‘Bushe Abantu Bamwenamo Shani mu Mulimo Mubomba?’
ICI e cipusho caipwishe Chandrakant Patel, kalemba wa lyashi umwina India. Aipwishe uubombela pa maofeshi yakalamba aya Nte sha kwa Yehova, mu Brooklyn, ku New York. Patel aile mu kutandala pali aya maofeshi, lelo alisungwike pa fyo amwene no kumfwa ica kuti ashifika fye ku India, alembele icipande mu nyunshipepala ya mu lulimi lwa ciGujarati.
Ilyo alepusanya ifisumino fimo ifya mabumba yambi aya fya mapepo aya mu India, ku fyo Inte sha kwa Yehova shasumina, Patel atile Inte sha kwa Yehova shena shasumina muli Lesa Wa maka yonse, Yehova, tashasumina mu cishilano caseeka mu macalici ica kuti kwaba Abene Batatu muli umo, kabili tababomfya ifipasho mu kupepa. Atile Inte sha kwa Yehova shakwata ifishinte fyasumbuka pantu shilakonka sana amafunde ya buKristu aya mu Baibolo, ifili nga pa milandu ya bucende, ukuponya amafumo, ulupato, no bukomi. Atile Inte sha mutende, balalangisha ukutemwa, balashishimisha, balaafwa abantu bambi, balishipa kabili balipimpa mu kushimikila ubukombe bwa mu Baibolo ku bantu.
Bushe ulya kalemba wa lyashi umwina India bamwaswike shani cilya cipusho aipwishe ica kuti, ‘Bushe abantu bamwenamo shani mu mulimo mubomba?’ Alembele ukuti: ‘Banjaswike ukuti ukusambilila Baibolo kulaafwa abantu muli fyonse.’ Patel alefwaya ukwishiba maka maka pa milandu ya fya bumi ne fya ncito. Ilyo Patel alelondolola fimo fimo ifyo bamwebele alembele ukuti: ‘Nga umuntu akonka ukupanda amano kwa mu Malembo ukwa kukanaikowesha ku fintu ifili nga fwaka ne miti ikola, kuti aikala uwasanguluka no kusengauka amalwele ayengi. Kabili abantu ababombesha, aba mibele yasanguluka, kabili abafumacumi, balasangako bwangu incito. Ukulundapo, ukupwisha amafya mu cikuuku kabili mu kutemwa kulalenga ukulaumfwana na bantu. Kanshi abantu balamwenamo mu kubasambilisha Baibolo.’
Ulya kalemba wa lyashi aliimwenene pa maofeshi yakalamba aya Nte sha kwa Yehova ukuti abantu cine cine balakonka ifisambilisha Baibolo. Mu cipande alembele, alitashishe ubusaka ne nsansa sha babomfi ba kuitemenwa ababombesha abekala palya pe shinte lya milimo ya ku mupashi. Ne mwe bene kuti mwamwenamo mu kusambilila Baibolo. Inte sha kwa Yehova shikatemwa ukumulanga ifya kucita pa kusambilila.
Nga mulefwaya ukwishibilapo na fimbi nelyo nga mwingafwaya umuntu umo ukwisamutungulula isambililo lya Baibolo ilya pa fye mu mwenu, shi lembeleni ku Watchtower, Box 33459, Lusaka 10101, nelyo ku keyala kalinga pe bula 5.
[Abatusuminishe Ukubomfya Icikope pe bula 32]
Icikope ca nyunshipepala: Abatusuminishe ni ba Naya Padkar, Gujarati Daily iyasabankanishiwe ku Anand, mu India