Ifibusa fya kwa Lesa Filacita Ifisuma

Nga mwalikwate cibusa cintu mukumbwa imibele kabili ico mwacindika, muleesha ukucipashanya. Baibolo isoso kuti: “Yehova musuma, kabili alitambalala.” (Amalumbo 25:8) Tufwile ukuba abasuma kabili abatambalala pa kuba ifibusa fya kwa Lesa. Baibolo itila: “Mube abapashanya Lesa, nga bana abatemwikwa; kabili endeni mu kutemwa.” (Abena Efese 5:1, 2) Ishikonkelepo e nshila mwingacitilamo ifyo:

Muleafwilisha abantu bambi. “Tubombe icisuma kuli bonse.”—Abena Galatia 6:10.

Mulebombesha. “Uwibile eiba kabili; lelo ukucila acucutike, alebomba ku minwe yakwe icawama.”—Abena Efese 4:28.

Muleisunga aba busaka lwa ku mubili no kuba ne mibele isuma. “Tuisangulule ku kukantana konse kwa mubili no mutima, tube abafishisho mushilo mu kutiina Lesa.”—2 Abena Korinti 7:1.

Muletemwa aba mu lupwa lwenu no kubacindika. “Na imwe umo umo . . . atemwe umukashi wakwe ifyo aitemwo mwine, no mukashi abe na katiina ku mulume wakwe. Mwe bana, nakileni abafyashi benu.”—Abena Efese 5:33–6:1.

Muletemwa abantu bambi. “Tutemwane; ico ukutemwa kwa kwa Lesa.”—1 Yohane 4:7.

Muleumfwila amafunde ya calo. “Umuntu onse anakile [ubuteko] . . . Peeleni bonse ifyo bafwile ukupeelwa: umutuulo [“umusonko,” NW] peeleni ku ufwile umutuulo.”—Abena Roma 13:1, 7.