Abacaice Bepusha Ukuti . . .

Bushe Ningile Ukuyebelela Ulubembu Lwandi?

“Ndeumfwe nsoni nga nshi, nshishibe ica kucita. Ndefwaya ukweba abafyashi bandi, lelo ndeumfwe nsoni nga nshi.”—Lisa.a

E FYALEMBELE umukashana umo uwapelenganishiwa. Atemwanene no ushasumina pa ciputulwa ca myaka iyafulilako lintu bushiku bumo, pa mulandu wa kukolwa ubwalwa, aibimbile mu kwampana kwa bwamba no yu mwaume.

Ku ca bulanda, ifintu fya musango yo filacitika limo limo, nangu fye pa kati ka misepela ya Bwina Kristu. Ilyo tucili abaice kabili abashabelesha sana, e lyo tucililako kupange filubo. Lelo ilintu tacaba mulandu sana ukucite cilubo cinono, cili icapusanako nga nshi ku kubimbwamo mu kulufyanya kwabipisha, pamo nga bucisenene. (1 Abena Korinti 6:9, 10) Lintu ico cacitika, umusepela ulakabila ukwaafwiwa. Apaba ubwafya ni pa kuti tacaba icayanguka ukuyebelela ifilubo fyobe.

Umukashana umo uwa Bwina Kristu aibimbile mu kwampana kwa bwamba ilyo ashilaupwa. Apingwilepo ukuyebelela kuli baeluda ba mu cilonganino, ukusala fye no bushiku ubo aali no kucite fyo. Lelo alitantalisheko inshiku. Pa numa, alitantalisheko inshiku na kabili. Bwangu bwangu, umwaka uutuntulu walipitile!

“Takuli Icifiseme”

Nga ca kuti waliwila mu lubembu lwabipisha, ulekabila ukwishiba ukuti ukwikala fye tondolo cintu cabipa nga nshi. Umulandu umo cabipila wa kuti, ilingi line fyonse filesa mu kwishibikwa pa numa. Ilyo aali umwana umunono, Mark alitobele icibeekobeeko ca kukobeka mu ŋanda ice bumba. Ebukisho kuti: “Naeseshe ukucilundinkanya na glue, lelo tapalepele abafyashi bandi baishilemona imilale.” Ca cine, tauli mwaice nomba. Lelo abafyashi abengi ilingi line kuti bailuka lintu pali icilubene ku bana babo.

“Naleesha ukufishilisha amafya yandi pa kubepo bufi,” e fyasumina Ann uwa myaka ya bukulu 15, “lelo ifintu fyaleya filebipilako fye.” Ilingi line, ubufi bulaya no kubwela. Kabili lintu abafyashi bobe baishiba ukuti walibabepele, nangu cibe shani bali no kufulwa—bakacilapo kufulwa ukucila fintu pambi baali no kuba nga ca kuti waileyebelela fye mu kwangufyanya.

Icacilanapo kucindama, Baibolo isoso kuti: “Takuli icifiseme icishakamoneke, nangu icibeleme icishakeshibikwe, no kusokoloka.” (Luka 8:17) Yehova aleshiba cintu twacita na cintu tulecita. Te kuti ufisame kuli wene nga fintu fye Adamu tafiseme nakalya. (Ukutendeka 3:8-11) Mu kupita kwa nshita, imembu shobe kuti na sho shasansalikwa.—1 Timote 5:24.

Ukwikala fye tondolo kuti kwakucena na mu nshila shimbi. Kemba wa malumbo Davidi alembele ukuti: “Ilyo natalele, yalifumwike amafupa yandi mu kukuuta kwandi akasuba konse; Pantu akasuba no bushiku ukuboko kwenu kwafinine pali ine.” (Ilumbo 32:3, 4) Ee, icisendo ca kufishilisha inkaama kuti cabe cafina nga nshi lwa mu nkuntu. Amasakamika no kuyumfwa uwa mulandu, capamo no kutiina ukwishibikwa, kuti fyakulenga ukuyumfwa uwabipilwa. Kuti watendeka ukuitalusha ku fibusa na ku lupwa. Kuti pambi wayumfwa fye no kuti Lesa na o wine nakutaluka! “Nali na kampingu wa mulandu pa kulenga Yehova ubulanda,” e fyalembele umusepela we shina lya Andrew. “Calencululusha.”

Ukusokolola

Bushe kwalibako inshila iili yonse iya kuilulwilamo ici cisendo ca mu nkuntu? Ee, e ko yaba! Kemba wa malumbo atile: “Namulengele ukwishibo lubembu lwandi, na mampuulu yandi nshafimbilepo; . . . e lyo imwe mwalekelele amampuulu ya lubembu lwandi.” (Ilumbo 32:5; linganyako 1 Yohane 1:9.) Andrew mu kupalako alilulwikwe nga nshi ukupitila mu kuyebelela ulubembu lwakwe. Ebukisho kuti: “Natununwike Yehova kabili ukufuma pa nshi ya mutima napepele ukuti andekelele.”

Kuti wacita cimo cine. Pepa kuli Yehova. Alishiba cintu wacita, lelo mu kuicefya sumina icilubo cobe mwi pepo kuli wene. Lombo kulekelelwa, ukukanashimba pa mulandu wa kuti uleyumfwa ifyo te kuti wafwiwe pantu walibipa ukucila mu cipimo. Yesu afwile pa kuti twingaipakisha ukwiminina kusuma na Lesa te mulandu no kukanapwililika kwesu. (1 Yohane 2:1, 2) Na kabili kuti walomba ubukose ukuti waluke ukwaluka kulekabilwa. Ukubelenga Ilumbo 51 kuti kwakwaafwa nga nshi pa kutununuka Lesa muli iyi nshila.

Ukweba Abafyashi Bobe

Nangu cibe fyo, ifingi filakabilwa ukucila ukuyebelela fye kuli Lesa. Na kabili walikakililwako ukweba abafyashi bobe. Balipeelwa umulimo kuli Lesa uwa kukukusha “mu kufunda no kukonkomesha kwa kwa Shikulu.” (Abena Efese 6:4) Kuti bacite ci lyeka fye lintu beshibe amafya yantu ukwete. Ukweba abafyashi bobe na ko te kuti kube ukwayanguka nelyo ukwa kusekesha. Lelo pa numa ya kukalifiwa pa kubalilapo, mu kupalishako bali no kubweshako mutima. Kuti pambi batemwa no kutemwa ukuti walibacetekela nga nshi ica kuti wasokolola ubwafya ukwete kuli bene. Umulumbe wa kwa Yesu uwa mwana umonaushi ulanda pa lwa mulumendo uwaibimbile muli bucisenene. Lelo lintu mu kupelako ayebelele, wishi alimupokelele na maboko yabili! (Luka 15:11-24) Ukwabulo kutwishika abafyashi bobe mu kupalako bali no kukwafwa. Na kabushe, bacili balikutemwa.

Ca cine, kuti pambi wasakamikwa ifyo uli no kukalifya abafyashi bobe. Lelo tacili kuyebelela ulubembu ukukalifya abafyashi bobe; ciba kucito lubembu e kubakalifya! Ukuyebelela e ncitilo ya kubalilapo ukulola ku kutontolola ubo bukali. Ann, uulandilwepo kale, aebele abafyashi bakwe kabili pa numa ya ico ayumfwile uwailulukwa nga nshi.b

Lelo icipindami na cimbi ku kuyebelela caba ni nsoni no kutiina ukuseebana. Kalemba wa busumino Esra tacitile membu umwine, lelo lintu atumbwile imembu sha baYuda banankwe, atile: “Ninjikatwe nsoni no kuseebana ku kwinune cinso candi kuli imwe, mwe Lesa wandi.” (Esra 9:6) Mu cituntulu, caliba fye bwino ukuyumfwa uwa nsoni lintu walufyanya. Cilangilila ukuti kampingu obe acili alebomba. Kabili mu kupita kwa nshita isho nsoni shili no kufumapo. Andrew alondolwele cene muli iyi nshila: “Cintu cayafya nga nshi kabili ica kulenge nsoni ukuyebelela. Lelo ukwishibo kuti Yehova alalekelela apakalamba kulaleto kwilulukwa.”

Ukuyamona Baeluda

Nga ca kuti uli Mwina Kristu, tacipwila fye pa kweba abafyashi bobe. Andrew asoso kuti: “Nalishibe ukuti nali no kutwala ubwafya bwandi kuli baeluda ba mu cilonganino. Fintu nailulwikwe ukwishibo kuti baalefwaisha ukungafwa!” Ee, imisepela pa kati ka Nte sha kwa Yehova kuti baya kabili balingile ukuya kuli baeluda ba mu cilonganino ku kwafwiwa no kukoseleshiwa. Lelo mulandu nshi ushingapepela fye kuli Yehova capwila na po pene? Pantu Yehova aliseekesha baeluda icishingamo ca ‘kulinde myeo yenu.’ (AbaHebere 13:17) Kuti bakwaafwa ukusengauka ukuwila mu lubembu na kabili.—Linganyako Yakobo 5:14:16.

Wilaikopeka we mwine pa kupelulula ukuti kuti wayafwa pa lobe weka. Nga ca kuti mu cituntulu walikwata amaka ya kucite co, bushe nga waliwilile mu lubembu luntu wawilamo? Mu kumonekesha, ulekabila ukufwaya ukwaafwa ukufuma kuli bambi. E fyo Andrew acitile mu bukose. Aleti shani mu kupanda amano? “Ndekoselesha onse uuleibimba mu lubembu lwabipisha, nelyo uwaibimbamo kale, ukupongolwela umutima wakwe kuli Yehova na kuli umo uwa bakacema bakwe.”

Lelo ni shani fintu ulingile ukutununuka eluda? Salapo umo uo uyumfwa uwakakuka ukulanda na wene. Kuti watendeka pa kusoso kuti: “Ndekabila ukulanda na imwe pa lwa cintu cimo” nelyo “Ninkwatako ubwafya” nelyo fye ukuti “Ninkwata ubwafya kabili ndekabila ukwaafwa kwenu.” Ubufumacumi bobe no kulumbulula fyonse fili no kulangisha ukuti naulapila mu cine cine kabili ulefwaisha ukwaluka.

‘Ndetiina Ukutamfiwa’

Ni shani pa lwa kutiina ukutamfiwa? Ca cine ukuti ukucito lubembu lwabipisha kulenga umo ukuba mupepi no kutamfiwa, lelo te kuti e fyo cili no kuba nangu cibe shani. Abatamfiwa ni abo abakaana ukulapila—abo mu buumankonso bakaana ukwaluka. Amapinda 28:13 yasoso kuti: “Uufimba pa fya bupulumushi fyakwe takashuke; lelo uufitumbula no kufileka akacitwe nkumbu.” Icishinka ca kuti nautununuka baeluda pa kuti bakwaafwe cili bushininkisho bwa kuti ulefwaisha ukwaluka. Ico baeluda babelako maka maka kundapa, te kukanda iyo. Balikakililwako ukusunga abantu ba kwa Lesa mu cikuuku kabili mu mucinshi. Bafwaya ukukwaafwa ‘ukutambalika inshila sha kwendamo amakasa yobe.’—AbaHebere 12:13.

Ca cine, ukuli ubucenjeshi nelyo icibelesho calepa ica kucito lubembu lwabipisha nacibimbwamo, “ifiyene no kulapila” ifya kushinina kuti pambi fyacepa. (Imilimo 26:20) Inshita shimo shimo kulabako ukutamfya. Lelo nangu fye ni kuntu kacita wa fibi nalapila, baeluda balikakililwako ukumusalapulako mu nshila imo. Bushe ulingile ukukalifiwa nelyo ukububuka pa bupingushi bwabo? Pa AbaHebere 12:5, 6, Paulo acincisha ukuti: “We mwana wandi, wipepula kufunda kwa kwa Shikulu, nangu kutompoka pa kwebaulwa kuli wene; pantu uo Shikulu atemwa alamufunda, kabili afopaulo mwana onse uo apokelela.” Ukusalapula ukuli konse uko wapokelela, ukumone ukuti bushininkisho bwa kuti Lesa alikutemwa. Ibukisha, ukulapila kwa cine cine kuli no kukutungulula na kabili ku kwampana kwalinga na Shifwe wa nkumbu, Yehova Lesa.

Cikabila ubukose ukusumina ifilubo fyobe. Lelo pa kucite fyo, kuti watambalike nshila shobe ku bafyashi bobe e lyo na kuli Yehova Lesa kwine. Wileka umwenso, icilumba, nelyo insoni fikucilikile ku kwafwiwa. Ibukisha: Yehova ‘akalekelela apakalamba.’—Esaya 55:7.

[Amafutunoti]

[Amashiwi pe bula 30]

‘Ndekoselesha bonse abaacito lubembu ukupongolole mitima yabo kuli Yehova.’—Andrew

[Icikope pe bula 29]

Ukuyebelela ku bafyashi bobe kuti kwatungulula ku kupuupuutuka kwa ku mupashi