Bakabilisha ba Bufumu Bacita Lipoti

◻ “UKUPAKASA kukalamba” ukulwisha icilonganino ca Bwina Kristu ica mu kubangilila kwabombele ukusalanganya abasambi abengi aba kwa Kristu. (Imilimo 8:1) Nangu cibe fyo, uku kupakasa kwalibabwelele pa kuti abo basalanganiwe “balaendauka balebile mbila nsuma.” (Imilimo 8:4) Filipi atwalilile ukushimikila, kabili “amabumba baleangwa umutima umo.” (Imilimo 8:6) Fintu ukupakasa kwababwelele mu mwanda wa myaka uwa kubalilapo, e fyo kwali na mu mushi umo mu kapinda ka kulyo aka Thailand.

Painiya waibela uwa Nte sha kwa Yehova atendeke ukushimikila muli uyu mushi, lelo pa kutendeka abekashi ba mu mushi tabaali na kuumfwa. Lintu alandile kuli kashimikila wa cikaya, nangu cibe fyo, abantu balilongene ukushinguluka ku kuumfwa. Bamo baishile mu kwishibo kuti Nte alishibe Baibolo mu kucilapo ukucila pa mutumikishi wabo, e co batendeke ukusambilila Baibolo na painiya nangu cingati bambi balebalulunkanya. Ifibata fyabo fimo fyalipaiwe, ubumi bwa kwa painiya bwalitiinishiwe, kabili iŋanda ya mwaume umo uwalesekelela yalyocelwe. Uyo mwaume asosele ukuti: “Kuti baoca iŋanda yandi, lelo te kuti boce umutima wandi.” Abo abalesambilila na Nte bacofele amacinga intamfu yalepa pa kusangwa ku kulongana pa Ŋanda ya Bufumu. Bane aba bene balibatishiwe, kabili bambi mutanda bacili balasangwa ku kulongana capamo na bene.

Icilambu ca Bufumacumi

◻ Bamunyina mu Zambia balikuula ukushimikwa kusuma ukwa bufumacumi, kabili ici cafumamo amapaalo kuli bene, pamo pene no kwaafwa bambi ukwishiba icine. Eluda umo, uuli ni painiya wa nshita yonse, aali pa lwendo muli basi kabili aumfwile Nte umo muli basi ukulanda kuli bambi pa lwa kubuuka. Umuyendo amwipwishe ukuti: “Mulandu nshi imwe mwe Nte muitungila ukuti ubutotelo bwenu e bweka fye ubwa cine?” Munyina ailundile ku kulanshanya kabili asosele ku muyendo ukuti Yehova akalambula Inte shakwe pantu basambilisha icine ukufuma muli Baibolo.

Pa numa ya bushiku pa kati pali ubu bulendo bwalepa, basi yafikile pa bashilika bacilika umusebo. Kwaleloka imfula iikalamba nga nshi. Umushilika aingile muli basi no kwipusha nga ca kuti kwaliko Inte sha kwa Yehova abali bonse pa lwendo. Balimo batatu. Lyene asosele ukuti: “Cisuma, mwe Nte mushale namwikala, mwe bashala fumeni pa nse ne fyola fyenu.” Bonse bambi bafumine pa nse mu mfula, kabili pa numa ya kulondwa, babwelele ne fipe fyabo ne fya kufwala ifyabomba.

Ukubwelela muli basi, umushilika asosele ukuti: “Umulandu nacilekela Inte ukushala wa kuti baliba bantu abafumacumi. Twalikwata ifyakukumanya ifingi no kusanga ukuti e beka fye ababa bafumacumi; lintu twaipusha ifili mu fyola fyabo, batweba ica cine.” Lintu basi yatwalilile ukuya, munyina aipwishe ukuti: “Ni buli kwi ubutotelo bwa cine?” Umuntu umo ayaswike ukuti: “Ni ubo ubushibombele mu mfula.”

Ee, ubufumacumi bulaafwa ukwishibisha ubutotelo bwa cine, kabili mu cine cine bwalikwata ifilambu fya buko!