“Ubufumu Bwenu Bwise”

Yehova atulaya ukuti: ‘Takwakabe ukulila, ukumfwa ubukali, ukulwala, nelyo ukufwa. Nkakumuna ifilamba fyonse ku menso yabo. Ifibi fyonse bakafilaba.’

Yehova alefwaya Adamu na Efa baleikala umutende, kabili baleba ne nsansa ilyo ababikile mwi bala lya Edeni. Balingile ukulapepa Shibo uwa ku muulu no kulakwata abana mpaka isonde lyaisula. Adamu na Efa tabaumfwilile Yehova, lelo ifyo Lesa alefwaya ukucitila abantu tafya-alwike. Muli cino citabo, natumona ukuti fyonse ifyo Lesa alaya filacitika. Ubufumu bwakwe bukaleta amapaalo ayasuma sana mwi sonde nga filya fine alaile Abrahamu.

Nomba line Satana, ifibanda fyakwe, na bantu bonse abacita ifyabipa bali no kubafumyapo. Abantu bonse abakaba no mweo bakalapepa Yehova. Takwakabe ukulwala no kufwa. Cila bushiku nga twashibuka tukalaba na maka e lyo tukalaumfwa bwino sana ukuba no bumi. Isonde likaba paradaise. Bonse bakakwata ifya kulya ifisuma na mayanda ayasuma. Abantu bakaba aba cikuuku, tabakalecita ulubuli nelyo ukucusha abantu banabo. Inama sha mu mpanga tashakaletutiina, na ifwe tatwakaleshitiina.

Tukatemwa sana ilyo Yehova akatendeka ukubuusha abafwa. Tukapokelela abantu abaliko akale sana pamo nga Abele, Noa, Abrahamu, Sara, Mose, Ruti, Estere, na Davidi. Tukalawamya nabo isonde no kulipanga paradaise. Lyonse kukalaba imilimo iisuma iingi iyo tukalabomba.

Yehova afwaya ukuti na iwe ukabemo mu calo cipya. Ukeshiba ifingi pali Lesa ifyo ushabala autontonkanyapo. Cila bushiku natulepalamina kuli Yehova kabili tukatwalilile ukupalama kuli ena umuyayaya!