Shintilileni pa Bukose Bwapeelwa na Lesa
Ifishinka Fikalamba Ukufuma Muli Timote wa Cibili
YEHOVA apeela ababomfi bakwe amaka ku kushipikisha ifya kwesha no kupakaswa. Kabili fintu Timote na Bena Kristu bambi bakabile ubukose bwapeelwa na Lesa! Umulilo waocele Roma mu 64 C.E., kabili amaŋumfuŋumfu yasokolwele ukuti Kateka Nero e washingemwe. Ku kuicingilila umwine, apeele umulandu Abena Kristu, kabili ici mu kumonekesha capumikishe ibimbi lya kupakasa. Mu kupalako pali ilya nshita (mupepi na 65 C.E.), umutumwa Paulo na kabili abikilwe mu cifungo mu Roma. Nangu cingati alolenkene ne mfwa, lyene alembele kalata wakwe uwa cibili kuli Timote.
Kalata wa kwa Paulo apekanishe Timote ku kukaanya abasangu no kwiminina uwashangila mu kulolenkana no kupakaswa. Yamukosekeleshe ukucita ukulunduluka kwa ku mupashi no kulanda pa lwa mibele ya kwa Paulo mu cifungo. Kalata na kabili ikoselesha bakabelenga ku kushintilila pa bukose bwapeelwa na Lesa.
Cula ku Bubi no Kusambilisha mu Kuba no Kufuuka
Lesa atupeela ubukose ku kushipikisha ukupakaswa nga bakashimikila ba mbila nsuma. (2 Timote1:1-18) Paulo tabalile alaba Timote mu mapepo yakwe, kabili aibukishe icitetekelo cakwe icabula bubumbimunda. Lesa tapeele Timote ‘umupashi wa bukuuwe, lelo uwa maka, uwa kutemwa, kabili uwa kutekanya.’ E co lekeni abe uushaba na nsoni mu kucitilo bunte no kucula ku bubi pa mulandu wa mbila nsuma. Na kabili akoseleshiwe “[ukukonke] cipasho ca fyebo fituntulu” ifyo aumfwile kuli Paulo, kwati ni fyo tulingile ukwikatilila mu kukosa ku cine ca Bwina Kristu ica cine cine nangu cingati bamo bapumbuka ukufuma kuli cene.
Ifintu ifyo Paulo asambilishe fyali no kupeelwa ku baume ba busumino abaali no kusambilisha bambi. (2:1-26) Timote aebelwe ukuba icita cisuma ica kwa Kristu, uwa busumino lintu alecula ku bubi. Paulo umwine aculile mu fikakilo fya cifungo pa kushimikila imbila nsuma. Akoseleshe Timote ukucincila ku kuipeela umwine kuli Lesa ngo mubomfi wasuminishiwa, uuleuka ifya kubwabwata ifyabipa ifyo fitoba ica mushilo. Kabili aebelwe ukuti umusha wa kwa Shikulu afwile ukukambisha bambi mu kuba no bufuuke.
Bile Cebo!
Ubukose bwapeelwa na Lesa bwalekabilwa ku kulolenkana ne nshiku sha kulekelesha no kusumbula icine ca mu Malembo. (3:1-17) Ukufuma pa kati ka bashipepa kwali no kwisako abantu ‘abasambilile inshita yonse no kuba pe abafilwo kwishibe cine.’ Aba musango uyo ‘abantu babifi kabili abafutika bakalundulukila ku kubipo kucila, abaluba kabili abalufiwa.’ Nangu cibe fyo, Timote aali no ‘kwikalilila muli ifyo asambilile.’ E fyo na ifwe tulingile ukucita, pa kwishiba ukuti ‘Amalembo yonse yantu yapuutwamo kuli Lesa, kabili ya mulimo ku kusambilisha, ku kwebaula, ku kulungika, ku kufunda kwa mu bulungami; ukuti umuntu wa kwa Lesa abe uwapwililila, uwaiteyanya ku kubombo mulimo onse usuma.’
Timote aali no kukaanya abasangu no kupwilikisha ubutumikishi bwakwe. (4:1-22) Aali no kucita ifyo mu ‘kubile cebo’ no kwikalilila kuli cene. Ici cali icakatama, apantu icilonganino calolenkene ne ‘nshita iishayene’ pa kuti bamo balesambilisha ififundisho fya bufi. Inte sha kwa Yehova na bo bene bekatilila ku Cebo ca kwa Lesa nomba, ukucishimikila mu kuba no kupamfiwa mu cilonganino na ku bantu ku nse, nangu fye mu mibele iishiyene. Paulo ‘abakile citetekelo,’ nangu cingati alikeenwe kuli bambi. Lelo ‘Lesa aiminine kuli wene no kumukoselesha, ukuti ukubila kufishiwepo muli wene.’ Shi na ifwe natushintilile pa bukose bwapeelwa na Lesa no kutwalilila ukushimikila imbila nsuma.
[Akabokoshi ne Cikope pe bula 31]
Icita Cisuma: Paulo acincishe Timote ukuti: “Culila pamo na babiyo, nge cita cisuma ca kwa Kristu Yesu. Uwa mulalo nangu umo takobwa mu mitabotabo ya bwikalo buno, e kuti atemune uwamulembele mu mulalo.” (2 Timote 2:3-4) Icita ca pa nshi ica bena Roma ‘caculile ku bubi’ lintu calesenda ifyanso fyafina, isembe, umuseke, ifya kulya fya nshiku shitatu, ne fipe fimbi. (Josephus’ Wars of the Jews, Book 3, icipandwa 5) Tasupile amabuseko ya makwebo, pantu ico nga tacatemwine abalemwangalila, kabili ifipooswa fyakwe fyalifimbilwe. Mu kupalako, Umwina Kristu acula ifya kwesha ifyasuntinkanishiwa no kuba “icita cisuma ca kwa Kristu.” Nangu cingati kuti abomba incito ya ku calo ku kukumanisha ukukakililwako kwa ku mupashi, tafwile ukuleka ukuibimbamo kushalinga mu fintu fya ku mubili ukumulenga ukuleka ukulwa ubulwi bwa ku mupashi. (1 Abena Tesalonika 2:9) Ukucitilo bunte ukufuma ku ŋanda ne ŋanda, abomfyo “lupanga lwa [mupashi] ulo e cebo ca kwa Lesa,” no kwaafwa abantu ukufuma ku kuluba kwa butotelo. (Abena Efese 6:11-17; Yohane 8:31, 32) Apantu ubumi buli mu busanso, shi ifita fyonse ifya Bwina Kristu fitwalilile ukutemuna Yesu Kristu na Yehova Lesa muli iyi nshila.