Bushe Abafyashi Kuti Ba-afwa Shani Abana?

ICIPANI cimo ica mu America icilolekesha pa masambililo cikoselesha abana be sukulu aba ku sekondari ukuti: “Mulebelenga sana pa kuti mukakwate amatoni ayasuma.” Ilyo abacaice bamo besha ukukonka uku kupanda amano, balacila mu cipimo. Madeline Levine, uo tulandilepo na mu cipande cifumineko alembele ukuti: “Ukufula kwa fisambililo fya kubelenga, ifintu fimbi ifya kucita pa sukulu, ukutendeka bwangu ukubelenga ifya ku koleji, e lyo na bakafundisha abo balipila pa kuti bafwe abana ukukwata matoni ayasuma, filalenga abana be sukulu abengi ukukwata ifya kucita ifingi nga nshi ifilenga no bumi bwabo ukuba mu bwafya.” Abana be sukulu abapita mu fya musango yu kuti balenaka sana kabili kuti balwala no kulwala.

Nga mulasakamana sana ukuti umwana wenu alanaka nga nshi pa mulandu wa fya kucita ku sukulu ukufula, mufwile ukuyamonana na bakafundisha bakwe bonse na bakalamba be sukulu. Mulingile ukulanshanya nabo no kubeba ifyo umwana wenu alepitamo, pantu mwalikwata insambu sha kucita ifyo.

Baibolo ikoselesha abafyashi ukubika amano ku fyo abana balepitamo ilyo balekula. Mose aebele abafyashi abena Israele ukuti: “[Amafunde ya kwa Lesa] muleyasambilisha ku bana benu no kuyalandapo ilyo mwikele mu mayanda yenu na lintu mule-enda mu musebo na pa kulaala na pa kubuuka.”—Amalango 6:7.

Ukufwaisha ukwishiba ifilecitika ku mwana wenu nga ali ku sukulu takupilibula ukuti ninshi mulemufwailikisha. Lelo kulanga ukuti mwalibika amano ku mwana wenu kabili mulamutungilila. Na kabili ukucita ifyo kuti kwalenga mwa-afwa umwana wenu ukukanalanaka sana ilyo ali ku sukulu.

[Icikope pe bula 16, 17]

Lanshanyeni na bakafundisha bakwe pa fyo umwana wenu alepitamo