Bakabilisha Ba Bufumu Bacita Lipoti

Ubufumacumi Bwatasha Ubutumikishi Bwesu

UBUFUMACUMI caba icifwaikwa ca kutendekelako ica Bena Kristu. Umutumwa Paulo alembele pa AbaHebere 13:18 ukuti: “Natusuubila ukuti tuli na kampingu [umufumacumi, NW], pa kufwayo kwenda [abafumacumi, NW] muli fyonse.” Ukubelesha kwesu ubufumacumi ‘kupulamike isambilisho lya kwa Lesa Umupusushi wesu muli fyonse.’ (Tito 2:10) Ubufumacumi, pamo pene no kushimikila kwa Bufumu, ukwa Bena Kristu babili mu bufumu bwa ku South Pacific ubwa Tonga bulepeela ubunte bwa maka. Iofesi lya musambo ilya Watch Tower Society mu Western Samoa lyashimika ukuti:

“Pa myaka abaupana babili Inte balelanda pa lwa Bufumu bwa kwa Lesa ku bantu mu mishi ine pa cishi cabo lelo ukwabula ifya kufumamo fimoneka. Lyene, ilintu umulume alwele, umukashi ali no kusakamana icilime cabo kabili aali no kulepula pa kati ingashi no kwanika shene, intulo yabo yeka fye iya ndalama. Lintu inshita yaishile ku balefwaya ukushita ku kubebeta ingashi shauma, umufuko wa muntu umo walisakene ne mifuko isano iya kwa nkashi. Abekala mushi bamucincishe ukusenda umufuko wapulilemo no kumona cene nge paalo ukufuma kuli Lesa. Nkashi, nangula ni fyo, alikeene kabili, nelyo fye lintu alipilwe indalama sha mifuko mutanda, aali fye no kupoka indalama sha mifuko isano. Ubufumacumi bwakwe bwalimwenwe.

“Pa numa, lintu umulume wakwe aali no kuya pa lwendo ku cishi cimbi, shimatuuka alimwipwishe ukumushitilako ifipe fimo. Nte acitile nge fyo aipushiwe kabili abweseshe indalama shasheleko ku mwaume. Umwaume alisungwike. Asosele ukuti wali e muku wa kubalilapo umuntu amubweseshe indalama shasheleko. Bambi abo aleipusha ukumushitilako ifintu lyonse balesunga indalama shasheleko. Inshita imbi, lintu Nte akabile ifintu fimo ukufuma mwi tuuka lya uyu mwaume, umwaume amupeele ulufungulo lwa kwi tuuka, ukumweba ukusenda ifyo alefwaya no kusha indalama mwi tuuka. Bambi abalipo baipwishe shimatuuka umulandu engapeelela ulufungulo lwa kwi tuuka kuli Nte kabili te kuli bena. Umwine we tuuka alondolwele ukuti Nte e untu fye aali no kucetekela mu mushi.

“Imyendele ishaiwamina iya aba baupana babili ilelanshanishiwapo pa kati ka bekala mushi. Inte baishibikilwa ku bufumacumi bwabo, ukukaanabuulamo ulubali kwabo mu mapolitiki, no kucitilo bunte kwabo pa lwa Bufumu bwa kwa Lesa, ifilangisha ubupusano pa kati ka fisumino fya bekala mushi ne fisambilisho fya Baibolo. Nomba lintu ifipusho fyaimako ukukuma kuli Baibolo, abantu ilingi line batununuka Inte ku fyasuko. Umulume alishibushiwa fye nelyo ubushiku, ukuya ku kukumana kwa mu mushi, no kwasuka ifipusho ifyaipushiwe pa mitwe ya Baibolo. Lintu alesangwa ku fililo mu mushi, ilingi line alipushiwa ukulangisha cintu Baibolo isosa pa lwa bafwa, kabili ukulandapo kwakwe kwalipokelelwa.”

E co ubufumacumi bwa aba baupana babili Inte no kushimikila kwabo ukwa Bufumu filepeela ubunte busuma pali ici cishi cayemba ica mu South Pacific. Balesubila ukuti bambi bakasambilila Baibolo no kubuula ukwiminina ku cine. Nga ca kuti bacite co, Yehova Lesa mu kushininkisha akabapaala.—Yohane 8:32.