Ukukoshiwa ku Citetekelo Cakwe
UMUKASHANA wa myaka 17 alembeele iofeshi lya Watch Tower Society mu Moldova, kale iyaletekwa na Soviet Union, ku kutasha pa cipande cali muli Loleni! wa June 8, 1998. Icipande caleti “Ukusalapo Umo Pali Batata Babili,” kabili calondolwele ifya kukumanya fya mwina Armenia wacaice.
Umukashana alondolola ukuti, “Lintu nalebelenga icipande amenso yandi yaiswilemo ifilamba pantu ifyamucitikile e fyancitikile na ine.” Atwalililo kuti: “Lintu nali ne myaka 15, natendeke ukusambilila Baibolo, kabili abafyashi bandi tabandeseshe pa kubala. Lelo lintu natendeke ukusangwa ku kulongana kwa Nte sha kwa Yehova, balindeseshe. Lyene, mu 1997, lintu natendeke ukwebako bambi fintu nalesambilila, abafyashi banjebele ukuti: ‘Uye ku Nte shinobe isho shine uleke shilekulisha no kukufwika, kabili shikufwaile ne ncito. We cicintomfwa we!’ Balimpumine no kumpuma, ukulantutaula umutwe ku cibumba.
“Ubo bwesho bwalinkosele. Ilingi line naleyumfwa nge fyaleyumfwa ulya cilumendo umwina Armenia, uwatile inshita shimo aaletwishika nga ca kuti Yehova alimutemenwe. Naleilishanya ukuti, ‘Bushe ninshi tapaba ifyo naba? Bushe Yehova akanjelela pa membu nalecita? Bushe Yehova acili alintemwa?’
“Calenkosela sana ukutontonkanyo kuti Yehova tantemenwe na kabili. Ilingi line nalepaapaata Yehova mu mapepo, ninshi ndelukusha ne filamba, ukuti angafwe, ankoshe pa kuti nikabala musha. Na cine, Yehova alyumfwile amapepo yandi no kwasuka ukupaapaata kwandi. Ampeele ubukose ubwingi ukupitila mu Cebo cakwe, muntu kemba wa malumbo mu kushininkisha abilishe ukuti: ‘Ilyo tata na mayo bandekelesha, e lyo Yehova ambuula.’—Amalumbo 27:10.
“Pa September 27, 1997, nalangishe ukuipeela kwandi kuli Yehova lintu nabatishiwe pa kulongana kwa muputule ukwa Nte sha kwa Yehova mu Kagul. Nomba nimona ukuti Yehova, Shifwe wa mu muulu uwa kutemwa, alafikilisha ubulayo bwakwe ubwa pa Amalumbo 84:11 ubutila: ‘Yehova Lesa kasuba kabili ni nkwela, ukusenamina no bukata Yehova alapeela; tatana cisuma ku benda muli bumpomfu.’
“Ndetasha sana ulya mulumendo umwina Armenia pa kulondolola muli magazini wa Loleni! ilyashi lyakwe ilikoshe citetekelo. Ndesubilo kuti abafyashi bandi na bafyashi bakwe mu kupita kwa nshita na bo bakatemwa ifisambilisho fya Baibolo.”