NEHEMIA

1 Aya e mashiwi Nehemia*+ umwana wa kwa Hakalia alandile: Nomba mu mweshi wa Kislevu,* mu mwaka walenga 20, nali mwi sano mu Shushani.*+ 2 Pali ilya inshita Hanani+ munyinane alishile na baume abo afumine nabo ku Yuda, kabili nabepwishe pa baYuda abapuswike kabili abashelepo pali bankole.+ Nabepwishe na pali Yerusalemu. 3 Banjebele abati: “Abantu abashalapo abekala mu citungu abafuma muli bunkole balecula kabili baliseebana.+ Ifibumba fya Yerusalemu fyalibongoloka+ ne mpongolo shalipya.”+

4 Ilyo banjebele fye ifi, naikele panshi natendeka ukulila kabili pa nshiku ishingi naleloosha, nalifungile+ kabili nalepepa kuli Lesa wa ku muulu. 5 Natile: “Mwe Yehova Lesa wa ku muulu, Lesa mukulu kabili uwa kutiinya, mwe basunga icipangano kabili mwe balanga ukutemwa ukushipwa ku bamutemwa kabili abakonka amafunde yenu,+ 6 shi umfweni ipepo ilyo ne mubomfi wenu ndepepa kuli imwe buno bushiku kabili ndolesheni. Akasuba no bushiku+ ndapepelako ababomfi benu abena Israele kabili ndasokolola ne membu isho aba abantu benu bacita. Ine na ba mu ng’anda ya kwa tata twalimubembukila.+ 7 Ca cine twalimubembukila+ pantu tatukonka amafunde yenu, ifyo mutweba no bupingushi bwenu ifyo mwapeele umubomfi wenu Mose.+

8 “Shi ibukisheni ifyo mwaebele* umubomfi wenu Mose amuti, ‘Nga mwabembuka, nkamusalanganishisha mu nko shonse.+ 9 Lelo nga mwabwelela kuli ine kabili mwalakonka amafunde yandi, nangu abantu benu bakabe ukwapela imyulu, nkabalonganika+ kabili nkabaleta ku cifulo ico nasala ukuti e ko ishina lyandi likabe.’+ 10 Babomfi benu kabili bantu benu abo mwalubwile ku maka yenu ayakalamba, na ku kuboko kwenu ukwakosa.+ 11 Mwe Yehova, shi kutikeni ipepo lya mubomfi wenu ne pepo lya babomfi benu abaitemenwa ukutiina ishina lyenu, kabili shi lekeni ifintu fyendele bwino umubomfi wenu buno bushiku kabili imfumu ibe ne cikuuku kuli ine.”+

Nomba ine nalebomba umulimo wa kupeela imfumu ifya kunwa.+

2 Mu mweshi wa Nisani,* mu mwaka walenga 20+ ukutula apo Imfumu Artakishashete+ yatendekeele ukuteka, balileteele imfumu umwangashi, na ine naliubuulile napeela imfumu nge fyo nalecita lyonse.+ Lelo tayatalile aimonapo ndi no bulanda. 2 E ico imfumu yanjipwishe aiti: “Cinshi ulemonekela uwa bulanda e lyo ninshi taulwele? Nangu cibe shani kuli icikusakamike.” Ilyo yanjebele ifi nalitiinine nga nshi.

3 Lyena naebele imfumu nati: “Kalebalika mwe mfumu! Icilengele imbe no bulanda ni co umusumba umo bashiika ifikolwe fyandi balionaula, kabili impongolo sha uko shalipya”+ 4 Lyena imfumu yanjipwishe aiti: “Cinshi ulefwaya?” Ilyo line nalipepele kuli Lesa wa ku muulu.+ 5 Lyena naebele imfumu nati: “Nga mwamona ukuti cili fye bwino mwe mfumu, kabili nga mwaba ne cikuuku kuli ine ne mubomfi wenu, nsuminisheni ndeya ku Yuda, ku musumba uko bashiika ifikolwe fyandi, pa kuti ndeyaukuula cipya cipya.”+ 6 Lyena imfumu ninshi naikala na namfumu yanjipwishe aiti: “Bushe ukapwa inshiku shinga pa kuti ukafike kabili ni lilali ukabwela?” E ico imfumu yalinsuminishe ukuti ndeya+ kabili naliyebele ilyo nali no kubwela.+

7 Lyena naebele imfumu nati: “Nga mwamona ukuti cili fye bwino mwe mfumu, mpeeleni amakalata ya kuyapeela abalashi ba ku citungu ca kwi Shilya lya Mumana,*+ aya kuti bakansuminishe ukuyapita muli cilya citungu mpaka nkayefika ku Yuda. 8 Nayebele no kuti impeele kalata ya kutwalila Asafi uwalesunga Impanga ya Bufumu,* pa kuti akansuminishe ukutemamo ifimuti fya kupangilamo imyalo ya pa mpongolo ya cikuulwa icikalamba ica bashilika+ icaba mupepi ne tempele, e lyo ne fimuti nkabomfya pa kukuula ifibumba fya musumba+ ne ng’anda nkalaikalamo. E ico imfumu yalimpeele+ amakalata pantu Lesa wandi uwaba ne cikuuku ali na ine.+

9 Nasukile nafika ku ntungulushi sha ku citungu ca kwi Shilya lya Mumana kabili nalishipeele amakalata ya mfumu. Imfumu yalimpeele na bakalamba ba bashilika na balenina pali bakabalwe ukuti tuye nabo. 10 Ilyo Sanbalati+ umwina Horone na Tobia+ umulashi* umwina Amone+ baumfwile ukuti nakwisa umuntu uwishile mu kucitila abena Israele ifisuma, balifulilwe nga nshi.

11 Nasukile nafika ku Yerusalemu kabili ilyo papitile inshiku shitatu, 12 ine na baume bamo twalimine ubushiku, kabili nshaebele nangu umo ico Lesa wandi alefwaya ukuti ncite* ku musumba wa Yerusalemu, kabili twasendele fye impunda iyo nanininepo. 13 Nafumiine ku Mpongolo ya Mupokapoka+ ubushiku e lyo napita pa ntanshi ya Kamfukumfuku ka Cisoka, naya ku Mpongolo ya Cishala ca Mito.+ Naliceeceetele ifibumba fya Yerusalemu pa kuti imone ifyo fyabongolweke ne fyo impongolo shapile.+ 14 Naile ku Mpongolo ya Kamfukumfuku+ na ku Cishiba ca Mfumu, kabili takwali incende apa kuti inama nanininepo ipite. 15 Lelo naile ndekonka umupokapoka+ ubushiku, kabili naleceeceeta ifibumba. Lyena nalibwelele, naingilila pa Mpongolo ya ku Mupokapoka.

16 Intungulushi+ tashaishibe uko naile ne fyo nalecita pantu nshalandile nangu cimo ku baYuda, kuli bashimapepo, kuli bashimucindikwa, ku ntungulushi na ku babomfi bambi abashala. 17 Ilyo papitile inshita nabebele nati: “Namumona ifyo ifintu fyabipa, ifyo Yerusalemu yaonaika ne fyo impongolo shapya. Iseni tukuule cipya cipya ifibumba fya Yerusalemu pa kuti twitwalilila ukuseebana.” 18 Lyena nalibashimikile ifyo Lesa wandi uwaba ne cikuuku ali na ine,+ ne fyo imfumu yanjebele.+ Ilyo nabashimikiile banjebele abati: “Natwime tukuule.” E ico balikoseleshenye* kabili bali-ipekenye pa kuti babombe uyu umulimo uusuma.+

19 Nomba ilyo Sanbalati umwina Horone, Tobia+ umulashi* umwina Amone+ na Geshemu umwina Arabia+ baumfwile ukuti natutendeka ukukuula ilinga, batampile ukutuseka no kutupumya+ abati: “Cinshi mulecitila ifi? Bushe mulefwaya ukupondokela imfumu?”+ 20 Lelo nabaswike nati: “Lesa wa ku muulu e ukalenga tukapwishe ukukuula,+ kabili ifwe fwe babomfi bakwe tukema tukakuule, lelo imwe tamwakwatamo nangu cimo mu Yerusalemu,+ tamwakwatamo insambu, kabili tamwakwatamo ica kumwibukishishapo.”

3 Eliashibu+ shimapepo mukalamba na bamunyina abali bashimapepo, balitendeke ukukuula Impongolo ya Mpaanga.+ Basangulwile iyi impongolo*+ babikako ne fiibi. Basangulwile icibumba ukuyafika ku Lupungu lwa Mea+ e lyo no kuyafika ku Lupungu lwa Hananele.+ 2 Kabili abaume ba ku Yeriko+ batendekeele ukukuula apo Eliashibu na bamunyina bali no kupelela. Lyena Sakuri umwana wa kwa Imri na o atendekeele ukukuula apo abaume ba ku Yeriko bali no kupelela.

3 Abana ba kwa Hasenaa bakuulile Impongolo ye Sabi,+ babikako amafulemu ya mbao+ e lyo babikako ifiibi, amaingwe ne mipindo. 4 Kabili Mereemote+ umwana wa kwa Uriya, umwana wa kwa Hakose atendekeele ukuwamya icibumba umo cabongolweke apo abana ba kwa Hasenaa bali no kupelela. Meshulamu+ umwana wa kwa Berekia, umwana wa kwa Meshesabele atendekeele ukuwamya icibumba umo cabongolweke apo Mereemote ali no kupelela, kabili Sadoke umwana wa kwa Baana atendekeele ukuwamya icibumba umo cabongolweke apo Meshulamu ali no kupelela. 5 Kabili abena Tekoa+ batendekeele ukuwamya icibumba umo cabongolweke apo Sadoke ali no kupelela, lelo abaume babo bashimucindikwa tabaicefeshe, balikeene ukubomba umulimo uo abalebangalila babebele ukubomba.

6 Yoyada umwana wa kwa Pasea na Meshulamu umwana wa kwa Besodia bawemye Impongolo ya Musumba wa Kale.+ Balibikileko amafulemu ya mbao e lyo babikako ifiibi, amaingwe ne mipindo. 7 Melatia umwina Gibeone+ na Yadone umwina Meronote, bawemye icibumba icali mupepi ne yi mpongolo. Aba baume bali ba ku Gibeone na ku Mispa,+ kabili umulashi wa ku citungu ca kwi Shilya lya Mumana*+ e walebangalila. 8 Usiele umwana wa kwa Haraya, uwalepanga ifintu ukubomfya golde, atendekeele ukuwamya icibumba umo caonaike apo Melatia na Yadone bali no kupelela. Hanania uwalepanga amafuta yanunkila atendekeele ukuwamya icibumba umo cabongolweke apo Usiele ali no kupelela, kabili balambatike amabwe* panshi mu Yerusalemu ukuyafika kwi Linga lya Mutika Uukalamba.+ 9 Refaya umwana wa kwa Huri, intungulushi ya hafu ya citungu ca Yerusalemu atendekeele ukuwamya icibumba umo cabongolweke apo Hanania ali no kupelela. 10 Uwakonkele pali Refaya ni Yedaya umwana wa kwa Harumafu. Awemye icibumba icali apaloshenye ne ng’anda yakwe. Hatushi umwana wa kwa Hashabinia atendekeele ukuwamya icibumba umo cabongolweke apo Yedaya ali no kupelela.

11 Malkiya umwana wa kwa Harimu+ na Hashubu umwana wa kwa Pehati-moabu+ bawemye iciputulwa cimbi ica cibumba e lyo no Lupungu lwa Fitofu.+ 12 Shalumu umwana wa kwa Haloheshe, intungulushi ya hafu ya citungu ca Yerusalemu na bana bakwe abanakashi, batendekeele ukuwamya icibumba umo cabongolweke apo Malkiya na Hashubu bali no kupelela.

13 Hanuni na baleikala ku Sanoa+ bawemye Impongolo ya Mupokapoka.+ Bakuulile iyi impongolo e lyo babikako ifiibi, amaingwe ne mipindo. Bawemye ne cibumba icalepele imikono* 1,000 ukuyafika fye na ku Mpongolo ya Cishala ca Mito.+ 14 Malkiya umwana wa kwa Rekabu, intungulushi ya citungu ca Bete-hakeremu+ awemye Impongolo ya Cishala ca Mito. Akuulile iyi impongolo e lyo abikako ifiibi, amaingwe e lyo ne mipindo.

15 Shalumu umwana wa kwa Kol-hose, intungulushi ya citungu ca Mispa+ awemye Impongolo ya Kamfukumfuku.+ Akuulile iyi impongolo abikapo no mutenge e lyo abikako ifiibi, amaingwe e lyo ne mipindo. Awemye ne cibumba ca Cishiba+ ca Shela* icali mupepi ne Bala lya Mfumu+ ukufika ku Matabo+ aya kutentemukilapo ukufuma ku Musumba wa kwa Davidi.+

16 Uwakonkelepo ni Nehemia umwana wa kwa Asbuki, intungulushi ya hafu ya citungu ca Betsuri.+ Awemye icibumba ukutendekela apaloshenye ne Nshiishi sha kwa Davidi+ ukufika pa cishiba+ ico bapangile, ailefika fye na ku Ng’anda ya Bashilika.

17 Abena Lebi e bamukonkelepo ukuwamya icibumba umo caonaike, kabili Rehumu umwana wa kwa Bani e walebangalila. Hashabia intungulushi ya hafu ya citungu ca Keila,+ e wakonkelepo ukuwamya icibumba umo cabongolweke, kabili aleimininako icitungu cakwe. 18 Abena Lebi bambi e bakonkelepo ukuwamya icibumba umo cabongolweke, kabili Babai umwana wa kwa Henadadi, intungulushi ya hafu ya citungu ca Keila e walebangailila.

19 Uwakonkelepo ni Esere umwana wa kwa Yeshua,+ intungulushi ya ku Mispa. Awemye iciputulwa cimbi ica cibumba icali apaloshenye na pa kuninina pa kuya umo Balesungila Ifyanso. Ici ciputulwa cali pali cimo ico bakuulile icaletungilila ilinga.+

20 Uwakonkelepo ni Baruki umwana wa kwa Sabai.+ Awemye iciputulwa cimbi ica cibumba ukufuma pa co bakuulile icaletungilila ilinga ukufika pa mwinshi wa ng’anda ya kwa Eliashibu+ shimapepo mukalamba. Ali uwacincila ilyo alebomba uyu mulimo.

21 Uwakonkelepo ni Mereemote+ umwana wa kwa Uriya umwana wa kwa Hakose. Awemye iciputulwa cimbi ica cibumba ukufuma pa mwinshi wa ng’anda ya kwa Eliashibu ukuyafika pa mpela ya iyi ng’anda.

22 Abakonkelepo ukuwamya icibumba umo cabongolweke ni bashimapepo ba ku citungu ca Yordani.*+ Batendekeele apo Mereemote ali no kupelela. 23 Abakonkelepo ni Benjamini na Hashubu. Bawemye icibumba icaloshenye ne ng’anda yabo. Uwakonkelepo pali bena ni Asaria umwana wa kwa Maaseya umwana wa kwa Anania. Awemye icibumba icali mupepi ne ng’anda yakwe. 24 Uwakonkelepo ni Binui umwana wa kwa Henadadi. Awemye iciputulwa cimbi ica cibumba ukufuma pa ng’anda ya kwa Asaria ukufika pa co bakuulile icaletungilila ilinga+ kabili ailefika fye na pa koona.

25 Uwakonkelepo ni Palali umwana wa kwa Usai. Awemye icibumba icali pa ntanshi ya co bakuulile icaletungilila ilinga no lupungu ulwaikatene ne Ng’anda ya Mfumu.*+ Ulu ulupungu lwali mu Lubansa lwa Balinshi.+ Uwakonkelepo ukuwamya icibumba umo cabongolweke ni Pedaya umwana wa kwa Paroshe.+

26 Kabili abalebombela pe tempele*+ abaleikala mu Ofele,+ bawemye icibumba ukufika apaloshenye ne Mpongolo ya Menshi+ ku kabanga, kabili bawemye no lupungu ulwapulilemo.

27 Abakonkele pali bena, bena Tekoa.+ Bawemye iciputulwa cimbi ica cibumba, ukufuma pa ntanshi iya lupungu ulwapulilemo ukuyafika kwi linga lya Ofele.

28 Bashimapepo bawemye pa muulu ya Mpongolo ya Bakabalwe,+ cila muntu awemye apaloshenye ne ng’anda yakwe.

29 Uwakonkelepo ni Sadoke+ umwana wa kwa Imere. Awemye icibumba icaloshenye ne ng’anda yakwe.

Uwakonkele pali ena ukuwamya icibumba umo cabongolweke ni Shemaya umwana wa kwa Shekania, umulinshi wa pa Mpongolo ya ku Kabanga.+

30 Abakonkele pali ena ukuwamya iciputulwa cimbi ica cibumba, ni Hanania umwana wa kwa Shelemia na Hanuni umwana walenga 6 uwa kwa Salafi.

Uwakonkelepo ni Meshulamu+ umwana wa kwa Berekia. Awemye icibumba icaloshenye ne cikuulwa cakwe.

31 Uwakonkelepo ni Malkiya uwalepanga ifintu ukubomfya golde. Awemye icibumba umo cabongolweke ukuyafika ku ng’anda ya balebombela pe tempele*+ na bashimakwebo, iyali mupepi ne Mpongolo ya Balinshi ukuyafika fye na pa muputule wa pa muulu uwa pa koona.

32 Abalepanga ifintu ukubomfya golde na bashimakwebo, bawemye icibumba umo cabongolweke icali pa kati ka muputule wa pa muulu uwa pa koona ne Mpongolo ya Mpaanga.+

4 Nomba ilyo Sanbalati+ aumfwile fye ukuti twalekuula ilinga cipya cipya, alikalipe nga nshi kabili atendeke ukutumfya abaYuda. 2 Kabili ilyo ali na bamunyina na bashilika ba mu Samaria, alandile ati: “Cinshi ico aba abaYuda abashakwata amaka balecita? Bushe kuti babomba uyu mulimo beka? Bushe kuti batuula amalambo? Bushe kuti bapwisha ukukuula ilinga mu bushiku bumo? Bushe kuti balenga aya amabwe ayatobaulwa ayali mu miina ya lukungu+ yaba ayatuntulu?”

3 Nomba Tobia+ umwina Amone+ uwaiminine mupepi na Sanbalati alandile ati, “Nangu fye ni mumbwe nga anina pali ili ilinga balekuula kuti lyabongoloka.”

4 E ico napepele nati: Mwe Lesa wesu, umfweni ifyo baletupontela.+ Bwesesheni iyi miponto pa mitwe yabo+ kabili muleke babasende bunkole ku balwani babo ku calo cimbi. 5 Mwibalekapo fye pa filubo fyabo kabili mwifuuta ulubembu lwabo,+ pantu nabasaalula abalekuula.

6 Twalitwalilile ukukuula ilinga umo lyabongolweke, ica kuti mu butali ukuya mu muulu lyafikile pa kati, kabili abantu batwalilile ukubomba ne mitima yabo yonse.

7 Nomba ilyo Sanbalati, Tobia,+ abena Arabia,+ abena Amone na bena Ashidode+ baumfwile fye ukuti umulimo wa kuwamya ilinga lya Yerusalemu umo lyabongolweke waleilako fye pa ntanshi, balikalipe nga nshi. 8 E ico baumfwene ukuti bese balwishe Yerusalemu, balete ne fimfulunganya mu musumba. 9 Lelo twalipepele kuli Lesa wesu kabili twalibikileko aba kutulinda akasuba no bushiku pa kuti tucingililwe.

10 Lelo abaYuda balandile abati: “Abalebomba* nabanaka kabili amabwe ayatobaika ne fintu fimbi ifyo tulingile ukupoosa fingi nga nshi, te kuti tupwishe ukukuula ilinga.”

11 Kabili abalwani besu baletila: “Tabakeshibe ilyo tukabengilila kabili tabakatumone, tukabepaya bakaleke no kubomba umulimo.”

12 AbaYuda abaleikala mupepi na balwani besu nga baisa kuli ifwe, pa miku iingi* baletweba abati: “Ilyo abalwani bakesa mu kutusansa bakafumina mu ncende ishalekanalekana.”

13 E ico nabikile abaume pa ncende ishabatama mu kati ke linga apashaleba nangu cimo. Nababikile ukulingana ne ndupwa shabo kabili bonse bali no lupanga, ifumo no buta. 14 Ilyo namwene ukuti bali no mwenso, ilyo line nalimine kabili naebele bashimucindikwa+ ne nkonkani sha ntungulushi na bantu bambi abashala nati: “Mwibatiina.+ Muleibukisha ukuti Yehova mukalamba kabili wakutiinya;+ lwileniko bamunyinenwe, abana benu abaume, abana benu abanakashi, abakashi benu na mayanda yenu.”

15 Nomba ilyo abalwani besu baumfwile ukuti natwishiba ifyo balepanga ukucita kabili Lesa wa cine nafulunganya amapange yabo, twalitendeke ukukuula ilinga na kabili. 16 Ukutula bulya bushiku, hafu ya mpendwa ya baume balekuula ilinga+ e lyo hafu imbi iya mpendwa ya baume baleba na mafumo, inkwela na mata kabili balefwala ne fya kucinga icifuba. Bacilolo+ bena baleiminina ku numa ya baYuda 17 abalekuula ilinga, balebafwilisha. Abalesenda ifipe ifyafina balebomfya ukuboko kumo pa kubomba umulimo e lyo ukuboko kumbi baleikatilako icanso. 18 Bonse abalekuula balekaka bapanga mu misana, kabili uwalelisha intandala+ aleiminina mupepi na ine.

19 Lyena naebele bashimucindikwa ne nkonkani sha ntungulushi na bantu bambi nati: “Umulimo ukalamba nga nshi, kabili natutalukana nga nshi pa kukuula ilinga. 20 Nga mwaumfwa intandala yalila, mwise uko tuli. Lesa wesu aletulwilako.”+

21 E ico ilyo twalekuula ilinga, hafu imbi iya mpendwa ya baume baleba na mafumo, ukutula ku maca mpaka intanda shatula. 22 Pali ilya nshita naebele abantu nati: “Lekeni cila mwaume no mubomfi wakwe balesendama mu Yerusalemu. Bakulalekanina ukutulinda ubushiku kabili akasuba bakulabomba umulimo wa kukuula ilinga.” 23 E ico ine na bamunyinane na balemombela+ e lyo na balinshi abankonkele, tatwafuulilepo ifya kufwala, kabili twaleikatila ifyanso ku kuboko kwa ku kulyo.

5 Lelo abaume na bakashi babo batendeke ukuilishanya nga nshi pali bamunyinabo abaYuda.+ 2 Bamo balelanda abati: “Ifwe na bana besu abaume na bana besu abanakashi tuli bengi. Tatukwete ingano sha kuti tulye pa kuti twifwa.” 3 Bambi balelanda abati: “Amabala yesu umo tulima ingano na ya myangashi na mayanda yesu yalaba iciikatilo pa kuti tukongole ingano mu nshita ya cipowe.” 4 E lyo bambi nabo balelanda abati: “Natukongola indalama pa kuti tutuule umutuulo ku mfumu+ uwa mabala yesu aya ngano na mabala yesu aya myangashi. 5 Tatwapusana na bamunyinefwe* kabili abana besu baba fye nga bana babo, lelo ifwe tufwile ukuleka abana besu abaume na bana besu abanakashi baba abasha, kabili abana besu abanakashi bamo baliba kale abasha.+ Nomba tapali nangu cimo ico twingacita, pantu balitupoka amabala yesu aya ngano na ya myangashi.”

6 Ilyo naumfwile ifyo abantu baleilishanya ne fyo balelanda, nalikalipe nga nshi. 7 E ico nalitontonkenyepo sana pa fyo bailishenye, kabili napeele bashimucindikwa ne nkonkani sha ntungulushi umulandu, nabebele nati: “Imwe bonse nga mwakongwesha bamunyinenwe, mufwaya ukuti balelundapo pa kumubwesesha.”+

Pa mulandu ne fyo bacitile naebele abantu bonse ukuti balongane. 8 Kabili nabebele nati: “Twalicita fyonse ifyo twalingile ukucita pa kuti tulubule bamunyinefwe abaYuda abo bashitishe ku bena fyalo. Bushe nomba imwe muleshitisha bamunyinenwe,+ kabili bushe mulefwaya ukuti tubalubule na kabili?” Ilyo nabebele ifi baikele fye tondolo, tabakwete ne fya kulanda. 9 Lyena nabebele no kuti: “Ifyo mulecita tafiweme. Bushe tamufwile ukulalanga ukuti mulatiina Lesa+ muli fyonse ifyo mucita pa kuti inko, e kutila abalwani besu, belatupontela? 10 Ine na bamunyinane na babomfi bandi tulakongwesha abantu indalama ne ngano. Nga twabakongwesha, twilabeba ukuti balundepo pa kubwesha.+ 11 Lelo line mubabweseshe amabala yabo+ aya myangashi, amabala yabo aya miolife, amabala yabo yambi na mayanda yabo. Mubabweseshe ne fyo mwabebele ukulundapo* pa ndalama, pa ngano, pa mwangashi uupya na pa mafuta ifyo bakongwele kuli imwe.”

12 Nabo balandile abati: “Twalababwesesha ifintu fyabo, kabili tatwabebe ukuti batupeele ifya kulundapo. Twalacita fyonse ifyo mwalanda.” E ico naitile bashimapepo kabili naebele abantu ukuti balape ukutila bakafikilisha fyonse ifyo balaya. 13 Nakuntile ne ca kufwala candi* e lyo nabeba nati: “Ifi fine e fyo Lesa wa cine akakunte umuntu onse uushakacite ifi mwalaya. Akamufumye mu ng’anda yakwe na ku fyo akwata, akamukunte ica kuti akashale fye ukwabula nangu cimo.” Lyena ulukuta lonse lwatile: “Ameni!”* Kabili abantu balumbenye Yehova, kabili bacitile ifyo balaile.

14 Ukufuma ubushiku Imfumu Artakishashete yansontele ukuba umulashi+ wa citungu ca Yuda, ukufuma mu mwaka walenga 20+ ukufika mu mwaka walenga 32+ ukutula apo Imfumu Artakishashete+ yatendekeele ukuteka, e kutila pa myaka 12, ine na bamunyinane tatwalyapo ifya kulya ifyo imfumu yaebele abantu ukuti balepeela umulashi.+ 15 Lelo abali abalashi ilyo ine nshilaba umulashi balecusha abantu kabili balepoka kuli bena amashekele* ya silfere 40 cila bushiku, aya kushitamo umukate no mwangashi. Ababomfi babo nabo balecusha abantu. Lelo ifi te fyo ine nalecita+ pantu ndatiina Lesa.+

16 Nalikuulileko ne linga kabili tatwapokelepo nangu umo ibala,+ na babomfi bandi bonse baleisa mu kubombako umulimo wa kukuula ilinga. 17 Kwali abaYuda 150 ne nkonkani sha ntungulushi e lyo nabalefuma ku fyalo fimbi abo nalelya nabo pe tebulo lyandi. 18 Cila bushiku balempekanishisha ing’ombe imo iilume, impaanga 6 ishisuma sana ne fyuni, kabili nga papita inshiku 10 balempekanishisha* umwangashi wa misango yonse uwingi. Lelo nshalepatikisha abantu ukuti balempeela ifya kulya ifyo balingile ukupeela umulashi pantu imilimo balebomba yalikosele. 19 E ico napepele nati: Mwe Lesa wandi mwikandaba kabili mpaaleni pali fyonse ifyo nacitila aba bantu.+

6 Nomba ilyo Sanbalati, Tobia,+ Geshemu umwina Arabia+ na balwani besu bambi babebele fye ukuti ninkuula ilinga cipya cipya+ kabili mwi linga tamuli icipunda nangu cimo icishele (nangu ca kuti pali ilya nshita ninshi nshilabika ifiibi pa mpongolo),+ 2 Sanbalati na Geshemu bantumiine amashiwi ya kuti: “Isa tukumanine mu mushi umo pa mishi iyaba mu mpanga yabatama iya Ono.”+ Lelo balepanga ukuncita ifyabipa. 3 E ico natumine abakuyabeba ati: “Umulimo ndebomba ukalamba, e ico nshaiseko. Cinshi nalalekela ukubomba umulimo ndebomba pa kuti fye njise kuli imwe?” 4 Bantumiine amashiwi yamo yene imiku 4, lelo nalebaasuka fye cimo cine.

5 Lyena pa muku walenga 5, Sanbalati alembele amashiwi yamo yene muli kalata e lyo apeela umubomfi wakwe ukuti andetele. Iyi kalata tabayisele. 6 Aya e mashiwi yali muli kalata: “Abantu ba mu nko shimbi na Geshemu+ balelanda abati iwe na baYuda mulepanga ukupondoka.+ E co ulekuulila ne linga kabili ukulingana ne fi balelanda ulefwaya ukuba imfumu yabo. 7 Nausonta na bakasesema pa kuti babile mu Yerusalemu monse pali iwe abati, ‘Mu Yuda muli mfumu!’ Nomba imfumu yesu ikomfwa ukuti e fyo ucitile. E ico isa tulanshanye.”

8 Lelo pa kumwasuka namutumiine amashiwi ya kuti: “Pa fyo ulandile tapali nangu cimo icacitika, niwe ulefyelenganya fye.”* 9 Pantu abantu bonse baletutiinya abati: “Amaboko yenu yakanaka ica kuti tamwakatwalilile ukubomba umulimo.”+ Lelo ndepepa nati, mwe Lesa wandi nkosheni.+

10 Lyena naile ku ng’anda ya kwa Shemaya umwana wa kwa Delaya, umwana wa kwa Mehetabele pa nshita ashalefuma mu ng’anda. Anjebele ati: “Natuleya ku ng’anda ya kwa Lesa wa cine, mu kati ke tempele, twisaleko ne fiibi, pantu baleisa mu kukwipaya. Baleisa mu kukwipaya ubushiku.” 11 Lelo namwebele ati: “Bushe ine, nine ningabutuka? Kabili bushe kuti naingila mwi tempele bakaana ukunjipaya?+ Nshayeko!” 12 Lyena naishileiluka ukuti te Lesa walengele uyu kasesema alande aya mashiwi, lelo ni Tobia na Sanbalati+ bamutumine. 13 Bamutumine ukuti ese antiinye kabili alenge membuke, pa kuti bakwate apakonawila ishina lyandi kabili banseebanye.

14 E ico napepele nati, mwe Lesa wandi mwikalaba ifyo Tobia+ na Sanbalati bacitile, mwikalaba ne fyo Noadia kasesema mwanakashi na bakasesema bambi batwalilile ukuntiinya.

15 E ico twapwishishe ukukuula ilinga mu nshiku 52 pa bushiku bwalenga 25 ubwa mweshi wa Eluli.*

16 Ilyo abalwani besu bonse baumfwile fye ukuti natupwisha ukukuula ilinga, kabili ilyo inko shonse ishali mupepi shamwene ilinga, baliseebene nga nshi+ kabili balilwike ukuti Lesa wesu e watwafwile pa kuti tupwishe ukukuula ilinga. 17 Pali ilya nshita bashimucindikwa+ ba mu Yuda baletumina Tobia amakalata ayengi kabili na o alebalembela. 18 Abengi mu Yuda bamulaile ukuti bakulamutungilila pantu ali ni shifyala wa kwa Shekania umwana wa kwa Ara,+ kabili Yehohanani umwana wakwe aupile umwana wa kwa Meshulamu+ umwana wa kwa Berekia. 19 Kabili lyonse balenjeba ifisuma pali ena kabili nabo baleya mu kumweba ifyo nalelandapo. Lyena Tobia alenembela amakalata ya kuntiinya.+

7 Nomba ilyo fye napwishishe ukukuula ilinga cipya cipya,+ nalibikile ifiibi pa mpongolo.+ Lyena nalisontele bakalinda ba pa mpongolo,+ bakemba+ na bena Lebi.+ 2 Nasontele na Hanani+ munyinane na Hanania uwaleangalila icikuulwa icikalamba ica bashilika+ ukuti baleangalila Yerusalemu, pantu aali uwa cishinka sana kabili aletiina Lesa wa cine+ ukucila ifyo abantu abengi balemutiina. 3 E ico nabebele nati: “Tamufwile ukwisula impongolo sha Yerusalemu ilyo akasuba kashilabalika sana, kabili ilyo abalelonda bashilainuka bafwile ukwisala ifiibi no kufikoma. Kabili mwebe abekala mu Yerusalemu ukuti balelonda umusumba. Bamo baleiminina apo mulebeba ukulaiminina e lyo bambi baleiminina pa ntanshi ya mayanda yabo.” 4 Nomba umusumba wa Yerusalemu ukalamba, lelo abantu bekalamo banono,+ kabili abantu tabakuula amayanda cipya cipya.

5 Lelo Lesa wandi anengele naita abakankaala, inkonkani sha ntungulushi na bantu pa kuti cila muntu alembeshe mu lupwa atuntwike.+ Lyena nasangile ibuuku umo balembele indupwa umo ababalilepo ukwisa ku Yerusalemu batuntwike, kabili ifyo balembelemo ni fi:

6 Kabili aba e bantu ba mu citungu abafumine muli bunkole abo Nebukadnesari imfumu+ ya Babiloni yasendele bunkole,+ kabili ababweleele ku Yerusalemu na ku Yuda, cila muntu ku musumba wakwe.+ 7 Abaletungulula aba bantu bali ni Serubabele,+ Yeshua,+ Nehemia, Asaria, Raamia, Nahamani, Mordekai, Bilishani, Misperete, Bigibai, Nehumu na Baana.

Iyi e mpendwa ya baume abena Israele ababweleele ku Yerusalemu:+ 8 abatuntwike muli Paroshe bali 2,172; 9 abatuntwike muli Shefatia bali 372; 10 abatuntwike muli Ara+ bali 652; 11 abatuntwike muli Pehati-moabu,+ abatuntwike muli Yeshua na Yoabu+ bali 2,818; 12 abatuntwike muli Elamu+ bali 1,254; 13 abatuntwike muli Satu bali 845; 14 abatuntwike muli Sakai bali 760; 15 abatuntwike muli Binui bali 648; 16 abatuntwike muli Bebai bali 628; 17 abatuntwike muli Asigadi bali 2,322; 18 abatuntwike muli Adonikamu bali 667; 19 abatuntwike muli Bigibai bali 2,067; 20 abatuntwike muli Adini bali 655; 21 abatuntwike muli Atere, kabili abatuntwike muli Hisekia bali 98; 22 abatuntwike muli Hashumu bali 328; 23 abatuntwike muli Besai bali 324; 24 abatuntwike muli Harifu bali 112; 25 abatuntwike muli Gibeone+ bali 95; 26 abaume abena Betelehemu na bena Netofa bali 188; 27 abaume abena Anatote+ bali 128; 28 abaume abena Betasimabete bali 42; 29 abaume abena Kiriati-yearimu,+ abena Kefira na bena Beerote+ bali 743; 30 abaume abena Rama na bena Geba+ bali 621; 31 abaume abena Mikimasi+ bali 122; 32 abaume abena Betele+ na bena Ai+ bali 123; 33 abaume abena Nebo imbi bali 52; 34 abatuntwike muli Elamu umbi bali 1,254; 35 abatuntwike muli Harimu bali 320; 36 abaume abena Yeriko bali 345; 37 abaume abena Lode, abena Hadidi na bena Ono+ bali 721; 38 abaume abena Senaa bali 3,930.

39 Impendwa ya bashimapepo+ ababwelele ku Yerusalemu ni yi: Abatuntwike muli Yedaya aba mu ng’anda ya kwa Yeshua bali 973; 40 abatuntwike muli Imere bali 1,052; 41 abatuntwike muli Pashihuri+ bali 1,247; 42 abatuntwike muli Harimu+ bali 1,017.

43 Impendwa ya bena Lebi+ ababwelele ni yi: Abatuntwike muli Yeshua, aba mu lupwa lwa kwa Kadmiele+ kabili abatuntwike muli Hodeba bali 74. 44 Impendwa ya bakemba+ ababwelele ni yi: Abatuntwike muli Asafi+ bali 148. 45 Abalelinda impongolo+ ababwelele ni aba: Abatuntwike muli Shalumu, abatuntwike muli Atere, abatuntwike muli Talmone, abatuntwike muli Akubu,+ abatuntwike muli Hatita, na batuntwike muli Shobai, bonse pamo bali 138.

46 Abalebombela pe tempele*+ ababwelele ni aba: Abatuntwike muli Siha, abatuntwike muli Hasufa, abatuntwike muli Tabaote, 47 abatuntwike muli Kerose, abatuntwike muli Sia, abatuntwike muli Padone, 48 abatuntwike muli Lebana, abatuntwike muli Hagaba, abatuntwike muli Salmai, 49 abatuntwike muli Hanani, abatuntwike muli Gidele, abatuntwike muli Gahari, 50 abatuntwike muli Reaya, abatuntwike muli Resini, abatuntwike muli Nekoda, 51 abatuntwike muli Gasamu, abatuntwike muli Usa, abatuntwike muli Pasea, 52 abatuntwike muli Besai, abatuntwike muli Meunimu, abatuntwike muli Nefushesimu, 53 abatuntwike muli Bakibuki, abatuntwike muli Hakufa, abatuntwike muli Harihuri, 54 abatuntwike muli Basiliti, abatuntwike muli Mehida, abatuntwike muli Harsha, 55 abatuntwike muli Barikose, abatuntwike muli Sisera, abatuntwike muli Tema, 56 abatuntwike muli Nesiya na batuntwike muli Hatifa.

57 Abatuntwike mu babomfi ba kwa Solomone+ ababwelele ni aba: Abatuntwike muli Sotai, abatuntwike muli Soferete, abatuntwike muli Perida, 58 abatuntwike muli Yaala, abatuntwike muli Darkone, abatuntwike muli Gidele, 59 abatuntwike muli Shefatia, abatuntwike muli Hatili, abatuntwike muli Pokerete-hasebaimu, abatuntwike muli Amone. 60 Bonse abalebombela pe tempele*+ na batuntwike mu babomfi ba kwa Solomone bali 392.

61 Abafumine ku Tele-mela, ku Tele-harisha, ku Kerubi, ku Adone na ku Imere, abafililwe ukwishiba indupwa sha bashibo kabili abafililwe ukushininkisha nga ca kuti bali bena Israele ni aba:+ 62 abatuntwike muli Delaya, abatuntwike muli Tobia na batuntwike muli Nekoda bali 642. 63 Kabili abatuntwike muli bashimapepo ababwelele ni aba: abatuntwike muli Habaya, abatuntwike muli Hakose,+ na batuntwike muli Barsilai,+ uwaupile umwana wa kwa Barsilai umwina Gileadi kabili uo bainike ishina lya kwa shifyala. 64 Aba balifwaile ibuuku umo balembele intuntuko shabo pa kuti beshibe umo batuntwike, lelo tabalisangile, e ico tababasuminishe ukuba bashimapepo.*+ 65 Umulashi*+ abebele ukuti tabalingile ukulalyako ifya mushilo nga nshi,+ mpaka kukabe shimapepo uukabepushishako kuli Lesa ukubomfya Urimu na Tumimu.+

66 Abantu bonse mu lukuta bali 42,360.+ 67 Tabapendeeleko abasha babo abaume na basha babo abanakashi,+ abali 7,337; na bakemba abaume na bakemba abanakashi+ abali 245. 68 Bakabalwe babo bali 736, imfalashi shabo na sho shali 245, 69 ingamila shabo shali 435 ne mpunda shabo shali 6,720.

70 Bamo pa ntungulushi sha mayanda ya bashibo batuulile imituulo ya kubomfya pa kukuula itempele cipya cipya.+ Umulashi* atuulile amadrakima* ya golde 1,000, imbale shafonka 50, e lyo ne mingila ya bashimapepo+ 530. 71 Kabili bamo pa ntungulushi sha mayanda ya bashibo batuulile amadrakima ya golde 20,000 na ama maina* ya silfere 2,200, pa kuti iyi mituulo baibomfye pa kukuula itempele cipya cipya. 72 Kabili abantu bambi batuulile amadrakima ya golde 20,000, ama maina ya silfere 2,000 ne mingila ya bashimapepo 67.

73 Kabili bashimapepo, abena Lebi, abalelonda impongolo, bakemba,+ abantu bamo, abalebombela pe tempele* na bena Israele bambi abashala* baikele mu misumba yabo.+ Ilyo umweshi walenga 7 wafikile,+ abena Israele bonse ninshi bekala mu misumba yabo.+

8 Lyena abantu bonse balongene pamo no mutima umo mu lubansa ulwaloshenye ne Mpongolo ya Menshi.+ Kabili baebele Esra+ uwalekopolola amafunde* ukuleta ibuuku lya Mafunde ya kwa Mose,+ ayo Yehova aebele Israele ukulakonka.+ 2 E ico pa bushiku bwa kubalilapo ubwa mweshi walenga 7,+ Esra shimapepo aletele ibuuku lya Mafunde+ pa kuti abelengele abaume, abanakashi na bantu bonse abali no kwishiba umo amafunde yalolele. 3 Kabili abelengeele abantu ibuuku lya mafunde ninshi nasansula ishiwi+ mu lubansa ulwaloshenye ne Mpongolo ya Menshi, ukufuma ku macaca ukufika akasuba pa kati. Abelengeele abaume, abanakashi na bonse abali no kwishiba umo amafunde yalolele, kabili abantu balekutikisha+ ifyo alebelenga mwi buuku lya Mafunde. 4 Kabili Esra uwalekopolola Amafunde* aiminine mupepi ne cintamba ca mbao, ico bapangile pa kuti bacibomfye pali uku kulongana; kabili ku kulyo kwakwe kwaiminine Matitia, Shema, Anaya, Uria, Hilkia na Maaseya, e lyo ku kuso kwakwe kwaiminine Pedaya, Mishaele, Malkiya,+ Hashumu, Hashibadana, Sekaria na Meshulamu.

5 Esra akupukwile ibuuku ninshi abantu bonse balemonako, pantu apo aiminine palisanswike kabili ilyo akupukwile ili ibuuku, abantu bonse balimine. 6 Lyena Esra alumbenye Yehova Lesa wa cine, Lesa Mukulu, kabili abantu bonse balandile abati, “Ameni!* Ameni!”+ e lyo baimisha amaboko yabo mu muulu. Lyena bafukamiine Yehova bafisha ne finso fyabo panshi. 7 Kabili Yeshua, Bani, Sherebia,+ Yamini, Akubu, Shabetai, Hodia, Maaseya, Kelita, Asaria, Yosabadi,+ Hanani, na Pelaya abali abena Lebi, balelondolwela abantu Amafunde,+ ninshi abantu bacili nabeminina. 8 Kabili bakonkenyepo ukubelenga ibuuku umwali Amafunde ya kwa Lesa wa cine ninshi nabasansula amashiwi. Balelondolola bwino bwino amafunde pa kuti abantu beshibe umo yalolele; e ico balengele abantu baumfwikisha ifyo balebabelengela.+

9 Lyena Nehemia uwali umulashi* pali ilya nshita, Esra+ shimapepo, kabili uwalekopolola amafunde* e lyo na bena Lebi abalesambilisha abantu amafunde baebele abantu bonse abati: “Buno bushiku bwa mushilo ubwa kwa Yehova Lesa wenu.+ Mwiloosha nelyo ukulila.” Pantu abantu bonse baleloosha ilyo bababelengeele Amafunde. 10 Abebele ati: “Kabiyeni mulye ifyawamisha,* munwe ne fyalowa. Abashikwete ifya kulya mubapeeleko,+ pantu buno bushiku bwa mushilo ubwa kwa Shikulu wesu, kabili mwiba no bulanda pantu ukusekelela uko Yehova amupeela kulamucingilila.”* 11 Kabili abena Lebi baletalalika abantu bonse abati: “Talaleni! buno bushiku bwa mushilo, mwiba no bulanda.” 12 E ico abantu bonse baile mu kulya no kunwa kabili balipeeleko na bantu bambi ifya kulya. Balesekelela nga nshi+ pantu balyumfwikishe ifyali mu mafunde.+

13 Kabili pa bushiku bwalenga bubili, intungulushi sha mu mayanda ya bashibo isha bantu bonse, bashimapepo na bena Lebi, baile kuli Esra uwalekopolola amafunde* pa kuti beshibilepo na fimbi pa fyali mu Mafunde. 14 Lyena mu Mafunde ayo Yehova apeele Mose basangilemo apo balemba ukuti, abena Israele balingile ukulaikala mu nsakwe pa nshita ya mutebeto mu mweshi walenga 7,+ 15 kabili bafwile ukubilisha+ mu misumba yabo yonse na mu Yerusalemu monse abati: “Kabiyeni ku citungu ca mpili muyeleta imisambo ya miolife, imisambo ya fimuti fya mafuta, iya muhadasi, iya tuncindu ne misambo ya fimuti fimbi pa kuti mupangemo insakwe, ukulingana ne fyalembwa mu mafunde.”

16 E ico abantu baileleta imisambo, pa kuti cila muntu aipangile insakwe pa mutenge wa ng’anda yakwe e lyo na mu mansa shabo, mu mansa sha ng’anda ya kwa Lesa wa cine,+ mu lubansa lwa ku Mpongolo ya Menshi+ na mu lubansa lwa ku Mpongolo ya kwa Efraimu.+ 17 E ico bonse ababwelele muli bunkole balipangile insakwe, batendeka no kwikalamo, pantu abena Israele tabacitile ifi ukutula ilyo Yoshua+ umwana wa kwa Nuni ali no mweo ukufika pali bulya bushiku, e ico balisekelele nga nshi.+ 18 Kabili cila bushiku balebelenga mwi buuku lya Mafunde ya kwa Lesa wa cine,+ ukufuma pa bushiku bwa kubalilapo ukufika pa bushiku bwa kulekelesha. Kabili balikwete umutebeto pa nshiku 7, lyena pa bushiku bwalenga 8 balilongene ukulongana kwacindamisha, ukulingana ne fyalembelwe mu mafunde.+

9 Pa bushiku bwalenga 24 ubwa uyu mweshi, abena Israele balilongene pamo; balifungile ninshi nabafwala insamu kabili bali-ikubile ulukungu.+ 2 Abena Israele inkonko bonse bali-ipaatwile ku bena fyalo,+ kabili balimine balayebelela imembu shabo ne filubo fya bashibo.+ 3 Lyena balimine apo bali kabili babelengele mwi buuku lya Mafunde+ ya kwa Yehova Lesa wabo pa ma-awala nalimo yatatu aya kasuba ninshi nabasansula amashiwi. Lyena pa ma-awala yambi yatatu baleyebelela imembu kabili balekontamina Yehova Lesa wabo.

4 Lyena Yeshua, Bani, Kadmiele, Shebania, Buni, Sherebia,+ Bani na Kenani baiminine pa cintamba+ ca bena Lebi kabili bapepele kuli Yehova Lesa wabo ninshi nabasansula amashiwi. 5 Kabili abena Lebi, e kutila Yeshua, Kadmiele, Bani, Hashabinia, Sherebia, Hodia, Shebania na Petahia balandile abati: “Iminineni kabili lumbanyeni Yehova Lesa wenu ukufuma umuyayaya ukuya umuyayaya.+ Lekeni balumbanye ishina lyenu ilya bukata, ilyacila pa fyo abantu bengamulumbanya ne fyo bengamupaala.

6 “Takwaba Lesa uwaba nga imwe mwe Yehova.+ Mwapangile imyulu ne myulu ya myulu na fyonse ifyabamo. Mwapangile ne calo na fyonse ifyabamo na babemba na fyonse ifyabamo. Kabili mulacingilila fyonse pa kuti fibe ifya mweo, ifya mu muulu fyonse filamukontamina. 7 Nimwe Yehova Lesa wa cine, uwasalile Abramu+ no kumufumya mu Uri+ umusumba wa bena Kaldi kabili mwa-alwile ishina lyakwe lyaba Abrahamu.+ 8 Mwamwene ukuti ali ne cishinka mu mutima wakwe;+ e ico mwapangene nankwe icipangano ca kuti mukamupeela icalo ca bena Kanaani, abena Hiti, abena Amore na bena Perisi, abena Yebusi na bena Gegashi, pa kuti abana*+ bakwe bakacipyane kabili mwalifikilishe ifyo mwalaile pantu mwalilungama.

9 “Mwalimwene ifyo ifikolwe fyesu fyalecula mu Egupti,+ kabili ilyo balilile kuli imwe pali Bemba Wakashika mwalyumfwile. 10 Lyena mwacitile ifishibilo ne fipesha amano pa kuti mukande Farao na babomfi bakwe bonse e lyo na bantu bonse aba mu calo cakwe,+ pantu mwalishibe ukuti balicushishe+ abantu benu. Mwalengele ishina lyenu lyaishibikwa ica kuti na pali ino nshita lyalishibikwa.+ 11 Kabili mwa-akenye bemba ninshi balemonako, ica kuti ba-abwike pa mushili uwauma.+ Mwapoosele na balebakonka apashika, nga filya umuntu engapoosa ilibwe mu menshi ayalulunkene.+ 12 Akasuba mwalebatungulula ukubomfya intumba ye kumbi, e lyo ubushiku mwalebatungulula ukubomfya intumba ya mulilo, pa kuti mulebasanikila mu nshila iyo balingile ukupitamo.+ 13 Mwaishile pa Lupili lwa Sinai+ kabili mwalandile nabo ukufuma ku muulu.+ Mwabapeele ubupingushi bwalungama, amafunde ya cine* e lyo ne fya kukonka ifisuma.+ 14 Mwalengele baishiba Isabata+ lyenu ilya mushilo. Mwabapeele ifya kukonka na mafunde ukupitila mu mubomfi wenu Mose. 15 Ilyo bali ne nsala mwabapeele umukate ukufuma ku muulu,+ kabili ilyo bali ne cilaka mwabafumiishe amenshi mu cilibwe.+ Kabili mwabebele ukwingila no kupoka icalo ico mwalapile* ukuti mukabapeela.

16 “Lelo abali ifikolwe fyesu, baishileba ne cilumba+ kabili baishileba bacintomfwa,*+ tabalekonka amafunde yenu. 17 Balikeene ukumfwa+ kabili balilabile ifipesha amano ifyo mwabacitiile, lelo baishileba bacintomfwa* kabili baisonteele umuntu uwa kubatungulula pa kuti babwelelemo ku Egupti uko bali abasha.+ Lelo imwe muli Lesa uwaiteyanya ukweleela, uwa cikuuku,*+ uwa luse, uukokola ukukalipa kabili uwaba sana no kutemwa ukushipwa,* kabili tamwabalekeleshe.+ 18 Na lintu baipangiile umwana wa ng’ombe* balalanda no kuti, ‘Uyu e Lesa wenu uwamufumishe mu calo ca Egupti,’+ kabili na lintu bamusaalwile nga nshi, 19 tamwabalekeleshe mu matololo+ pa mulandu wa kuti mwalikwatisha uluse. Intumba ye kumbi tayalekele ukubatungulula akasuba, nangu ni ntumba ya mulilo nayo tayalekele ukubasanikila mu nshila iyo baali no kupitamo.+ 20 Kabili mwabapeele umupashi wenu uusuma pa kuti babe na mano.+ Tamwabatanine mana iya kuti balye+ kabili mwalibapeele na menshi ilyo bali ne cilaka.+ 21 Pa myaka 40 mwalebapeela ifya kulya mu matololo.+ Tababulishe nangu kamo, ifya kufwala fyabo tafyasapwike,+ na makasa yabo tayafimbile.

22 “Mwabapeele amabufumu ne nko, mwabaakenye+ icalo ca kwa Sihone,+ e kutila icalo ca mfumu Heshebone,+ e lyo ne calo ca kwa Oge+ imfumu ya Bashani pa kuti fibe ifyalo fyabo. 23 Kabili mwalengele abana babo bafula nge ntanda sha mu muulu.+ Lyena mwabaletele mu calo ico mwalaile ifikolwe fyabo ukuti mukabapeela pa kuti cikabe icalo cabo.+ 24 E ico abana babo balingiile mu calo no kucipoka,+ kabili mwabacimfisheeko abena Kanaani+ abaleikala mu calo. Mwalengele bacimfya imfumu shabo na bantu ba mu calo ica kuti babacitile ifyo balefwaya. 25 Kabili bapokele ne misumba ya malinga+ ne mpanga ya mufundo.+ Bapokele na mayanda umwali ifisuma ifingi sana, ifishima, amabala ya myangashi na ya miolife+ ne fimuti ifingi ifyaletwala ifisabo. E ico baliliile no kwikuta, kabili balinine pa mulandu wa kutila mwalibacitiile ifisuma ifingi.

26 “Lelo baishileba bacintomfwa kabili balimupondokele,+ balilekele ukukonka amafunde yenu.* Balipeye bakasesema benu abalebasoka pa kuti babwelele kuli imwe, kabili balimusaalwile nga nshi.+ 27 Ifi fyalengele mwaleka abalwani babo balebacimfya+ kabili balebacululusha.+ Lelo ilyo balecula balelilila kuli imwe, na imwe mwaleumfwa ku muulu; kabili pa mulandu wa kuti mwalikwatisha uluse mwalebatumina aba kubapususha ku balwani babo.+

28 “Nomba nga batendeka fye ukwikala umutende, balebwekeshapo ukucita ifyabipa,+ na imwe mwaleleka abalwani babo babacimfya, kabili balebacusha.*+ Lyena balebwelela kuli imwe no kulomba ukuti mubapusushe,+ na imwe mwaleumfwa ku muulu kabili pa miku iingi mwalebapususha pantu mwalikwatisha uluse.+ 29 Nangu ca kuti mwalebasoka pa kuti batendeke ukukonka Amafunde yenu na kabili, baleituntumba kabili balekaana ukukonka amafunde yenu.+ Tabalekonka ifyo mwalebeba ifya kuti umuntu nga afikonka kuti aba no mweo.+ Lelo balimufutatile kabili balimupondokeele,* balikeene ukumfwa ifyo mwalebeba. 30 Mwalibatekanishiishe pa myaka iingi,+ kabili ukubomfya umupashi wenu mwatwalilile ukubasokela muli bakasesema benu, lelo tabaleumfwa. Mwasukile mwaleka abantu ba mu fyalo fimbi babacimfya.+ 31 Kabili pa mulandu wa kuti mwalikwatisha uluse, tamwabalofeshe+ nelyo ukubalekelesha, pantu nimwe Lesa wa cikuuku* kabili uwa luse.+

32 “Nomba mwe Lesa wesu, Lesa mukulu, uwa maka kabili uwa kutiinya, uwasunga icipangano kabili uwakwata ukutemwa ukushipwa,+ mwilaba amacushi yonse ayatuponena, ayaponena imfumu shesu, bacilolo besu,+ bashimapepo besu,+ bakasesema besu,+ ifikolwe fyesu na bantu benu bonse ukutula ilyo imfumu sha ku Asiria+ shaleteka ukufika na buno bushiku. 33 Te kuti tumupeele umulandu pa mafya yonse aya ayatucitikila, pantu muli ba cishinka, fwe babifya ni fwe.+ 34 Lelo imfumu shesu, bacilolo besu, bashimapepo besu ne fikolwe fyesu, tabalekonka amafunde yenu, kabili tabalebika amano ku fyo mwalebeba na ku fyo mwalebasoka. 35 Na lintu imfumu shabo shalebateka kabili na lintu mwalebacitila ifisuma ifingi, baleikala na mu calo icikalamba kabili ica mufundo ico mwabapeele, tabalemubombela+ kabili tabalekele ukucita ifyabipa. 36 E ico ifwe lelo, tuli basha+ mu calo ico mwapeele bashifwe pa kuti balelya ifisabo fya ciko, kabili baleipakisha ifintu ifisuma ifya muli ici calo. 37 Pa mulandu wa membu shesu, ifisabo fya ici calo ifingi fiya ku mfumu sha ku fyalo fimbi.+ Ishi imfumu shituteka ukulingana ne fyo shilefwaya kabili ifi fine e fyo shiteka ne nama shesu, kanshi tulecula nga nshi.

38 “E ico pa mulandu ne fi fyonse, twalasuminishanya ifyo twakulacita+ kabili twalafilemba. Lyena bacilolo besu, abena Lebi e lyo na bashimapepo besu balafwatikapo icifwati.”+

10 Abafwatikepo icifwati+ ni aba:

9 Abena Lebi abafwatikepo icifwati ni aba: Yeshua umwana wa kwa Asania, Binui uwatuntwike muli Henadadi, Kadmiele,+ 10 Shebania, Hodia, Kelita, Pelaya, Hanani, 11 Mika, Rehobu, Hashabia, 12 Sakuri, Sherebia,+ Shebania, 13 Hodia, Bani na Beninu.

14 Ishi e ntungulushi sha bantu ishafwatikepo icifwati: Paroshe, Pehati-moabu,+ Elamu, Satu, Bani, 15 Buni, Asigadi, Bebai, 16 Adoniya, Bigibai, Adini, 17 Atere, Hisekia, Asuri, 18 Hodia, Hashumu, Besai, 19 Harifu, Anatote, Nebai, 20 Magipiashi, Meshulamu, Hesiri, 21 Meshesabele, Sadoke, Yadua, 22 Pelatia, Hanani, Anaya, 23 Hoshea, Hanania, Hashubu, 24 Haloheshe, Pilha, Shobeke, 25 Rehumu, Hashabina, Maaseya, 26 Ahiya, Hanani, Anani, 27 Maluki, Harimu, na Baana.

28 Abantu bambi abashala, bashimapepo, abena Lebi, abalelonda pa mpongolo, bakemba, abalebombela pe tempele,* na bonse abaipaatwile ku bantu ba mu fyalo fimbi pa kuti balekonka amafunde ya kwa Lesa wa cine,+ kumo na bakashi babo, abana babo abaume na bana babo abanakashi, bonse abali no kwishiba umo amafunde yalolele— 29 bailundile kuli bamunyinabo bashimucindikwa, kabili balapile umulapo wa kuti nga tabakonkele amafunde ayo Lesa wa cine abapeele ukupitila mu mubomfi wakwe Mose, Lesa ali no kubatiipa. Balapile ukuti bali no kulakonka amafunde yonse aya kwa Yehova Shikulwifwe, ubupingushi bwakwe, na fyonse ifyo abebele ukulakonka. 30 Balapile no kuti tabali no kuufya abana babo abanakashi ku ba mu fyalo fimbi, nelyo ukuleka abana babo abaume ukuupa aba ku fyalo fimbi.+

31 Abantu ba mu fyalo fimbi nga baleta ifya kulya ifyalekanalekana* ne fintu fimbi ifya kushitisha pa bushiku bwe Sabata+ nelyo pa bushiku bwa mushilo,+ tatwakulashita. Na kabili tukalaleka impanga yatuusha mu mwaka walenga 7,+ kabili tatwakulapinda inkongole.+

32 Kabili twasuminishenye ukuti cila muntu akulapeela amagramu 4 aya silfere* cila mwaka aya kubomfya ku mulimo wa pa ng’anda* ya kwa Lesa wesu,+ 33 ku mulimo wa kupanga umukate+ wa kutuula, ku mutuulo wa ngano uo baletuula lyonse,+ ku mutuulo wa koca uo baletuula lyonse pa Masabata,+ pa kutampa kwa myeshi,+ pa nshita ya mitebeto,+ pa mituulo ya mushilo, pa mituulo ya pa lubembu+ iya kufutilako abena Israele na ku milimo yonse iya pa ng’anda ya kwa Lesa wesu.

34 Na kabili twalipendwile pa kuti twishibe ilyo indupwa sha bashimapepo, abena Lebi na bantu bambi abashala bali no kulaleta inkuni ku ng’anda ya kwa Lesa cila mwaka. Ishi inkuni baleshibomfya pa koca amalambo pa ciipailo ca kwa Yehova Lesa wesu nga fintu balembele mu Mafunde.+ 35 Kabili cila mwaka twakulaleta ku ng’anda ya kwa Yehova, ifilimwa ifya kulabalilapo ukupya mu calo cesu, e lyo ne fisabo ifyalekanalekana ifya kulabalilapo ukupya,+ 36 twasuminishenye no kuti twakulatwala ku ng’anda ya kwa Lesa wesu, kuli bashimapepo ababombela pali iyi ng’anda,+ abana besu abaume amabeli, amabeli ya ng’ombe,+ aya mpaanga, aya mbushi na ya fitekwa fimbi, ukulingana ne fyo balembele mu Mafunde. 37 Twakulaleta no buunga ubushapeleka sana ubwa ngano ishabalilapo ukupya,+ imituulo, ifisabo ifyalekanalekana,+ umwangashi uupya na mafuta.+ Twakulafitwala kuli bashimapepo mu miputule ya kusungilamo ifintu* iya mu ng’anda ya kwa Lesa wesu.+ Twakulapeela na bena Lebi+ ifya pe kumi ifya pali fyonse ifyo twakulasombola mu calo cesu, pantu abena Lebi e bapoka ifya pe kumi mu misumba yonse umwaba amabala.

38 Kabili shimapepo umwana wa kwa Aarone afwile ukuba na bena Lebi ilyo balepoka ica pe kumi, kabili abena Lebi bafwile ukutwala ica pe kumi ca pa fya pe kumi mu miputule ya kusungilamo ifintu* iya mu ng’anda ya kwa Lesa wesu.+ 39 Pantu mu miputule ya kusungilamo ifintu* e mo abena Israele na bana ba kwa Lebi bafwile ukutwala imituulo+ ya ngano, umwangashi upya na mafuta.+ Kabili muli iyi ine imiputule e mo basungila ne fipe fya pa ncende ya mushilo. Kabili e mwikala bashimapepo abalebombela pa ng’anda ya kwa Lesa pali ilya nshita, e lyo na balinshi ba pa mpongolo na bakemba. Tatwakalekeleshe ing’anda ya kwa Lesa wesu.+

11 Nomba bacilolo ba bantu baleikala mu Yerusalemu,+ lelo abantu abashala balipendwile+ pa kuti basale ulupwa lumo pa ndupwa 10 ulwali no kulaikala mu Yerusalemu, umusumba wa mushilo. Lyena indupwa shimbi ishashala shali no kutwalilila ukwikala mu misumba imbi. 2 Kwali abaume na bambi abaitemenwe ukulaikala mu Yerusalemu, kabili abantu bonse balibatashishe ukufuma panshi ya mitima yabo.

3 Ishi e ntungulushi sha mu citungu ishaleikala mu Yerusalemu. (Abena Israele abashala, bashimapepo, abena Lebi, abalebombela pe tempele,*+ na batuntwike mu babomfi ba kwa Solomone,+ baleikala mu misumba imbi iya mu Yuda, cila muntu pa ncende bamupeele mu musumba wakwe.+

4 Bamo aba mu mukowa wa kwa Yuda no mukowa wa kwa Benjamini nabo baleikala mu Yerusalemu.) Pa ba mu mukowa wa kwa Yuda pali Ataya umwana wa kwa Usia, umwana wa kwa Sekaria, umwana wa kwa Amaria, umwana wa kwa Shefatia, umwana wa kwa Mahalalele uwatuntwike mu lupwa lwa kwa Perese,+ 5 na Maaseya umwana wa kwa Baruki, umwana wa kwa Kol-hose, umwana wa kwa Hasaya, umwana wa kwa Adaya, umwana wa kwa Yoyaribu umwana wa kwa Sekaria uwatuntwike mu lupwa lwa bena Shela. 6 Abaume ba maka abatuntwike muli Perese abaleikala mu Yerusalemu bali 468.

7 Kabili aba mu mukowa wa kwa Benjamini ni aba: Salu+ umwana wa kwa Meshulamu, umwana wa kwa Yoede, umwana wa kwa Pedaya, umwana wa kwa Kolaya, umwana wa kwa Maaseya, umwana wa kwa Itiele, umwana wa kwa Yeshaya. 8 Lyena abakonkelepo ba mu lupwa lwa kwa Gabai na Salai, bonse pamo bali 928. 9 Kabili Yoele umwana wa kwa Sikri e walebangalila, e lyo Yuda umwana wa kwa Hasenua e wali inkonkani yakwe mu musumba.

10 Pali bashimapepo pali: Yedaya umwana wa kwa Yoyaribu, Yakini,+ 11 Seraya umwana wa kwa Hilkia, umwana wa kwa Meshulamu, umwana wa kwa Sadoke, umwana wa kwa Merayote, umwana wa kwa Ahitubu,+ uwali intungulushi pa ng’anda* ya kwa Lesa wa cine, 12 na bamunyinabo abalebomba imilimo pa ng’anda ya kwa Lesa, bonse pamo bali 822. Bambi abali pali bashimapepo ni Adaya umwana wa kwa Yerohamu, umwana wa kwa Pelalia, umwana wa kwa Amsi, umwana wa kwa Sekaria, umwana wa kwa Pashihuri,+ umwana wa kwa Malkiya, 13 na bamunyina, intungulushi sha mayanda ya bashibo bonse pamo bali 242; na Amashisai umwana wa kwa Asarele, umwana wa kwa Ahisai, umwana wa kwa Meshileemote, umwana wa kwa Imere, 14 na bamunyinabo, abaume abali aba maka kabili abashipa, bonse pamo bali 128, kabili uwalebangalila ni Sabdiele uwa mu lupwa ulwalumbuka.

15 Pa bena Lebi pali: Shemaya+ umwana wa kwa Hashubu, umwana wa kwa Asrikamu, umwana wa kwa Hashabia, umwana wa kwa Buni, 16 Shabetai+ na Yosabadi,+ abali intungulushi sha bena Lebi kabili abaleangalila imilimo imbi pa ng’anda ya kwa Lesa wa cine; 17 na Matania+ umwana wa kwa Mika, umwana wa kwa Sabdi, umwana wa kwa Asafi,+ uwaletungulula bakemba kabili uwaleimba inyimbo sha kulumbanya Lesa pa nshita ya kupepa,+ na Bakibukia uwalemwafwilisha na Abda umwana wa kwa Shamua, umwana wa kwa Galali, umwana wa kwa Yedutuni.+ 18 Abena Lebi bonse abaleikala mu musumba wa mushilo bali 284.

19 Abalelinda impongolo bali ni Akubu, Talmone,+ na bamunyinabo, bonse pamo bali 172.

20 Abena Israele abashala, bashimapepo na bena Lebi, baleikala mu misumba imbi iya mu Yuda, cila muntu pa ncende iyo bamupeele.* 21 Abalebombela pe tempele*+ bena baleikala mu Ofele,+ kabili Siha na Gishpa e balebangalila.

22 Uwaleangalila abena Lebi mu Yerusalemu ni Usi umwana wa kwa Bani, umwana wa kwa Hashabia, umwana wa kwa Matania,+ umwana wa kwa Mika uwatuntwike mu bana ba kwa Asafi bakemba, e waleangalila imilimo ya pa ng’anda ya kwa Lesa wa cine. 23 Pantu imfumu yalipangile ifunde+ lya kuti cila bushiku balepeela bakemba ifyo balekabila. 24 Kabili Petahia umwana wa kwa Meshesabele uwatuntwike muli Sera umwana wa kwa Yuda, e walepanda amano imfumu* pa fyo yali no kucita pa milandu yonse iyo abantu baleleta ku mfumu.

25 AbaYuda bamo baikele mu Kiriat-arba+ na mu misumba ya iko iinono, mu Dibone na mu misumba ya iko iinono, mu Yekabiseele+ ne mishi ya iko, 26 mu Yeshua, mu Molada,+ mu Bete-pelete,+ 27 mu Hasari-shauli,+ mu Beere-sheba na mu misumba ya iko iinono, 28 mu Siklagi,+ mu Mekona na mu misumba ya iko inono. 29 mu En-rimone+ mu Sora+ mu Yarimuti, 30 mu Sanoa,+ mu Adulamu na mu mishi ya iko, mu Lakishi+ na mu mishi ya iko, mu Aseka+ na mu misumba ya iko iinono. Baikele* mu Beere-sheba ukuyafika ku mupokapoka wa Hinomu.+

31 Aba mu mukowa wa kwa Benjamini bena baikele mu Geba,+ mu Mikmashi, mu Aiya, mu Betele+ na mu misumba ya iko iinono, 32 mu Anatote,+ mu Nobu+ na mu Anania, 33 mu Hasore, mu Rama,+ mu Gitaimu, 34 mu Hadidi, mu Seboimu, mu Nebalati, 35 mu Lode na mu Ono,+ umupokapoka umwaleikala abacenjela mu fya kupangapanga. 36 Kabili amabumba yamo aya bena Lebi ayaleikala mu Yuda, bayebele ukulaikala mu citungu ca kwa Benjamini.

12 Bashimapepo na bena Lebi abaile pamo na Serubabele+ umwana wa kwa Shealtiele+ na Yeshua+ ku Yerusalemu ni aba: Seraya, Yeremia, Esra, 2 Amaria, Maluki, Hatushi, 3 Shekania, Rehumu, Mereemote, 4 Ido, Ginetoi, Abiya, 5 Miyamini, Maadia, Bilgai, 6 Shemaya, Yoyaribu, Yedaya, 7 Salu, Amoke, Hilkia na Yedaya. Aba e bali intungulushi sha bashimapepo ne sha bamunyinabo mu nshiku sha kwa Yeshua.

8 Abena Lebi bali ni Yeshua, Binui, Kadmiele,+ Sherebia, Yuda na Matania.+ Matania na bamunyina e baletungulula pa kwimba inyimbo sha kutootela Lesa. 9 Kabili Bakibukia na Uni bamunyinabo, baloshenye nabo ilyo balebomba umulimo wa bulinshi. 10 Yeshua afyele Yoyakimu, Yoyakimu na o afyele Eliashibu, na Eliashibu+ afyele Yoyada.+ 11 Yoyada afyele Yonatani, Yonatani na o afyele Yadua.

12 Mu nshiku sha kwa Yoyakimu, aba e bali bashimapepo kabili intungulushi sha mayanda ya bashibo: Meraya e waleimininako ulupwa lwa kwa Seraya,+ Hanania e waleimininako ulupwa lwa kwa Yeremia; 13 Meshulamu e waleimininako ulupwa lwa kwa Esra;+ Yehohanani e waleimininako ulupwa lwa kwa Amaria; 14 Yonatani e waleimininako ulupwa lwa kwa Maluki; Yosefe e waleimininako ulupwa lwa kwa Shebania; 15 Adina e waleimininako ulupwa lwa kwa Harimu;+ Helekai e waleimininako ulupwa lwa kwa Merayote; 16 Sekaria e waleimininako ulupwa lwa kwa Ido; Meshulamu e waleimininako ulupwa lwa kwa Ginetone; 17 Sikri e waleimininako ulupwa lwa kwa Abiya,+ . . . ;* e waleimininako ulupwa lwa kwa Minyamini; Piltai e waleimininako ulupwa lwa kwa Moadia; 18 Shamua e waleimininako ulupwa lwa kwa Bilgai;+ Yehonatani e waleimininako ulupwa lwa kwa Shemaya; 19 Matenai e waleimininako ulupwa lwa kwa Yoyaribu; Usi e waleimininako ulupwa lwa kwa Yedaya;+ 20 Kalai e waleimininako ulupwa lwa kwa Salai; Ebere e waleimininako ulupwa lwa kwa Amoke; 21 Hashabia e waleimininako ulupwa lwa kwa Hilkia; na Netanele e waleimininako ulupwa lwa kwa Yedaya.

22 Mu nshiku sha kwa Eliashibu, Yoyada, Yohanani na Yadua+ ukufika na lintu Dariusi imfumu ya ku Persia aleteka, balelemba intungulushi sha mayanda ya bashibo isha bena Lebi nga filya fine balelemba bashimapepo.

23 Abena Lebi abali intungulushi sha mayanda ya bashibo balibalembele mwi buuku umo balelemba ifyalecitika pali ilya nshita, ukufika na mu nshiku sha kwa Yohanani umwana wa kwa Eliashibu. 24 Abali intungulushi sha bena Lebi ni Hashabia, Sherebia na Yeshua+ umwana wa kwa Kadmiele.+ Kabili bamunyinabo baloshenye ne shi intungulushi ilyo balelumbanya Lesa no kumutootela ukulingana ne fyo Davidi umuntu wa kwa Lesa wa cine alandile,+ kabili amabumba ya balinshi yaliloshenye. 25 Matania,+ Bakibukia, Obadia, Meshulamu, Talmone na Akubu,+ e balelonda pa mpongolo,+ abalelonda imiputule ya kusungilamo ifintu iyali mupepi ne mpongolo she tempele. 26 Balebomba uyu umulimo mu nshiku sha kwa Yoyakimu umwana wa kwa Yeshua,+ umwana wa kwa Yosadaki, mu nshiku sha kwa Nehemia intungulushi na mu nshiku sha kwa Esra+ shimapepo kabili uwalekopolola amalembo.*

27 Pa kupeela ilinga lya Yerusalemu kuli Lesa, baile mu kufwaya abena Lebi mu ncende ishalekanalekana umo baleikala kabili babaletele ku Yerusalemu pa kuti kube ukusefya, ukusekelela no kwimba inyimbo sha kutootela Lesa,+ ninshi balelisha amalimba, ifilimba fya nsale ne nsango. 28 Kabili abana ba bakemba* balilongene. Bafumine ku Citungu ca Yordani mu ncende ishali mupepi na Yerusalemu mu mishi ya bena Netofa,+ 29 ku Bete-gilgali+ na mu fitungu fya Geba+ na Asimabete,+ pantu bakemba bali-ikuulile imishi mu ncende shonse ishali mupepi na Yerusalemu. 30 Bashimapepo na bena Lebi bali-isangulwile kabili basangulwile abantu,+ impongolo+ ne linga.+

31 Lyena naebele bacilolo ba mu Yuda ukuti banine pe linga. Na-akenye na bakemba mu mabumba yabili ayakalamba aba kwimba inyimbo sha kutootela Lesa, na mabumba yabili aya bantu aya kubakonka pa numa. Ibumba limo ilya bakemba lyaleya ku kulyo pe linga ukulola ku mpongolo ya Cishala ca Mito.+ 32 Hoshaya na bacilolo bamo aba mu Yuda balekonka bakemba pa numa. 33 Bali pamo na Asaria, Esra, Meshulamu, 34 Yuda, Benjamini, Shemaya na Yeremia. 35 Abana ba bashimapepo bamo abo bali nabo abali na mapenga+ ni aba: Sekaria umwana wa kwa Yonatani, umwana wa kwa Shemaya, umwana wa kwa Matania, umwana wa kwa Mikaya, umwana wa kwa Sakuri, umwana wa kwa Asafi,+ 36 na bamunyina Shemaya, Asarele, Milalai, Gilalai, Maai, Netanele, Yuda na Hanani. Bali ne filimba nga filya Davidi umuntu wa kwa Lesa wa cine alelisha,+ kabili Esra+ uwalekopolola amalembo* ali pa ntanshi yabo. 37 Ilyo bafikile ku Mpongolo ya Kamfukumfuku+ baninine Amatabo+ ya Musumba wa kwa Davidi,+ ayali mupepi na pa kuninina ilinga. Bapitile apali Ing’anda ya kwa Davidi, bayafika na ku Mpongolo ya Menshi+ ku kabanga.

38 Ibumba limbi ilya bakemba abaleimba inyimbo sha kutootela Lesa, lyaile ku kuso.* Kabili ine na bantu bamo twalebakonka pa numa pa muulu we linga. Bapitile pa Lupungu lwa Fitofu+ bayafika kwi Linga lya Mutika Uukulu.+ 39 Lyena bapitile pa Mpongolo ya kwa Efraimu+ ne Mpongolo ya Musumba wa Kale,+ e lyo baya ku Mpongolo ye Sabi,+ ku Lupungu lwa kwa Hananele,+ ku Lupungu lwa Mea, ku Mpongolo ya Mpaanga;+ e lyo bayaiminina pa Mpongolo ya Mulinshi.

40 Amabumba yabili aya bakemba abaleimba inyimbo sha kutootela Lesa yaishileiminina pa ntanshi ya ng’anda ya kwa Lesa wa cine. E ico na ine ne ntungulushi shimo isho nali na sho twaliminine, 41 kabili Eliakimu, Maaseya, Minyamini, Mikaya, Elioenai, Sekaria na Hanania abali bashimapepo, nabo baliminine ninshi bali na mapenga. 42 Maaseya, Shemaya, Eleasari, Usi, Yehohanani, Malkiya, Elamu na Esere nabo baliminine. Bakemba baleimba inyimbo ninshi nabasansula amashiwi kabili Israhia e walebangalila.

43 Pali bulya bushiku batuulile amalambo ayengi nga nshi kabili balisekelele,+ pantu Lesa wa cine alengele basekelela nga nshi. Abanakashi na bana nabo balisekelele,+ ica kuti ifyo basekelele mu Yerusalemu fyaleumfwika no kutali.+

44 Pali bulya bushiku balisontele abaume aba kulolekesha pa miputule ya kusungilamo imisangulo,+ ifilimwa ifyabalilapo ukupya+ ne fya pe kumi.+ Abantu nga basombola ifyo balelima mu mabala yali mupepi ne misumba, balebuulapo fimo bapeela bashimapepo na bena Lebi ukulingana ne fyo amafunde yalandile.+ Ifyo abantu balepeela bashimapepo na bena Lebi+ balefisungila muli iyi miputule. Abantu mu Yuda balesekelela pantu bashimapepo na bena Lebi balebombela pe tempele. 45 Bashimapepo na bena Lebi batendeke ukubomba imilimo ya kwa Lesa wabo ne milimo ya kusangulula ukulingana ne fyo Davidi no mwana wakwe Solomone balandile. Ifi fine e fyo bakemba na balelinda impongolo bacitile. 46 Pantu kale mu nshiku sha kwa Davidi na Asafi kwali abaletungulula bakemba na baletungulula pa kwimba inyimbo sha kulumbanya Lesa ne sha kumutootela.+ 47 Kabili mu nshiku sha kwa Serubabele+ na mu nshiku sha kwa Nehemia, abena Israele bonse balepeela bakemba+ na balelinda impongolo+ ifyo balekabila cila bushiku. Na kabili balepaatulako fimo ifya kupeela abena Lebi,+ kabili abena Lebi na bo balepaatulako fimo ifya kupeela abatuntwike muli Aarone.

13 Pali bulya bushiku babelengeele abantu mwi buuku lya kwa Mose,+ kabili basangile apo balembele ukuti umwina Amone onse nelyo umwina Moabu+ talingile ukuba mu lukuta lwa kwa Lesa wa cine,+ 2 pantu tabapeele abena Israele ifya kulya na menshi, lelo baebele Balaamu ukuti abatiipe.+ Nomba Lesa wesu alengele icitiipu caba ipaalo.+ 3 Ilyo fye baumfwile ili ifunde, batendeke ukufumya abena fyalo bonse mu bena Israele.+

4 Nomba ilyo ifi fishilacitika, Eliashibu+ shimapepo uwalelolekesha pa miputule ya kusungilamo ifintu* pa ng’anda* ya kwa Lesa wesu+ ali ni lupwa wa kwa Tobia.+ 5 Amupeele umuputule uukalamba uwa kusungilamo ifintu,* umo balesungila umutuulo wa ngano, ububani bwabuuta, ifipe, icalenga 10* ica ngano, umwangashi uupya, na mafuta+ ifyo balepeela abena Lebi,+ bakemba na balinshi ba pa mpongolo, pamo no mutuulo balepeela bashimapepo.+

6 Pali iyi nshita nshali mu Yerusalemu, pantu nalibwelelemo ku Mfumu Artakishashete+ iya ku Babiloni mu mwaka walenga 32+ ukutula apo yatendekeele ukuteka. Ilyo papitile nshita nalombele imfumu ukuti insuminishe ukuya. 7 Lyena naishile ku Yerusalemu kabili namwene ifyabipa ifyo Eliashibu+ acitile. Apeele Tobia+ umuputule wa kusungilamo ifintu uwali mu lubansa lwa ng’anda ya kwa Lesa wa cine. 8 Nalifulilwe nga nshi pa fyo Eliashibu acitile, e ico napoosele panse ifipe fyonse ifya mu ng’anda ifya kwa Tobia ifyali mu muputule wa kusungilamo ifintu.* 9 Lyena naebele bamo ukuti bawamye iyi imiputule ya kusungilamo ifintu,* kabili nabwesesheemo ifipe fya mu ng’anda ya kwa Lesa wa cine,+ no mutuulo wa ngano no bubani bwabuuta.+

10 Kabili naishileishiba ukuti abantu tabalepeela+ abena Lebi ifyo balingile ukulabapeela,+ ica kuti abena Lebi na bakemba balilekele ukubomba imilimo balebomba, cila muntu abweleele kwi bala lyakwe.+ 11 E ico nakalipiile intungulushi+ kabili nashipwishe nati: “Cinshi ico mwalekela ing’anda ya kwa Lesa wa cine yalekeleshiwa?”+ Lyena naitile abena Lebi e lyo nabeba ukuti batendeke ukubomba imilimo balebomba. 12 Kabili abaYuda bonse baletele ifya pe kumi+ fya pa ngano, umwangashi uupya na mafuta, kabili bafibikile mu miputule ya kusungilamo ifintu.+ 13 Lyena nasontele Shelemia shimapepo, Sadoke uwalekopolola amalembo* na Pedaya umwina Lebi ukuti baleangalila imiputule ya kusungilamo ifintu, kabili Hanani umwana wa kwa Sakuri, umwana wa kwa Matania e walebafwilisha, pantu aba baume bali abacetekelwa. Aba e balebomba umulimo wa kwakanya bamunyinabo ifyo abantu baleleta.

14 Mwe Lesa wandi, mukanjibukishe+ na pali ici, kabili mwikalaba ukutemwa ukushipwa uko nalanga ukupitila mu milimo nabomba iyakuma ing’anda yenu ne fyo nacitila ababomba imilimo pali iyi ng’anda.*+

15 Muli shilya nshiku namwene abantu mu Yuda balekama imyangashi* pe Sabata.+ Balelonganika imifuko ya ngano e lyo baininika pa mpunda. Baleleta umwangashi, ifisabo fya mwangashi, amakunyu ne fintu fimbi ku Yerusalemu pa bushiku bwe Sabata.+ E ico nalibasokele ukuti belashitisha ifintu pe Sabata. 16 Kabili abena Turi abaleikala muli uyu musumba, baleleta isabi ne fintu fimbi ifyalekanalekana kabili balefishitisha ku baYuda na ku bena Yerusalemu pa bushiku bwe Sabata.+ 17 E ico nakalipiile intungulushi sha mu Yuda kabili nashebele nati: “Ifi mulecita tafiweme, tamulecindika ubushiku bwe Sabata. 18 Bushe ifi mulecita te filya ifikolwe fyenu fyacitile, ica kuti Lesa alitukandile aonaula na uno musumba? Ifi mushilesunga Isabata+ filelenga Lesa afulilwe sana abena Israele.”

19 Ilyo fye kwatendeke ukufiita ninshi Isabata talilatendeka, naebele bamo ukuti besale ifiibi fya pa mpongolo. Nabebele no kuti tabafwile ukufiisula mpaka Isabata likapwe. Naebele na babomfi bandi bamo ukuti bekale pa mpongolo pa kuti kwiba umuntu nangu umo uwakuleta ifya kushitisha pa bushiku bwe Sabata. 20 E ico pa muku umo nelyo ibili, bashimakwebo na baleshitisha ifintu ifyalekanalekana baleele kunse ya musumba wa Yerusalemu. 21 Lyena nalibasokele kabili nabebele nati: “Cinshi ico mulesendamina mupepi ne linga? Nga mwabwekeshapo, nshakamupanye.” Ukutula bulya bwine bushiku tabatalile abaletapo ifya kushitisha pa bushiku bwe Sabata.

22 Kabili naebele abena Lebi ukuti, lyonse bafwile ukulaisangulula kabili baleisa mu kulinda impongolo pa kuti ubushiku bwe Sabata buleba ubwa mushilo.+ Pali ici na co mwe Lesa wandi, mukanjibukishishepo, kabili mukambelele uluse, pantu ukutemwa kwenu ukushipwa kukalamba.+

23 Muli shilya nshiku naishileishiba ukuti kwali abaYuda abaupile*+ abena Ashidode,+ abena Amone na bena Moabu.+ 24 Abana babo bamo balelanda iciAshidode, e lyo bambi balelanda indimi shimbi, lelo takwali nangu umo pa bana babo uwaishibe ukulanda ululimi lwa baYuda. 25 E ico nalibakalipiile no kubasoka pa fyo Lesa ali no kubapingula kabili nalyuminepo abaume bamo,+ nabanukula no mushishi. Kabili nabebele nati, lapeni mwi shina lya kwa Lesa ukuti: “Tamwakoofye abana benu abanakashi ku bana babo abaume, kabili tamwakaleke abana benu abaume bakoope abana babo abanakashi, e lyo na imwe bene tamwakoope abana babo abanakashi.+ 26 Icalengele ukuti Imfumu Solomone iya bena Israele ibembuke ni co yaupile abanakashi ba ku fyalo fimbi. Mu nko shonse tamwali imfumu iyali nga ena;+ kabili Lesa wakwe alimutemenwe,+ ica kuti amulengele aba imfumu ya bena Israele bonse. Lelo abanakashi ba ku fyalo fimbi balengele na o wine abembuka.+ 27 Tatwatala atumfwapo ulubembu ulukalamba ngo ulu mwacita, mwalibembukila Lesa wesu ifi mwaupa abanakashi ba ku fyalo fimbi.”+

28 Umwana umo uwa kwa Yoyada+ umwana wa kwa Eliashibu+ shimapepo mukalamba aupile umwana wa kwa Sanbalati+ umwina Horone. E ico nalimutamfishe.

29 Mwe Lesa wandi, mukebukishe aba bantu kabili mukabakande pantu balikowesha bushimapepo ne cipangono ico mwapangene na bashimapepo+ na bena Lebi.+

30 Kabili nalibasangulwile ku fintu fyonse ifyo abena fyalo balecita ifyalengele bakowele, napeele na bashimapepo na bena Lebi imilimo iyo cila muntu ali no kulabomba.+ 31 Nalipekenye no kuti abantu baleleta inkuni+ pa nshita balingile ukulaletelapo. Nabebele no kuti baleleta ifilimwa ifyabalilapo ukupya.

Mwe Lesa wandi mwikandaba, kabili mpaaleni.+