INTENDEKELO

Cino citabo ca Amalembo Ayengafwa Abena Kristu mu Mikalile, caku lalenga cilemwangukila ukusanga amalembo na malyashi mu Baibo ayengalenga mwaishiba ifya kucita nga mwakwata ubwafya. Na kabili cakulalenga mulesanga bwangu amalyashi ayo mwingabomfya pa kukoselesha abantu bambi na pa kubafwa ukusala ifya kucita ifingalenga Yehova acindikwa. Kuti mwasala ilyashi ilyo mulefwaya. Muli cila lyashi muli ifipusho no bulondoloshi ubunono pa lyashi lya mu Baibo, ifingamwafwa ukusanga ifyo mulefwaya. (Moneni akabokoshi akaleti “Ifya Kubomfya Cino Citabo.”) Mwakulasanga bwangu amalembo ayengalenga mwaishiba ifya kucita kabili ayengamusansamusha. Na kabili mwakulasanga amashinte ya mafunde ayo mwingabomfya pa kwafwa no kukoselesha abantu bambi.

Ifya Kubomfya Cino Citabo

Pa kusanga ilyashi mulefwaya, mulebomfya akabokoshi ka kufwailamo ifyebo, nelyo kuti mwafwaya pa mitande ya malyashi. Cino citabo balicakanya mu fipande 7 ifikalamba. Ifi ifipande ni fi: Amafya, Ifisuma ne Fibi Ifyo Tucita, Icilonganino, Ifyo Tucita Cila Bushiku, Ulupwa, Bucibusa bwesu na Yehova, na Imibele. Mwakulasanga amalyashi ayo mulefwaya muli ifi ifipande. Saleni icipande ico mulemona ukuti e mwingaba ilyashi mulefwaya, lyena saleni ilyashi mulefwaya pa malyashi ayalimo. Nga tamwishibe icipande umwingaba ilyashi mulefwaya, kabiyeni apali Ifipande Fyonse, e lyo mutendeke ukumona amalyashi yonse ayalimo mpaka musange ilyashi mulefwaya. Muli cila lyashi muli utumitwe utuli mu filembo ifyatikama. Utumitwe tumo, fipusho e lyo tumbi, te fipusho. Ilyo mwakulabenga amalembo ayali mu filembo ifyatikama ayakonkeene na kamutwe, mulemona no kutontonkanya sana pa fyo ayo malembo yekatene na kamutwe, nelyo ifyo yaleasuka icipusho. Amalyashi yamo baliyakanya mu tufipande utunono pa kuti cilemwangukila ukusanga ilyashi mulefwaya. Mu malyashi yamo mwaliba amalembo na yambi ayo balembapo ati, “Moneni na.” Aya malembo nayo yalanda na fimbi pe lyashi mulebelengapo. Kabili ilyo mulebelenga mwakulasanga napo balembele ati “Amalyashi ya mu Baibo ayo Twingasambililako.” Panshi ya aka kamutwe paleba amashiwi ayalelondolola icishinka icilakamba ico ilembo lilelandapo. Nga mwabelenga ilembo, aya mashiwi yakulamwafwa ukwishiba ifyo mulingile ukubikako sana amano muli ilyo ilembo.

Muli cino citabo tababikamo amalembo yonse ayalanda pa lyashi mulefwaya. Lelo cakulamwafwa ukusanga amalembo ayasuma ayo mwingabomfya. Lyena kuti mwabomfya impapulo shimbi nga mulefwaya ukufwailapo ifyebo na fimbi. (Amp 2:1-6) Nga mulefwaya ukufwailapo ifyebo na fimbi, mulebomfya ifisontelelo fya malembo ne fyebo fya kutwafwa ukusambilila ifyaba muli Baibo ya Kusambililamo iya New World Translation of the Holy Scriptures iya mu ciNgeleshi. Mulebomfya Icitabo ca Kwafwa Inte sha kwa Yehova Ukusanga Ifyebo nelyo Icisontelelo ca Mpapulo sha Watch Tower pa kuti muleishiba bwino umwalola amalembo ne fya kuyabomfya. Mulebelengako ne mpapulo ishafumine nomba line pa kuti mwingeshiba bwino ubulondoloshi bwa nomba line ubwa ilyo ilembo.

Cino citabo ca Amalembo Ayengafwa Abena Kristu mu Mikalile nacilemwafwa ukusanga amano, ukwishiba, e lyo no kwiluka ifyaba mu Malembo ya Mushilo. Ilyo mwakulabomfya cino citabo, muli no kushininkisha ukuti “icebo ca kwa Lesa ca mweo kabili ca maka.”—He 4:12.