Icalo Cipya Cili Mupepi!
IMITUBULULO ingi ku kundapa amalwele ya calo. Mu cinkumbawile, ifwaya ukwangwako no kubombela pamo, pamo pene no kubombesha kwakulisha ukwaikatanishiwa ne nko shonse mu kusaalala kwa calo. Kuliko ukuyumfwa kwa kuti ilyo imibele yabipilako, ukukabila kwa kubakwa kwa bonse kukapatikisha inko ukupimununa ifise ntanshi fyabo no kubombela capamo ku kupanga icalo cipya kabili icingatungililwa. Calicitwe cikope ukuti ishipooswa shapimwa isha fita shikacefiwako apakalamba nga nshi mu kutemwa ukubomfya ubukumu ku kulolenkana ne fintiinya fya fyashingulukako kabili ukuti, nga fintu camonwa muli State of the World 1990, “ukucila pa kulasungilila ifyaimikwa fyabo fiine ifya kuicingilila ifikalamba, amakamfulumende kuti pambi yaisa ku kushintilila pa mulalo watanununwa apakalamba kabili uwakoshiwa uwa kusungo mutende uwa U.N., umo uwingakwata amaka no bulashi ku kupokololako icalo icili conse icili cilundwa ku wa kusansa.”
Lelo amapange ya musango uyo yalapelebelo kutali ku kuletako imibele yafulukwa iyacitantikwa mu mabula yesu aya kwiswila. Imicenjelo ya fye iya buntunse te kuti mu nshila iili yonse yundape ukubembuka kwa buntunse no kufunuka; taifumyapo impatila no kulwa kwa mishobo; tailetako ukutemwa kwabula kaso pa kati ka mutundu wa muntu onse; kabili te kuti yebekeshe impela ku kulwala ne mfwa. Imisoka tailolenkanishiwa mu kufumamo cimo, kabili takwabako ukulumbula ukuli konse ukwa kucimfya ukupusana kwa butotelo no lupato. Kabili ukufumyapo utuyofi twa cifyalilwa te kuti nelyo fye kulangulukwepo. Ukutemwa buluko, mu kuba no kwenekelwa kwa kuko ukwa kulenga impika, kwasuminishiwa ukutwalilila. Mu kubulwe nsansa, lyene, tufwile ukusondwelela ukuti abantunse balifilwa ukuletako ukupikulula kubomba.
Nalyo line, kuliko ukupikulula! Mu cine cine, ifi fintu fyonse ififulukwa no mutundu wa muntu fyalilaiwa, kabili icilayo cifuma kuli Lesa “uushibepa.” (Tito 1:2) Alishiba mu cine cine ififwile ukucitwa, kabili alikwata amano, amaka, no kukampuka ku kupwishishisha cintu akwatile mifwaile.—Ukusokolola 7:12; 19:1.
Lesa alaya ukuti: “Pashala panono, e lyo umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende.”—Ilumbo 37:10, 11.
Ni shani fintu ici cikapwishishiwa? Esaya 11:9 ayasuka ukuti: “Tafyakacite bubi, kabili tafyakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.” Ee, umutundu wa muntu onse ukasambilishiwa “ukwishiba Yehova,” kabili abantu abali bonse umo umo abakaana ukumfwila tabakasuminishiwe ukutwalilila no kufulunganya umutende wa bambi. Isonde lyesu ilyayemba talyakonaulwe na kabili.
“[Moneni] imilimo ya kwa Yehova . . . Aputulo bulwi ukufika ku mpela ya calo,” e filaya Ilumbo 46:8, 9. (Moneni na kabili Mika 4:3, 4.) Ica kusangwilako cacindama mu kulenga umutende wa mu cibulungwa kupwisha ukupusana kwa kutemwa buluko. Ukubombela pamo kwalyebekeshiwa, pantu ni kamfulumende fye imo e ikabako mu kusaalala kwa calo—iyo iya kwa Lesa. Kabili kamfulumende yakwe buli Bufumu “ubushakonaulwe umuyayaya.” (Daniele 2:44) Ukulundako, Imfumu ya buko ni Yesu Kristu wabuushiwa, uushifwa, untu ukuteka kwakwe kukaba kwa bulungi no bulungami.—Esaya 9:6, 7; 32:1.
Lelo bushe ici kuti cafulunganishiwa no kukanapwililika kwa cifumanda ukwa muntu no konaulwa ku kukalipwa kwatwalilila, ukulwala, ubulanda, ne mfwa? Iyo, pantu ne fi fiine fikaba fintu fyapita. Ukusokolola 21:4 kutwebekesha ukuti: “Kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” Ulubembu lwapyanwa lukeleelwa pa cishinte ce lambo lya cilubula ilya kwa Yesu, kabili umutundu wa muntu ukabweshiwa ku mibele yapwililika. (Abena Roma 6:23; Abena Efese 1:7) Kabili ni nani uungacilapo ukulama amaka ya cifyalilwa no kuyasunga ukufuma ku kucena umutundu wa muntu ukucila pali Kabumba wabo?—Ilumbo 148:5-8; Esaya 30:30.
Ifintu ifyo umuntu engasubila fye no kulotapo fye, Lesa akaleta. Lelo ni lilali? Ubusesemo bwa Baibolo bulangilila ukuti ukwaluka kukesa pa nshita lintu inko shili mu ‘kukalipa’ kabili umuntu ali no ‘konaule calo.’ (Ukusokolola 11:18) Inshiku sha kulekelesha isha calo cikote shilingile ukwishibikilwa ku “nshita ishayafya”—ukufumamo ukubipilako kwa mibele ifyo tulemona ukutushinguluka nomba line. (2 Timote 3:1-5, 13) Kabili Yesu asobele ukuti inkulo iyamona ifintu fya musango uyo yaali no kuba ni nkulo iyaali no kumona ukufikilishiwa kwa malayo ya kwa Lesa.—Mateo 24:3-14, 32-34.
Buule nshita ku kubebeta muli ayo malayo ayalembwa muli Baibolo. Pantu pali ici cishinka, bonse abantu bakwata ukwishiba na Lesa balasuminishanya: Nomba e nshita ku calo cipya!