Babomba Apapela Amaka Yabo

Nangula te kuti babe na maka ya kubwesesha kuli Yehova pa bunonshi bwakwe bonse kuli bene, abengi bacita apapela amaka yabo ku kwafwilisha umulimo wa mu kusaalala kwa calo uwa Nte shakwe. (Mateo 24:14; linganyeniko Marko 14:3-9.) Ica kusekesha muli uyu mulandu ni uyu kalata ukufuma ku lupwa mu Minnesota, U.S.A.:

“Bamunyina Batemwikwa,

“Tuletuma umusangulo wa bwingi bwa $——. Tuleipusha ukuti ubomfiwe ku kwafwilisha mu fya ndalama umulimo wa mu kusaalala kwa calo nelyo ubomfiwe ku Indalama sha Kukuulila Amayanda ya Bufumu, nelyo ku kukabila ukuli konse kumbi uko ukuteyanya pambi kwingakwata. . . .

“Tuli abacetekela ukuti ishi ndalama shili no kubomfiwa mu kumfwana no kufwaya kwa kwa [Yehova]. Kuti twatemwa ukubuula ili shuko ku kutambika ukukoselesha kwesu ku kutwalilila umulimo ushaiwamina, kabili ukucilisha tulemutasha kuli tepu ya video iya mibombele ya mu kusaalala kwa calo iya [Watch Tower] Society. Cali ni iyi tepu e yatulengele ukuba abaibukila ulwa kukula kwa mulimo, kabili yatulengele ukumfwikisha ukuti imisangulo yesu iya kuitemenwa ilakabilwa. Akale, twalekeele icilonganino, umuputule, ne citungu ukusakamana ukutuma imisangulo kuli imwe, lelo nomba tuletasha Yehova pa kuba uwatekanya na ifwe mu mimwene yesu iyaipipa no kutulanga mu kubamo ukutemwa ukukabila kwa kwafwilisha mu fya ndalama pa lwesu uyu mulimo wa kupususho bumi, mu kulunda ku misango imbi iya misangulo. Tulepingulapo ukutuma, pamo ngo lupwa, ukukanacepako pali $—— cila mweshi . . . mu kulungatika ku New York.

“Na kabili, twamutasha ku kwaafwa kushaiwamina mupeela kuli ifwe ne citetekelo kuli Yehova cintu mwalangisha.”