Ukushomboka no Bulwele Bunasha

NGA FINTU CASHIMIKWA NA BA TANYA SALAY

Kale nali umufyashi uwacincila kabili umutumikishi wa nshita yonse mu musumba unono uwa Luverne, Alabama. Kuno abantu baba aba mutende kabili abashapamfiwa. Fyonse fyalemoneka ukwenda bwino kuli ine no mulume wandi, Duke, no mwana wandi, Daniel. Lyene opareshoni inono yayalwile apakalamba imikalile yesu.

AMAFYA yesu yatendeke mu 1992 lintu bamfumishe icisa. Tapakokwele, natendeke ukumfwa ubukali bwatapata no kulasunda libili libili (imiku 50 ukufika kuli 60 cila bushiku). Incenshi yaishiba amalwele ya banakashi iyalemombelapo yantantikile ukumonana na urologist ku kwesha ukumona icalelenga ubu bwafya.

Naile ku cipatala ku kupimwa. Ilyo naileko umuku wa kubalilapo, uyu urologist atile nali no bulwele bwa—interstitial cystitis (IC), nelyo ukufimba kwa cisu. Calyafishe ukwishiba ubu bulwele pantu ifishibilo fya IC fyalipalana ne fishibilo fya malwele yambi aya filundwa umo imisu ikala no kupita. Na kabili, takwaba inshila sha kupiminamo ishilangilila mu kulungatika ukuti ubu bulwele ni IC. E co, badokota bafwile ukupima sana ilyo bashilasondwelela ukuti ubu bulwele ni IC.

Dokota wesu alandilepo fye ukuti apo imiti tayafwa sana, kuli pele pele icicitika kufumya icisu! Atile kwaliba inshila shimbi isha kundapilamo lelo shonse tashibomba bwino. Pa kumfwa ifyo twalipeshiwe amano nga nshi. Nali umutuntulu ukufika iyi nshita. Apo tuli Nte sha kwa Yehova, ine na Duke twali abatumikishi ba nshita yonse pa myaka iyingi, nomba banjeba ukuti bafwile ukufumya icisu candi. Ndatasha ukuti umulume wandi alintungilile bwino.

Twasalile ukumonana na urologist umbi. Twamwene badokota abengi. Ica bulanda ca kuti pali ilya nshita badokota baishibe fye ifinono pali IC. Na kabili, ba urologist abengi baliikwatila imfundo pa lwa IC, e ico batasha inshila shapusanapusana isha kundapilamo ubu bulwele. Ulupapulo lumo ulwa fya miti lwatile: “Ilingi ubu bulwele buba bwa mutatakuya.” Ulupapulo lumbi lutila: “Basayantisiti tabalasanga icingondapa IC, kabili tabaishiba abengankula bwino ku kundapa kumo na kumo. . . . Pa mulandu wa kuti badokota tabaishiba icileta ubulwele bwa IC, inshila sha kundapilamo shinashako fye ifishibilo fya ubu bulwele.”

Naleumfwa sana ubukali pa mulandu wa kusunda libili libili ica kuti nali uwaipekanya ukwesha fyonse ifyo badokota batubulwile. Nalyesha imiti yalekanalekana ukucila pali 40 pamo ne miti ya cimuntu, ukulaswa inshindano apalekalipa, nerve block, epidural na spinal injection, na transcutaneous electrical nerve stimulation (TENS), umo amalaiti yanono yengila mu mubili pa maminiti nelyo amaawala. Nalifwailishe sana pa lwa bulwele, ico cangafwile ukwishibako fimo pa lwa fyalecitika.

Pali nomba nwa umuti wa methadone, uyo uucefyako ubukali, pamo ne miti imbi 6. Na kabili lyonse ndaya ku cipatala, uko bandasa inshindano sha epidural pamo na steroids ku kungafwa ukucefyako ubukali. Pa mulandu wa kusunda libili libili, ndaya ku cipatala lyonse nga papita imyeshi itatu nelyo ine ku kundapa uko beta ati hydrodistension. Muli uku kundapa babomfya ifya menshi menshi pa kutanununa icisu nga filya ciba kuli baluni. Balicita ici pa miku inono. Palapita imyeshi ukwabula ukumfwa ubukali sana. Mu myaka inono iyapita, nalitekwapo mu cipatala pa miku ukucila pali 30.

Ni shani pa lwa nshila ya kundapilamo iya kulekelesha, e kuti ukufumya icisu? Ulupapulo lumo lutila: “Badokota abengi tabafwaya ukucita opareshoni pantu te fimo fine ififumamo mu balwele balekanalekana—bamo balalepulwa lelo ifishibilo fya ubo bulwele filatwalilila.” E co pali ino nshita nshiletontonkanya pa lwa kufumya icisu.

Limo ukukalipwa kulacilamo kabili takupwa ica kuti cilanguka ukupelelwa. Inshita imo natontonkenye na pa lwa kuipaya fye. Lelo ico nshalefwaya museebanya ukuipaya kwingaleta pe shina lya kwa Yehova. Nalimona ubucindami bwe pepo ne sambililo lya pa lobe pamo no kulundulula bucibusa bwakosa na Yehova, pantu tatwishiba cingatucitikila icingaalula ubumi bwesu. Ubu bucibusa bwalimpususha mu kulwala kwandi, pantu nalishiba ukuti nga naliipeye.

Nga natontonkanya pali iyi myaka 9 iyapita, ndamona ifyo ubumi bwayaluka lubilo lubilo. Ndatesekesha amashiwi yaba pali Lukala Milandu 12:1 ayatila: “Lelo ibukisha Kalenga obe mu nshiku sha bulumendo bobe, ilyo inshiku sha bubi tashilaisa, ne myaka tailafika ilyo ukatila, Tapaba kuli ine ukucankilwamo.” Ndatasha sana ukuti natendeke ubutumikishi bwa nshita yonse ilyo nali ne myaka 15 kabili nalitwalilile pa myaka nalimo 20. Muli ilya nshita nalundulwile bucibusa bwakosa na Yehova.

Ndatasha Yehova pa mulume wandi no mwana wandi, Daniel, abo abantungilila. Na kabili ndakoseleshiwa nga nshi nga ba mu cilonganino bantumina lamya nelyo nga bantandalila. Ndafilwa ukufuma pa nse mu nshita ya mpepo pantu ukutalala kulenga icifungalashi ukucilamo. Ndacita ubunte bwa pali lamya, ico cinenga ukuti ntwalilile ukuba ne subilo lya Paradise no kulimona ilya cine cine. Ndafwaisha inshita lintu ukulwala no kucula fikaba nafiya kabili tafyakebukishiwe.—Esaya 33:24.