Umubango wa Ng’wena

ING’WENA e nama yakwatisha amaka ya kusuma ifintu pa nama shonse ishabako pali ndakai. Ku ca kumwenako, umusango umo uwa ng’wena ishaba mupepi na ku Australia shalikwata amaka ya kusuma sana icintu ukucila pa nkalamo na imbwili. Na lyo line, umubango wa ng’wena walikwata sana amaka ya kumfwa konse akakumyako ukucila ne fyo iminwe ya bantu yumfwa. Nomba apo impapa ya ng’wena yalikalabana, ninshi yumfwa shani bwangu?

Umubango wa ng’wena walikwata utupumba utunono utwingi sana. Pa numa ya kusambililapo sana pali utu tupumba, ba Duncan Leitch abasambilila ifya sayansi batile: “Muli utu tupumba e mufumina insandesande ishituma ifyebo kuli bongobongo.” Ici cilenga insandesande shilecingililwa no kulenga utupumba tulekwata sana amaka ya kumfwa ifintu. Ici cilenga ing’wena ukulaishiba nampo nga ifyo ikwete mu kanwa fya kulya nelyo iyo. Kabili cilafwilisha ing’wena ishikota ukwimya no kusenda utwana twashiko mu kanwa ukwabula ukukasuma. Kanshi nangu ca kuti akanwa ka ng’wena kalikwatisha amaka ya kusuma ifintu, kalikwata na maka ya kwishiba ifili mu kanwa.

Muletipo shani? Bushe umubango wa ng’wena waishilebako fye uwine nangu kwali uwaupangile?