Ukusekelela Muli Kabumba Wesu Uwakulisha

“Lekeni Israele asekelele mu Wamulenga wakulisha, lekeni abana ba Sione—baangile mu Mfumu yabo.”—ILUMBO 149:2, NW.

1. Te mulandu no kubilisha kwa “buntungwa mu kupelako,” cinshi cili e mibele ine ine iya mutundu wa muntu?

ICALO ca lelo capumwa no “kushikitika kwa kupaapa.” Iyo e numbwilo Yesu abomfeshe mu busesemo bwakwe ukukuma ku “kusondwelela kwa micitile ya fintu” (NW), inshita yabamo akayofi iyatendeke ne nkondo ya calo iya kubalilapo mu 1914. (Mateo 24:3-8) Bapolitishani abengi tabamona icili conse kano fye imfifi ya ku nshita ya ku ntanshi. Te mulandu no kubilikisha kwa “buntungwa mu kupelako” muli Europe ya ku Kabanga, uwali pa nshita imo presidenti muli ilya ncende asupawile imibele lintu asosele ukuti: “Ukupuulika kwa bwingi bwa bantu no kusonga kwa greenhouse, ifipunda muli ozone na AIDS, icintiinya ca kululunkanya kwa manyukiliya no mupokapoka ulekulilako mu kumonekesha pa kati ka kapinda ka ku kuso aka ba fyuma na kapinda ka ku kulyo aka bapiina, ubusanso bwa cipowe, ukucepelako kwa ncende isangwamo bumi no bukumu bwa mabwe ubwa ino planeti, ukutanunuka kwa lutambi lwa fya makwebo ya pa televisioni ne cintiinya cilekulilako ica nkondo sha mu ncende shimo—ifi fyonse, ukukumbinkanishiwa na makana ya fya kusangwilako fimbi, fimininako icintiinya ca cinkumbawile ku mutundu wa muntu.” Takuli amaka ya buntunse ayengasesha ici cintiinya ca kayofi ka kwipaya.—Yeremia 10:23.

2. Ni nani akwata ukupikulula kubelelela ku mpika sha mutundu wa muntu, kabili lutampulo nshi abuula kale kale?

² Kuti twasekelela, nangu cibe fyo, pa kuti Kabumba wesu Uwakulisha alikwata ukupikulula kubelelela. Mu busesemo bwa kwa Yesu “ukusondwelela kwa micitile ya fintu” kwasuntinkana no “kubapo” (NW) kwakwe ukwa kukanamoneka. (Mateo 24:3, 37-39) Pa kupanga “imyulu ipya,” Yehova abikile Yesu pa cipuna cakwe ica bufumu nge Mfumu ya buMesia, ubushininkisho bwa mu busesemo ukulango kuti ici ca kuponako cacindama mu lyashi lya kale cacitike mu myulu mu mwaka wa 1914.a (2 Petro 3:13) Pamo nga kateka wa kubishanya na Shikulu Mulopwe Yehova, Yesu nomba alitumwa ku kupingule nko na ku kupaatukanya abafuuka, abantu bapale mpaanga aba pe sonde ukufuma ku bapale mbushi abatalama. “Imbushi” shabula bukapepa shapeelwa icishibilo ca “kulimunwa kwa muyayaya” kabili “mpaanga” ku bumi bwa muyayaya mu mekalo ya pe sonde aya Bufumu.—Mateo 25:31-34, 46.

3. Mulandu nshi Abena Kristu ba cine bakwata uwa kusekelela?

³ Abashalapo ba kwa Israele wa ku mupashi pe sonde, abalundwako nomba ne bumba likalamba ilya ishi mpaanga sha cumfwila, nabakwata umulandu onse uwa kwaangila muli Yehova, Imfumu ya ciyayaya, ilyo aleleta imifwaile yakwe pa kalume ukupitila mu Bufumu bwa Mwana wakwe. Kuti batila: “Ukusekelela nkasekelela muli Yehova, umweo wandi ukalayangila muli Lesa wandi; pantu amfwika amalaya ye pusukilo . . . Ifyo umushili ufumyo mumeno, ifyo ibala lilenge fyabyalwamo ukupuuka, e fyo Shikulu [Mulopwe, NW] Yehova akalengo bulungami no kutasha ukupuuka ku mulola wa nko shonse.” (Esaya 61:10, 11) Uku “kupuuka” kwashininkishiwa mu mamilioni abalelonganikwa nomba ukufuma mu nko ku kwimba ilumbo lya kwa Yehova.

‘Ukucikalakasha’

4, 5. (a) Ni shani fintu ukulonganikwa kwa bantu ba kwa Lesa kwasobelwe? (b) Kwingilishiwako nshi ukwapulamo kwamwenwe mu kati ka mwaka wa mulimo uwa 1992?

⁴ Ukulonganika kuleangufyanya ilyo impela ya micitile ya kwa Satana ilepalamina. Kabumba wesu Uwakulisha abilisho kuti: “Abantu bobe bakaba abalungami bonse . . . , ukulimba kwandi, umulimo wa kuboko kwandi, ku kuleka ncindamikwe; umunono akabe kana limo, uwacepa akabo luko lwakosa. Ine Yehova ne wasose ci, mu nshita ya ciko nkacilengo kukalakasha.” (Esaya 60:21, 22) Uku kukalakasha kulemoneka mu kupapusha muli Lipoti wa Mwaka wa Mulimo uwa 1992 uwa Nte sha kwa Yehova mu Kusaalala kwa Calo, uusabankanishiwe pa mabula 12 ukufika ku 15 aya uyu magazini.

⁵ Icapulamo muli uyu lipoti cili cipimo cipya ica pa mulu ica bakabilisha ba Bufumu 4,472,787, ukwingilishako kwa 193,967—4.5 peresenti ukufula ukucila pa mwaka wapwile. Icipimo ca pa mulu ica 301,002 ababatishiwe mu kati ka 1992 na co cine cibelebesha icishinka ca kuti bacinkupiti balepokelela icine ca Baibolo. Fintu tusekelela pa kuti muli ubu “bushiku bwa mfifi, bwa mfifi iyatoola, . . . kwaisa abantu abengi, abakosa,” abo, ukupala ukusenya kwa makanta, baletanununa ubunte bwa Bufumu “ukufika ku mpela ya pano nse”! (Yoele 2:2, 25; Imilimo 1:8) Ukufuma ku Alaska ya menshi makasa—uko indeke ya Watch Tower Society yacita inyendo ukucila pali 50 ku fifulo fya kubombelamo ifya mfula yabuuta—ukufika ku fiswebebe fyapya ifya Mali na Burkina Faso ne fishi fyasalangana ifya Micronesia, ababomfi ba kwa Yehova balebalika ngo “lubuuto ku nko, ku kuleko kupususha [kwakwe] kube ukufika ku mpela ya pano isonde.”—Esaya 49:6.

6, 7. Kwaluka nshi ukushaenekelwe ukwa fya kuponako kwacitilweko ubunte mu myaka ya nomba line, kabili ni shani fintu ababomfi ba kwa Yehova baankulako kuli kwene?

⁶ Yehova aliba nge ca kushinamo kabili ulupungu lwakosa mu kucingilila no kukosha abantu bakwe. Mu mbali ishingi ishe sonde, Inte sha kwa Yehova shalikwata ukushipikisha amakumi ya myaka ya lumanimani lwa bunkalwe no kupakaswa. (Ilumbo 37:39, 40; 61:3, 4) Lelo mu nshita ya nomba line, kwati ni ku cipesha amano, ifibindo ne fipindami fyalifumishiwapo mu fyalo 21, ica kuti nomba abantu ba kwa Lesa kuti babilisha mu buntungwa ukuti Kabumba wesu Uwakulisha alimika Kristu nge Mfumu pe sonde.—Ilumbo 2:6-12.

⁷ Bushe abantu ba kwa Yehova balebomfya bwino ubuntungwa bwabo ubwasangwa ubupya? Moneni muli charti ukwingilishiwako ukwa Bulgaria, Romania, ne cali kale Soviet Union muli Europe ya ku Kabanga no kwa Angola, Benin, na Mozambique mu Africa. Mu Zaire, namo mwine, ukutanunuka kuli ukwa cinjelengwe. Mu kuba no buseko mu mitima yabo, bamunyinefwe balubulwa basuka ubwite ukuti: “Tooteleni Yehova, pantu musuma . . . , uucita eka ifipesha amano fikalamba; pantu [ca muyayaya icikuuku cakwe ica kutemwa, NW].” (Ilumbo 136:1, 4) Uku kutootela kulalumbululwa ku mulimo wapimpa mu kulonganika abantu bambi abapale mpaanga ku lubali lwa Bufumu.

8. Ni shani fintu bakalumba abapya aba kwa Yehova ‘bapupuka nge kumbi’ muli Europe ya ku Kabanga? mu Africa?

⁸ Mu kati ka lusuba lwa ku Europe ulwapita, amabungano ya bantu ba kwa Yehova ayacitilwe mu fyali kale ifyalo fya ciKomyunisti yalikwata abasangilweko aba kusungusha. Icacilapo kupapusha cili ni mpendwa sha balebatishiwa, muli filya fyalo. Mu musango umo wine, mu Togo, Africa, icibindo califumishiwepo pa December 10, 1991. Umweshi wakonkelepo, ibungano lya mu kati ka calo lyalicitilwe. Ukulinganishiwa na avareji ya pa mweshi iya bakasabankanya 6,443 mwi bala, abasangilwe pali ili bungano bafikile kuli 25,467, mu kuba na 556 ukubatishiwa—8.6 peresenti ya mpendwa ya bakasabankanya. Nga fintu Esaya 60:8 alangisha, bakalumba abapya aba kwa Yehova ‘besa balepupuka nge kumbi, nge nkunda ku miinshi ya shiko’ mu filonganino fya bantu ba kwa Yehova.

9. Kupayanya nshi kwacitwa pa kuti Abena Kristu mu fyalo fyalubulwa mu nshita ya nomba line ‘bengalya no kwikuta’?

⁹ Insala ya ca kulya ca ku mupashi muli Europe ya ku Kabanga na Africa na yo ine ilecefiwako. Amafakitari ya Watch Tower Society mu Germany, Italy, na South Africa yalituma ifimbayambaya fyalongwamo ifipe cimo pa numa ya cinankwe ifya fitabo, mu mpendwa ya ndimi, mu fyalo ifyacula ku nsala ya ku mupashi. Ku numa, abengi aba Nte baali no kupeeleshanya bamagazini basampauka, lelo nomba balepokelela ukupaka kwa ca kulya ca ku mupashi. Balasekelela ukwakana mu kufikilishiwa kwa busesemo bwa kuti: “Ukulya mukalalya no kwikuta, mukalatasha ne shina lya kwa Yehova Lesa wenu, uwamucitile fipesha amano.”—Yoele 2:26.

Ukusakamana ku Kutanunuka Kwalundwako

10. Mu cilolwa ca basangilwe ku kulongana abengi pa Cibukisho, bwite nshi bwatambikwa kuli bonse abalesekelela?

¹⁰ Ica kupapusha mu cine cine cili cipendo ca mu kusaalala kwa calo ica basangilwe ku Cibukisho ca mfwa ya kwa Yesu, 11,431,171, ukwingilishiwako kwa 781,013, nelyo 7.3 peresenti ukucila pa mwaka wapwile. Mwaiseni, imwe bonse mwe bapya! Fintu cingaba icawamisha nga ca kuti bonse abantu abapya abalesekelela aba musango yo baipakishe ubunonshi bwe sambililo lya Baibolo ilya pa ŋanda na umo uwa Nte sha kwa Yehova! (Moneni Esaya 48:17.) Lipoti wa Mwaka wa Mulimo alelanga 4,278,127 aya muli aya masambililo ukutungululwa umweshi umo umo, ukwingilishiwako kwawama ukwa 8.4 peresenti. Nangu cibe fyo, abengi na bambi kuti bapokelela uyu mulimo. Inte sha kwa Yehova bali aba buseko ukutandalila lyonse abalesekelela ku kutungulula isambililo lya Baibolo ilya pa fye mu ŋanda, muli ifyo ukwaafwa aba ukushikimika inkasa shabo mu kushangila pa nshila ya ku bumi bwa muyayaya. (Yohane 3:16, 36) Mulandu nshi te kulombela isambililo lya musango yo? Kabili ibukisha, ukusengela kwakaba kulakulolela lyonse pa Ŋanda ya Bufumu!—Ilumbo 122:1; Abena Roma 15:7.

11, 12. (a) Ni mpika nshi shilesangwa mu fyalo fimo? (b) Ni mu nshila nshi “ukulingana” kulebelako pa kati ka fyalo fyabesha ne cuma ne fyabesha ifipiina?

¹¹ Ifyo ifilonganino ifyakwata Amayanda ya Bufumu ayasuma fyalipaalwa mu kufumba. Imibele ili iyapusanako mu fyalo uko Inte sha bucishinka bashipikisha imyaka iingi pe samba lya cibindo, ukulongana mu bumfisolo mu tumabumba tunono. Mu fifulo fyafulilako ifya musango yo, bali nomba abantungwa lelo bakwete Amayanda ya Bufumu ayanono. Mu calo ca mu Africa, ku ca kumwenako, mu kuba ne filonganino 93, kwabako Amayanda ya Bufumu yatatu fye. E co ukulongana ilingi line kucitilwa pa ncende shikalamba ishabulamo akantu pa mpanga. Icilonganino ca bantu 150 kuti pambi cakwata 450 ukusangwa kuli uku kulongana lyonse.

¹² Muli Europe ya ku Kabanga ilingi line cilabe cayafya ukushite cikuulwa nelyo ukukuula, lelo ukulunduluka kumo kulecitwa. Ukupeelwa kwa cikuulwa cipya icishaiwamina ica musambo kwatantikwe pa November 28, 1992, mu Poland. Imisangulo ya bukapekape ku mulimo wa mu kusaalala kwa calo uwa Nte sha kwa Yehova ilebomfiwa ku kwaafwa ukukuula umwa kulonganina ne fikuulwa fimbi. Muli ifyo, “ukulingana” kulabako mu kuti bukapekape bwa bamunyina abasangwilako ukufuma ku kukwata kwabo ifya ku mubili “ukwingi” kulafwilisha mu kupayanishisha ukukabila kwa ku mupashi ukwa filonganino mu fyalo fyapusulwa.—2 Abena Korinti 8:13, 14.

Amaawala Amamilioni Ikana!

13. Maawala yanga yapooselwe mu kushimikila no kusambilisha mu 1992, kabili kubombesha kwa bani kulebelebeshiwa muli ici cipendo?

¹³ Cinshi wingacita na maawala amamilioni ikana? Bonse abafika ku bumi bwa muyayaya bakaba na maka ya kupoosa ayo maawala ayengi, kabili nelyo fye ukucilapo, mu mulimo wa kusandulula, uwa kwikusha kuli Yehova. Lelo elenganya ukupapikanya ayo maawala yafula mu mwaka umo! Ico e cintu abantu ba kwa Yehova bapwishishishe mu kati ka 1992. Ukusansha pamo amalipoti imo imo aya bakasabankanya ba Bufumu bonse, tusanga icipimo cipya ica pa mulu ica maawala 1,024,910,434 ayapooselwe mu nshila yawamisha intu amaawala yengapooselwamo—ukulumbanya Kabumba wesu Uwakulisha, ‘ukusambilisha pa bantu na ku ŋanda ne ŋanda.’ (Imilimo 20:20) Pali avareji, Inte 4,289,737 balecita lipoti umweshi umo umo. Besa ukufuma ku myendele yonse iya bumi. Bamo balaba abapelebela mu nshita bengasangwilako ku mulimo wa Bufumu. Aba basanshamo imitwe ya ndupwa, abafwile ukupayanishisha aba mu ŋanda; aba cikalamba; na bengi abakwata impika sha butuntulu bwa bumi; pamo pene na bana abacili pa sukulu. Nalyo line, lipoti iicitwa na umo umo ili kubelebesha kwakatamikwa ukwa kutemwa kwa kuli Yehova.—Linganyeniko Luka 21:2-4.

14. Ni shani fintu abacaice ‘baleibukisha Kalenga wabo’?

¹⁴ Inkulo ya bacaice ilekulilako mu mulimo wa kwa Yehova, kabili mu nsansa icinabwingi ca aba balebomfya amashiwi ya kwa Solomone pali Lukala Milandu 12:1 ukuti: “Ibukisha Kalenga obe mu nshiku sha bulumendo bobe.” Baleibomfya abene beka mu mulimo wabo uwa pa sukulu, pamo pene no kukanshiwa mu milandu ya ku mupashi ku bafyashi baipeelesha. Caliba buseko ukumona impendwa ikalamba iya bacaice abapungwe ukwiminina pa mabungano ya mu nshita ya nomba line, ukuitambika abene ku lubatisho. Cili na kabili ubuseko ukwishiba ukuti abengi, pa kusambilila ubutukushi bumo nelyo ukulamuka, balecita ukuipekanya kubomba ku kucita bupainiya lintu bapwisha isukulu. Muli ifyo, bakaba na maka ya kuyafwilisha abene beka, nge fyacitile umutumwa Paulo ukufuma ku nshita ne nshita pa kupanga amahema.—Imilimo 18:1-4.

15, 16. Ni shani fintu bapainiya na babomfi bambi aba nshita yonse basangwilako ku kulunduluka kwa mulimo wa Bufumu, kabili lipaalo nshi bamo aba bene baipakisha?

¹⁵ Mwandi kusangwilako kwakulisha bapainiya na babomfi ba nshita yonse bambi balecita ku kulunduluka kwa mulimo wa Bufumu! Imitande ya bapainiya yalingilishako ukufika ku cipimo ca pa mulu ica 931,521 uyu mwaka wapwile. Ilyo aba baleshimikila cila bushiku ukufuma ku ŋanda ne ŋanda no kutungulula amasambililo ya Baibolo mu mayanda ya bantu, balaba aba kufumamo cimo nga nshi mu kuilumbulwila abene pa Malembo. Ukulundako, abengi baliba abafikapo ku kusangwa kwi Sukulu lya Mulimo wa Bupainiya ilya milungu ibili, ilibaafwa ukukusha amaka yakulilako no buseko mu kucita umulimo wa kwa Lesa.

¹⁶ Umo umo uwa aba bapainiya ba busumino kuti asuminisha amashiwi ya pali Esaya 50:4 aya kuti: “Shikulu [Mulopwe, NW] Yehova apeela kuli ine ululimi lwa basambilila, ulwa kwishibo kukosesha ku cebo uwapomponteka.” Kuliko abantu umo umo abengi ilelo abali abatendwa ne calo cabola icabashinguluka lelo abalesanga ukupembesula ukupitila mu cebo cilandwa na bapainiya besu aba busumino.—Linganyeniko Amapinda 15:23; Esekiele 9:4.

Programu ya Maka iya Bukuule

17. Mu kulunda ku kukuula kwa ku mupashi, kukuula nshi ukwa ku mubili kwacitilwo bunte mu myaka ya nomba line?

¹⁷ Ulubanda lwa mu kusaalala kwa calo ulwa ku mupashi ulwa Nte sha kwa Yehova lwita na kabili pa kukula kwa ku mubili. Ukutanunuka kwa fibombelo fya kupulintilamo, amaofesi, na mayanda ya Bethel no bukuule bwa Mayanda ya Bufumu na Mayanda ya Kulongana kukalamba fiba ifyakabilwa. E co Inte sha kwa Yehova balafwaikwa ukuba bakakuula mu nshila ya ku mubili. Ukukuula kwapalako kwalicitike mu kasuba ka Mfumu Solomone. Solomone akuulile tempele ku kupepa kwa kwa Yehova umwabele “ca mikuulile . . . ico ali na co mu mutima,” Yehova pa kuba napayanya ici kuli wishi, Imfumu Davidi. (1 Imilandu 28:11, 12) Muli ifyo, Solomone takoseshe fye bakakutika bakwe na mashiwi yashingapimwa no mutengo aya mano lelo na kabili atungulwile ukukuula kwa ku mubili ukushaiwamina ukushatalile akufikwapo ne calo ca fya ku mubili.—1 Ishamfumu 6:1; 9:15, 17-19.

18, 19. (a) Milimo nshi iya kukuula ileya ku ntanshi lubilo lubilo iilecitwa no kuteyanya kwa kwa Yehova? (b) Ni shani fintu umupashi wa kwa Yehova wamoneka mu kukuula kwa ku mubili pamo pene no kwa ku mupashi?

¹⁸ Ilelo, Inte sha kwa Yehova tabakuula umwabela ifya mikuulile fyapuutwamo muli bulesa, lelo balikwata umupashi wa kwa Lesa. Nga fintu cali mu nshiku sha kwa Israele, ici cilabakunta ku kukuula mu nshila iyo iisungusha abantu ba mu calo. (Sekaria 4:6) Inshita naipipa. Amayanda ya Bufumu ne fikuulwa fimbi filekabilwa ukwabulo kushingashinga. Mu fyalo fimo Amayanda ya Bufumu ayakuulwa bwangu yali ayaseeka. Mu myaka yapitapo ikumi, ku ca kumwenako, Canada yacita lipoti ukukuula umwa kulonganina 306, cimo cimo mu nshiku ukucepako pali shibili. Pa mulandu wa kutanunuka kwa lubilo lubilo ukwa mulimo wa kwa Yehova mu kusaalala kwa calo, ubwingi bonse ubwa fikuulwa fipya ifya misambo 43 nelyo ukutanununwa kwa misambo filekuulwa pali ino nshita nelyo fyalitantikwa. Ukulundapo, icikuulwa ca ntunti 30 ica kwikalamo, mu kuba ne miputule ya kusendamamo aba kuitemenwa aba pa Bethel mupepi ne kana limo, cilepalamina ukupwishishiwa mu Brooklyn. Na kabili mu New York State, pa Patterson, ubukuule bwa cifulo ca masomo ya Baibolo, umulimo wa bukuule uwakulisha uyo Watch Tower Society yabala aibombapo, buleya ku ntanshi ukutangilila nga nshi imitantikile.

¹⁹ Iyi milimo ya makuule ilelunduluka mu kuba no kufumamo cimo ne mibele isuma iya mulimo uusungusha amakampani ya bukuule ayaishiba aya mu calo. Mulandu nshi? Pa mulandu wa kusangwilako kwakulisha ukucitwa ne nte shaipeela isha kwa Yehova. Umupashi wakwe ulabasesha te ku kupayanya fye ukwafwilisha kwa fisolobelo lelo na kabili ukupeela no mutima onse inshita yabo no lupikwe. Ififulo fya bukuule fimaŋanyamo na bakabomba bakanshiwa bwino, abaipeelesha. Takwabako amastraka ya bakabomba, kabili takwaba kwelepeta pa ncito. Umupashi wa kwa Yehova ulapayanya ukukunta, pamo fye nga fintu wakuntile bakakuula be hema mu nshita ya kwa Mose na abo abakuulile itempele mu nshiku sha kwa Solomone. Bumupashi e mibele yapulamo iifwaikwa kuli aba bakabomba.—Linganyeniko Ukufuma 35:30-35; 36:1-3; 39:42, 43; 1 Ishamfumu 6:11-14.

20. (a) Kufika ku cipimo nshi imbila nsuma ikatwalilila ukushimikilwa? (b) Cilolelo nshi icapaalwa cilolela abantu ba kwa Yehova?

²⁰ Solomone alitwalilile programu yakwe iya kukuula pa numa ya kupwishe tempele. (2 Imilandu 8:1-6) Ku cipimo uko ubunte bwa kasuba ka lelo bukatwalilila ukutanunuka—mu kuba no kukabila kwalingana ukwa bukuule bwa mwa kulonganina ne fibombelo fimbi—tatwaishiba. Twalishiba, nangu cibe fyo, ukuti lintu iyi mbila nsuma iya Bufumu ibe naishimikilwa ukufika ku cipimo cintu Yehova akambisha, lyene impela, “ubucushi bukalamba,” ikesa. (Mateo 24:14, 21) Mwi sonde ilishili lyaonaulwa na kabili ku bantu bafunuka, ukutantika kwa kwa Yehova ukwa “myulu ipya ne calo cipya” kukaleta lyene amapaalo yashingalandwa ku mutundu wa muntu. Shi kanshi ‘natusekelele no kwanga pe pe pali ico Lesa alelenga,’ ukupeela ilumbo lyonse kuli Kabumba wesu Uwakulisha!—Esaya 65:17-19, 21, 25.

[Futunoti]

Bushe Kuti Walondolola?

◻ Milandu nshi twakwata iya kusekelela muli Kabumba wesu Uwakulisha?

◻ Kwingilishiwako nshi kwacitilwe lipoti mu kati ka mwaka wa mulimo uwa 1992?

◻ Mu fyalo umo ukucitilo bunte kwabindilwe ku numa, mapaalo nshi ayafumba yacitwa lipoti?

◻ Ni shani fintu imisepela na bapainiya basangwilako ku kwingilishiwako mu kuteyanya kwa kwa Yehova?

◻ Ni shani fintu abantu ba kwa Yehova bali abapamfiwa mu milimo ya kukuula kwa ku mubili pamo pene no kwa ku mupashi?

[Akabokoshi pe bula 17]

Umwaka wapwile ukucila pa maawala amamilioni ikana yalipooselwe mu mulimo wa kushimikila no kusambilisha

[Charti pe bula 12-15]

LIPOTI WA MWAKA WA MULIMO UWA 1992 UWA NTE SHA KWA YEHOVA UWA MU KUSAALALA KWA CALO

(Moneni muli magazini)

[Icikope pe bula 10]

Imyanda ya makana aba lubatisho umwaka wapwile balangilila ipaalo lya kwa Yehova pa mulimo wa kushimikila no kusambilisha

[Icikope pe bula 16]

Impendwa shikalamba isha bacaice ‘baleibukisha Kalenga wabo’