Ubufumacumi Ifunde Lyawamisha

UBUFUMACUMI bwalitashiwa apakalamba mu Baibolo kabili cintu cifwaikwa ku Bena Kristu ba cine. (Mateo 22:39; 2 Abena Korinti 8:21) Mu kulundapo, ubufumacumi mu cine cine lifunde lyawamisha, nga fintu bwalangishiwa mu bumi bwa bengi ilelo abo imintontonkanya yabo ne mitima yaalulwa ku kwishiba kwalungikwa ukwa Baibolo. Ica kumwenako ca ici cisa ukufuma ku Liberia.

Pa numa ya kulanguluka kukalamba ukwabamo ipepo, eluda wa Bwina Kristu no mukashi wakwe baisele ituuka lya kubililamo. Mulandu nshi? Pa mulandu wa kuti lyabasendele inshita yabo ikalamba no kucilikila imibombele yabo iya butumikishi ne sambililo lya pa lwabo. Basumine ukwikushiwa na malipilo yalinga ukufuma mu kushitisha ilangi lya nsalu. Mu kwangufyanya pa numa babuulile ulu lutampulo, nangu cibe fyo, imitengo ye langi yalibwelele pa nshi mu kushitisha kwa cikaya. Amalipilo yabo nomba tayali no kwafwilisha ulupwa. Cinshi bali no kucita?

Baipwishe akampani kalebapayanishisha ilangi ukubweseshako pa nshi imitengo yabo, muli ifyo ukusuminisha icibwesha cawaminako. Ici calikeenwe. Nangu cibe fyo, akampani katambike ukutuma amainvoisi yabili, imo ukulanga umutengo wa cine cine na imbi ukulangilila umutengo wacefiwa untu bali no kutambika ku Customs pa kuti bengalipila indalama shacepako. Ici cali no kusuminisha eluda ukuipakisha icibwesha ca $2,000 icishili ca mwi funde pa kutumwa kwa fipe kumo kumo.

Munyina alikeene ukuba ulubali lwa mibombele iyabulo bufumacumi kabili kuti aibila kamfulumende. Abalashi ba kampani balipapushiwe. Balembele ukuti: “Twacindika kampingu obe,” kabili basontele eluda ukuba uwa kwimininako ifipe fyabo mu Liberia. Mu kuba no kukabila kwa ku mubili ukwa lupwa ukusakamwana bwino nomba, eluda no mukashi wakwe baliba na maka ya kucita bupainiya bwa kwafwilisha, ukubomba mu kupalamisha na bamunyina ukukuula icilonganino. Mu cine cine, ubufumacumi bwabo bwashinine ukube paalo kuli bene.

Alfonso, mu Spain, na o asangile ukuti ubufumacumi lifunde lyawamisha. Uyu kalume afumine pa ŋanda pa mushinku wa myaka 12, kabili ilyo tapalalepa aleshitishe miti ikola, capamo no kwiba bamotoka, mu mayanda, na mu matuuka. Inshita shimo aibile amatuuka ikumi mu bushiku bumo. Pa mushinku wa myaka 21, aba kubishanya nankwe bane balimupumine icabipisha, baibile imiti ikola yakwe yonse, kabili bafwaile ukumwipaya nga ca kuti aali no kubaseba ku kapokola. Apantu aali uwaishibikwa kuli bakapokola, aletiina fye no kuya ku cipatala ku kundapwa.

Ilintu alepola ku filonda fyakwe panono panono, Alfonso abelebeshe mu kukatama pa nshila yakwe iya bumi. Aibukishe ifintu pa lwa Baibolo ne fishinte fya Bwina Kristu ifyo nyina amwebele lintu aali umwana. Lyene, alisuulile amashiwi ya kwa nyina, lelo nomba alombele isambililo lya Baibolo ne Nte sha kwa Yehova. Mu myeshi mutanda alyalwile umupwilapo imyendele yakwe no buntu bwakwe kabili aali uwafikapo ku kubatishiwa.

Nangu cibe fyo, ubushiku bumo pa ntanshi ya lubatisho lwakwe, apokelele ubwite bwa kumonekela pa ntanshi ya cilye ku kulolenkana no mulandu wa kwiba kwa kwiipangasha ne mfuti. Wali musoka uo acitile inshita imo ku numa. Nangu ni fyo, Alfonso mu kukakuka atumbwile incitilo yakwe iyalubana kabili abikilwe mu cifungo ukulolela ukulubulwishiwa. Loya wakwe uwa kumucingilila amucincishe ukulondolola ukuti taibile icili conse no kuti takwete mfuti. Lelo Alfonso apampamine pa kulande cine. Pa mulandu wa ncitilo shakwe shalubana ne calembwa cakwe icabipa ku kapokola, uwa kupeeela umulandu afwaile ukuti akakwe imyaka 13. Lelo mu mimwene ya myendele yakwe iisuma ne mibele ya bufumacumi, apeelwe imyeshi mutanda, iyo kale kale abombele lintu alelolela ukulubulula.

Nomba Alfonso no mukashi wakwe babombela Yehova mu busumino, aba nsansa pa kusanga imifwaile ine ine mu bumi no kushininkisha ku cakukumanya cabo cine ukuti ubufumacumi lifunde lyawamisha.