Bakabilisha ba Bufumu Bacita Lipoti
Bacetekele Muli Yehova
INTE SHA KWA YEHOVA balikambishiwa kuli Yehova ukushimikila imbila nsuma iya Bufumu ku calo conse pa kuti abantu ba nko shonse bakakwate ishuko lya mu nshita ukwishiba ulwa calo cipya ica kwa Lesa. Mu fyalo fimo, ilingi line pa kusonga kwa bashibutotelo ba Kristendomu, umulimo wesu ulaleshiwa. Uyo waba e mulandu mu calo cimo mu Africa. Lelo Inte sha kwa Yehova kulya bacita nge fyacitile Imfumu Davidi. Asosele ukuti: “Lesa e o natetekela, nshatiine; cinshi ico umuntunse engacita kuli ine?” (Ilumbo 56:11) Ifyakukumanya fya bamunyinefwe muli cilya calo filanga ukuti balicetekela muli Yehova kabili batwalilila no mulimo wakwe uwakatama.
Inte umo uwalebomba nga kafundisha mukalamba pa sukulu apampamine pa kunakila “Lesa ukucilo kunakila abantu,” ukubilisha ukukanabuulamo ulubali kwakwe mu milandu ya Buteko. (Imilimo 5:29) Alyuminwe icabipisha kabili aenekelwe ukupingulwa nga kafutuka. Bonse batontonkenye ukuti aali no kwipaiwa. Nte, nangu cibe fyo, acetekele muli Yehova. Atwalilile uwa citetekelo kabili alondolwele imilandu isuma ku kwiminina kwakwe. Ica kufumamo? Alilekelweko no kubweshiwa kwi tauni lya kumwabo, pa numa ya ico ifibombelo fya Buteko abamumine balilombele ubwelelo. Uyu Nte wa cishinka alibweshiwe ku ncito yakwe iya bukafundisha kabili alisumbwilwe ku cifulo ca kwa kabebeta wa masukulu!
Kampanya we sukulu limo akwete kafundisha Nte ukutamfiwa. Umweshi umo pa numa uyu kampanya apokelele icitabo ca Kuti Waikala Kuli Pe na pe muli Paradise Pe Sonde ukufuma kuli painiya waibela kabili asumine kwi sambililo lya Baibolo. Pa numa ya kupwisha icipandwa 6, alilekele incito nga kampanya we sukulu, kabili wene no mukashi wakwe batendeke ukusangwa ku kulongana konse ukwa Nte sha kwa Yehova. Ulucelo lumo pa mulungu kafundisha watamfiwe incito alipapushiwe apakalamba ukukumanya umwaume uwamutamfishe no kusanga ukuti aali pa nshila ya kuba munyina wa ku mupashi.
Ica kukumanya na cimbi ukufuma kuli ici calo cimo cine cilangilila fintu Inte sha kwa Yehova balimba umucinshi ku mitantikile ya kwa Yehova no kubomba ku kusunga ukuteyanya ukwasanguluka. Painiya waibela uwalebombela mu cifulo ca kubombelamo icaba ceka akumenye ukukaanya ukwingi. Apantu afumine ku mukowa umbi ne citungu, abalwani ba cine balefwaya ukumutamfya ukufuma mu mushi. Nangu cibe fyo, imfumu ya mushi yasonteleko ku myendele yakwe ne fya kufumamo fyawama ifya butumikishi bwakwe kabili taali nakusuminisha ukutamfiwa kwakwe. Imfumu yalimwene ukuti ukutula pa kwisa kwa kwa painiya waibela, abantu balecindika amabulashi yateka pa kulipila imisonko yabo no kubomba umulimo wa kuwamya imisebo mu bwikashi limo mu mulungu.—Abena Roma 13:1, 7.
Lyene, inshita ya bushiku imo Nte umbi aliketwe ubucende no mwanakashi ushali Nte. Kwaliko ishiku, kabili painiya waibela alitilwe ku mfumu, iyamulengulwile, ukusoso kuti: “Mona munonko uwiketwe mu bucende. Imwe mwe Nte sha kwa Yehova tamwapusanako ukufuma ku mabutotelo yambi.” Painiya waibela, nangu cibe fyo, alondolwele ukuti: “Nangu twaba abashapwililika, twalipusanako ukufuma ku mabutotelo yambi pantu tatutekelesha incitilo sha abo abacita imembu shabipisha.”
Nte uwacitile ubucende alikakilwe mu cifungo no kulipila indalama. Mu kulundapo, alitamfiwe ukufuma mu cilonganino pamo nga kacita wa fibi ushalapila. Iyi ncitilo yaebekeshe imfumu kabili yatalalike utunwa twa abo abalepumya Inte sha kwa Yehova. Imfumu yalandilepo ukuti: “Mwilalanda bubi bubi pa lwa Nte sha kwa Yehova. Balikwate cine. Incitilo ya musango uyo taibuulwa ku mabutotelo yambi.”
Inte sha cishinka muli cilya calo bakonka ukukonkomesha kwe Ilumbo 37:3 ukuti: “Tetekela Yehova no kucite cisuma, ikala mu calo no kubishanya ne cishinka.” Bushe tukacetekela muli Yehova nga fintu aba Abena Kristu bacita?