“Iyi Ŋanda Yenu”

“IYI ŋanda yenu—kuli yene twalundako.” Ifyo mu kulinga aya mashiwi yasupawilile ukuyumfwa kwa abo bapwishishishe fye umulimo wakosa uwa myaka ibili pe ofesi lya musambo wa Australia ilya Watch Tower Society! Amashiwi yalungatikwe kuli Yehova Lesa, kabili yali lubali lwa lwimbo lwashikilwe ku kashita kaibela. Kashita nshi? Ukupeela kwa kulundako kupya ku ŋanda ya Bethel na fakitori.

Ukutanunuka mu Kwangufyanya Ifyo?

Ku ca kupapusha, mu kucepako pa myaka cinelubali mu kubangilila, ukupeela kwapalako kwalicitilwe pa yaali Bethel yapikana iyakuulwa iipya pa Igleburn, ku masamba ya kapinda ka kulyo ku nse ya Sydney, Australia. Mulandu nshi ukutanunuka kwalundwako kwalekabilwa mu kwangufyanya ifyo?

Ku cintu cimo, impendwa ya Nte mu Australia yalikula ukufuma mu kucepako ukucila 32,000 mu 1981 ukufika ku cipimo ca 51,152 mu October 1989, kabili ico calengele ukwingilishako mu mpendwa ya babomfi ba mu Bethel. Mu kulundapo, kwaliko ukwingilishiwako kwa kupapusha mu bwingi bwa fitabo fintu Australia yaletuma ku misambo imbi. Pali ino nshita, Australia ipayanya impapulo mu ndimi shalekanalekana 37 ku kubombela ukukabila kwa Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Western Samoa, Tonga, Tuvalu, na Wallis Islands, pamo pene na Australia. E ico, ulupwa lwa Bethel lwalikula mu kwangufyanya ukufika ku filundwa 164.

Ku kupayanishisha ulu lupwa lulekula, mu kubangilila mu 1987 ukulundako kwe ofesi lipya ilya ntunti shitatu kwalipwishishiwe, ukupayanya incende ye ofesi lyalundwako ilyalekabilwa nga nshi. Mu kukonkapo, Ibumba Litungulula lyasuminishe ubukuule bwa kutanununa fakitori ya ntunti shitatu no kulundako kwa mwa kusendama ukwa ntunti shisano. Mu January 1988 umulimo walitendeke pali fakitori ipya iyalundwako, iyali no kupayanya amasikweya mita 3,600 yalundwako aya ncende. Imyeshi inono pa numa, umulimo walitendeke pa kutanununa umwa kusendama, ukwali no kupayanya imiputule 51 na imbi iya kusendamamo.

Amalambo na Bukapekape

Ubwite bwalituminwe ku filonganino ukupulinkana icalo ukufwaya aba kuitemenwa abaali no kuba ulubali lwa “lupwa lwa bukuule” ukufika pa myaka ibili. Ukwankulako kwali ukukalamba, kabili aba kuitemenwa ukufuma ku ncito shonse balyankwileko mu kwangufyanya. Ukucila pa maformu ya kwipushishapo 700 yambi yalipokelelwe, kabili ukucila pa ciputulwa ca nshita iya bukuule, ubwingi bonse ubwa ba kuitemenwa 270 balishile no kubomba pa mulimo pa fiputulwa fya nshita ukufuma pa milungu ibili ukufika mupepi ne myaka ibili.

Nte umo akwete ubukwebo bwa fimotoka fikalamba mu kapinda ka kulyo aka citungu ca Queensland. Ashitishe ulubali lwa bukwebo bwakwe, kabili wene no mukashi wakwe babeele ulubali lwa lupwa lwa bukuule ukufuma pa kutendeka kwa buko. Ashitile mashini ya kwimbilako iikalamba kabili acitile umulimo uwa kwimba uwalekabilwa nga nshi apa fye kuli Sosaite. Lintu umulimo ukalamba uwa kwimba wapwishishiwe, ashitishe mashini kabili lyene atwalilile ukwikala ukubomba mu ncende shimbi isha bukuule. Ici cili fye ca kumwenako cimo ica mupashi usuma, uwabula akaso uulangishiwa na bonse ukupulinkana umulimo onse.

Inte basangwile bamashini bapanga indaka ya mabwe ku kupongolwela amakyubiki mita 3,300 aya ndaka ya mabwe yalekabilwa ku ntunti cinekonsekonse mu fikuulwa fibili. Bambi basangwilileko ifibombelo fyalekabilwa ifya matanki ya menshi ya ndaka ya mabwe ifya malita 22,000, kabili Inte abalebomba pa fakitori basangwilileko ukubombesha kwabo ku kukuula amatanki.

Te bonse aba kuitemenwa baali abalamuka baishibe ncito, kwena. Mu cine cine, abacaice abengi basambilile ukulamuka kwa ncito ukupya pa cifulo ca bukuule pene. Abafulilako babeele bakakuula bafikapo ilyo baafwile ukubumba citika wa milioni wa njelwa shalefwaikwa ku mulimo. Bambi basambilile ukubika ifisele ku cibumba na pa nshi, kabili mu milungu fye inono, nkashi umo abeele uwalamuka mu kulambatika ifikope fya ku cibumba.

Ubushiku bwa Kupeela

Ubushiku bwa kupeela, Icibelushi, November 25, 1989, bwacele na kasuba kasuma kabili ubwalengama—ubushiku bwayemba, ku kupwa kwa lusuba. Intunti ya bubili iya fakitori ipya iyalundwako yalipwishishiwe ku kupanga icikuulwa ca kulonganinamo icikalamba ica programu ya kupeela. Ukulundinkanishiwa kuli televisioni mu miputule yali mu ncende sha ntunti shimbi shibili isha fakitori ne ntunti ya kutuminamo ifitabo, icikuulwa ca kulonganinamo ica Bethel, no muputule wa kuliilamo uwa Bethel. Ici capeele incende ya mu kati isuma iya kwikalamo abantu ukucila pali 3,000.

Pa kuti incende yaali iyapelela, beka fye abo ababatishiwa ukucila pa myaka 40 e balaalikwe ku kusangwako, capamo na batandashi ba pa lwabo aba lupwa lwa Bethel no lupwa lwa bukuule. Ifya kupembesula e ko fyali mu nshita ya lucelo, kabili imbokoshi ya fya kulya fyanunkila ifya pa kati ka kasuba fyalipayanishiwe. Pa 9:00 a.m., ukukumana kwa pa mwaka ukwa Watchtower Society ya Australia kwalicitilwe, kabili ifilundwa fyonse 21 ifye bumba lya mwi funde ifya mu Australia fyalisangilweko. Pa numa ifyebo fya mwi funde ifikabilwa fyabombelwepo, bambi balilaalikwe mu kukumana, kabili bonse balisansamushiwe ku kuumfwa ilyashi kuli Theodore Jaracz uwe Bumba Litungulula.

Pa 1:45 p.m., inyimbo sha Bufumu isha maminiti 15 shatendeke programu ya kupeela. Ibumba lyaali ilya nsansa ukuumfwa amalipoti, amalyashi ayepi aya kusekesha, ifyakukumanya, no kulandapo ku filundwa fitatu ifye Bumba Litungulula abasangilwepo. Pali aba, Carey Barber na Daniel Sydlik balecita ukutandala kwabo ukwa kubalilapo ku ncende ilya. Munyina Barber alandile pa mutwe wa lyashi uwa kuti “Ukulobolola E Kupwa kwa Nkulo,” lintu Munyina Sydlik abombele no umutwe wa lyashi uwa kuti “Ba Nsansa Abantu Abo Lesa Wabo Ni Yehova.” Munyina Jaracz, uyo walebombela umusambo wa Australia pamo nga kangalila wa calo, apeele ilyashi lya kupeela.

Ulubali lwa kulekelesha ulwa programu lwali kwimba kwa lwimbo lwa fikomo fine pa ntanshi fye ya lyashi lya kupeela. Ukushimpa pa mashiwi ya kwa Esaya pali Esaya 60:22, umutwe wa lwimbo wali wa kuti “Umunono Abe Kana Limo.” Mu kulekana kwa fiunda ukutasha kwalumbulwilwe kuli Yehova ica kuti aba kuitemenwa abengi balikwete ishuko ku kulunda kuli ‘iyi ŋanda’ muli ulu lubali lwe bala lya mu kusalala kwa calo.

[Ifikope pe bula 15]

Ukulundwako kupya ku mwa kupulintila pa Ingleburn, N.S.W., Australia

C. Barber

T. Jaracz

D. Sydlik