Yesu Kristu Ali Ni Ani?

Mu fyalo ifingi ukushinguluka isonde, kuli ukusefya Krisimasi pali ino nshita ya mwaka. Abantu abengi nga nshi basumina ukuti Yesu Kristu afyelwe pa December 25 imyaka napamo 2,000 iyapitapo. Mu fyalengwa ne fyabaswa, alengwa nelyo ukubaswa nga kanya mu mulimba. Lelo, kwena, alikulile ukuba umwaume no kwikala pe sonde imyaka 33 ne myeshi 6.

BUSHE mwalitala amulanguluka imimonekele ya kwa Yesu ilyo akulile? Bushe inkanda yakwe yalemoneka shani? Bushe aali umutulushi kabili uwayemba, nelyo uwanakuka kabili uwalwalililako, nga fintu alengwa na bakalenga balekanalekana pa myaka iingi? Bushe alikwete umwefu nelyo takwete? Bushe alikwete umushishi uutali?

Na kabili, bushe Yesu alikwete icintengulusha ca lubuuto lwa mushilo, ukushinguluka umutwe wakwe nga fintu alengwa na bakalenga bamo? Atemwa bushe takwete icili conse icaibela icalemupusanyako na bantu bambi?

Ukutontonkanya kwa bakalemba ba malyashi ya ku calo na bakalenga pa lwa mimonekele ya kwa Yesu kwalipusanapusana ukufuma ku nkulo ne nkulo. Mu kulundapo, kwaliba ifitontonshi fyashintililwapo mu fyalembwa fya ba nsangwapo ifyalembelwe na bakalemba ba Baibolo abaikele mu mwanda wa myaka uwa kubalilapo abaali nankwe.

Nangu cibe fyo, ifipusho fyacindamisha ukucila pa mimonekele yakwe ni fi: Bushe mu cine cine Yesu Kristu aali ani? Lubali nshi abomba mu mifwaile ya kwa Lesa? Bushe alilufikilisha? Cifulo nshi akwata nomba, kabili ali kwi? Bushe alikwata icifulo icakatamisha icingambukila abantu bonse, ukusanshako fye na bengi abafwa?

Lekeni intanshi tubebete ifishinka ukukuma ku mimonekele ya kwa Yesu. Bushe alemoneka shani?