“Ifilamba fya Kutasha”
“UKULILA ifilamba fya kutasha, e lyo napwa fye ukubelenga icipande ‘Ifya Kwaafwa Abapopomenwa Ukunonko Buseko Cipya Cipya.’” (Ulupungu lwa kwa Kalinda March 15, 1990, amabula 26-30) Ifyo e fyatendeke imo iya makalata ayengi aya kutasha ayapokelelwe na Sosaite ku fipande pa lwa kupopomenwa ifilemoneka mu shafumine isha March 1 na March 15, 1990. Uku kulumbulula kwaibela, nangu cibe fyo, kwafumine kuli nkashi mu Japan uo umwana wakwe umwaume umwaice nomba line apaminwe no bulwele bwa muntontonkanya (schizophrenia). Alondolola ukuti:
“Ukusansamusha no kukoselesha uwapopomenwa cila bushiku, inshita shimo ndayumfwa uwabulwa amaka ku kutwalilila. Lintu bwaila, umwana wandi umwaume alafyambatwa no mwenso no kusakamikwa. E co ndamupeela utubulungwa twa kulengo tulo no kwikala pa mbali ya busanshi bwakwe ukulapukusa iminwe yakwe no kubika iminwe yandi pa mpumi yakwe ukufikila alaala. Caba fye kwati kulaalika umwana, kabili pa numa mupepi ne awala limo, mu kupelako aponena mu tulo twashika. Ilyo e lintu ŋumfwa uwailulukwa, lelo pa nshita imo ine, ndayeba ukuti mailo ulucelo nkalupitamo.
“Umwana wandi umwaume asoso kuti, ‘nshawaminwe icili conse. Takwaba isubilo kuli ine.’ Cila bushiku epusha mu bulanda ukuti, ‘Bushe nkabala ŋundapwa ubulwele bwandi? Ni lilali nkalubuka ku muti? Butali bwaba shani uyu musango wa bumi ukatwalilila?’ Pa nshita sha musango uyu momfya ifipusho ku kwalula itontonkanyo lyakwe nge fyo bamagazini batubulwile, kabili ici cilamwaafwa ukupuupuutuka ukufika ku cipimo cimo. Lelo tupita mu mpika imo ine ubwaca no bwaila.
“Kulabako na kabili inshita ilyo umwana wandi umwaume eta baeluda [ukufuma mu cilonganino ca pa mwesu] pa kati ka bushiku ilintu ayumfwa uwasakamikwa nga nshi kabili abepusha ukumupepelako. Ici cimoneka ukuba ica kusansamusha apakalamba kuli wene no kulenga umuntontonkanya wakwe ukutusha. . . . Ilingi line, imibele ya mwana wandi umwaume ilabipilako lintu umulume wandi (uushasumina) aya ku nyendo sha makwebo. Lintu naipusha ukwaafwa pali lamya, bamunyina abengi babutukila ku ŋanda yesu.
“Namutasha, bamunyina, ukufuma pe samba lya mutima wandi pa kusabankanya ifipande fya musango yu ukufuma ku nshita ne nshita kabili ukulangilila ukuti mulasakamana ifikabilwa fya banaka.”
[Yasainwa na] H. H.