Bushe Uleibukisha?

Bushe walipeelako itontonkanyo lyasakamanisha ku shafuma isha nomba line isha Ulupungu lwa kwa Kalinda? Nga ni fyo, mu kupalishako ulecisanga ica kusekesha ukwibukisha ifyakonkapo:

◻ Ni shani fintu icalembwa ca Baibolo ica mbuli sha kwa Yehova citupeela ukucetekela mu kulolenkana no “bucushi bukalamba”? (Mateo 24:21)

Lyonse ukuba mu kulama, Yehova alilangilila ifyo kuti atontonkanya ukucila abalwani bakwe no kuteulwila imibele kwi pusukilo lya bantu bakwe.—8/15, ibula 27.

◻ Cinshi cintu abafyashi bafwile ukuba abaitemenwa ukucita ku kusungilila ukumfwana pa kati ka bene na bana babo?

Abafyashi bafwile ukupoosa inshita na bana babo. Na kabili, bafwile ukuitemenwa ukuipusulako pa mulandu wa bana babo ku kukula kwabo ukwa ku muntontonkanya, ku mubili, na ku mupashi.—9/1, ibula 22.

◻ Bupilibulo nshi ukwaluka kwa kwa Yesu kwakwata kuli ifwe ilelo? (Marko 9:2-4)

Ukwaluka kuti kwakuula icitetekelo mu cebo ca busesemo ica kwa Yehova no kukosha icisumino cesu muli Yesu Kristu pamo nga Umwana wa kwa Lesa kabili Mesia walaiwa. Na kabili kuti kwakosha icisumino cesu mu kubuuka kwa kwa Yesu ku bumi bwa ku mupashi no kulundulula icitetekelo cesu muli kamfulumende ya kwa Lesa.—9/15, ibula 23.

◻ Cinshi caba ubupilibulo bwa “pa nshita imo” pali Esaya 11:6? (NW)

Ubupilibulo bwasakamanisha ubwa ici cikomo bulanga ukuti umumbulu no mwana wa mpaanga tafyakaleba lyonse mupepi na cimo ne cinankwe mu calo cipya. Cili icapalako ukuti ifinama fya musango uyo fikaba ficili nafikwata amekalo yapaatulwa na muli ifyo ukwisa pe samba lya mabumba ya ‘fitekwa ne nama sha mpanga’ nga fintu fyaliko muli Paradise ya kutendekelako. (Ukutendeka 1:24) Nangu cibe fyo, ifinama fikaba pa mutende cimo ne cinankwe, ukuba na maka ya kuba mupepi na cimo ne cinankwe ukwabula ubusanso.—9/15, ibula 31.

◻ Cinshi caba ulufungulo ku buKristu bwa cine cine?

Ukutemwa e lufungulo ku buKristu bwa cine cine. Icitetekelo, imilimo, no kubishanya kwalungama fyalikatama, lelo ukwabula ukutemwa umutengo wa fiko taumwensekeshiwa. Ici caba ifyo pa mulandu wa kuti Yehova ukucila pali fyonse aba ni Lesa wa kutemwa. (1 Abena Korinti 13:1-3; 1 Yohane 4:8)—10/1, ibula 20.

◻ Bushe inumbwilo “inshita ya kufyalwa, ne nshita ya kufwa” pali Lukala Milandu 3:2 ilafwilisha imfundo ya kuti Lesa alipimina libela inshita yesu iya kufwa?

Iyo. Solomone alelanda fye pa lwa kushinguluka kwatwalilila ukwa bumi ne mfwa uko kucululusha abantunse bashapwililika. Lukala Milandu 7:17 ilondolola ukuti: “Wilundapo pa kubifya nangu kubo watumpa; cinshi ico ulefwila ilyo inshita yobe tailafika?” Mano nshi yantu uku kufunda kwingapanga nga ca kuti inshita ya umo iya mfwa yalipiminwe libela?—10/15, amabula 5-6.

◻ Cinshi cipaasha ukulwisha ukuba kwa mutumwa Petro shikofu wa kubalilapo uwa Roma?

Takwabako ukushinina ukuli konse ukwa kuti Petro alibalile atandalila umusumba wa Roma; kabili Petro tabalile alosha ku mwine eka pamo nge cili conse ukucila pa kuba umo uwa batumwa ba kwa Kristu. (2 Petro 1:1)—10/15, ibula 8.

◻ Bushe caliba icalungama ku Bena Kristu ukutuma amaluba ku cililo?

Nga ca kuti calishibikwa bwino ukuti umwata (nelyo ica kulenga, pamo nga umusalaba) ndakai kwalikwata ubupilibulo bwa butotelo mu ncende ya umo, cilingile ukusengaukwa. E co Abena Kristu tabakatume amaluba mu musango wa musalaba nelyo ukuyabomfya mu nshila ya kusefya iyo mu kukanatwishika yakwata ubupilibulo bwa butotelo bwa bufi. Nangu cibe fyo, pali ino nshita mu fyalo ifingi, umwata wa kupayanya amaluba ukwabula ukusuntinkana kwa butotelo waliba uwaanana. Abena Kristu bamo batuma amaluba ku kusanshako ukuyumfwa kwa kusansamusha ku kashita ka bulanda no kulanga icililishi no kwangwako.—10/15, ibula 31.

◻ Cinshi cintu ubulondoloshi bwabamo ubulashi bulenga ukumfwika pa lwa Bulesa Butatu?

Bucilenga icaumfwika ukuti icifundisho ca Bulesa Butatu te mfundo yayanguka. Mu cifulo ca ico, caba lilongo lyapikana ilya mfundo ishaletwa pamo ukucila pa myanda ya myaka no kukobenkanishiwa muli imo ne inankwe. Abasambilila abengi, ukusanshako abasumina muli Bulesa Butatu, balasumina ukuti Baibolo mu cituntulu tayabamo icifundisho ca Bulesa Butatu.—11/1, amabula 21-2.

◻ Mulandu nshi 29 C.E. yalangulukilwa ngo bushiku bwa kwalukilapo mu lyashi lya kale ilya Baibolo?

Pa mulandu wa kuti pa kusaakanya ifyebo fya Baibolo ifyalungikwa no kupende nshiku kwa ku calo ukwa kuteka kwa kwa Tiberi, abasambi ba Baibolo kuti bapenda ukuti ubutumikishi bwa kwa Yohane bwatendeke muli shinde wa 29 C.E. no kuti imyeshi mutanda pa numa, mu mibundo ya 29 C.E., Yohane abatishe Yesu.—11/15, ibula 31.

◻ Cinshi cintu “ukupepa” kwapilibwile ku bantu balanda iciHebere, kabili ni shani fintu ici cibomba ku Nte sha kwa Yehova ilelo?

Ishiwi lyapalako ilya ciHebere ilye shiwi “ukupepa” kuti lyapilibulwa “umulimo.” Ku muntontonkanya wa ciHebere, muli ifyo, ukupepa kwapilibwile umulimo. Ici e cintu cipilibula ku bantu ba kwa Yehova ilelo, e co ica kwishibilako cacindama ica butotelo bwa cine caba mulimo wa bukapepa uwa kushimikila.—12/1, ibula 19.