“Mube Abatootela”

◼ Lyonse Baibolo ilakoselesha abapepa Lesa ukulatootela. Amalumbo 92:1 yatila “cisuma ukutootela Yehova.” Umutumwa Paulo na o afundile ukuti: “Mube abatootela.”—Abena Kolose 3:15.

Ukutasha kusuma. Profesa Robert Emmons, uusambilisha pe sukulu lya University of California mu musumba wa Davis atile: “Abafwailisha ico ukutasha kwawamina balisanga nomba ukutila ukutasha kulafwa nga nshi abali na mafya, maka maka abakwete amasakamika, kabili ukutasha kulalenga abantu ukulayumfwa ukuti nabo balicindama.”

Magazini ya Time yalanda pa busuma na bumbi ubwaba mu kutasha, yatila: “Abatemwa ukutasha bambi . . . balaba no bumi busuma kabili balatontonkanya pa fisuma ifikacitika ku ntanshi, tabasakamikwa sana, kabili tababa sana ne cikonko ica kuti cabalwalika nge fyo ciba ku bantu bambi.”

Lelo ku ca bulanda, Baibolo yasobele ukutila “mu nshiku sha kulekelesha,” abantu abengi “bakaba abaitemwa” kabili “abashitasha.” (2 Timote 3:1-5) Bushe Abena Kristu ba cine kuti bacita shani pa kuti tabapalene na ba bantu? Kalemba wa Baibolo atile: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.” (Esaya 48:17) Ukumfwila amafunde ya kwa Lesa kulatucingilila ku mafya ayo abantu abaitemwa, abafwaya fye ukuisekesha bakwata. Na kabili twalishininkisha ukutila Yehova alamona ifyo tuibikilishako ukucita ukufwaya kwakwe kabili akatulambula ukulingana ne milimo yesu. (AbaHebere 6:10) Ifintu fya musango uyo ifyo tuipakisha filalenga tulefwaisha ‘ukutootela Yehova.’—Amalumbo 107:8.