomu nabo balishilesansa abaYuda, basenda na bankole. 18 AbaPelishiti+ nabo balisanshile abantu abaleikala mu misumba ya Shefela+ na Negebu mu Yuda, kabili balipokele Bete-shemeshe,+ Ayalone,+ Gederote, Soko ne misumba ya iko iinono, Timuna+ ne misumba ya iko iinono na Gimso ne misumba ya iko iinono; kabili e mo batendeke ukwikala. 19 Yehova alilengele abaYuda baicefya pantu Ahasi imfumu ya bena Israele alilekele abaYuda balacita sana ifyabipa, ica kuti balibembukile Yehova kabili balilekele ukuba aba cishinka kuli ena.
20 Tilgati-pilnesere+ imfumu ya ku Asiria asukile aisa mu kulwisha Ahasi kabili alimucushishe,+ mu cifulo ca kumukoselesha. 21 Pantu Ahasi abuulile ifipe fyonse ifya mu ng’anda ya kwa Yehova, ifya mu ng’anda ya mfumu*+ ne ya bacilolo kabili apeele imfumu ya ku Asiria, lelo ifi acitile tafyamwafwile. 22 Pa nshita Imfumu Ahasi yalecula, e lyo yacililemo ukubembukila Yehova. 23 Ahasi atendeke ukutuulila balesa ba ku Damaseke+ amalambo abamucimfishe,+ kabili alandile ati: “Apo balesa ba bena Siria balebafwa, e bo nakulatuulila amalambo, pa kuti na ine balengafwa.”+ Lelo aba balesa balengele ena na bena Israele bailetelela. 24 Kabili Ahasi alonganike ifipe fya mu ng’anda ya kwa Lesa wa cine+ e lyo afyonaula. Aisele ne fiibi fya ng’anda ya kwa Yehova,+ kabili apangile ne fiipailo pa makoona yonse aya misebo ya mu Yerusalemu. 25 Kabili mu misumba yonse iya mu Yuda apangiilemo ififulo fya kupepelapo ifya kufutumwinapo amalambo kuli tulesa,+ kabili alikalifye Yehova Lesa wa fikolwe fyakwe.
26 Amalyashi yambi aya kwa Ahasi ne fyo acitile, ukufuma pa kutendeka ukufika na lintu afwile, baliyalemba mwi Buuku lya Mfumu sha mu Yuda ne sha mu Israele.+ 27 Ahasi alifwile nga filya fine ifikolwe fyakwe fyafwile. Bamushiikile mu musumba mu Yerusalemu, lelo tabamushiikile mu nshiishi sha mfumu sha mu Israele.+ Lyena Hisekia umwana wakwe e wamupyene pa bufumu.
29 Hisekia+ atendeke ukuteka ilyo ali ne myaka 25, kabili atekele imyaka 29 mu Yerusalemu. Nyina ali ni Abiya umwana wa kwa Sekaria.+ 2 Hisekia alecita ifisuma mu menso ya kwa Yehova+ nga filya fine Davidi icikolwe cakwe acitile.+ 3 Mu mwaka atendeke ukuteka mu mweshi wa kubalilapo, aiswile ifiibi fya ng’anda ya kwa Yehova kabili alifiwemye.+ 4 Lyena aitile bashimapepo na bena Lebi kabili baishilelongana mu lubansa lwa ku kabanga. 5 Abebele ati: “Umfweni ifyo nalalanda mwe bena Lebi. Nomba isangululeni,+ musangulule ne ng’anda ya kwa Yehova Lesa wa fikolwe fyenu, mufumye ne fyakowela mu ncende ya mushilo.+ 6 Pantu bashifwe balibembwike kabili balecita ifyabipa mu menso ya kwa Yehova Lesa wesu.+ Balimushile kabili tabacindike itenti lya mushilo ilya kwa Yehova kabili balimukeene.+ 7 Baisele ne fiibi fya mu muputule wa kwingililapo,+ bashimya ne nyali.+ Balilekele ukoca ububani,+ kabili tabaletuulila Lesa wa bena Israele amalambo ya koca+ pa cifulo ca mushilo. 8 E ico Yehova afuliilwe nga nshi abaYuda na bena Yerusalemu,+ kabili abalengele baba ica kutiinya, ica kupapa kabili ica kulishishapo umunsoli,* nge fyo muleimwena.+ 9 Ici e calengele ifikolwe fyesu bafipaye ku lupanga,+ basende na bana besu abaume na bana besu abanakashi na bakashi besu mu kuyaba bankole.+ 10 Nomba ndefwaisha ukupangana na Yehova Lesa wa bena Israele icipangano,+ pa kuti aleke ukutufulilwa. 11 Mwe bana bandi, ino te nshita ya kuba no mulekelesha,* pantu Yehova namusala pa kuti muleiminina pa cinso cakwe, mulemubombela+ kabili mulemufutumwina amalambo.”+
12 E ico abena Lebi balimine batendeka ukubomba. Abatuntwike mu bena Kohati+ bali ni Mahati umwana wa kwa Amasai na Yoele umwana wa kwa Asaria; abatuntwike mu bena Merari+ bali ni Kishi umwana wa kwa Abdi na Asaria umwana wa kwa Yehalele; abatuntwike mu bena Gershone+ bali ni Yoashi umwana wa kwa Sima na Edene umwana wa kwa Yoa; 13 abatuntwike mu bana ba kwa Elisafani bali ni Shimri na Yeuele; abatuntwike mu bana ba kwa Asafi+ bali ni Sekaria na Matania; 14 abatuntwike mu bana kwa Hemani+ bali ni Yehiele na Shimei; lyena abatuntwike mu bana ba kwa Yedutuni+ bali ni Shemaya na Usiele. 15 Lyena balonganike bamunyinabo kabili bali-isangulwile pa kuti batendeke ukusangulula ing’anda ya kwa Yehova nga fintu imfumu yabebele.+ Ifi bacitile e fyo amafunde ya kwa Yehova yalandile. 16 Bashimapepo baingile mu ng’anda ya kwa Yehova pa kuti baiwamye. Balifumishe fyonse ifyo balebomfya pa kupepa tulesa ifyo basangile mwi tempele lya kwa Yehova, kabili bafitwele mu lubansa+ lwa ng’anda ya kwa Yehova. Lyena abena Lebi balifibuulile bafitwala kunse ya musumba ku Mupokapoka wa Kidrone.+ 17 E ico pa bushiku bwa kubalilapo ubwa mweshi wa kubalilapo, balitendeke ukusangulula itempele kabili pa bushiku bwalenga 8 ubwa uyu mweshi bafikile mu muputule wa kwingililapo uwa ng’anda ya kwa Yehova.+ E ico basangulwile ing’anda ya kwa Yehova pa nshiku 8, kabili pa bushiku bwalenga 16 ubwa mweshi wa kubalilapo balipwishishe.
18 Ilyo bapwishishe ukuwamya, baile ku Mfumu Hisekia kabili bayebele abati: “Natusangulula ing’anda yonse iya kwa Yehova. Natusangulula iciipailo ca mituulo ya koca+ ne fipe fya ciko fyonse,+ ne tebulo apakubika umukate wa kutuula+ ne fipe fya liko fyonse. 19 Natupekanya kabili natusangulula+ ifipe fyonse ifyo Imfumu Ahasi yafumishe mwi tempele ilyo ishali iya cishinka kuli Lesa,+ natufibika pa ntanshi ya ciipailo ca kwa Yehova.”
20 Imfumu Hisekia yaimine lucelocelo, yalonganika bacilolo ba mu musumba e lyo baya ku ng’anda ya kwa Yehova. 21 Baletele ing’ombe ishilume 7, impaanga ishana ishilume 7, impaanga ishilume 7, ne mbushi ishilume 7 pa kuti shibe umutuulo wa pa lubembu uwa bufumu, umutuulo wa pa cifulo ca mushilo no mutuulo wa baYuda.+ E ico Hisekia aebele bashimapepo abatuntwike muli Aarone ukuti batuule ishi inama pa ciipailo ca kwa Yehova. 22 Lyena baipeye ing’ombe+ kabili bashimapepo babulile umulopa wa shiko bausansa pa ciipailo;+ kabili baipeye impaanga ishilume basansa no mulopa wa shiko pa ciipailo, baipeye ne mpaanga ishana ishilume e lyo basansa umulopa wa shiko pa ciipailo. 23 Lyena bapalamike imbushi ishilume isha mutuulo wa pa lubembu ku mfumu na ku lukuta lonse kabili babikile iminwe pali shena. 24 Bashimapepo baipeye ishi imbushi no kushituula umutuulo wa pa lubembu, babikile no mulopa wa shiko pa ciipailo pa kuti bafutileko abena Israele bonse umulandu, pantu imfumu yatile umutuulo wa koca no mutuulo wa pa lubembu ufwile ukuba wa bena Israele bonse.
25 Pali ilya nshita Hisekia abikile abena Lebi pa ng’anda ya kwa Yehova. Bali na malimba ne filimba fya nsale ne nsango,+ kabili baleimba inyimbo ukulingana ne fyo Davidi,+ Gadi+ uwalemwena imfumu ifimonwa na Natani+ kasesema balandile, pantu ifyo balandile fyafumine kuli Yehova ukupitila muli bakasesema bakwe. 26 E ico abena Lebi baiminine ne filimba fya kwa Davidi, e lyo bashimapepo bena bali na mapenga.+
27 Lyena Hisekia alandile ukuti batuule ilambo lya koca pa ciipailo.+ Ilyo batendeke ukutuula ilambo, batampile ukwimbila Yehova ninshi balelisha amapenga ne filimba fya mfumu Davidi iya bena Israele. 28 Ilyo baleimba ulwimbo no kulisha amapenga, ulukuta lonse lwalikonteme mpaka bapwisha ukutuula umutuulo wa koca. 29 Ilyo bapwishishe fye ukutuula umutuulo, imfumu na bantu bonse abo yali nabo balikonteme pa kuti bapepe Lesa. 30 Lyena Imfumu Hisekia na bacilolo baebele abena Lebi ukuti bembe inyimbo sha kulumbanya Yehova isho Davidi+ na Asafi+ uwalemona ifimonwa bashikile. E ico batendeke ukulumbanya Lesa ninshi balesekelela nga nshi, lyena balikonteme bafisha ne mpumi panshi.
31 Lyena Hisekia alandile ati: “Apo nomba bamupaatulako pa kuti mulebombela Yehova, leteni amalambo ne mituulo ya kutootela ku ng’anda ya kwa Yehova.” E ico ulukuta lonse lwatendeke ukuleta amalambo ne mituulo ya kutootela, kabili bonse abaitemenwe baletele imituulo ya koca.+ 32 Imituulo yonse iya koca iyo ulukuta lwaleteele Yehova+ yali ing’ombe 70, impaanga ishilume 100, ne impaanga ishana ishilume 200, 33 kabili imituulo ya mushilo yali ing’ombe 600 ne mpaanga 3,000. 34 Lelo bashimapepo balicepele aba kuti bafunde inama shonse isha mituulo ya koca. E ico bamunyinabo abena Lebi balibafwile+ mpaka umulimo wapwa kabili mpaka bashimapepo baisangulula,+ pantu abena Lebi balibikile sana amano* ku kuisangulula ukucila bashimapepo. 35 Kabili kwali ne mituulo ya koca iingi+ na mafuta ya pa malambo ya mutende,+ ne mituulo ya mwangashi iya kutuulila pamo ne mituulo ya koca.+ E fyo batendeke ukubomba umulimo wa pa ng’anda ya kwa Yehova na kabili. 36 E ico Hisekia na bantu bonse balisekelele pa fyo Lesa wa cine acitiile abantu,+ pantu ifi fyonse Lesa aficitile bwangu bwangu.
30 Hisekia atumine amashiwi ku bena Israele bonse+ na ku baYuda, kabili alembeele abena Efraimu na bena Manase+ amakalata, aya kuti bese ku ng’anda ya kwa Yehova mu Yerusalemu mu kwibukisha Icakucilila ca kwa Yehova Lesa wa bena Israele.+ 2 Lelo imfumu, bacilolo ba iko no lukuta lonse mu Yerusalemu baumfwene ukuti bakakwate Icakucilila mu mweshi walenga bubili,+ 3 pantu tabakwete Icakucilila pa nshita balingile ukucikwatilapo,+ pa mulandu wa kuti takwali bashimapepo abengi abaisangulwile+ kabili abantu tabaishile ku Yerusalemu. 4 Imfumu no lukuta lonse balitemenwe ifi bapekenye ukukwata Icakucilila. 5 E ico baumfwene ukuti babile imbila mu Israele monse, ukufuma ku Beere-sheba ukufika ku Dani,+ iya kuti abantu bese mu kwibukisha Icakucilila ica kwa Yehova Lesa wa bena Israele mu Yerusalemu, pantu abantu tabalesefesha pamo Icakucilila nge fyo amafunde yalandile.+
6 Lyena ukulingana ne fyo imfumu yabebele abo imfumu na ba bacilolo bapeele amakalata baile mu Israele monse na mu Yuda, bale-eba abantu abati: “Mwe bena Israele, bweleleni kuli Yehova Lesa wa kwa Abrahamu, Isaki na Israele, pa kuti na o abwelele ku bashalapo abapuswike ilyo imfumu sha bena Asiria shamusanshile.+ 7 Mwiba nge fikolwe fyenu kabili nga bamunyinenwe ababembukile Yehova Lesa wa fikolwe fyabo, ica kuti abalengele baba ica kutiinya, nge fyo mulemona.+ 8 Nomba mwiba bacintomfwa nge fyo ifikolwe fyenu fyali.+ Nakileni Yehova kabili mwise mu cifulo cakwe ica mushilo+ umo asangulula umuyayaya, mulebombela Yehova Lesa wenu pa kuti afumye ubukali ububilima ngo mulilo pali imwe.+ 9 Pantu nga mwabwelela kuli Yehova, bamunyinenwe na bana benu bakababelela uluse ku babasenda mu kuyaba bankole,+ kabili bakabasuminisha ukubwelela kuli cino calo,+ pantu Yehova Lesa wenu alalangulukilako,* wa luse+ kabili takamushe nga mwabwelela kuli ena.”+
10 E ico abo batumine ukutwala amakalata, baile mu misumba yonse iya mu citungu ca kwa Efraimu ne ca kwa Manase,+ kabili bailefika na ku citungu ca kwa Sebuluni, lelo abantu balebatumfya kabili balebaseka.+ 11 Lelo abantu bamo aba mu mukowa wa kwa Ashere, no wa kwa Manase no wa kwa Sebuluni bali-icefeshe kabili baishile ku Yerusalemu.+ 12 Lesa wa cine alipaalile abaYuda kabili alengele baba no mutima umo uwa kumfwila ifyo imfumu na bacilolo babebele, ifyakumine ukupepa Yehova.
13 Abantu abengi nga nshi balilongene mu Yerusalemu pa kuti bakwate Umutebeto wa Mukate Uushatutumuka+ mu mweshi walenga bubili,+ abalongene bali abengi nga nshi. 14 Balimine bafumya ifiipailo fya tulesa mu Yerusalemu,+ kabili balifumishemo ne fiipailo fyonse ifyo balefutumwipo ifyanunkila,+ bafipoosa na mu mupokapoka wa Kidrone. 15 Lyena balipeye inama she lambo lya Cakucilila pa bushiku bwalenga 14 ubwa mweshi walenga bubili. Bashimapepo na bena Lebi balyumfwile nsoni, e ico bali-isangulwile kabili baletele imituulo ya koca ku ng’anda ya kwa Yehova. 16 Baiminine pa fifulo apo baleiminina ukulingana ne fyo amafunde ya kwa Mose umuntu wa kwa Lesa wa cine yalandile; lyena bashimapepo basanshile umulopa+ pa ciipailo uo abena Lebi babapeele. 17 Pa balongene pali abantu abengi abashaisangulwile kabili abena Lebi e baleipaya inama she lambo lya Cakucilila isha bantu abashaisangulwile,+ pa kuti babasangulule pa cinso ca kwa Yehova. 18 Pantu kwali abantu abengi nga nshi abashaisangulwile, maka maka abena Efraimu, abena Manase,+ abena Isakari na bena Sebuluni, na lyo line baliile Icakucilila nangu ca kuti te fyo amafunde yalandile. Lelo Hisekia alibapepeleko, atile: “Apo mwe Yehova muli basuma,+ beleleni uluse 19 onse uupangile mu mutima wakwe ukuti akulabombela Lesa wa cine,+ Yehova Lesa wa fikolwe fyakwe, nangu ca kuti taisangulwile ukulingana ne fyo alingile ukuisangulula pa kuti asefyeko ukusefya kwa mushilo.”+ 20 Yehova alyumfwile ipepo Hisekia apepele kabili alibelele abantu uluse.*
21 E ico abena Israele abali mu Yerusalemu balikwete Umutebeto wa Mukate Uushatutumuka+ pa nshiku 7 ninshi balesekelela nga nshi,+ kabili abena Lebi na bashimapepo balelumbanya Yehova cila bushiku. Balelisha sana ifilimba fyabo pa kulumbanya Yehova.+ 22 Hisekia alilandile na bena Lebi bonse abali aba mano ilyo balebombela Yehova. Alibakoseleshe, kabili balilile ifya kulya pa mutebeto pa nshiku shonse 7.+ Baletuula amalambo ya mutende+ kabili baletasha Yehova Lesa wa fikolwe fyabo.
23 Lyena ulukuta lonse lwaumfwene ukuti bakwate umutebeto pa nshiku na shimbi 7, e ico balikwete uyu mutebeto pa nshiku na shimbi 7 kabili balesekelela.+ 24 Hisekia imfumu ya mu Yuda yapeele ulukuta ing’ombe ishilume 1,000 ne mpaanga 7,000, bacilolo na bo bapeele ulukuta ing’ombe ishilume 1,000 ne impaanga 10,000,+ kabili bashimapepo abengi nga nshi baleisangulula.+ 25 Kabili ulukuta lonse ulwa mu Yuda, bashimapepo, abena Lebi, no lukuta lonse ulwafumine mu Israele+ e lyo na balebeshi+ abafumine mu Israele na baleikala mu Yuda balitwalilile ukusekelela. 26 Abantu mu Yerusalemu balisekelele nga nshi, pantu ukutula ilyo imfumu Solomone umwana wa kwa Davidi aleteka abena Israele tabatalile abakwatapo umutebeto ngo yu mu Yerusalemu.+ 27 Na mukulekelesha bashimapepo abena Lebi baliimine balapaala abantu,+ kabili Lesa alyumfwile ishiwi lyabo, ne pepo lyabo lyalifikile ku cifulo cakwe ica mushilo uko ekala ku muulu.
31 Ilyo fye umutebeto wapwile, abena Israele bonse abaliko baile mu misumba ya mu Yuda. Bailetobaula ifimabwe fya kupepelapo ifyo baimike,+ baputawile ne fimuti fya kupepelapo ifyo baimike*+ kabili babongolwele ififulo fya kupepelapo+ ne fiipailo+ mu Yuda monse na mu citungu ca kwa Benjamini e lyo na mu citungu ca kwa Efraimu ne ca kwa Manase+ mpaka bafyonaula fyonse. Lyena abena Israele bonse babweleele ku misumba yabo, cila muntu ku cifulo cakwe.
2 Lyena Hisekia abikile bashimapepo na bena Lebi mu mabumba yabo,+ pa kuti balebomba imilimo iyo babapeele.+ Baletuula imituulo ya koca na malambo ya mutende kabili balebombela Lesa. Balemutasha no kumulumbanya mu mpongolo sha mu mansa sha kwa Yehova.+ 3 Ifintu fimo ifya mfumu balifipeele pa kuti fibe umutuulo wa koca.+ Balefibomfya pa kutuula umutuulo wa koca uwa lucelo ne cungulo.+ Balefituula umutuulo wa koca pa Masabata+ na pa kutampa kwa myeshi+ e lyo na pa mitebeto,+ ukulingana ne fyo amafunde ya kwa Yehova yalandile.
4 Kabili aebele abaleikala mu Yerusalemu ukuti bapeele bashimapepo na bena Lebi+ ifyo balingile ukulabapeela, pa kuti balekonka sana amafunde ya kwa Yehova. 5 Ilyo fye abena Israele baumfwile ifyo imfumu yabebele, baletele ingano ishabalilepo ukupya ishingi nga nshi. Baletele no mwangashi uupya, amafuta+ no buci na fyonse ifyo balimine+ kabili baletele ifya pe kumi ifingi ifya pali fyonse.+ 6 Kabili abena Israele na baYuda abaleikala mu misumba ya mu Yuda, nabo baletele ica pe kumi ca ng’ombe, ica mpaanga e lyo ne ca pe kumi ca pa mituulo ya mushilo+ iyo bapaatwilileko Yehova Lesa wabo. Imituulo baletele yali iingi nga nshi. 7 Mu mweshi walenga butatu+ batendeke ukubika pa cifulo cimo imituulo iyo abantu baletele, kabili bapwishishe mu mweshi walenga 7.+ 8 Ilyo Hisekia na bacilolo baishilemona ifyo imituulo yafulile, balilumbenye Yehova kabili balipaalile abantu bakwe abena Israele.
9 Hisekia aipwishe bashimapepo na bena Lebi icalengele imituulo ifule. 10 Asaria shimapepo mukalamba uwa mu ng’anda ya kwa Sadoke amwaswike ati: “Ukutula apo abantu batendekela ukuleta imituulo mu ng’anda ya kwa Yehova,+ balalya no kwikuta lelo imituulo iishalapo ingi, pantu Yehova umwine alipaala abantu bakwe, kabili ifintu ifingi nga nshi e fishelepo.”+
11 E ico Hisekia abebele ukuti bapekanye imiputule ya kusungilamo imituulo*+ mu ng’anda ya kwa Yehova, nabo balipekenye. 12 Batwalilile ukuleta ne mitima yabo yonse imituulo, ifya pe kumi+ e lyo ne fya mushilo; Konania umwina Lebi e walelolekesha pa mituulo iyo baleleta, kabili Shimei munyina e wali inkonkani yakwe. 13 Yehiele, Asasia, Nahati, Asaele, Yerimote, Yosabadi, Eliele, Isimakia, Mahati na Benaya e baleafwilisha Konania na Shimei munyina ukulingana ne fyo Imfumu Hisekia yalandile. Kabili Asaria e waleangalila ing’anda ya kwa Lesa wa cine. 14 Kabili Kore umwana wa kwa Imna umwina Lebi uwalelinda impongolo ya ku kabanga,+ e o baebele ukulalolekesha pa mituulo ya kuitemenwa+ iyo abantu baletuulila Lesa wa cine kabili ayakenye bashimapepo iyi imituulo ya kwa Yehova+ e lyo ne fya mushilo sana.+ 15 Kabili aleangalila Edene, Minyamini, Yeshua, Shemaya, Amaria na Shekania, abalebomba imilimo babapeele mu misumba ya bashimapepo+ pantu bali aba cishinka. Balebomba umulimo wa kwakanya bamunyinabo mu mabumba+ imituulo iyo abantu baletuula. Balebapeela fimo fine nampo nga mwaice nelyo mukalamba. 16 Baleakanyako imituulo na baume abo balembele ukulingana ne ntuntuko shabo, ukufuma pa wa myaka itatu ukuya pa muulu, abaleisa mu mabumba yabo mu kubomba pa ng’anda ya kwa Yehova imilimo babapeele.
17 Bashimapepo babalembele ukulingana ne ntuntuko sha mayanda ya bashibo,+ nga filya fine balembele abena Lebi, ukufuma pa wa myaka 20 ukuya pa muulu.+ Babalembele ukulingana ne milimo balebomba mu mabumba balimo.+ 18 Mu ntuntuko shabo isho balembele, balilembelemo na bana babo abanono, abakashi babo, abana babo abaume na bana babo abanakashi. Balembele abena Lebi bonse ne ndupwa shabo pantu balitwalilile ukuba abasanguluka pa mulandu wa kuti balebomba umulimo wa mushilo kabili bali aba cishinka. 19 Balilembele na bashimapepo abatuntwike muli Aarone, abaleikala mu fifulo fya mulemfwe ifyali mupepi ne misumba yabo.+ Mu misumba yonse balisalilemo abaume bamo kabili babapeele umulimo wa kwakanya bashimapepo imituulo na bonse abo balembele mu ntuntuko sha bena Lebi.
20 Ifi e fyo Hisekia acitile mu Yuda monse, kabili atwalilile ukucita ifisuma kabili ifyalungama mu menso ya kwa Yehova Lesa wakwe, kabili ali uwa cishinka kuli ena. 21 Fyonse ifyo acitile pa kuti alebombela Lesa wakwe, nampo nga milimo iyo abombele pa ng’anda ya kwa Lesa wa cine+ nelyo imilimo imbi iyakumine amafunde na fimbi ifyo abebele ukukonka, abombele no mutima wakwe onse, kabili Lesa alimupaalile.
32 Ilyo Hisekia abombele iyi milimo yonse ne cishinka,+ Imfumu Sankeribu iya ku Asiria yaishile mu kusansa Yuda. Yashingile ne misumba yonse iya malinga pantu yalefwaisha ukubongolola ifibumba pa kuti ipoke iyi misumba.+
2 Ilyo Hisekia aishibe ukuti Sankeribu alishile kabili alefwaisha ukulwa inkondo na bena Yerusalemu, 3 kabili pa numa ya kwipushako bacilolo na bashilika bakwe, Hisekia asalilepo ukuti bacilike utumfukumfuku twa menshi utwali kunse ya musumba,+ e ico nabo balisumiine ukuti bacilike. 4 Abantu abengi balilongene kabili babombeele pamo ukucilika utumfukumfuku tonse no mulonga uwapitile mu calo, balelanda abati: “Tatulefwaya imfumu sha bena Asiria shikasange amenshi ayengi nga shaisa.”
5 Na kabili alibombeshe pa kuti akuule icibumba umo cabongolweke, akuulapo ne mpungu. Kabili kunse ya ici cibumba akuulileko icibumba na cimbi. Awemye na Milo*+ ya Musumba wa kwa Davidi umo yaonaike kabili alipangile ifyanso ifingi ne nkwela. 6 Lyena asontele abakalamba ba bashilika aba kuti baleangalila abantu kabili abebele ukuti balongane mu lubansa lwa pa mpongolo ya musumba, e lyo abakoselesha ati: 7 “Shipeni kabili koseni. Mwitiina imfumu ya ku Asiria+ na bantu abengi abo ili nabo pantu abali ku lubali lwesu bengi ukucila abo ili nabo.+ 8 Yena ili na maka ya buntunse, lelo ifwe tuli na Yehova Lesa wesu uwalatwafwa kabili uwalatulwila inkondo.”+ Ifi Hisekia imfumu ya Yuda alandile fyalikoseleshe abantu.+
9 Ilyo Sankeribu imfumu ya ku Asiria ali mu Lakishi+ pamo na bashilika bakwe aba maka, atumine ababomfi bakwe ku Yerusalemu kuli Hisekia imfumu ya baYuda, na ku baYuda bonse abali mu Yerusalemu.+ Abatumine ukuyabeba ati:
10 “Sankeribu imfumu ya bena Asiria yalanda aiti, ‘Nani mucetekele pa kuti mutwalilile ukwikala mu Yerusalemu e lyo ninshi natushinga uyu musumba?+ 11 Bushe Hisekia talemubepa fye pa kuti mufwe ku cipowe na ku cilaka ifi alemweba ati: “Yehova Lesa wesu ali no kutupokolola ku mfumu ya ku Asiria”?+ 12 Bushe te uyu wine Hisekia uwabongolwele ififulo fya kupepelapo ifya kwa Lesa wenu+ ne fiipailo fyakwe+ e lyo aeba abaYuda na bena Yerusalemu ati: “Mulekontamina fye pa ciipailo cimo kabili e po mulefutumwina amalambo”?+ 13 Bushe tamwaishiba ifyo ine ne fikolwe fyandi twacitile abantu bonse aba mu fyalo?+ Bushe balesa ba aba bantu balipokolwele ifyalo fyabo ilyo nafisanshile?+ 14 Ni lesa nshi pali balesa ba aba bantu abo ifikolwe fyandi fyasanshile uwali na maka ya kupususha abantu bakwe kuli ine, ica kuti imwe muletetekela Lesa wenu ukuti akamupususha ilyo nkamusansa?+ 15 Nomba mwileka Hisekia amubepe nelyo amubeleleke,+ mwimucetekela, pantu takwaba lesa nangu umo uwa nko nelyo uwa bufumu uwapusushapo abantu bakwe kuli ine na ku fikolwe fyandi. Kanshi na Lesa wenu takamupusushe ilyo nkamusansa!’”+
16 Ababomfi ba kwa Sankeribu batwalilile ukusaalula Yehova Lesa wa cine e lyo na Hisekia umubomfi wakwe. 17 Sankeribu alembele na makalata+ ya kusaalula Yehova Lesa wa bena Israele+ na ya kulanda ifyabipa pali ena, alembele ati: “Nga filya fine balesa ba bantu ba mu fyalo fimbi bashingapokolola abantu babo kuli ine,+ e fyo na Lesa wa kwa Hisekia ashakapokolole abantu bakwe ilyo nkabasansa.” 18 Kabili balebilikisha abena Yerusalemu abali pa cibumba mu lulimi lwa baYuda pa kuti babatiinye kabili babasakamike pa kuti bapoke umusumba.+ 19 Balesaalula Lesa wa mu Yerusalemu nga filya fine balesaalula tulesa twa bantu ba pano isonde uto abantu baapanga. 20 Lelo Imfumu Hisekia na kasesema Esaya+ umwana wa kwa Amose batwalilile fye ukupepa no kupaapaata Lesa ku muulu ukuti abafwe.+
21 Lyena Yehova atumine malaika uwaishileipaya abashilika bonse aba maka,+ intungulushi na bakalamba ba bashilika abali mu nkambi ya mfumu ya bena Asiria, ica kuti imfumu ya ku Asiria yabwelelemo ku calo ca iko ninshi naiseebana. Pa numa yaingile mu ng’anda* ya kwa lesa wa iko. Ilyo yali mulya abana ba iko bamo baishileyipaya ku lupanga.+ 22 E fyo Yehova apuswishe Hisekia na baleikala mu Yerusalemu ku Mfumu Sankeribu iya ku Asiria e lyo na ku balwani babo bonse kabili alengele batuusha ku balwani babo bonse. 23 Kabili abantu abengi baleteele Yehova ubupe ku Yerusalemu kabili bapeele Hisekia imfumu ya Yuda+ ifintu ifisuma nga nshi, pa numa abantu ba mu fyalo fyonse balimucindike sana.
24 Muli shilya nshiku, Hisekia alilwele ica kuti ali fye mu kufwa kabili alipepele kuli Yehova+ na o alimwaswike, e lyo amupeela icishibilo.+ 25 Lelo Hisekia tacitile ifyalangile ukuti alitashishe pa fisuma ifyo bamucitiile pantu aishileba ne cilumba, kabili ubukali bwa kwa Lesa bwaishile pali ena na pa baYuda na pa baleikala mu Yerusalemu. 26 Pa numa Hisekia ali-icefeshe kabili alilekele ukuba ne cilumba.+ Abena Yerusalemu nabo bali-icefeshe, kabili ubukali bwa kwa Yehova tabwaishile pali bena ilyo Hisekia ali no mweo.+
27 Hisekia aishilekwata ifyuma ifingi nga nshi kabili alicindeme.+ Akuulile na matala+ ya kusungilamo silfere, golde, amabwe yakosa umutengo, amafuta ya balsamu, inkwela e lyo ne fintu fimbi ifisuma. 28 Akuulile na matala ya ngano, na ya mwangashi uupya na ya mafuta, kabili apangile amatanga ya nama shalekanalekana na macinka ya mpaanga. 29 Hisekia ali-ikuulile ne misumba, alikwete ne fitekwa ifingi. Akwete impaanga, imbushi ne ng’ombe, pantu Lesa alilengele akwata ifintu ifingi. 30 Hisekia e wacilike intulo ya menshi+ ya ku Gihone+ kabili ayalwilile ku masamba ya Musumba wa kwa Davidi.+ Fyonse ifyo Hisekia alecita fyale-enda bwino. 31 Lelo ilyo abo batumine kuli bacilolo ba ku Babiloni baishile kuli Hisekia pa kuti bamwipushe pa cishibilo+ icacitike mu calo,+ Lesa wa cine alimulekele acita ifyo alefwaya pa kuti amweshe,+ amone fyonse ifyali mu mutima wakwe.+
32 Amalyashi yambi aya kwa Hisekia ne fyo alangile ukutemwa ukushipwa,+ balifilemba umo balemba icimonwa ca kwa kasesema Esaya+ umwana wa kwa Amose, mwi Buuku lya Mfumu sha baYuda ne sha bena Israele.+ 33 Lyena Hisekia alifwile nge fyafwile ifikolwe fyakwe, kabili bamushiikile mu nshiishi iyali pa mutentemuko uwali pa kuya ku nshiishi uko bashiikile abana baume ba kwa Davidi;+ kabili abaYuda bonse na baleikala mu Yerusalemu balimucindike ilyo afwile. Manase umwana wakwe e wamupyene pa bufumu.
33 Manase+ ali ne myaka 12 ilyo aishileba imfumu, kabili atekele imyaka 55 mu Yerusalemu.+
2 Manase alecita ifyabipa mu menso ya kwa Yehova, ifya bunani ifyo inko isho Yehova atamfiisheko abena Israele shalecita.+ 3 Akuulile cipya cipya ififulo fya kupepelapo ifyo Hisekia wishi aonawile,+ akuuliile baBaali ifiipailo kabili aimike ifimuti fya kupepelapo,* alekontamina ne fya mu muulu fyonse kabili alefibombela.+ 4 Na kabili akuulile ifiipailo mu ng’anda ya kwa Yehova,+ iyo Yehova alandilepo ati: “Mu Yerusalemu e mukaba ishina lyandi umuyayaya.”+ 5 Kabili ifya mu muulu fyonse afikuuliile ifiipailo mu mansa shibili isha ng’anda ya kwa Yehova.+ 6 Aocele na bana bakwe mu mulilo+ mu Mupokapoka wa Mwana wa kwa Hinomu.+ Alecita ifinjelengwe,+ alebuka, alelowa kabili alisontele na ba kumwipushishako ku mipashi na balesobela ifintu.+ Alicitile ifyabipa ifingi nga nshi mu menso ya kwa Yehova pa kuti amukalifye.
7 Abikile icilubi ico apangile mu ng’anda iyo Lesa wa cine+ aebelepo Davidi na Solomone umwana wakwe ati: “Muli ino ng’anda na mu Yerusalemu, umusumba uo nasala mu mikowa yonse iya kwa Israele, e mo nkalenga ishina lyandi likatwalilile ukuba.+ 8 Kabili nshakafumye na kabili abena Israele mu calo ico napeele ifikolwe fyabo, cikulu fye balebika amano ku kukonka fyonse ifyo nabeba, e kutila amafunde yonse no bupingushi bwandi ifyo nabapeela ukupitila muli Mose.” 9 Manase atwalilile fye ukulufya abaYuda na baleikala mu Yerusalemu. Alelenga balecita ifyabipa ukucila ne fyo inko isho Yehova alofesheeko abena Israele shalecita.+
10 Yehova alitwalilile ukusoka Manase na bantu bakwe, lelo tababikileko amano.+ 11 E ico Yehova alengele abakalamba ba bashilika ba mfumu ya bena Asiria baikata Manase ukubomfya ifya kukobelako,* bamukaka amaceni yabili aya mukuba e lyo bamusenda ku Babiloni. 12 Ilyo aculile, apaapeete Yehova Lesa wakwe ukuti amubelele uluse* kabili atwalilile ukuicefya nga nshi kuli Lesa wa fikolwe fyakwe. 13 Atwalilile ukupepa kuli Lesa wakwe, kabili Lesa wakwe alyumfwile ifyo alemupaapaata ukuti amubelele uluse. E ico alimubweseeshe pa bufumu bwakwe ku Yerusalemu.+ Lyena Manase aishileishiba ukuti Yehova ni Lesa wa cine.+
14 Pa numa akuulile ilinga kunse ya Musumba wa kwa Davidi+ ku masamba ya Gihone+ iyaba mu mupokapoka kabili lyailefika fye na ku Mpongolo ye Sabi.+ Atwalilile ukukuula ili ilinga ukuyafika fye na ku Ofele,+ kabili lyali ilitali. Asontele na bakalamba ba bashilika mu misumba yonse iya malinga mu Yuda. 15 Lyena afumishe tulesa ne cilubi mu ng’anda ya kwa Yehova+ kabili afumishe ne fiipailo fyonse ifyo akuulile pa lupili apali ing’anda ya kwa Yehova+ e lyo na mu Yerusalemu, kabili aebele abantu ukuti bafipoose kunse ya musumba. 16 Awemye ne ciipailo ca kwa Yehova,+ atendeka no kutuulilapo amalambo ya mutende+ na malambo ya kutootela,+ kabili aebele abaYuda ukuti balebombela Yehova Lesa wa kwa Israele. 17 Na lyo line abantu balitwalilile ukutuula amalambo pa fifulo fya kupepelapo, lelo uo baletuulila aya amalambo ni Yehova Lesa wabo.
18 Amalyashi yambi aya kwa Manase, ipepo apepele kuli Lesa wakwe ne fyo abalemona ifimonwa bamwebele mwi shina lya kwa Yehova Lesa wa kwa Israele, balifilemba umo balemba amalyashi ya kale aya mfumu sha bena Israele. 19 Ipepo apepele,+ ifyo Lesa amubelele uluse pa mulandu wa kuti alipaapeete, imembu shonse isho acitile, ne fyo ashali ne cishinka,+ apo akuulile ififulo fya kupepelapo, na po aimike ifimuti fya kupepelapo*+ ne filubi ifyo apangile ilyo ashilaicefya, fyonse ifi balifilembela pamo na mashiwi ya balemumwena ifimonwa. 20 Lyena Manase alifwile nge fyafwile ifikolwe fyakwe kabili bamushiikile pa ng’anda yakwe. Amone umwana wakwe e wamupyene pa bufumu.+
21 Amone+ ali ne myaka 22 ilyo aishileba imfumu, kabili atekele imyaka ibili mu Yerusalemu.+ 22 Amone alecita ifyabipa mu menso ya kwa Yehova nga filya fine Manase wishi acitile.+ Aletuulila amalambo utulubi uto Manase wishi apangile,+ kabili alitwalilile ukutubombela. 23 Nomba Amone ena taicefeshe kuli Yehova+ nga filya Manase wishi aicefeshe,+ atwalilile fye ukucita ifyabipa. 24 Umuye nshiku ababomfi bakwe balimupondokeele+ kabili bamwipaile mu ng’anda yakwe. 25 Lelo abantu ba mu calo baipeye bonse abapondokeele Imfumu Amone,+ kabili Yoshia+ umwana wakwe e o bapyanike pa bufumu.
34 Yoshia+ ali ne myaka 8 ilyo aishileba imfumu, kabili atekele mu Yerusalemu imyaka 31.+ 2 Yoshia alecita ifyalungama mu menso ya kwa Yehova kabili alecita ifyo icikolwe cakwe Davidi acitile, kabili alitwalilile ukuba ne cumfwila.
3 Mu mwaka walenga 8 ukutula apo Yoshia atendekeele ukuteka ninshi acili fye umwaice, atampile ukubombela Lesa wa kwa Davidi icikolwe cakwe.+ Mu mwaka walenga 12 atendeke ukusangulula icitungu ca Yuda no musumba wa Yerusalemu.+ Aonawile ififulo fya kupepelapo,+ ifimuti fya kupepelapo* ifyo baimike, ifilubi+ e lyo ne fimpashanya fya cela.* 4 Babongolwele ne fiipailo fya baBaali ninshi Yoshia alemonako, kabili aonawile ifyo baleocelapo ububani ifyali pa muulu. Aputawile ne fimuti fya kupepelapo* ifyo baimike, ifilubi ne fimpashanya fya cela* kabili alifishonawile fyaba fye kwati lukungu, e lyo akuba ulu ulukungu pa nshiishi sha bantu balefituulila amalambo.+ 5 Aocelele na mafupa ya bashimapepo pa fiipailo fyabo.+ E fyo asangulwile icitungu ca Yuda no musumba wa Yerusalemu.
6 Na mu misumba ya mu citungu ca kwa Manase, ica kwa Efraimu,+ ica kwa Simeone ukufika fye na mu misumba ya mu citungu ca kwa Naftali, na mu ncende shonse ishashele ifibolya. 7 Abongolwele ifiipailo, aputawile ifimuti fya kupepelapo* ifyo baimike e lyo ne filubi,+ e lyo afishonaula fyaba fye kwati lukungu, kabili aonawile ifyo baleocelapo ububani ifyali mu Israele monse.+ Pa numa abweleelemo ku Yerusalemu.
8 Mu mwaka walenga 18 ukutula apo atendekeele ukuteka, ilyo apwishishe ukusangulula icalo ne tempele,* aebele Shafani+ umwana wa kwa Asalia, Maaseya umukalamba wa musumba na Yoa umwana wa kwa Yoahasi uwalelembela imfumu ifyebo, ukuti bayewamya ing’anda ya kwa Yehova Lesa wakwe.+ 9 Baishile kuli Hilkia shimapepo mukalamba kabili bamupeele indalama isho abantu baletele ku ng’anda ya kwa Lesa, isho abena Lebi abalelinda pa mwinshi bapokele ku bena Manase, ku bena Efraimu na ku bena Israele bonse+ e lyo na ku baYuda, ku bena Benjamini e lyo na ku baleikala mu Yerusalemu. 10 Lyena bapeele ishi ndalama abo basontele ukula-angalila umulimo mu ng’anda ya kwa Yehova. Abalebomba umulimo pa ng’anda ya kwa Yehova nabo balibomfeshe ishi ndalama ku kuwamya ifyaonaike ku ng’anda. 11 Bapeele indalama abacenjela mu fya kupangapanga na baishiba ukukuula pa kuti bashitemo amabwe ayaputulwa ne mbao sha kupaalikila, na pa kuti bawamye imyalo ya mayanda ayo imfumu sha mu Yuda shalekele yaonaika.+
12 Kabili aba abaume bali aba cishinka ilyo balebomba uyu mulimo.+ Abena Lebi aba kubangalila abo basontele bali ni Yahati na Obadia abatuntwike mu bena Merari,+ na Sekaria na Meshulamu abatuntwike mu bena Kohati.+ Kabili abena Lebi bonse abaishibe ukulisha ifilimba,+ 13 baleangalila abalebomba imilimo yalekanalekana* e lyo na balebomba imilimo imbi. Abena Lebi bamo bali ni bakalemba, bambi baleangalila ifintu fimbi e lyo bambi balelinda impongolo.+
14 Ilyo balefumya indalama isho abantu baletele ku ng’anda ya kwa Yehova,+ Hilkia shimapepo asangile ibuuku lya mafunde ya kwa Yehova+ ayo apeele abantu ukupitila muli* Mose.+ 15 E ico Hilkia aebele Shafani kalemba ati: “Ninsanga ibuuku lya mafunde mu ng’anda ya kwa Yehova.” Lyena Hilkia apeele Shafani ili ibuuku. 16 Pa numa Shafani atwele ibuuku ku mfumu kabili ayebele ati: “Ababomfi benu balebomba imilimo yonse iyo mwabapeela. 17 Nabafumya indalama ishali mu ng’anda ya kwa Yehova kabili bapeele abaleangalila uyu mulimo e lyo na balebomba umulimo.” 18 Na kabili Shafani kalemba aebele imfumu ati: “Kuli ibuuku ilyo Hilkia shimapepo ampeele.”+ Lyena Shafani atendeke ukubelengela imfumu ifyali muli ili buuku.+
19 Ilyo imfumu yaumfwile fye amashiwi ayali mwi buuku lya mafunde, yalepwile ifya kufwala fya iko.+ 20 Lyena imfumu yaebele Hilkia, Ahikamu+ umwana wa kwa Shafani, Abdone umwana wa kwa Mika, Shafani kalemba na Asaya umubomfi wa mfumu aiti: 21 “Kabiyeni kanjipushisheniko kuli Yehova, mwipushisheko na bantu abashala mu Israele na mu Yuda pa mashiwi yali muli ili ibuuku basangile; pantu ubukali bwa kwa Yehova ubuli no kwisa pali ifwe bukalamba, pa mulandu wa kuti ifikolwe fyesu tafyakonkele fyonse ifyaba muli ili ibuuku ifyo Yehova alandile.”+
22 E ico Hilkia na bo imfumu yatumine baile kuli Hulda kasesema mwanakashi.+ Hulda ali mukashi wa kwa Shalumu umwana wa kwa Tikba umwana wa kwa Hahasi uwaleangalila umo balesungila ifya kufwala. Hulda aleikala mu citungu icipya ica musumba wa Yerusalemu kabili bailelanda nankwe.+ 23 Hulda abebele ati: “Yehova Lesa wa kwa Israele atila, ‘Muye-eba umuntu uumutumine kuli ine amuti: 24 “Yehova atila, ‘Nkaleta ubucushi pali cino cifulo na pa bekalamo,+ ifitiipu fyonse ifyo babelengeele imfumu ya Yuda ifyalembwa muli ili buuku+ fikacitika. 25 Pa mulandu wa kuti balinsha+ kabili balefutumwina tulesa amalambo pa kuti bankalifye+ muli fyonse ifyo balecita, ubukali bwandi ububilima ngo mulilo bukesa pali cino cifulo kabili tabwakapwe.’”+ 26 Lelo muye-eba imfumu ya Yuda iimutumine mu kwipusha kuli Yehova amuti: “Ifi e fyo Yehova Lesa wa kwa Israele alanda ifikumine amashiwi ayo umfwile,+ 27 apo walinashishe umutima obe kabili wali-icefeshe pa cinso ca kwa Lesa ilyo waumfwile ifyo nalandile pali cino cifulo na pa bekalamo kabili wali-icefeshe, walepula ne fya kufwala fyobe watendeka no kulila pa cinso candi, na ine ning’umfwa ipepo lyobe,+ e fyo Yehova alanda. 28 E mulandu wine ukafwila nge fyafwa ifikolwe fyobe, kabili bakakushiika mu mutende kabili tawakabeko ilyo nkaleta ubucushi bonse pali cino cifulo na pa bekalamo.’”’”+
Lyena baishile-eba imfumu ifyo alandile. 29 E ico imfumu yatumiine bamo amashiwi kabili yaitile abakalamba bonse aba mu Yuda na mu Yerusalemu.+ 30 Pa numa imfumu yaile ku ng’anda ya kwa Yehova pamo na baume ba mu Yuda bonse, abaleikala mu Yerusalemu, bashimapepo na bena Lebi, e kutila abantu bonse, ukutampila pa munono ukufika ku mukalamba. Yabelengeele abantu amashiwi yonse ayali mwi buuku lya cipangano ilyo basangile mu ng’anda ya kwa Yehova.+ 31 Imfumu yaiminine pa cifulo ca iko kabili yapangene icipangano*+ na Yehova ica kuti yali no kulakonka Yehova, yali no kulakonka amafunde yakwe, yali no kulakonka ifyo ali no kulaibukishako abantu ne fyo ali no kulabeba, yali no kulacita ifyali mu cipangano ifyalembelwe muli ili ibuuku+ no mutima wa iko onse no mweo*+ wa iko onse. 32 Kabili yaebele bonse abali mu Yerusalemu na mu citungu ca kwa Benjamini ukuti tabafwile ukutoba ici icipangano. Kabili abaleikala mu Yerusalemu balekonka ifyali mu cipangano ico bapangene na Lesa wa fikolwe fyabo.+ 33 Lyena Yoshia afumishe ifya bunani* fyonse ifyali mu fitungu fya bena Israele,+ kabili alengele bonse mu Israele balabombela Yehova Lesa wabo. Ilyo Yoshia ali no mweo* abantu tabalekele ukulapepa Yehova Lesa wa fikolwe fyabo.
35 Yoshia apekenye Icakucilila+ ica kwa Yehova mu Yerusalemu, kabili baipeye inama she lambo lya Cakucilila+ pa bushiku bwalenga 14 ubwa mweshi wa kubalilapo.+ 2 Aebele bashimapepo ukuti batendeke ukubomba imilimo yabo kabili alibakoseleshe ukulabomba imilimo ya pa ng’anda ya kwa Yehova.+ 3 Lyena aebele abena Lebi abalesambilisha abena Israele bonse amafunde,+ kabili abali aba mushilo kuli Yehova ati: “Bikeni Icipao ca mushilo mu ng’anda iyo Solomone umwana wa kwa Davidi imfumu ya bena Israele akuulile.+ Tamulingile ukulacisenda pa mabeya yenu na kabili.+ Nomba mulebombela Yehova Lesa wenu na bantu bakwe abena Israele. 4 Kabili muipekanye mu ndupwa sha bashinwe ukulingana na mabumba mwabamo, nga fintu Davidi imfumu+ ya bena Israele na Solomone umwana wakwe balembele.+ 5 Mufwile ukwiminina mu cifulo ca mushilo ukulingana na mabumba mwabamo aya ndupwa sha bamunyinenwe, pa kuti kube ibumba lya bena Lebi ilya kubombela ulupwa lumo na lumo. 6 Mwipaye inama she lambo lya Cakucilila+ kabili muisangulule. Mupekanishishe na bamunyinenwe pa kuti bakonke ifyo Yehova alandile ukupitila muli Mose.”
7 Yoshia apeele abantu abalipo impaanga ishana ishilume ne mbushi ishana ishilume pa kuti bashituule ilambo lya Cakucilila. Ishi nama shonse shali 30,000 kabili abapeele ne ng’ombe 3,000. Ishi nama shonse bashifumishe pa nama sha mfumu.+ 8 Bacilolo bakwe nabo bapeele abantu, bashimapepo na bena Lebi umutuulo wa kuitemenwa. Hilkia,+ Sekaria, Yehiele abali intungulushi pa ng’anda ya kwa Lesa wa cine bapeele bashimapepo inama 2,600 isha kutuula amalambo ya pa Cakucilila, kabili babapeele ne ng’ombe 300. 9 Konania na Shemaya na Netanele bamunyina e lyo na Hashabia, Yeiele na Yosabadi abali intungulushi sha bena Lebi, nabo bapeele abena Lebi inama 5,000 isha kutuula amalambo ya pa Cakucilila, kabili babapeele ne ng’ombe 500.
10 Balipwishishe ukupekanya ifintu fyonse kabili bashimapepo baiminine mu fifulo fyabo. Abena Lebi nabo baiminine ukulingana na mabumba balimo,+ nga fintu imfumu yabebele. 11 Baipeye inama sha malambo ya pa Cakucilila+ kabili bashimapepo basanshile umulopa pa ciipailo uo abena Lebi babapeele.+ Abena Lebi bena balefunda inama.+ 12 Lyena bapekenye umutuulo wa koca pa kuti bawakanye ku bantu abashelepo abali mu mabumba ukulingana ne ndupwa sha bashibo, pa kuti nabo bautuule kuli Yehova ukulingana ne fyalembelwe mwi buuku lya kwa Mose. Ifi fine e fyo bacitile na pa kwakanya ing’ombe. 13 Baipike* inama sha mutuulo wa pa Cakucilila nga fintu balecita lyonse;+ kabili baipikile ifya mushilo mu mpoto, mu nongo na mu fya kwipikilamo fimbi, lyena bwangu bwangu baleteele abantu bonse. 14 Pa numa abena Lebi bali-ipekanishishe ilambo lya pa Cakucilila kabili bapekanishisheko na bashimapepo pantu bashimapepo abatuntwike muli Aarone baletuula amalambo ya koca na mafuta ukufika ubushiku. E ico abena Lebi bali-ipekanishishe ilambo lya pa Cakucilila kabili balipekanishisheko na bashimapepo abatuntwike muli Aarone.
15 Kabili bakemba abana ba kwa Asafi,+ bali pa fifulo fyabo nga fintu Davidi,+ Asafi,+ Hemani na Yedutuni+ uwalemwena imfumu ifimonwa balandile. Kabili abalelinda impongolo bali pa mpongolo shalekanalekana.+ Tabalingile ukuleka ukubomba umulimo wabo, pantu bamunyinabo abena Lebi balibapekanishishe ilambo lya pa Cakucilila. 16 E ico pali bulya bushiku balipekenye fyonse ifyo balingile ukupekanya, pa kuti bakwate Icakucilila+ ica kwa Yehova na pa kuti batuule imituulo ya koca pa ciipailo ca kwa Yehova, ukulingana ne fyo Imfumu Yoshia yalandile.+
17 Abena Israele abali mu Yerusalemu balikwete Icakucilila pali ilya nshita e lyo no Mutebeto wa Mukate Uushatutumuka pa nshiku 7.+ 18 Tabatalile abakwatapo Icakucilila ca musango yu mu Israele ukufuma ilyo Samwele kasesema ali uwa mweo, kabili takwali imfumu nangu imo mu Israele iyapekenyepo Icakucilila nge ci, ico Yoshia,+ bashimapepo, abena Lebi, abaYuda bonse, abena Israele abaishile mu Yerusalemu na baleikala mu Yerusalemu bapekenye. 19 Bakwete ici Icakucilila mu mwaka walenga 18 ukutula apo Yoshia atendekeele ukuteka.
20 Ilyo bapwishishe ifi fyonse kabili ilyo Yoshia awemye itempele,* Neko imfumu+ ya bena Egupti yalishile mu kulwa inkondo ku Karikemishi mupepi no mumana wa Yufrate. Lyena Yoshia alile mu kumulwisha.+ 21 E ico Neko atumine aba kuyaeba Yoshia ati: “Nshishile mu kulwa na iwe we mfumu ya baYuda. Lelo njishile mu kulwa no bufumu bumbi, kabili Lesa anjebele ukuti mfwile ukwangufyanya. Nga ulefwaya ukutwalilila ukuba uwa mweo, wilwisha Lesa uuli na ine pantu alekulofya.” 22 Yoshia tabwelelemo, lelo ali-ifungushenye+ pa kuti alwe nankwe kabili taumfwile amashiwi Neko amwebele ayo Lesa alandile. E ico aile mu kumulwisha mu Mpanga Iyabatama iya Megido.+
23 Abalepoosa imifwi balashile Imfumu Yoshia, kabili imfumu yaebele ababomfi ba iko aiti: “Mfumyeni kuno pantu nabancena sana.” 24 E ico ababomfi bakwe bamufumishe mwi celeta ali, bamubika mwi celeta lyakwe limbi ilya nkondo e lyo bamutwala ku Yerusalemu. E fyo Yoshia afwile kabili bamushiikile mu nshiishi ya fikolwe fyakwe.+ Kabili abaYuda bonse na bena Yerusalemu balooseshe Yoshia. 25 Yeremia+ aleimba inyimbo sha bulanda pa kuloosha Yoshia. Kabili bakemba+ abaume na banakashi balemba inyimbo sha bulanda pali Yoshia ukufika na lelo; balibikileko ne funde lya kuti ishi inyimbo baleshimba mu Israele, kabili balishilemba umo balemba inyimbo sha bulanda.
26 Amalyashi yambi aya kwa Yoshia, ifyo acitile ifyalelanga ukuti ali no kutemwa ukushipwa, ifyo alekonka ifyalembelwe mu mafunde ya kwa Yehova, 27 ne fintu fimbi ifyo acitile, ukufuma pa kutendeka ukufika na lintu afwile, balifilemba mwi Buuku lya Mfumu sha bena Israele ne sha baYuda.+
36 Lyena abaYuda babuulile Yehoahasi+ umwana wa kwa Yoshia, bamubika pa bufumu mu Yerusalemu pa kuti apyane wishi.+ 2 Yehoahasi ali ne myaka 23 ilyo aishileba imfumu, kabili atekele imyeshi itatu mu Yerusalemu. 3 Lelo imfumu ya ku Egupti yalimufumishe pa bufumu mu Yerusalemu kabili yapingwile icalo amatalanti* ya silfere 100 ne talanti lya golde limo.+ 4 Kabili imfumu ya ku Egupti yabikile Eliakimu munyina wa kwa Yehoahasi pa bufumu pa kuti aleteka abaYuda na baleikala mu Yerusalemu kabili ya-alwile ishina lyakwe lyaba Yehoyakimu. Nomba Neko+ asendele Yehoahasi munyina wa kwa Eliakimu ku Egupti.+
5 Yehoyakimu+ ali ne myaka 25 ilyo aishileba imfumu kabili atekele imyaka 11 mu Yerusalemu. Alecita ifyabipa mu menso ya kwa Yehova Lesa wakwe.+ 6 Imfumu Nebukadnesari+ iya ku Babiloni yaishilekaka Yehoyakimu amaceni yabili aya mukuba, yamusenda na ku Babiloni.+ 7 Kabili Nebukadnesari alisendele ifipe fimo ifya mu ng’anda ya kwa Yehova ku Babiloni, ayafibika na mwi sano lyakwe.+ 8 Amalyashi yambi aya kwa Yehoyakimu, ifya bunani fyonse ifyo acitile ne fyabipa ifyo baishileishiba pali ena, balifilemba mwi Buuku lya Mfumu sha mu Israele ne sha mu Yuda. Umwana wakwe Yehoyakini e wamupyene pa bufumu.+
9 Yehoyakini+ ali ne myaka 18 ilyo aishileba imfumu, kabili atekele imyeshi itatu ne nshiku 10 mu Yerusalemu. Yehoyakini alecita ifyabipa mu menso ya kwa Yehova.+ 10 Pa kutendeka kwa mwaka,* Imfumu Nebukadnesari yatumine ababomfi ba iko ukuyaikata Yehoyakini no kumuleta ku Babiloni.+ Yabebele no kuleta ifipe ifisuma ifyali mu ng’anda ya kwa Yehova.+ Lyena yabikile Sidekia munyina wa kwa wishi Yehoyakini pa bufumu pa kuti aleteka mu Yuda na mu Yerusalemu.+
11 Sidekia+ ali ne myaka 21 ilyo aishileba imfumu, kabili atekele imyaka 11 mu Yerusalemu.+ 12 Sidekia alecita ifyabipa mu menso ya kwa Yehova Lesa wakwe. Taicefeshe kuli kasesema Yeremia+ uo Yehova atumine ukuyamusoka. 13 Apondokeele ne Mfumu Nebukadnesari,+ iyalengele alape mwi shina lya kwa Lesa ukuti akulainakila. Ali ni cintomfwa* kabili alikene ukumfwila Yehova Lesa wa kwa Israele. 14 Intungulushi shonse isha bashimapepo na bantu balicililemo ukubembukila Lesa. Balecita fyonse ifya bunani ifyo inko shalecita kabili balikoweshe ing’anda ya kwa Yehova+ iyo asangulwile mu Yerusalemu.
15 Yehova Lesa wa fikolwe fyabo alebatumina inkombe isha kubasoka. Alebasoka libili libili pantu alyumfwilile abantu bakwe uluse kabili talefwaya ukuti itempele lyakwe lyonaike. 16 Lelo balepumya inkombe sha kwa Lesa wa cine,+ balisuulile amashiwi yakwe+ kabili baleseka bakasesema bakwe,+ ica kuti tabali no kundapwa, lyena ubukali bwa kwa Yehova bwaishile pa bantu bakwe.+
17 E ico abatumiine imfumu ya bena Kaldi,+ iyaipaile abalumendo babo ku lupanga+ pa cifulo ca mushilo.+ Tayaumfwilile uluse umulumendo nelyo umukashana, umukalamba nelyo umulwele.+ Lesa apeele fyonse mu minwe ya iko.+ 18 Ifipe fyonse ifya mu ng’anda ya kwa Lesa wa cine, ifikalamba ne finono e lyo ne fyuma fya mu ng’anda ya kwa Yehova ne fyuma fya mfumu ne fya bacilolo ba iko, fyonse yafitwele ku Babiloni.+ 19 Yaocele ing’anda ya kwa Lesa wa cine,+ yabongolola ne cibumba ca Yerusalemu.+ Kabili yaocele impungu shonse ishakosa, yaonaula ne fipe fyonse ifisuma.+ 20 Abapuswike ku lupanga+ yabasendele mu kuyaba bankole ku Babiloni. Baileba ababomfi ba iko+ na babomfi ba bana ba iko mpaka ubufumu bwa Persia bwatendeka ukuteka,+ 21 pa kuti amashiwi ayo Yehova alandile ukupitila muli Yeremia yafikilishiwe.+ Icalo cali icibolya ukufika lintu catuushishe amasabata+ yonse ayo cishatuushishe. Ilyo icalo cali icibolya calituushishe, mpaka imyaka 70 yapwa.+
22 Mu mwaka Sailasi imfumu+ ya ku Persia atendeke ukuteka, Yehova alicincishe umutima wakwe pa kuti ifyo Yehova alandile ukupitila muli Yeremia+ fifikilishiwe. Sailasi abilile imbila mu bufumu bwakwe bonse, kabili alembele iyi mbila+ ati: 23 “Ifi e fyo Imfumu Sailasi iya ku Persia yalanda, ‘Yehova Lesa wa ku muulu alimpeela amabufumu yonse aya pano isonde,+ kabili alinjeba ukuti imukuulile ing’anda mu musumba wa Yerusalemu uwaba mu Yuda.+ Nani pali imwe uwaba pa bantu ba kwa Lesa? Shi Yehova Lesa wakwe abe nankwe, kabili mulekeni aleya.’”+
Nelyo “e po baleipushisha Lesa.”
Mu ciHebere, “inshiku ishingi.”
Nelyo “abalenina pali bakabalwe.”
Nelyo “abalenina pali bakabalwe.”
Nelyo kuti yapilibula no kuti, “baleshita bakabalwe ku Egupti na ku Kue; bashimakwebo ba mfumu baleshita bakabalwe ku Kue,” nalimo Kue e Kilikia.
Nelyo “aba kusenda ifipe.”
Nelyo “isano.”
Mwi dalamu limo mwaleingila amalita 220. Mu ciHebere ici icipimo ni “kore.” Moneni Ifyebo Fyalundwako pa B14.
Mu mutondo umo mwaleingila amalita 22. Moneni Ifyebo Fyalundwako pa B14.
Nelyo “abalesenda ifipe.”
Umukono walelepa amasentimita ukucilako panono pali 44, lelo bamo balanda ukuti ukulingana ne fyo balepima kale umukono walelepa mupepi na masentimita 52. Moneni Ifyebo Fyalundwako pa B14.
Mu mamanyuskripti yamo aya kale balembamo ati “120,” lelo mu mamanyuskripti yambi na mu fyebo fimbi ifyo bapilibula mwena balembamo ati “imikono 20.”
Mu ciHebere, “ing’anda iya mushilo nga nshi.”
Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
Ishekele lyalefina ukucilako panono pa magramu 11. Moneni Ifyebo Fyalundwako pa B14.
Mu ciHebere, “ing’anda iya mushilo nga nshi.”
Nelyo “ku kapinda ka ku kulyo.”
Nelyo “ku kapinda ka ku kuso.”
Ilyalola mu kuti “Yehova akoshe.”
Nalimo kuti lyapilibula ukuti “Ku Maka Yakwe.”
Nelyo “ica kusungilamo amenshi.”
Ukucilako panono pa masentimita 7. Moneni Ifyebo Fyalundwako pa B14.
Mu mutondo umo mwaleingila amalita 22. Moneni Ifyebo Fyalundwako pa B14.
E kutila, Umutebeto wa Nsakwe.
Nelyo “bashimapepo abena Lebi.”
Mu ciHebere, “umwana obe umwaume uukafuma mu musana obe.”
Umukono walelepa amasentimita ukucilako panono pali 44. Moneni Ifyebo Fyalundwako pa B14.
Mu ciHebere, “mulungami.”
Nelyo “mwabacusha.”
Amapantankolo musango wa makanta uulya sana ifimenwa.
Nelyo “ifyo mwaishibikwa.”
Mu ciHebere, “mwifumya icinso ca.”
Nelyo “yalelumbanishisha Lesa pamo nabo.” Nalimo aba bali bena Lebi.
Nelyo “apa kwingilila mu Hamati.”
Ubushiku bwakonkelepo ilyo umutebeto wapwile nelyo ubushiku bwalenga 15.
Nelyo “isano.”
Mu ciHebere, “bakalabasekela mu manshoko.”
Nelyo “isano.”
Mu ciHebere, “abana ba kwa Israele.”
Nelyo “akuulile cipya cipya.”
Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
Nelyo “aishile mu kumupika ubwile.”
Mu ciHebere, “umupashi onse walifumine muli ena.”
Italanti lyalefina amakilogramu ukucilako panono pali 34. Moneni Ifyebo Fyalundwako pa B14
Nelyo “isano.”
Ishekele lyalefina ukucilako panono pa magramu 11. Moneni Ifyebo Fyalundwako pa B14
Ilingi line abalebomfya ishi nkwela bantu abalepoosa imifwi.
Mu Malembo ya ciHebere maina imo yalefina amagramu 570. Moneni Ifyebo Fyalundwako pa B14.
Mu ciHebere, “akantengelesha kandi kakatikama ukucila intungu sha kwa tata.”
Mu ciHebere, “matenti.”
Mu ciHebere, “abo basalile.”
Nelyo “akoseshe.”
Mu ciHebere, “imbushi.” Abantu abalepepa ifi fibanda nalimo baletontonkanya ukuti fyali na mafufu kabili fyalemoneka nge mbushi.
Nelyo “asalanganishishe.”
Mu ciHebere, “amabufumu.”
Nelyo “isano.”
Mu ciHebere, “abalebutuka.” E kutila abashilika abalebutuka pa ntanshi ye celeta lya mfumu.
Mu ciHebere, “abo basalile.”
Mu ciHebere, “abo basalile.”
E kutila, icipangano ca muyayaya kabili icishaluka.
Mu ciHebere, “abo basalile.”
Mu ciHebere, “iminshi ya fibi fibili.”
Ilingi line abalebomfya ishi nkwela bantu abalepoosa imifwi.
Mu ciHebere, “Kabili pa nshiku ishingi.”
Mu ciHebere, “tapali umutende pa balefuma nelyo pa baleingila.”
Mu ciHebere, “mwileka amaboko yenu yatompoke.”
Mu ciHebere, “ukufwaya.”
Nelyo “ukukosha; ukukuula cipya cipya.”
Nelyo “elafuma nelyo elaingila mu citungu ca.”
Nelyo “isano.”
Nelyo “ukukosha; ukukuula cipya cipya.”
Nelyo “pa kukosha; pa kukuula cipya cipya.”
Mu ciHebere, “ale-enda mu.”
Nelyo “ukusunkilako.”
Nelyo “malaika.”
Mu ciHebere, “Bushe umupashi wa kwa Yehova upitile kwi pa kufuma pali ine pa kuti ulande na iwe?”
Mu ciHebere, “mu nkambi.”
Nelyo “kwi sano lyakwe.”
Nelyo “muleipeelesha.”
Nalimo “aba bali bena Meuni.”
Iyi ifwile yali ni Bemba Wafwa.
Mu ciHebere, “ulubuto.”
Mu ciHebere, “abana abaume.”
Nelyo “Impanga Yabatama.”
Mu ciHebere, “bapaaliile.”
Ilyalola mu kuti “Amapaalo.”
Mu ciHebere, “batendeke ukucita ubucende na tulesa.”
Mu ciHebere, “umupashi wa baPelishiti.”
Nelyo “isano.”
Balemwita no kuti Ahasia.
Mu ciHebere, “umwana umwanakashi.”
Mu mamanyuskripiti yamo aya ciHebere mwaba ati, “Asaria.”
Nelyo “alilwele.”
Mu ciHebere, “umwana umwaume.”
Nelyo “isano.”
Mu ciHebere, “ilyo yafuma na lintu yaingila.”
Ilingi line abalebomfya ishi nkwela bantu abalepoosa imifwi.
Nelyo “icilongwe.”
Nelyo kuti yapilibula no kuti, “icimfungwa umwali Amafunde ya kwa Lesa.”
Nelyo “e balepeela icishibilo.”
Nelyo “isano.”
Nelyo “itempele.”
Nelyo “isano.”
Nelyo kuti yapilibula no kuti, “mpaka bonse batuula.”
Moneni Amashiwi ya mu Baibo ne fyo Yapilibula, pa mashiwi ya kuti “Ifimuti fya Kupepelapo.”
Nelyo “balebashinina.”
Mu ciHebere, “wafimbile.”
Mu ciHebere, “Pa kwaluka kwa mwaka.”
E kutila, “abena Siria.”
Nelyo “ali na malwele ayengi.”
Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
Nelyo “tumonane icinso ne cinso.”
Mu ciHebere, “Walicimfya.”
Nelyo “mwi sano lyobe.”
Mu ciHebere, “kwi tenti lyakwe.”
Balemwita no kuti Ahasia.
Nalimo amamita 178. Moneni Ifyebo Fyalundwako pa B14.
Nelyo “isano.”
E kutila, “Amasia wishi.”
Nelyo “afukwile.” Afwile afukwile ifishima mu mabwe.
Nelyo “isano.”
Italanti lyalefina amakirogramu ukucilako panono pali 34. Moneni Ifyebo Fyalundwako pa B14.
Mwi dalamu limo mwaleingila amalita 220. Mu ciHebere ici cipimo ni Kore. Moneni Ifyebo Fyalundwako pa B14.
Nelyo “ifilubi ifyaengwa.”
Moneni Amashiwi ya mu Baibo ne fyo Yapilibula, pe shiwi lya kuti “Gehena.”
Mu ciHebere, “ing’anda.”
Nelyo “isano.”
Nelyo “ica kutumfishapo.”
Nelyo “ukutuusha.”
Mu ciHebere, “umutima uwatambalala.”
Nelyo “wa mutembo.”
Mu ciHebere, “alibondepe.”
Nelyo “imiputule ya kuliilamo.”
Nalimo ili lyali liloba ilyo baletulika mu mbali ye linga pa kuti bacingilile umusumba.
Nelyo “itempele.”
Nelyo kuti yapilibula no kuti, “bamwikatile mu fipunda.”
Nelyo “alinashishe icinso ca kwa Yehova Lesa wakwe.”
Nelyo “ifimpashanya fya kwenga.”
Nelyo “ifimpashanya fya kwenga.”
Mu ciHebere, “ing’anda.”
Nelyo “abalesenda ifipe.”
Mu ciHebere, “ayo ukuboko kwa kwa Mose kwalembele.”
Nelyo “yapangene icipangano cipya cipya.”
Nelyo “utulubi.”
Mu ciHebere, “inshiku shakwe shonse.”
Nelyo kuti yapilibula no kuti, “ukoca.”
Mu ciHebere, “ing’anda.”
Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
E kutila pa mwela. Mu Israele ici ciputulwa ca mwaka caletendeka mu March nelyo mu April.
Mu ciHebere, “alikoseshe umukoshi wakwe.”