Kuti Mwasambilila Ukuba Aba Mutende

NANGU ca kuti mu cifyalilwa tulemenena fye ku kucita ifyabipa, ilingi line ubunkalwe bwena tubusambilila fye ilyo tulekula. No kuba aba mutende na ko e fyo kwaba, tukusambilila fye. Lelo nani engatusambilisha ifya kuba aba mutende icine cine? Ukwabulo kutwishika, uwalinga sana ukutusambilisha ni Kabumba wesu, uwakwatisha amano. Moneni pa fishinka fyakonkapo fisano na mashiwi ya mano ayasangwa mu Baibolo.

1 “Wilakumbwa umuntu wa bunkalwe.” (Amapinda 3:31) Ico mufwile ukwishiba ca kuti umuntu uwakwata amaka yene yene, alailama kabili alinakilila. Amapinda 16:32 yatila: “Uukokola ukukalipa awama ukucila impalume.” Uyu muntu alatekanya, tasakaatuka mu bukali nangu bamukalifye shani. Na kuba ilyo bamukalifya aba fye uwanakilila, ne ci cilenga ukuti ‘anashe ubukali.’ (Amapinda 15:1) Lelo uufulwa bwangu ena, alabubuka mu bukali nga bamulufyanya fye panono.—Amapinda 25:28.

2 Saleni ifibusa ifisuma. Amapinda 16:29 yatila: “Uwa bunkalwe abepa umunankwe.” Lelo “uule-enda na ba mano akaba uwa mano.” (Amapinda 13:20) Kanshi, nga tuleangala na bantu ba mutende, abailama kabili abanakilila, na ifwe tukalapashanya imibele yabo.

3 Temweni bambi ukufuma pa nshi ya mutima wenu. Ukutemwa balikulondolola bwino sana pali 1 Abena Korinti 13:4-7. Ifikomo fimo fimo fitila: “Mu kutemwa mwaba ukushishimisha ne cikuuku. . . . Mu kutemwa . . . tamwaba ukukalifiwa. Tamwaba ukusunga ifilubo. . . . Ukutemwa kulasuulako ku fya bubifi fyonse, . . . kushipikisha fyonse.” Yesu atile nga twapashanya ukutemwa kwa kwa Lesa, tukatemwa na balwani besu.—Mateo 5:44, 45.

4 Cetekeleni ukuti Lesa akafumyapo ububifi. “Mwilabwesesha ububi pa bubi. . . . Mule-esha na maka yenu yonse ukuba aba mutende ku bantu bonse. Mwe batemwikwa, mwilalandula, . . . pantu calembwa ati: ‘Nine mfwile ukulandula; nine nkabweseshapo pa fibi ifyo bacita, e fyasosa Yehova.’” (Abena Roma 12:17-19) Nga twatetekela Lesa na malayo yakwe, tulaba no mutende wa muntontonkanya, uo abashatetekela bashaishiba nangu panono.—Amalumbo 7:14-16; Abena Filipi 4:6, 7.

5 Ishibeni ukuti Ubufumu bwa kwa Lesa fye e bukaleta umutende wa cine pe sonde. Ubufumu bwa kwa Lesa buteko bwa ku muulu ubo nomba line bukafumyapo ababipa bonse no kutendeka ukuteka isonde lyonse. (Amalumbo 37:8-11; Daniele 2:44) Ilyo ubu Bufumu bukalateka, “abalungama bakapuuka, kabili umutende ukafula ukushinta na po umweshi ukalekela ukubapo.”—Amalumbo 72:7.

Ifyo Baibolo isambilisha fyalyafwa abantu abengi nga nshi ukutemwa umutende, ukubikako fye na balya abali abankalwe.