Bushe Abana Bafwile Ukusalapulwa Shani?

Inyunshipepala ya ku Canada iya National Post yatile: “Kulaba amafya nga ca kuti abana baletashiwa te mulandu ne co bacita.” Abafyashi bamo basumina ukuti ici cilenga abana ukuikatamika. Lelo, Roy Baumeister, uwasoma ifya muntontonkanya atile, “ukuikatamika kusuma nga ca kuti umuntu alebomba bwino, lelo abafyashi bafwile ukwangwa ku kusambilisha abana ukuilama.”

Umufyashi uutiina ukusalapula umwana ilyo alufyanya alamonaula. Na kuba ukusalapula ni nshila ya kufundilamo. Ukusalapula kusambilisha umwana uulufyenye ukukanabwekeshapo. Ca cine, abafyashi tabalingile ukusalapula kwa bukalushi kabili ukwacila pa cilubo cipangilwe. (Yeremia 46:28) Bafwile ukushininkisha ukuti ukusalapula takucililemo. Baibolo itila: “Mwe bashibo, mwisonga abana benu, epali banenuka.”—Abena Kolose 3:21.

Muli Baibolo, ukusalapula lyonse kwayampana no kutemwa no kunakilila, takwayampana no bukali no bukatu. Kafundisha walamuka afwile ukuba “uwa congwe kuli bonse, . . . uushipikisha; afunde ifibambe mu kufuuka.” (2 Timote 2:24, 25) Kanshi, ukusalapula kwa bafyashi takufwile ukuba fye nge nshila abafyashi balefumishishamo ubukali. Baibolo taisuminisha ukubomfya inshila ishingacena umwana nelyo isha ku mucusha ku mutima.

Iminshipendwa mwi sonde lyonse balinonkelamo muli ici citabo ca mabula 192. Ifipande fimo cakwata ifisambilisha ni fi: “Kansheni Umwana Wenu Ukufuma ku Bwaice” na “Afweni Umwana Wenu Umupungwe Ukukula Bwino.” Nga mulefwayako ici citabo, isushisheni akapepala kali pe samba no kutuma ku keyala kali pa kapepala nelyo ku keyala kalinga pe bula 5 ilya uno magazini. Mukapokelela imitubululo ingamwafwa ukukalulula amafya no kulenga ulupwa ukuba ica kucankilwamo kuli Kalenga.

□ Ntumineniko icitabo ca Icaba Inkaama ku Nsansa sha Lupwa.

□ Mukwai na ine kuti bantandalilako pa kuti nkatendeke ukusambilila Baibolo ukwabula ukulipila.