Amano Ayaba mu Kutaluka ku Cintemwa ca Bwaume no Bwanakashi no Kuba fye mu Cupo no Muntu Umo
UKUFIKA pali lelo, mupepi na bantu amamilioni 30 balikwata akashishi katandanya ubulwele bwa AIDS kabili ukucila na pa mamilioni 6 balifwa. Mupepi na 8,500 balasangwa no bulwele cila bushiku—pali abo, palaba abana banono 1,400 abo ilingi line bafwa ilyo bashilakumanya umwaka. Ico beta abati lulu wa kusangako inshila sha kuicingilila ku malwele ya mu kwampana kwa bwamba calilenga icintubwingi ukupoosako amano, lelo bamo bamona ifyo uyu lulu te kuti apwishe ubwafya. “AIDS bulwele ubwipaya,” e fyalemba Dr. Steven J. Sainsbury muli The Tampa Tribune, “kabili inshila iili yonse iya kubombelamo pa kucincintila ubu bulwele ifwile ukuba iyafikapo mu kukumanina.”
Ukulosha ku kubomfya amakondomu pamo nge nshila ya kucincintila AIDS, Dr. Sainsbury alandapo ati: “Tutile kwati cili ni fi. Tutile, pa mulandu umo uushishibikwe, bamotoka mu kupumikisha balepuulika lyonse lintu wafwayo kuti ulishe. Banamutekenya icalo conse balebasantaula. Bwasuka ubuteko bwasangako inshila ya kupwishishamo ubwafya. Bwatila ku mafuta ya motoka muletumbinkanyako ifi, e lyo ubusanso bwa kupuuka bukanakako amaperesenti 90. Bushe kuti mwatila ubwafya nabupwa? Bushe kuti mwatwalilila ukwensha motoka wenu? Ndetwishika nga kuti mwatwalilila. Nomba mulandu nshi tusuminina ukuti amakondomu kuti yatucingilila kuli AIDS?”
Ukwishibo kuti AIDS ilingi line alengwa no kwampana kwa bwamba, Dr. Sainsbury alandapo fintu ubwafya bwingapwa atila: “Taluka ku kwampana kwa bwamba ukufikila ukaipekanye ukukakililwa ku cupo ca kuba no muntu umo uushakwata bulwele. Amashiwi yakalamba yali kutalukako e lyo ne cupo ca kuba no muntu umo.”
Baibolo ikambisha ukutaluka ku kwampana kwa bwamba ku bantu bashaupana e lyo no kuba mu cupo no muntu umo kuli abo abaupana. Ifipimo fyasumbuka ifya mu Baibolo fyalibinda ubulalelale, ubucende, no kulaalana kwa ba bwamba bumo bwine. (Mateo 19:4-6; 1 Abena Korinti 6:9, 10; 7:8, 9) Nangu cingatila abengi balasuusha ici cipimo, ukusoso kuti ca kale kabili tacibomba, imibele isuma iya mu Baibolo yalisumbula ubutuntulu bwa bumi no mutende wa ku muntontonkanya.—Esaya 48:17.