Abana be Sukulu Balanaka Sana

JENNIFER, umukashana wa myaka 17 alikwete sana amano ku sukulu kabili lyonse aleba pa balekwata amatoni ayengi. Alecitako ne fintu fimbi ifya pa sukulu nga akomboka kabili bakafundisha ne mpanda mano sha pa sukulu bonse balimutemenwe. Lelo ilyo kwashele umwaka umo ukuti apwishe isukulu, atampile ukulalwala umutwe kabili ilingi line aleumfwa umuselu. Amona kwati icalelenga ukuti alelwala, ni filya alepoosa ama-awala ayengi pa kubelenga ifya ku sukulu, na filya ashalelala sana utulo.

Kwaliba na bambi abakwata ubwafya Jennifer akweteko. Abana be sukulu abanaka sana pa mulandu wa masambililo nabafula nga nshi ica kuti bamo balakabila na badokota abaishiba ukundapa amalwele ya kuli bongobongo. Ici calenga ukuti bakafundisha bamo mu America bapange akabungwe ka kwafwa abana be sukulu pa kuti belanaka sana. Aka kabungwe baketa ati Challenge Success.

Limbi na iwe wine uli mwana we sukulu kabili limbi ulanaka sana kwati ni filya fine Jennifer alenaka. Nelyo nga muli bafyashi, limbi mulamona ukuti abana benu balabombesha kabili balanaka sana pa kuti fye bakakwate amatoni ayasuma ku sukulu. Bushe kuli uko abana be sukulu pamo na bafyashi bengapandwa amano pa kuti bapwishe ubu bwafya?