Icikakilo ca Cupo Icilenenuka

NYINA wacaice afukatile akanya kakwe aka myeshi ya bukulu ibili. Lyene, mu kulaluka kwa kupumikisha, akaponeshe pa nshi. Kakalume kalifwile amaawala yanono pa numa. “Namuponeshe ku mumbo,” e fyasosele nyina, “pantu umulume wandi tasakamana ulupwa lwakwe.” Mu cifulo ca kukalulushanya no mulume wakwe, afumishe ubukali bwakwe pa kanya ka kaele.

Banono banyina abalukila ku ncitilo ya musango yo iyacishamo, lelo abengi balikwata ukuyumfwa ngo kwakwe. Cileba icakoselako ku baupana babili ukulenga icupo cabo ukutunguluka. “Lintu ukucitikako kwa kutunguluka kwa cupo kuli ukwacepesha nga fintu kwaba mu United States ilelo,” e fisosa Journal of Marriage and the Family, “ukucita ukukakililwako kwakosa ku cupo, ukwakumanina . . . kwaliba ukwa busanso nga nshi ica kuti takuli umuntu uupelulula umupwilapo uwingacicita.”

Muli ishi nshita shalulunkana, bucisenene, ukukanalinga, imisha, ukupusana na bena buko, na kaso fyonse filuminisha ukukansana kwa mu ŋanda, uko ilingi line nga nshi kusumbanina mu kulekana. Imibele ili iyakakala icibi mu Japan ica kuti nelyo fye liCalici lya Katolika, ilyalumbuka ku kwiminina kwa liko ukwakosa ukulwisha ukulekana, lyali no kwimika komiti waibela ku kunashako imilandu ku filundwa fyalekana no kuupa nelyo ukuupwa cipya cipya. Impendwa ileingilishiwako iya baya ku calici ileambukilwa ku mpika shaampana no kulekana.

Nangu cibe fyo, impendwa ya kulekana isokolola ulubali fye lunono ulwa mpika. Ukusapika mu United States kulangisha ukuti imibele ya bumi bwa mu cupo iilebotelela e ilenga ukwingilishiwako mu kulekana, ukucila ukukongama fye kwa kwangalila pamo uko kulenga ukulekana ukuba ukwayanguka. Mu kuba no kubombesha kunono no kukakililwako kunono, ubumi bwa mu cupo bulalufya ukucebusha kwa buko. Abengi ukumoneka kwena bamoneka nga baupana, lelo tabasendama pamo, kabili tabalanshanya nangu panono. Bamo bayumfwa nge fyayumfwile umwanakashi umwina Kabanga uwashitile inshishi yakwe umwine iyapaatukako, no kusoso kuti, ‘Nakaana ukuba no mulume wandi mu nshishi imo.’ Pa kukanaba na maka ya kulekana no mulume wakwe pano nomba, aiminina pa kulekana kwa pa numa ya mfwa. Mu bulanda, nangu ca kuti abantu ba musango yo tabalekana, ubumi bwa mu cupo tabwaba ni ntulo ya nsansa kuli bene.

Ifyo e fyo cali kuli Isao. Aupile umukashi wakwe mu kususwa, e co tayumfwile uwakuntwa ukwalula inshila yakwe iya bumi iya matutumuko. Nangu cingati alefola indalama ishalinga nga kensha wa fimbayambaya, aposaike amalipilo yakwe yonse pa kulya no kunwa, ukukanasakamana ulupwa lwakwe. Nge ca kufumamo, ukuumana no mukashi wakwe takwalepwa. “Ilyo lyonse ifintu fyambipile,” e fibukisha Isao, “nali no kuya ku ŋanda no kufumisha ubukali bwandi pa lupwa lwandi.” Ukupala ulupili lupuuka ulushingatalala, ukulanda pa kulekana kwaleimako cila bushiku.

Abaume abengi na banakashi baleshipikisha mu fyupo fyabipa. Nampo nga balekana nelyo iyo, tabalesanga insansa. Bushe kwalibako inshila ya kutungulukilamo mu cupo cabo? Cinshi cingacitwa ku kukosha icikakilo cabo ica cupo?