Bushe Ukusefya Kwalumbuka Kwaliba fye Bwino?
PA KATI ka mweshi wa October, ifintu filatendeka ukwaluka sana mu misumba imo iya ku France. Mu mawindo ya mashitolo balangisha ifipushi, utulubi no bwile bwa batandabube. Abashitisha mu mashitolo yakalamba balafwala utusote twafiita utwasompa. Na pa kulekelesha, abaice balatendeka ukwendauka mu misebo, balekonkonsha pa fiibi no kutiinya abantu ukuti calabipa nga tababape ifyo abene batila “ifya bupe.”
Imicitile ya musango yu iya kupapa ibako pa kusefya kwa Halloween. Nangu line ukusefya kwa Halloween kale kwalemoneka kwati kwa bena Amerika beka, ndakai nakusalanganina mwi sonde lyonse, kabili abaice na bakalamba kumo bonse balesefyako. Nga ni ku France kwena naciisha no mwana. Bamo batunganya ukutila mu mayanda ayengi aya bena France mwali abasefesheko Halloween uyu mwaka wapwile. Ipepala lya ku Italy ilya La Repubblica lyalandile pali uku kusefya ukuti kuli kwati “bulwele bwa lwambu” ubulesalanganina mu fyalo fyapalama ku Italy. Ipepala lya Nordkurier lyatile “[abena Germany] abengi nomba tabalefwaya ukupuswa uyu musamwe wa congo.”
Te bena Bulaya fye abasendelwe no musango wa kusefya Halloween. Mwi sonde fye lyonse, abantu balecincimuka nga nshi pali uku kusefya. Ba International Herald Tribune batile uyu mwaka wapwile, umulabasa wa ku Sri Lanka wabikileko ukucimfyanya kwa kumona “uwingapanga icintu cimo ica kutiinya sana ukucila bonse, e lyo no wingapunda ishiwi lya kutiinya sana ukucila bonse.” Ukusefya kwa Halloween kwalifika na ku Japan. Ku musumba wa Tokyo kulaba ‘ukucimfyanya kwa kutantika ifipushi’ kabili kulasangwa iminshipendwa ya bantu.
Na mu fyalo umo bashisefya sana Halloween, mwaba ukusefya no kwangala ukwapalako. Ku Britain, pa bushiku bwa Guy Fawkes Night, kuti wamona abaice balelulumba mu misebo balelomba indalama no kupanga icongo capala filya ficita abaice basefya Halloween. Ku Taiwan, kwaliba ukusefya
uko abengi batemwa ukwa Fyengelo. Abaice balendauka mu misebo nabasenda ne ne fyengelo ifilelanga ifyuni ne nama. Ku Mexico na ko kwaliba ukusefya kwa Nshiku Nkulu ya Bafwa, uku kusefya na ko kwine kwalifika na ku United States. Kalemba Carlos Miller atile abena Amerika abafuma ku Mexico na nomba “balapanga utulubi twa calacas kabili balacindila na balupwa wabo abafwa.”
Abengi kuti bamona ukusefya kwa musango yu ukuti kwangala fye, kuti kwaba nge nshila ya kuleka abaice na bakalamba kumo ukufwala cimbi cimbi no kulacita ifishilolelemo. Nalyo line, ukutontonkanya kwa ifyo ukwa kukanapoosako amano kuti kwalanga ukuti umuntu alesuula icishinka ca kuti ukusefya kwa musango yu kwatuntuka ku basenshi. Ku ca kumwenako, Ukusefya kwa Fyengelo ukwa ku Taiwan, kwatendeke ilyo abantu balesanika ifyengelo ukwesha ukumona imipashi iyo baletontonkanya ukuti yalelulumba mu lwelele. Inshiku Nkulu iya Bafwa iyo abena Mexico basefya yatuntuka ku kusefya kwa bena Aztec ukwa kucindika abafwa.
Bamo kuti babike fikansa abati ukwatuntwike ukusefya te kwingalenga ukuti kubipe. Lelo ipusheni mwe bene ukuti, ‘Bushe cine cine ukusefya ukwafumine ku basenshi kuti kwaba fye bwino?’ Abafwaya ukuti amakwebo yabo yende ilyo kuba ukusefya bena tabasakamana no ko ukusefya kwatuntuka. Ukulanda pa kusefya kwa Halloween, umwiminishi wa kabungwe ka Cultural Institute of Barcelona, ku Spain, atile: “Kusefya kwa makwebo fye.” Te kumona umwaka wapwile pa kusefya kwa Halloween ku United States kweka fye, indalama bapangile shali nalimo amadola amabilioni 6.8. Ku France, akampani kapanga ifya kufwala fya pa kusefya kwa Halloween kalitendeka ukusanga indalama ishingi sana mu myaka itatu iyapita.
Lelo bushe na imwe mufwile ukusefyako amangalo ya musango yu pa mulandu fye wa kuti yalilumbuka kabili yalaleta sana indalama? Pa kwasuka ico cipusho, twalalandako na fimbi pa kusefya kwa Halloween.
[Icikope pe bula 18]
Ifipanga fya kupanga fye ukubomfya shuga ifibomfiwa pa kusefya kwa Nshiku Nkulu ya Bafwa ku Mexico
[Abatusuminishe]
SuperStock, Inc.
[Icikope pe bula 19]
Ku Britain, kulaba ukukosha ifimbilimbili fya mulilo pa kusefya kwa Guy Fawkes Night
[Abatusuminishe]
© Hulton Getty Archive/gettyimages